Yaheiya 1

Kielien Giezhi Urusan Ersa Mexiha Duyade Irezho

1Zui melieshida Kielien wine. Ene Kielien Hudaghala hhantu wo. Ene Kielienshi Huda wo. 2Hhe zui melieshida Hudaghala hhantu wo. 3Duya jiereshikulai man hhe zhayaghawo. Hhe uye zhayaghasei nieda uwo. 4Hhei sudoro amin wine. Ene aminshi kunlai gon wo. 5Gon kharanide zhouise kharani gonni gieru dane. 6Yaheiya giezhi nie kunyi Hudai hhense peizhi ireghawo. 7Hhei peizhi ireghase hhe gonde ganzhen beizhi kunlai man xianxin gieghane giezho. 8Ene kunshi gon pusho, gonde ganzhen beile irezho. 9Kunlai giegheraghaku zhenzhenji hhe gon duyade irezho.

10Hhe duyade wo, hhei tungo giezhi duyai zhayaghawoma, duya hhei tani dane. 11Hhe goya orondene irese goyai kunla hhei ese jienliewoma, 12jien hhei jienliezhi niereini xianxin giesan kunlade Hudai kewosi danlaku qienli ogiwo. 13Ene kesilashi kun jierese iresan pusho. Kunni duranghala jihua giedene olusanye pusho, Hudase iresan wo.

14Ene Kielien kun gholudene mai dunda souzho. Matan hhei famani uzhese zhen Adani niekozi Kewonni famani wo. Hhei sudoro nenjien, zhendao olon wo.

15 Yaheiya hhende ganzhen beizhi fugiede kieliewo, "Eneshi hhe mase khuina irenema, mase hen wo. Hhe zui melieshidasejiu wine giezhi bi kieliezhi daosan hhe wo." 16Matan man hhei fugie nenjien jierese nenjien olon jienliezho. 17Guijinshi Musase irezho. Nenjien, zhennishi Ersa Mexihase irezho. 18Kiemada Hudai chujieghezhi ese daozhoma, Hudai zhughe jieredu niekozi kewon Hudai mejieghawo. Hhe benshenshi Huda wo.

Yaheiyani Ganzhen

(Mat 3:1-12; Mak 1:1-8; Luj 3:1-18)

19 Yelusalense Yutai kunla buwa, Liwi kunlai peizhi Yaheiyashi kien bikuni asaghale echise Yaheiya ingiezhi ganzhen beizho. 20Hhe ghudan ese kieliezhi zhijie kieliewo, "Bishi Mexiha pusho." 21Hhela pse asawo, "Qinse chishi kien wo? Iliya onu?" "Pusho." "Qinse chishi hhe nie xienzhi onu?" "Pusho." 22Ingiese hhela kieliewo, "Chi daojishi kien wo? Bijien khareizhi echise peizhi ireghasan kunlade jiodai giene. Chi goyane nie kielie. Chishi kien wo?" 23Hhe kieliewo, "Bishi Isaiya xienzhi kieliesan mutun

Ezhanni moni zhidagha

giezhi hontande waradasan hhe shenqi wo."

24Hhelashi Falisai kun peizhi ireghasan wo. 25Ingiese asazho, "Chi Mexiha pusho, Iliya pusho, hhe nie xienzhiye pusho. Chi yangiezhi kunlade xili gieghazho?" 26Yaheiya kieliewo, "Bi usughala xili gieghazhoma, ta tani dasan daniezhan tai dunda beizho. 27Hhe mase khuina irenema, bi hhende mahei deizi andaghaseye pei dane." 28Ene shiqinlashi Yedanheni hhemandedu Bodanide fashen giesan wo, zhen Yaheiya xili gieghasan oron wo.

Hudai Ghoni Ghughan

29Khuichuduni Ersa hhelai hhende iresei Yaheiya chanladene kieliewo, "Uzhe, duyai kunlai zuini widaghaku Hudai ghoni ghughan wo! 30Eneshi hhe mase khuina irenema, mase hen wo. Hhe zui melieshidasejiu wine giezhi bi kieliezhi daosan hhe wo. 31Bi melieshidase hheni tani dane. Bi ede usughala xili gieghase hhei Isilie kunlade mejieghane giezho."

32 Yaheiya pse ganzhen beizhi kieliewo, "Bi melieshi chanlase Shenlin ghoghochen mutun asiman jierese bouzhezhi hhei jiere luiwo. 33Bi melieshise hhei tani dane. Mii peizhi usughala xili gieghasan Huda made kieliewo, 'Shenlin kienyi jiere bouzhesei chi chanlase hhe Shenlinghala xili gieghane.' 34Enei bi chanlawo. Eneshi Hudai kewon enbene giezhi bi ganzhen beine."

Zui Melieshidaku Tujila

35Khuichuduni Yaheiya ghua tujilaghalane hhantu hhende beizho. 36Yaheiya Ersai yosei chanladene kieliewo, "Uzhe, Hudai ghoni ghughan wo." 37Ghua tujilani ene kielienyi sonosudene Ersai daghawo. 38Ersa ochirasenu hhela daghasei chanladene asawo, "Ta yan kerene?" Hhela kieliewo, "Labi, chi khala souzho?" Labishi loushii isi wo. 39Ersa kieliewo, "Ta uzhele irendu." Hhela daghazhi echidene sousan oronyini uzhewo. Hhe xienzide chabudu xiawu 4 jien oluzho. Hhe udu hhela Ersare hhantu souwo.

40 Yaheiyai kielienyi chenliedene Ersai daghasan ghua kun dundadu nieshi Ximun-Bedurui jiuni Andelie wo. 41Hhe xien Ximun gaine ereizhi oludene kieliewo, "Bijien Mexihai penjiwo!" Mexihai fanyi giese Jidu wo.

42Ingiedene hhe Ximunni uduruzhi Ersai shida echiwo. Ersa hhei uzhedene kieliewo, "Chishi Yaheiyai kewon Ximun wo. Ede chii Jifa giezhi urune." Jifai fanyi giese Beduru wo.#1:42 tashi

Feili Nadanyeghalai Ereizhi Tuji Danlaghazho

43Khuichuduni Ersa jiejin giezhi Jialilide echine giezho. Ingiekude Feilii penjidene hhende kieliewo, "Chi mii dagha." 44Feilishi Bosaida kun wo. Andelie, Beduru enelashi nie oronnughun wo.

45 Feili Nadanyei ereizhi oludene kieliewo, "Musai guijin jiere huaisan, xienzhila jilasan hhe kunyi bijien chanlawo. Hheshi Nasale kun, Yusufui kewon Ersa wo."

46Ingie Nadanye kieliewo, "Nasalese pse yama khizheneba." Feili kieliewo, "Chi iredene uzhe."

47 Ersa Nadanye shidani iresei chanladene kieliewo, "Uzhe, eneshi nie zhenzhenji Isilie kun wo. Hhei zhughede yama huaini uwo."

48 Nadanye asawo, "Chi mii matugie taniwo?" Ersa kieliewo, "Feili chii da ese urukude chi uhuago mutun doura bikui bi chanlawo." 49Nadanye kieliewo, "Loushi, chishi Hudai Kewon, Isilie kunni honshan wo."

50 Ersa kieliewo, "Bi chii uhuago mutun doura bikui chanlawo giezhi kieliese chi mii xianxin giewu? Chi enense da fugie shiqin uzhene." 51Pse hhelade kieliewo, "Bi shuhuajia tande kielieye, asiman keizhi Hudai qienxienla Kunnikewonyi jiere bouzhi khikui ta chanlane."

Currently Selected:

Yaheiya 1: sce

Highlight

Copy