Matai 13

Fure Shizhikuni Bilazho

(Mak 4:1-9; Luj 8:4-8)

1Yen hhe udude Ersa giederase khizhedene haibienzide souwo. 2Tebieji olon kunla hhei shida irezhi hhantulase hhe chon jiere khirei souwo. Kunla man haibienzide beizho. 3Ersa kunlade bilazhi olon kieliewo, "Nie kun shizhile echiwo. 4Shizhikudeni niezhanla mo jiere luise bunzhula ire ijie agiwo. 5Niezhanla tura olon witu tashitu oronde luise tura ninkienshi niazi faizhi ghujin woma, 6genzi uwoshi naran khizhe nie xiese ghowo. 7Pse niezhanla eghesun dunda luise eghesun khizhezhi hhei jigheidawo. 8Da niezhanla gou ghazhade luise 100 pei, 60 pei, 30 pei zhonjia souwo. 9Chighin bitu kunla chenliendu!"

Bilaku Muji

(Mak 4:10-12; Luj 8:9-10)

10Tujilani Ersai shida ire asawo, "Kunlade yale bilazhi kieliene?" 11Ersa hhelade kieliewo, "Hudai gojiai mimii zinie tande mejieghawoma, hhelade ese mejieghawo. 12Bichen kunde pse olon ogizhi feilieghane. Wichen kunse bisanlainiye agi echine. 13Bi hhelade bilazhi kieliekushi hhela uzhese qinchu olu dane, chenliese sonosu dazhi minbai olu dane. 14Isaiya melie kieliesan kielien mutun hhelai jiere shuhua gholuwo,

'Ta izhi chenliezhoma, dunjire dane.

Ta izhi uzhezhoma, minbai olu dane.

15Ene bexinlai zhughe khiduzhezhi

chighin beidazhi

nudunne hameizho.

Pse nudunni chanlazhi

chighinni sonosuzhi

zhughedeni minbai oludene kharei daorese

Bi hhelai goudaghakuse ayizho.'

16Ingieliuzhe tande fuqi wine. Tai nudunde chanlazhi chighinde sonosuzho. 17Bi tande shuhua kielieye, olon xienzhi, gou kunla ta uzhesei uzhene giezhoma, uzhe dazho. Ta chenliesei chenliene giezhoma, chenlie dazho."

Bilasanni Mejieghazho

(Mak 4:13-20; Luj 8:11-15)

18"Ingiese ta ene fure shizhisan kunni bilasei chenlie. 19Kienliuzhe asiman gojiani kielienyi chenliedene dunjire dase Ibilisi iredene zhughedeni shizhisei agi echine. Eneshi mo jiere luisan fure wo. 20Tashitu oronde luisanshi kielienyi chenliedene bayasuzhi deigo jienliewoma, 21zhughedeni genzi wise niechaku wo. Kielienyi yenyinghala zeinan onu heiku kuzhese deigo furawo. 22Eghesun dunda luisanshi kielienyi chenliewoma, duyai munan gieku, baer miise kielienyi jigheidazhi yama sou dawo. 23Gou ghazhade luisanshi kielienyi chenliezhi dunjiresan kun wo. 100 pei, 60 pei, 30 pei zhonjia souwo."

Yemeini Bilazho

24 Ersa hhelade pse bilazhi kieliewo, "Asiman gojia hoxian kun ghazhadene boudei fure shizhisei xianli. 25Ashighala hhunturakude duitouni iredene yemeini boudei dundani shizhi yolawo. 26Boudei osizhi qiorun khise yemeiye khizhewo. 27Hojilani iredene ezhandene kieliewo, 'Ezhan, chi boudei fureni ghazhade ese tareiwu? Khalase iresan yemei wo?' 28Ezhan hhelade kieliewo, 'Eneshi duitou giesan wo.' Hojilani kieliewo, 'Bijien echidene xi agimu?' 29Ezhanni kieliewo, 'Bu echi, yemeini xise boudeiniye xi khizhene. 30Ghuala hhantu osi gie. Sagheizhi xiku shihoude bi ghurachen kunlade kielieye, "Xien yemeii xisenu chouladene khan tei. Boudeini yanchidene cankude ghura." giezhi.'"

Caizi Fureji Kuniegheni Bilazho

(Mak 4:30-32; Luj 13:18-21)

31 Ersa hhelade pse bilazhi kieliewo, "Asiman gojia nie caizi furei xianli. Kun agizhi echi ghazhadene tareiwo. 32Eneshi fure dundase zui gani woma, osizhi khizhese yan caiseliuzhe fugie wo. Mutun gholudene bunzhula chala jiereni holiene."

33Pse hhelade bilazhi kieliewo, "Asiman gojia hoxian kuniegheni xianli. Nie bierei agizhi echidene nie deizi ghurunde teizhi man faighawo."

Bilasanni Muji

(Mak 4:33-34)

34Enelashi man Ersa olon kunlade bilazhi kieliesan wo. Bilazhi ulie kieliese hhelade ulie kieliene. 35Ingiekushi Ezhan xienzhini tungo giezhi kieliesan kielien mutun gholughane giezho,

"Bi bilazhi kielieye.

Duyai zhayaghasanse niuighasan shiqinlai kieliezhi khizheghaye."

Yemeini Bilasei Mejieghazho

36Ingiedene Ersa kunlase likai gie giedera orowo. Tujila shidani ire kieliewo, "Ghazha jieredu yemeini bilasei bijiende mejiegha." 37Hhe kieliewo, "Boudei furei shizhisanshi Kunnikewon wo. 38Ghazhashi duya wo. Boudei fureshi asiman gojiai kunla wo. Yemeishi hhe doghunnii kunla wo. 39Yemei shizhisan duitoushi Ibilisi wo. Ghuraku shihoushi duya baraku shihou wo. Ghurachenshi qienxienla wo. 40Yemeini xi agidene khande sideraghaku mutun duya barakudeye ingiene. 41Kunnikewon qienxienlane peizhi zui fanjighasanlai, uhunni giesanlai man asiman gojiasene zhiizhi khizhedene 42fugie khantu nokiende benda oroghase hhende shidunne zhouzhi wilane. 43Ingiekude gou kunla adane gojiade naran nudun mutun gieran faine. Chighin bitu kunla chenliendu!"

Boubeini Bilazho

44"Asiman gojia hoxian ghazhade niuighasan boubeini xianli. Nie kun hhei chanladene niuighawo. Bayasuzhi echidene goyane dunxilai man huisenu ene ghazhai agiwo."

Manoui Bilazho

45"Pse asiman gojia hoxian nie meimei kun zhiguitu manou ereisei xianli. 46Nie fugie jiagetu manoui penjise echidene goya dunxilane man huisenu ene manoui agiwo."

Zhaghasun Bareiku Onni Bilazho

47"Pse asiman gojia hoxian haide xiaisan onni xianli. Yanyanji zhaghasunlai bareizhi 48on duruse usu bienzide laizhi khizhedene sousenu gounilai sunghuzhi tunzide teine. Bixinnilai bendane. 49Duya barakudeye ingiene. Qienxienla irese doghun kunni gou kun dundase sunghu khizhedene 50fugie khantu nokiende bendase hhende shidunne zhouzhi wilane."

Shini Khuichen Dunxi

51 Ersa kieliewo, "Enezighan kielienyi ta man dunjirewoye?" Hhela huida giewo, "Bijien dunjirewo." 52Ersa kieliewo, "Jien asiman gojiade tuji danlasan jinwun hanjiala hoxian gieni zhanguijii xianli. Hhe kufansene shini, khuichen dunxilai agi khizhene."

Ersai Nasalede Ese Jienliezho

(Mak 6:1-6; Luj 4:16-30)

53 Ersa enezighan bilasei kielie baraghadene hhense likai giewo. 54Ingiedene hhe goya orondene irezhi hhelai huitande kunlade sughase hhela man ghanirazhi kieliewo, "Ene kunde imutu agheli, fugie shiqin khalase irezho? 55Eneshi mujianyi kewon pushonu? Hhei ananishi Mereiyen pushonu? Gaijiulanishi Yagebu, Yusufu, Ximun, Yuda pushonu? 56Hhei oqinjiulani mai enende uwonu? Ene kunde khalase iresan benshi wo?" 57Hhela Ersade hokuzho. Ingiese Ersa hhelade kieliewo, "Xienzhini goyai oron, goyai giese chugo khalaliuzhe zunjine." 58Hhela Ersai xianxin ese giese Ersa hhende famatu shiqin olon ese giezho.

Currently Selected:

Matai 13: sce

Highlight

Copy