Matai 15

Zhughede Ganjinraghaku

(Mak 7:1-13)

1Ingiekude Falisai kun, jinwun hanjiala Yelusalense Ersai hhende ire asawo, 2"Chii tujila yangiezhi xienrenla sughasan xigonni ulie zunjine? Hhela ijiekude khane ulie wagha ijiezho." 3Ersa hhelade kieliewo, "Ta yangiezhi goya xigonghalane Hudai minlinni ulie zunjine? 4Huda, 'Ada anane zunji', 'Ada anane sugiesan kunni ala.' giezhi kieliezho. 5Ingieliuzhe ta kieliene, 'Kien ada anadene bi tande ogi shidakui Hudade ogiwo.' giezhi kieliese 6hhe kun adane ulie zunjise olune giezho. Ingiezhi ta goya xigonghalane Hudai kielienyi widaghazho. 7Jiazhon giesan kunlaya, Isaiya tai zhiizhi melieshida kieliesan ese codazho. Hhe kieliezho,

8'Ene bexinla amanghalane mii zunjine.

Zhugheni mase gholo wo.

9Hhela kunni guijinyi zhenzhenji daoli mutun kunlade sughazho.

Ingiese mii beiise yama oronde uwo.'"

10 Ersa kunlai uruzhi ire hhelade kieliewo, "Ta chenliezhi minbai olu, 11amanse orosan kunyi ulie zannanshighanema, amanse khizhesan kunyi zannanshighane." 12Ingie tujila hhei melie ire kieliewo, "Falisai kun ene kielienyi chenliese hokusanni chi mejielie?" 13Ersa kieliewo, "Asiman jieredu adami zeilasan pushoshi man xi khizhene. 14Hhelai bu gonji. Hhelashi sughoi uduruchen sugho wo. Sugho sughone uduruse ghuala nokiende anda boune."

15 Beduru Ersade kieliewo, "Ene bilazhi kieliesei bijiende kieliezhi minbai olugha." 16Ersa kieliewo, "Ta dou minbai olu dawu? 17Amande orosan kielighun mekiende echisei ta ulie mejienu? 18Amanse khizhesanshi zhughese khizhesanwo. Ene caigie kunni zannanshighane. 19Zhughese khizhesanshi doghunde sumulaku, alaku, piofen gieku, lon kijieku, ghulaku, jia ganzhen beiku, sugieku wo. 20Enela man kunni zannanshighane. Khane ulie wagha ijiese kunni ulie zannanshighane."

Nie Niman Kunni Biereini Xianxin Gieku

(Mak 7:24-30)

21 Ersa hhense likai giedene Tuilo, Xidunni oronde echiwo. 22Nie niman kunyi#15:22 Jianan kun bierei hhe oronse khizhedene waradazhi kieliewo, "Ezhan, Dawudeni houdei, made ubali nie xii! Mii oqinyi sheitan heisan hen wo." 23Ingieliuzhe Ersa yama huida ese giezho. Tujilani melie ire xiahua giezhi kieliewo, "Hhei khareighaba. Ene bierei mai khuinase waradazho." 24Ersa kieliewo, "Mii peizhi zinie Isilieni kunlai dundadu miisan ghonilade oluzhi ireghazho." 25Hhe bierei ire Ersai beiizhi kieliewo, "Ezhan, made banman nie gie!" 26Ersa kieliewo, "Kesilai ginanyi ga nogheide bendazhi ogise ese oluzho." 27Hhe bierei kieliewo, "Ezhan, oluzhoma, nogheiye ezhanne shire doura bousan zhazhai ijiene." 28Ingiese Ersa kieliewo, "Funi, chii xianxin gieku fugie wo. Chi keresan mutun chade gholu gie." Hhe shihoude oqinni goudawo.

Olon Gientulai Goudaghazho

29 Ersa hhense likai giezhi Jialilihai bienzide iredene ulade khirei souwo. 30Tebieji olon kunla hhei hhende iredene dogholon, sugho, sanfei, yaba, pse olon gientulai hhei konshida jiese hhe goudaghawo. 31Yaba kielien kielie, sanfei gouda, dogholon yo, sugho chanlasei olon kunla uzhedene ghanirazhi Isilieni Hudai kuaiwo.

4000 Kunde Chudughazho

(Mak 8:1-10)

32 Ersa tujilane uruzhi ire kieliewo, "Ene kunla mare hhantu ghurudu oluzho, hhelade ijiekui widazho. Bi hhelade ubali xiizho. Bi hhelai oliesuzhi echighaku duran uwo. Mo jiere echise injirekuse ayizho." 33Tujila hhende kieliewo, "Ene hontande imeghei kunlade ijie chudughaku ginan bijiende khalase irene?" 34Ersa hhelade kieliewo, "Tande ginan giedughon wo?" Hhela kieliewo, "Dolon wo, pse giedun ga zhaghasun wo." 35Ersa olon kunlai fenfulazhi zemin jiere soughadene 36dolon ginan, giedun zhaghasunyi barei mafan kieliedene ghulu tujilade ogise tujila olon kunlade ogiwo. 37Dajiala man ijiezhi chududene feiliesan zhazhai dolon lanzi zhonlowo. 38Ijiesan kun dunda bierei kewosilai ulie sanase 4000 ere kun wo. 39Ersa kunlai sandaghadene chon jiere khirei Majiadan oronde echiwo.

Currently Selected:

Matai 15: sce

Highlight

Copy