Matai 21

Honshan Mutun Yelusalende Orozho

(Mak 11:1-11; Luj 19:28-40; Yah 12:12-19)

1Hhela Yelusalense chadashizhi Ganlanshanni Bofaqide irekude Ersa ghua tujine peizhi 2hhelade kieliewo, "Ta duimienni aghinde echi. Hhende nie huiyasan enzheghei deigo chanlane, shidai da nie unaghan wo. Ta andaghadene mii shida lai ire. 3Kunla tande asase, 'Ezhan hhelai injine.' giezhi kieliema, hhe kun deigo laighane."

4Ene shiqin fashen giekushi Ezhan xienzhini tungo giezhi kieliesan kielien mutun gholughane giezho,

5"Xiwunni#21:5 Yelusalen kunlade kielie.

Uzhe, tai honshan tai hhende irewo.

Hhe goyane meilade uzhezhi enzheghe unuzho.

Unusanshi ga enzheghe wo."

6Tujila echidene Ersa fenfulasan mutun giewo. 7Hhela enzheghe, ga enzheghei lai ire goya jienlane enzheghe jiere daidene Ersai unughawo. 8Olon kunla jienlane mo jiere peizho. Psedu kunla mutun chalai chizhidene mo jiere peizho. 9Melie khuinadu olon kunla waradazhi kieliezho,

"Hesanna! Dawudeni houdeii doulandu!#21:9 Bijienyi jiui!

Ezhanni niereghala iresan hhei doulandu!

Zui undudedu Hudai doulandu!"

10 Ersa Yelusalende orose kunla man hunnerei daghazhi eneshi kien wo giezho. 11Olon kunla kieliezho, "Eneshi Jialiliyi Nasaleni xienzhi Ersa wo."

Mechini Arughazho

(Mak 11:15-19; Luj 19:45-48; Yah 2:13-22)

12 Ersa mechide orodene meimei giesan kunlai man tou khighawo. Baer arunzhasan kunlai shire, ghoghochen huisan kunlai bandoulai tungu unaghawo. 13Hhelade kieliewo,

"Mii giei onxian gieku gie giezhi urune giezhi jinwun jiere huaizho.

Ta ghughei ho gholughazho!"

14Mechi sudoro sugho, dogholonla Ersai shida irese hhelai goudaghawo. 15Fugie buwa, jinwun hanjiala Ersa ghaniraku shiqin giesei chanladene pse kesila mechi doura Hesanna! Dawudeni houdeii doulandu giezhi onghonosei sonosudene hende hokuzhi 16Ersade asawo, "Enezighan kesila kieliesei chi sonosuwoye?" Ersa kieliewo, "Sonosuwo. Jinwun jiere chi yeliwa, ga kesilai amanghala goyane doulaghawo giesei ta onshizhi ese daowu?" 17Ingie hhelase likai giezhi chenshise khidene Bodanide echi nie xii souwo.

Uhuago Mutunni Kharazho

(Mak 11:12-14, 20-24)

18 Ersa eqiemagha chenshide khareikude oliesuzho. 19Mo bienzide nie uhuago mutunyi chanlawo. Shidani echi nie uzhese mutun jiere lachen wine, alima uwo. Ersa mutunde, "Enedu khuinase chii jiere ibeizi alima ulie soune." giezhi kieliese uhuago mutun deigo gho fuguwo. 20Tujila uzhedene ghudurezhi, "Uhuago mutun matugie deigo gho fuguwo." giezhi kieliezho. 21Ersa kieliewo, "Bi tande shuhua kielieye, tande xianxin gieku bizhi inxin ulie giese bi uhuago mutun jiere giesei taye gie shidane, da ene ulade oronsene noidene haide bou giezhi kieliese boune. 22Ta xianxin giedene xiahua giezhi onxian giese man ogine."

Ersani Qienlini Asazho

(Mak 11:27-33; Luj 20:1-8)

23 Ersa mechide orodene kunlade sughakude fugie buwa, bexinlai zhanlaola hhei shida ire kieliezho, "Chi yan qienlighala ene shiqinlai giezho? Kien chade ene qienlii ogizho?" 24Ersa hhelade kieliewo, "Biye tande nie unqi asaye. Ta made kieliese biye yan qienlighala ene shiqinlai giesei tande kieliene. 25Yaheiyai xili gieghaku qienli khalase irezho? Asimanse onu, kunlase wo?" Hhela goyalane shanlian giezhi kieliewo, "Matan asimanse wo giese, 'Ta yale hhei xianxin ulie giene.' giezhi hhe matande kieliene. 26Kunlase wo giese matan bexinlase ayizho, hhela man Yaheiyashi xienzhi wo giezho." 27Ingie Ersade kieliewo, "Bijien ulie mejiene." Ersa hhelade kieliewo, "Biye tande yan qienlighala ene shiqinlai giesei ulie kieliene."

Ghua Kewonni Bilazho

28"Ta nie sumula bi ede bilaku matugiezho? Nie kunde ghua kewon wo. Hhe fugie kewondene kieliezho, 'Mii kewon, chi enedu putou yenzide wilie giele echi.' 29Kewonni kieliewo, 'Bi ulie echine.' Khuinashida houhui giedene echiwo. 30Adani echidene meila kewondene ye niekielienji kieliezho. Kewonni kieliewo, 'Ada, bi echiye.' Ingiedene ese echiwo. 31Ta sumulase ene ghua kewonlani alinie adane kielienyi chenliezho?" Hhela kieliewo, "Fugie kewon wo." Ersa kieliewo, "Bi tande shuhua kielieye, shui shanjisan kun, biozila tanse melie Hudai gojiade orone. 32Yaheiya tai hhende irekude gou moni uzheghazho. Ta hhei xianxin ulie giene, shui shanjisan kun, biozila hhei xianxin giezho. Ta hhela xianxin giesei uzhedene dou geizhen ulie giezhi xianxin ulie giene."

Doghun Wiliechilani Bilazho

(Mak 12:1-12; Luj 20:9-19)

33"Ta pse nie bilasei chenlie. Nie gieni zhanguiji nie yenzi putou zeiladene izhonyini qienjiwo. Sudoroni jiu daruku chizi waizhi yenzi uzheku teizi giedene kunlade bouizhi ogi, gholode echiwo. 34Ghuraku shihou oluse hojilai peizhi bouisan kunlase nexianne ghuraghale echiwo. 35Bouisan kunla hojilaini bareidene nieini eghiwo, nieini alawo, nieini tashida alawo. 36Zhanguijii pse genjia olon hojilai peizhi echighase bouisan kunla yen qingiezhi duidai giewo. 37Zuihoude hhela kewonyimi zunjineba giezhi kewonne peizhi echighawo. 38Bouisan kunla kewonyini chanladene nieniedene kielienduzho, 'Eneshi jiachanni jienliechen wo. Matan enei aladene jiachanni zhanjiye!' 39Ingie hhei bareidene putou yenzise tungu khigha alawo. 40Ingiese putou yenzii zhanguiji irekude bouisan kunlai matugiene?"

41Hhela kieliewo, "Doghun kunlai ese rouliezhi aladene putou yenzini nanshi putou jiuichen kunlade bouizhi ogine." 42Ersa hhelade kieliewo. "Ta jinwun jiere onshizhi ese daowu?

'Gie giesan kunla bendasan tashi

giei zhunyo tashi gholuwo.

Eneshi Ezhan giesanwo.

Matan uzhese xihan giezho.'

43Ingiese bi tande kielieye, Hudai gojiai tanse agi echidene Hudai gojiade oluzhi jiego khizheghasan minzude ogine. 44Kien ene tashi jiere anda bouse zhazhazi gholune. Ene tashi kienyi jiere anda bouse zai miendaghane."

45Fugie buwa, Falisai kunla Ersa bilasei chenliedene hhelai zhiizhi kieliesei mejie 46Ersai bareine giese olon kunlase ayizho. Olon kunla Ersai xienzhi wo giezho.

Currently Selected:

Matai 21: sce

Highlight

Copy