Matai 8

Pifugientuni Goudaghazho

(Mak 1:40-45; Luj 5:12-16)

1 Ersa ula jierese bouzhi irese tebieji olon kunla hhei daghawo. 2Ingiekude nie pifugientu Ersai melie ire papaladene kieliewo, "Ezhan, chi duran bise mini ganjinragha shidane." 3Ersa khane zhighazhi hhei maqizhi kieliewo, "Bi duran wine. Chi ganjinra!" Ingiese hhei pifugienni deigo ganjinrawo. 4Ersa hhende kieliewo, "Chi kiemade bu kieliedene echizhi beyene buwade uzhegha. Musai shu jiere fenfulasan mutun Hudade mure ogizhi kunlade ganzhen bei."

Baifuzhanni Hojini Goudaghazho

(Luj 7:1-10)

5 Ersa Jiabainunde orose nie baifuzhan melieni irezhi Ersai xiahua giezhi kieliewo, 6"Ezhan, hojimi tanhon giesenu giede kijiedene tendun shouizho." 7Ersa hhende kieliewo, "Bi hhei goudaghale yoye." 8Baifuzhan kieliewo, "Ezhan, chi mii giede irese bi pei dane. Chii nie aman kielienshi hojimi goudane. 9Biye kunlai kha doura wo, buduila mii kha doura wo. Bi buduiladene, 'Echi!' giese echine, 'Ire!' giese irene, 'Enei gie!' giese hhe giene." 10Ersa chenliedene ghanirazhi daghasan kunlade kieliewo, "Bi tande shuhua kielieye, bi intu xianxin giekui Isiliede uzhezhi uye daozho. 11Bi tande kielieye, dunmien ximiense olon niman kunla irezhi asiman gojiade Iburaheimu, Isaghei, Yagebure hhantu xi soune. 12Kharei Isilie kunlai tousenu ghadanedu kharanide echighase hhela hhende shidunne zhouzhi wilane." 13Ingie Ersa baifuzhande kieliewo, "Chi kharei. Chi xianxin giesan mutun gholu gie." Hhe shihoude hojini goudawo.

Olon Kunlani Goudaghazho

(Mak 1:29-34; Luj 4:38-41)

14 Ersa Bedurui giede echise Bedurui ghadunmekieni fashao giedene kijiesei chanlawo. 15Ersa hhei khani nie maqise fashao giesan daodene hhe bosizhe Ersai ushilawo. 16Khara oluse kunla sheitan heisan olon kunlai Ersai shida uduru irewo. Ersa nie aman kielienghala sheitanlai tou khighawo. Pse gien wineku kunlai man goudaghawo. 17Ingiekushi Ezhan Isaiya xienzhii tungo giezhi kieliesan kielien mutun gholughane giezho,

"Hhe matanyi bixinni deilawo.

Matanyi gienlai danjiwo."

Ersani Daghaku

(Luj 9:57-62)

18 Ersa olon kunla hhei wiqisei chujieghedene, "Hai duimiende daoye!" giezhi fenfulawo. 19Nie jinwun hanjia melie ire hhende kieliewo, "Loushi, chi khala echise bi chii daghane." 20Ersa kieliewo, "Funieghede dun wine, asiman jieredu bunzhude ho wine, Kunnikewonde nie zhentou teiku oronda uwo." 21Pse nie tuji iredene Ersade kieliewo, "Ezhan, bi xien adane bulale echiye." 22Ersa hhende kieliewo, "Fugusan kun fugusan kunlane bulale echi gie. Chi mii dagha."

Keini Beighazho

(Mak 4:35-41; Luj 8:22-25)

23 Ersa chon jiere khireise tujilani hhei daghazho. 24Menzhali hai jiere fugie kei bosiwo. Lan chabudu chonni unaghane. Ersa da hhunturazho. 25Tujilani echizhi Ersai uru xiereigha kieliewo, "Ezhan, bijienyi jiui! Bijienyi amin widane giezho!" 26Ersa kieliewo, "Ta ene Hudai gou xianxin ulie giechen kunla, yangiezhi ayizho?" Ingie bosizhedene kei, haini nie sugiese nanranghane gholuwo. 27Kunla ghaniradene kieliewo, "Eneshi yan kun wo? Kei, haiye kielienyini chenliene."

Ghua Sheitan Heisan Kunni Goudaghazho

(Mak 5:1-20; Luj 8:26-39)

28 Ersa hai duimiende daosenu Jiadala kunyi oronde irewo. Ghua sheitan heisan kun mezase khizhedene hhei shida texien wizhashi kiemada hhe mose yo dazho. 29Hhela deigo warada qiiwo, "Hudai kewon, chi bijienyi jiohoro bu gie. Shihou da uye kuruzho, chi enende irezhi bijienyi zayalanu?" 30Hhelase gouji gholode idaban khighei ijiezhi souzho. 31Sheitanla Ersai xiahua giezhi chi bijienyi tou khighane giese bijienyi khighei jiere echigha giewo. 32Ingie Ersa echi giese sheitanla khizhedene khigheilai jiere khiwo. Menzhali khigheila egheide chunji bou, haide yenji alawo. 33Khighei adulasan kunla holudene chenshide echi sheitan heisan ene kunlai shiqinyi kunlade man kieliewo. 34Ingiese nie chenshini kunla man Ersai ochirale khizhewo. Hhei uzhedene, "Enense likai gie." giezhi xiahua giewo.

Currently Selected:

Matai 8: sce

Highlight

Copy