Иоан 18

1Сідз висьталӧм бӧрын Исусыс велӧтчиссескӧт муніс Кедрон ю мӧдӧрӧ. Сэтчин пырисӧ пуйӧрӧ#18:1 пуйӧр ─ сад. 2Сэтӧн Исусыс унаись пантасьліс Аслас велӧтчиссезкӧт. Сійӧн Исуссӧ вузалісь Иуда тӧдіс, кытӧн нія ӧксьывлісӧ. 3Сэтчӧ Иудаыс вайӧтіс воиннэзӧс да Вежа Керку сьӧрын видзӧтіссезӧс, кӧднӧ ыстісӧ аркирейез да фарисейез. Нія локтісӧ ӧзтӧм биэзӧн да шыпурттэзӧн#18:3 шыпурт ─ меч.

4Исусыс тӧдіс ни, мый Сыкӧт лоас. Сія петіс нылӧ паныт да юаліс: «Кинӧс кошшатӧ?» 5Сылӧ висьталісӧ: «Назаретісь Исусӧс». Исусыс нылӧ шуис: «Этӧ Ме». Исуссӧ вузалісь Иудаыс сулаліс ныкӧт.

6Исуслӧн кыввез бӧрсянь отирыс керсисӧ бӧрлань да усисӧ му вылас. 7Исусыс бӧра юаліс: «Кинӧс кошшатӧ?» Нія шуисӧ: «Назаретісь Исусӧс». 8Исусыс сэтчӧ шуис: «Ме висьталі ни тіянлӧ: "Этӧ Ме". Сідзкӧ, Менӧ кӧ кошшатӧ, лэдзӧ мӧддэсӧ, ась мунӧны». 9Исусыс шуис сідз, медбы керсис Сылӧн висьталӧм кыввез сьӧрті: «Кӧднӧ Тэ Меным сетін, ны коласісь ӧтікӧс эг ӧшты».

10Симон-Петралӧн вӧлі шыпурт. Сія кыскис сійӧ да аркирей раблісь орӧтіс веськыт пельсӧ. Рабыслӧн нимыс вӧлі Малк. 11Сэк Исусыс Петраыслӧ висьталіс: «Дзеб шыпурттӧ. Ог разь понды юны дозсис, кӧдӧ сетіс Меным Айӧ?»

12Воиннэз, сюрсӧн веськӧтлісь да Вежа Керку сьӧрын видзӧтіссез Исуссӧ кутісӧ да кӧрталісӧ. 13Нія нуӧтісӧ Сійӧ Каиафлӧн Аннас нима тесть дынӧ. Сія воӧ аркирейнас вӧлі Каиафыс. 14Сія Каиафыс и висьталіс иудейеслӧ: «Буржык лоас, кулас кӧ отирыс понда ӧтік морт».

Петралӧн суськисьӧм

(Мт. 26:69-70; Мк. 14:66-68; Лк. 22:55-57)

15Симон-Петра ӧтік велӧтчиськӧт муніс Исусыс бӧрсянь. Аркирейыс тӧдіс сійӧ велӧтчисьсӧ. Сійӧн велӧтчисьыс Исусыс бӧрсянь пырис аркирейыс йӧрӧ. 16Петраыс кольччис ыбӧс саяс. Сэсся аркирейыслӧ тӧдса велӧтчисьыс петіс ӧтӧрас. Сія сёрнитчис ыбӧс сьӧрын видзӧтісь инькакӧт да пыртіс Петрасӧ йӧр пытшкас. 17Инькаыс юаліс Петралісь: «Абу я тэ Эта Мортлӧн велӧтчись?» Петраыс висьталіс: «Абу!»

18Вӧлі кӧдзыт. Раббез да Вежа Керку сьӧрын видзӧтіссез керисӧ би. Нія сувтісӧ биыс гӧгӧрӧ да шонтісисӧ. Сэтӧн ӧтлаын шонтісис и Петраыс.

Исус аркирей одзын

(Мт. 26:59-66; Мк. 14:55-64; Лк. 22:66-71)

19Аркирейыс юаліс Исусыслісь велӧтчиссес йылісь да Сы велӧтӧм йылісь. 20Исусыс сылӧ висьталіс: «Ме быдӧнныс одзын баиті отирыслӧ. Ме пыр велӧті синагогаын да Вежа Керкуын, кытчӧ пыр ӧксьывлӧны иудейес. Ме гусьӧн нем эг баит. 21Мыля Менчим юасян? Баитӧмӧ йылісь юась Менӧ кывзісь отирлісь. Нія тӧдӧны Менчим баитӧмӧс». 22Исусыскӧт ордчӧн сулаліс Вежа Керку сьӧрын видзӧтісь. Исуслӧн висьталӧм бӧрын сія вачкис Исусыслӧ пельбокас да шуис: «Сідз баитан аркирейкӧт?» 23Исусыс горӧтчис: «Умӧльӧ кӧ Ме висьталі, висьтав, мый умӧльыс? Бурӧ кӧ висьталі, сэк мый понда тэ Меным сӧтін?» 24Аннасыс Исуссӧ кӧрталӧмӧн ыстіс Каиаф аркирей дынӧ.

Петра бӧра суськисьӧ

(Мт. 26:71-75; Мк. 14:69-72; Лк. 22:58-62)

25Симон-Петраыс сулаліс да шонтісис биыс дынын. Сылісь юалісӧ: «Абу я тэ Сылӧн велӧтчиссез коласісь?» Сія суськисьӧмӧн шуис: «Абу». 26Аркирейыслӧн ӧтік раб вӧлӧм ӧтік увтырись мортыскӧт, кӧдалӧ Петраыс орӧтіс пельсӧ. Сія рабыс юаліс: «Эг я ме тэнӧ адззыв Сыкӧт пуйӧрас?» 27Петраыс бӧра суськисис. Сэтӧн китсӧвтіс петук.

Исус Пилат одзын

(Мт. 27:1-2; Мк. 15:1-5; Лк. 23:1-5)

28Асъяпоннас Каиафыс дынсянь Исуссӧ нуӧтісӧ Римсянь веськӧтлісь Пилат керкуӧ. Иудейес эзӧ пырӧ керкуас, медбы эзӧ сэрпӧсьмӧ да вермисӧ сёйны Ыджыт лунся сёян. 29Пилатыс петіс ны дынӧ да юаліс: «Мый керис умӧльсӧ Эта Мортыс?» 30Нія висьталісӧ: «Эз кӧбы вӧв Сія лёк керись, сэк мийӧ эгӧ бы Сійӧ вайӧтӧ тэ дынӧ». 31Пилатыс шуис нылӧ: «Босьтӧ Сійӧ да асланыт Туйдӧт сьӧрті судитӧ». Иудейес шуисӧ: «Миянлӧ мортсӧ оз туй сетны вийны». 32Исуслӧн висьталӧм сьӧрті сідз и коліс аркмыны. Сія эд висьтавліс, кыдз кулас.

33Сэк Пилатыс бӧр пырис керкуас, корис дынас Исуссӧ да юаліс: «Тэ иудейезлӧн Ӧксу?» 34Исусыс шуис сылӧ: «Ассянят я сідз висьталін, али тэныт мӧдіккез сідз висьталісӧ Ме йылісь?» 35Пилатыс шуис сэтчӧ: «Ме эд абу иудей. Тэнат отирыт аркирейескӧт вайӧтісӧ Тэнӧ ме дынӧ. Мый Тэ сэтшӧмсӧ керин?» 36Исусыс висьталіс: «Менам юралӧмӧ абу эта му вылісь. Вӧлі бы Менам юралӧмӧ эта му вылісь, сэк Менам отирӧ пессисӧ бы Ме понда и Ме эг бы сюр иудейес киӧ. Но Менам юралӧмӧ абу эта му вылісь». 37Пилатыс шуис Сылӧ: «Сідзкӧ, Тэ ─ Ӧксу?» Исусыс шуис: «Тэ ачыт висьталін: Ме ─ Ӧксу. Ме шогми да локті му вылас, медбы висьтасьны быльыс йылісь. Кин быльыслӧн, сія кывзӧ Менчим висьталӧмӧс».

38Пилатыс юаліс: «Мый сія быльыс?»

Исусӧс судитӧм

(Мт. 27:15-31; Мк. 15:6-20; Лк. 23:13-25)

Сідз висьталӧм бӧрын Пилатыс бӧр петіс иудейес дынӧ да висьталіс: «Ме эг адззы Сы сайын некытшӧм умӧль керӧм. 39Ыджыт лун одзас ме быд во лэдзлывла тіянлӧ ӧтік пукалісьӧс. Сідз тіян важынсянь ни керсьӧ. Сідзкӧ, колӧ кӧ тіянлӧ иудейезлӧн Ӧксуыс, лэдза Сійӧ?» 40Сэк быдӧнныс горӧтісӧ: «Эн лэдз Сійӧ, лэдз Вараввасӧ!» А Варавваыс вӧлі лёк керись.

Currently Selected:

Иоан 18: БЮ19

Highlight

Copy