Матвей 11
11
1Даскык велӧтчисьсӧ туйдӧтӧм бӧрын Исусыс муніс велӧтны да висьтасьны мӧдік каррезӧ.
2Пукалікас Пыртісь Иоанлӧ кывсис Исуслӧн керӧммез йылісь. Сія ассис кык велӧтчисьӧс ыстіс Исусыс дынӧ. 3Тшӧктіс юавны: «Тэ я миянлӧ кӧсйӧм Локтісьыс? Мӧдікӧс я миянлӧ видзчисьны?» 4Исусыс нылӧ висьталіс: «Мунӧ да висьталӧ Иоаныслӧ быдӧс кылӧмнытӧ да адззылӧмнытӧ:
5─ Синтӧммез адззӧны,
чотіссез ветлӧтӧны,
проказаӧн шогаліссез сӧстӧммӧны,
пельтӧммез кылӧны,
кулӧммез ловзьӧны,
кориссезлӧ Бур Юӧр висьтасьӧны.
6Шуда мортыс, кӧда оз дугды Меным веритны».
Пыртісь Иоан йылісь Исуслӧн висьталӧм
(Лк. 7:24-35)
7Иоанлӧн велӧтчиссес мунісӧ. Сэк Исусыс пондіс висьтавлыны йӧзыслӧ Иоан йылісь: «Мый видзӧтны тійӧ ветліт кушмуас? Поди, тӧлӧн оклалӧм шать? 8Мый видзӧтны ветліт? Дона да басӧк паськӧмӧ пасьтасьӧм мортӧс? Дона паськӧма йӧзыс олӧны ӧксу керкуэзын. 9Мый нӧ видзӧтны тійӧ ветліт? Поди, Енсянь юӧртісьӧс? Висьтала тіянлӧ: сідз и эм, Енсянь юӧртісься ыджытжыкӧс эд адззыліт. 10Сы йылісь гижӧмась этна кыввес:
─ Тэ одзын ыста Ассим юӧртісьӧс.
Сія лӧсьӧтас Тэныт туйсӧ.
11Веськыта тіянлӧ висьтала: инькаэзӧн вайӧммез коласын абу ӧтік Енсянь юӧртісь ыджытжык Пыртісь Иоанся. Но Енлӧн Юраланінын учӧтжыкыс сысся ыджытжык. 12Пыртісь Иоан кадсянь ӧнӧдз Енӧжись Юралӧмсӧ босьтӧны вынӧн, и кин вынсьӧтчӧ, сійӧ босьтӧ. 13Енсянь юӧртіссес да Туйдӧтыс одзланьсясӧ висьтавлӧмась Иоан кадӧдз. 14Вермат кӧ веритны, сія Илляыс, кӧдалӧ коліс локны. 15Пеля мортыс ась кылӧ!
16Кин вылӧ вачкисьӧны ӧння кадӧ оліссес? Нія ӧтӧрын пукалісь челядь кодьӧсь. Ӧтамӧднысӧ кытсӧвтӧмӧн нія шуӧны: 17"Мийӧ орсім тіянлӧ пӧлянӧн, а тійӧ эдӧ йӧктӧ. Мийӧ тіянлӧ норӧн сьылім, а тійӧ эдӧ горзӧ". 18Локтіс Иоан, оз сёй, оз ю. Сы йылісь шуӧны: "Сы пытшкын сэрпӧсь лов". 19Локтіс Морт Зон, сёйӧ-юӧ. Тійӧ тай шуат: "Эта мортыс радейтӧ сёйны да вина юны. Сія ёртасьӧ вот ӧктіссезкӧт да умӧльсӧ кериссезкӧт". Но Мывкыдлӧн#11:19 мывкыд ─ мудрость челядь сьӧрті тыдалӧ: Мывкыдыс ─ бур».
Ӧддьӧн умӧль вериттӧм каррезлӧ!
(Лк. 10:13-15)
20Вӧлісӧ каррез, кытӧн Исусыс медуна мыччаліс Ассис вынсӧ адззывлытӧм керӧммезнас. А сэтчин оліссез эзӧ бергӧтчӧ умӧль керӧммезныс дынісь. Сійӧн Исусыс пондіс ӧмавны#11:20 ӧмавны ─ упрекать нія каррезын оліссесӧ: 21«Ӧддьӧн умӧль лоас тэныт, Коразин#11:21 Коразин, Вифсаида да Капернаум ─ иудейезлӧн каррез кар! Ӧддьӧн умӧль лоас тэныт, Вифсаида! Тир да Сидон#11:21 Тир да Сидон ─ Финикия муын каррез, кытӧн олісӧ ентӧдтӧммез каррезын эзӧ адззылӧ тіянын мыччалӧм адззывлытӧм керӧммесӧ. Сэтчин оліссес адззылісӧ бы нійӧ, сэк, натьтӧ, важын ни бы пасьталісӧ чорыт паськӧм, пӧимӧн киськалісӧ юрнысӧ да пондісӧ тӧждісьны асланыс умӧль керӧммез кузя. 22Сійӧн висьтала тіянлӧ: Суд Лунӧ Тир да Сидон каррезын оліссезлӧ тіянся кокнитжык лоас.
23Тэ Капернаум кар, енӧжӧдз мӧдан лэбтісьны? Тэ адӧдз усян. Тіянын мыччалӧм вынсӧ адззылісӧ бы Содом карын, сэк сія ӧнӧдз бы сулаліс. 24Висьтала тіянлӧ: Суд лунӧ Содом карлӧ тэсся кокнитжык лоас».
Ай йылісь Зонлӧн висьталӧм да шоччисьны корӧм
(Лк. 10:21-22)
25Сэк Исусыс висьталіс: «Ошка Тэнӧ, Айӧ, енӧжын да му вылын Дӧсвидзись! Тэ сійӧ сайӧвтін мывкыдаэз да уна тӧдіссез шогья, осьтін кага коддезлӧ. 26Сідз эд, Айӧ! Сэтшӧма керны эд Тэнат и вӧлі бур лӧсьӧтӧмыт.
27Менам Айӧ быдӧс сетіс Меным. Некин оз тӧд Зонсӧ, тӧдӧ дзир Айыс. Айсӧ некин оз тӧд, дзир Зоныс тӧдӧ. Тӧдӧ и сія, кинлӧ Зоныс осьтас.
28Сьӧкыта мырсиссез да мыдзӧммез, локтӧ Ме дынӧ. Ме тіянӧс шоччӧта. 29Босьтӧ ас выланыт Менчим сийӧсӧс#11:29 сийӧс ─ хомут, велӧтчӧ Месянь. Ме рам да небыт сьӧлӧма. Сэк тіян сьӧлӧммезныт шоччисясӧ. 30Менам сийӧсӧ оз личкы и нопӧ#11:30 ноп ─ бремя Менам кокнит».
Шоччисян лун йылісь юалӧм
(Мк. 2:23-28; Лк. 6:1-5)
Currently Selected:
Матвей 11: БЮ19
Highlight
Share
Copy
Want to have your highlights saved across all your devices? Sign up or sign in
