Марк 11
11
1Ерусалимӧ мунӧм коста Исус велӧтчиссескӧт сибӧтчис Виффагия да Вифания посаддэз дынӧ. Нія сулалісӧ Виягӧд#11:1 Виягӧд ─ (Оливка) эта кылыс грек кыв вылын «Елеон» керӧс увтын. Исусыс кык велӧтчисьӧс ыстіс одзлань 2да шуис: «Мунӧ паныт сулалан посадӧ. Сэтчин пырат да казялат дом йылын осёл чаньӧс. Сы вылӧ морт эз на пуксьыв. Домӧтсӧ пӧрччалӧ да вайӧтӧ сійӧ ме дынӧ. 3Кинкӧ пондас кӧ юасьны, мый тійӧ керат, висьталӧ: "Осёлыс колӧ Дӧсвидзисьнымлӧ. Сія осёлсӧ чожа бӧр вайӧтас"». 4Нія мунісӧ да адззисӧ ӧтӧрись ыбӧс бердӧ домалӧм осёл чаньсӧ да пӧрччалісӧ дом йывсис. 5Сэтӧн сулаліссес юалісӧ нылісь: «Мый керат? Мыйлӧ пӧрччалат осёл чаньсӧ?» 6Велӧтчиссес сідз и висьталісӧ, кыдз тшӧктіс Исусыс. Отирыс лэдзисӧ нійӧ. 7Велӧтчиссес вайӧтісӧ чаньсӧ Исусыс дынӧ. Нія сы вылӧ пуктісӧ вевдӧрись паськӧмнысӧ. Исусыс пуксис сы вылӧ. 8Отирыс туй вылас ольсалісӧ паськӧмнысӧ. Мӧдіккез чеглалісӧ пу уввез да тэчисӧ туй вылас. 9Одзас да бӧрас муніссес горӧтлісӧ:
─ Осанна#11:9 осанна ─ Енсӧ ошкан кыв, сія лоас «мездӧт миянӧс».!
Бласлӧвитӧм Дӧсвидзись нимӧн Локтісьыс!
10Бласлӧвитӧм Давид айнымлӧн юралӧмыс,
кӧда локтӧ Дӧсвидзись нимӧн!
Осанна! Ошкам Медвылісь Енсӧ!
11Исусыс локтіс Ерусалимӧ, пырис Вежа Керкуӧ да быдӧс видзӧтіс. Сэсся Сія даскык велӧтчиськӧт бертіс Вифанияӧ, кадыс эд вӧлі сёр ни.
Инжир пу ёрдӧм
(Мт. 21:18-19)
12Мӧд лунас Вифанияись мунікас Исусыслӧн пондӧм симавны кынӧмыс. 13Сія ылісянь казяліс инжир пу да сибӧтчис видзӧтны, оз я адззы сы вылісь мыйкӧ сёйны. Кӧр локтіс пу дынас, нем эз адззы, вӧлісӧ дзир листтэс. Эз на лок эд инжир вывсис воӧмсӧ ӧктан кадыс. 14Сэк Исусыс шуис пуыслӧ: «Ӧнісянь ась некин оз сёй инжиртӧ». Сылӧн велӧтчиссес кылісӧ висьталӧмсӧ.
Вежа Керку весӧтӧм
(Мт. 21:12-17; Лк. 19:45-48; Ин. 2:13-17)
15Нія локтісӧ Ерусалимӧ. Исусыс пырис Вежа Керкуас да пондіс сэтчинісь вашӧтны вузасиссесӧ да небиссесӧ. Сія пӧрлаліс сьӧм вежиссезлісь пызаннэсӧ да дуді вузаліссезлісь лабиччесӧ. 16Сія эз лэдз нем новйӧтны Вежа Керкуӧттяс. 17Исусыс пондіс велӧтны отирсӧ. Сія шуис: «Абу разь гижӧм: "Менам керкуӧ быд отирпӧлӧслӧ#11:17 отирпӧлӧс ─ разные народы лоас кейман керкуӧн"? А тійӧ сійӧ пӧртіт лёк кериссеслӧ позӧ!»
18Аркирейес да Туйдӧтӧ велӧтіссес кылісӧ этӧ да пондісӧ баитчыны, кыдз бы Сійӧ вийны. Но нія полісӧ Исуссис, быдӧс отирсӧ эд Сы велӧтӧмсянь диво кутӧ.
19Рытнас Исус велӧтчиссескӧт петіс карсис.
Веритӧм йылісь
(Мт. 21:20-22)
20Асывнас нія мунісӧ инжир пуыс дынӧт да казялісӧ: сія вуджӧдз косьмӧм. 21Петралӧ усисӧ тӧдвылас Исуслӧн кыввес. Сія Сылӧ висьталіс: «Велӧтісь! Видзӧт, инжир пуыс, кӧдӧ Тэ ёрдін, косьмӧм». 22Исусыс шуис велӧтчиссеслӧ: 23«Веритӧ Енлӧ. Ме тіянлӧ быльсӧ висьтала: кин тшӧктас кӧ эта керӧслӧ: "Лэбтісь да усь саридзӧ!", и керӧсыс усяс. Мортыс оз кӧ понды юрас видзны: петас, поди оз, а пондас веритны, сэк, мый сія висьталас, сідз и лоас! 24Сійӧн баита тіянлӧ: Еныслісь мый корат кеймиканыт, веритӧ, жыв тійӧ босьтіт ни, и корӧмныт лоас! 25Кӧр сувтат кеймыны, проститӧ быдӧннысӧ, кин керис тіянлӧ умӧльсӧ. Сэк енӧжись Айныт и тіянлісь умӧль керӧммезнытӧ проститас. 26Одӧ кӧ проститӧ отирсӧ, сэк тіян енӧжись Айныт и тіянлісь умӧль керӧммезнытӧ оз простит».
Исуслӧн вын йылісь юасьӧм
(Мт. 21:23-27; Лк. 20:1-8)
27Исусыс велӧтчиссескӧт бӧра локтіс Ерусалимӧ. Кӧр сія ветлӧтіс Вежа Керкуӧт, сы дынӧ сибӧтчисӧ аркирейез, Туйдӧтӧ велӧтіссез да бӧрйӧм пӧриссез. 28Нія Сылісь юалісӧ: «Кытшӧм вынӧн тэ быдӧс керан? Кин Тэнӧ сувтӧтіс сійӧ быдӧс керны?» 29Исусыс нылӧ висьталіс: «Ме и Ачым юала тіянлісь. Висьталат кӧ Меным юалӧмӧс, сэк и Ме висьтала, кытшӧм вынӧн быдӧс кера. 30Висьталӧ Меным, кытісь локтіс Иоанлӧн пыртчӧмыс? Енӧжсянь али мортсянь?» 31Нія ас коласаныс пондісӧ баитны: «Висьталам кӧ, енӧжсянь пӧ, Сія шуас: "Мыля нӧ тійӧ сылӧ эдӧ веритӧ?" 32Поди, висьтавны, мортсянь пӧ?» Но нія полісӧ отирсис, быдӧнныс эд Иоансӧ пуктісӧ Енсянь юӧртісьӧ. 33Исусыслӧ нія висьталісӧ: «Огӧ тӧдӧ». Сэк Исусыс нылӧ висьталіс: «И Ме ог висьтав, кытшӧм вынӧн быдӧс кера».
Виноград вӧдитіссез йылісь велӧтан висьт
(Мт. 21:33-46; Лк. 20:9-19)
Currently Selected:
Марк 11: БЮ19
Highlight
Share
Copy
Want to have your highlights saved across all your devices? Sign up or sign in
