ሉቃሳ ሚሺራቾ 4
4
ዬሱሳ ፓጬቴ
(ማቶ 4፡1-11፤ ማር 1፡12-13)
1ዬሱሲ ጺሎ ኣያናን ኩሚዲ ዮርዳኖሴ ሻፋፔ ሲሚዳ ማላ ጺሎ ኣያናይ ኢዛ ካሌዲ ባዞ ቢታ ኤፊዴስ። 2ሄንካ ጻላኤን ኦይዱ ታሙ ጋላስ ፓጬቲዴስ። ሄ ፓጬቲዛ ጋላሳታን ኣይኮካ ሞንታ ጊሻስ ዉርሴን ጋፊዴስ።
3ጻላኤይካ ዬሱሳ፥ «ኔ ጾሳ ና ጊዲኮ ኣኔ ሃይሳ ሹቻ ካ ጊዳና ማላ ኣዛዛ» ጊዴስ።
4ዬሱሲካ ዛሪዲ፥ «ኣሲ ካን ጻላ ዴና ጌቴቲዲ ጻፌቲዴስ» ጊዲ ጻላኤስ ዛሪዴስ።#ዛሬ 8፡3
5ሄሳፌ ካሊዲ ጻላኤይ ዬሱሳ ኢሲ ቃ ዙማ ቦላ ኬሲዲ ሳሎ ጉፋንን ዲዛ ካዎቴታ ቂጲዳ ኣይፌይ ጼላናስ ቤሲዲ፥ 6«ሃይሲ ኔ ቤኢዛ ቢታ ካዎታ ጎዳቴኔ ቦንቾይ ዉሪካ ታስ ኢሜቲዴስ፤ ታኒካ ታ ዶሲዛዴስ ኢማናስ ዳንዳይዛ ጊሻስ ኔስካ ኢማና።
7«ሄሳ ጊሻስ ኔኒ ኩንዳዳ ታስ ጎይኒኮ ሃይሲ ዉሪካ ኔስ ጊዳና» ጊዴስ።
8ዬሱሲካ ዛሪዲ፥ «ኔ ጎዳ ጾሳስ ኩንዳዳ ኢዛስ ጻላ ጎይና ጌቴቲዲ ጻፌቲዴስ» ጊዴስ።#ዛሬ 6፡13
9-11ሄሳፌካ ዬሱሳ ዬሩሳላሜን ጾሳ ኬ ጼራ ኬሲ ኤሲዲ ጾሳ ማጻፋን፥ «ኔና ናጋና ማላ ጾሲ ኔ ጊሻስ ባ ኪታንቻ ኣዛዛና፤ ‹ኔ ቶሆይ ሹቻን ጴቶንታ ማላ ኪታንቻቲ ባ ኩሼራ ኔና ቁ ሂስቲ ኦይካና› ጌቴቲዲ ጻፌቲዳ ጊሻስ ኣኔ ኔ ጾሳ ና ጊዲኮ ሃይሳፌ ዱጌ ኩንዳ» ጊዴስ።#ማዛ 91፡11-12
12ዬሱሲካ፥ «ኔ ጎዳ ጾሳ ፓጮፋ» ጌቴቲዴስ ጊዲ ዛሪዴስ።#ዛሬ 6፡16
13ጻላኤይካ ባ ፓጫናይሳ ዉርሲዳፔ ጉዬ ባስ ኢንጄ ዎዴይ ቤታናሼ ዬሱሳፔ ሻኬቲዴስ።
ዬሱሲ ጋሊላን ታማርሶ ኦይኪዴስ
(ማቶ 4፡12-17፤ ማር 1፡14-15)
14ዬሱሲካ ጺሎ ኣያና ዎልቃን ጋሊላ ሲሚዴስ፤ ኢዛ ጎባቴ ጋሊላ ኣቻን ዲዛ ዴሬታን ሲዬቲዴስ። 15ኢዚካ ኣይሁዳታ ዎሳ ኬን ታማርሲሺን ኢዛ ቲሚርቴይ ሎኢን ኣሳይ ዉሪካ ኢዛ ጋላቲዴስ።
ናዚሬቴን ዬሱሳ ኢጼቴ
(ማቶ 13፡53-58፤ ማር 6፡1-6)
16ሄፔ ባ ዬሌቲዳ ካታማ ናዚሬቴ ዪዲ ካሴ ሳምባታ ጋላስ ኣይሁዳ ዎሳ ኬ ጌሊዛ ማላ ጌሊዲ ጾሳ ማጻፋ ናባባናስ ዴንዲ ኤቂዴስ። 17ናቤ ኢሳያሳ ማጻፋይ ኢዛስ ኢሜቲን ማጻፋ ዶይዳ ማላ።
18-19«ጎዳ ኣያናይ ታ ቦላ ዴስ፤
ማንቆታስ ሚሺራቾ ቃላ
ዮታና ማላ ታና ቲይዴስ፤
ቃሼቲዳይታስ ቢርሼቴ፥
ቆቄቲ ጼላና ኦጌ
ታ ኣዋጃና ማላ፥
ሜቶቴቲዳይታ ኣሻና ማላ፥
ዶሴቲዳ ጎዳ ላይ ኣዋጃ
ታ ዮታና ማላ
ታና ኪቲዴስ»
ጊዛሶ ዴሚ ናባቢዴስ።
20ማጻፋካ ጎርዲዲ ኣይሁዳ ዎሳ ኬ ናጊዛይሳስ ዛሪ ኢሚዲ ኡቲዴስ። ኣይሁዳታ ዎሳ ኬን ዲዛይቲ ዉሪካ ኢዛ ቲሺ ሂስቲ ጼሊዳ። 21ኢዚካ ኢስታስ፥ «ሃይሲ ኢንቴ ኢንቴ ሃይራ ሲዪዳ ማጻፋ ቃላይ ሃች ፖሌቲዴስ» ጊዴስ።
22ኣሳይ ዉሪካ ኢዛ ጊሻስ ሎኦ ጻላላ ሃሳዬቴስ፤ ቃሴካ ኢዛ ዶናፔ ኬዚዛ ሎኦ ቃላፔ ዴንዲዳይሳን ማላሌቲዲ፥ «ሃይሲ ዮሴፌ ና ጊዴኔ?» ጊዳ።
23ኢዚካ፥ «ሌ ጎዶ ኔርካ ኔና ፓ፤ ቂፊርናሆሜን ኔኒ ኦሺን ኑ ሲዪዳይሳ ሃይሳን ኔ ካታማንካ ኦ ጊዛ ሌሚሶ ኢንቴ ታ ቦላ ማላታናይሳስ ሲይ ባ» ጊዲ ኢስታስ ዮቲዴስ። 24ቃሴካ፥ «ታ ኢንቴስ ቱማ ጋይስ፤ ናቤይ ባ ዬሌቲዳ ዴሬን ቦንቼቲ ኤሬና።#ዮሃ 4፡44
25-26«ጊዶ ኣቲን ታ ኢንቴስ ቱማ ጋይስ፤ ሄ ላይኔ ባጋ ጋካናስ ሳሎይ ጎርዴቲን ዎልቃማ ኮሻይ ቢታ ቦላ ሃኒዳ ኤላሳ ዎዴ ሄ ላይታን ኣዚናይ ባይንዳ ዳሮ ማጫሳቲ ኢስራኤሌ ቢታን ዴቴስ ሺን ኤላሲ ኢስታፌ ኢሲኔይኮካ ኪቴቲቤና። ጊዶ ኣቲን ሲዶና ጌቴቲዛ ቢታን ሴራጲታ ጌቴቲዛ ካታማን ዲዛ ኢሲ ኣዚናይ ባይንዳ ማጫሳይኮ ኪቴቲዴስ።#1ካዎ 17፡1፥8-16 27ናቤ ኤልሳኤ ዎዴ ኢስራኤሌ ዴሬን ዳሮ ኢንቺራቻ ሃርጊዛይቲ ዴቴስ፤ ጊዶ ኣቲን ሶሪያ ቢታ ኣስ ኒኢማኔፔ ኣቲን ሄ ዳሮታፔ ኦኒካ ኢንቺራቻ ሃርጌፌ ፓጺቤና» ጊዴስ።#2ካዎ 5፡1-14
28ኣይሁዳታ ዎሳ ኬን ዲዛይቲ ዉሪካ ሄሳ ሲዪዲ ዳሮ ሃንቄቲዳ። 29ባ ኡቲዳሶሆፔ ዴንዲ ኤቂዲ ዬሱሳ ካታማፔ ካሬ ኬሲዲ ዱጌ ዛሪ ዬዳናስ ኢስታ ካታማያ ኦሴቲዳ ዙማ ቦላ ኣፎቲዛሶን ኦሴቲዳሶ ኤኪ ኤፊዳ። 30ጊዶ ኣቲን ኢዚ ኢስታ ጊዶራ ሻኪ ዬጊዲ ኣ ቢዴስ።
ዬሱሲ ቱና ኣያና ኬሲዴስ
31ሄፔካ ጋሊላ ኣዉራጃን ዲዛ ቂፊርናሆሜ ጌቴቲዛ ካታማ ዎዴስ፤ ሄንካ ሳምባታ ጋላስ ዳሮ ኣሳ ታማርሶ ኦይኪዴስ። 32ኢዚ ጎዳቴራ ሃሳይዛ ጊሻስ ኢዛ ቲሚርቴዛን ማላሌቲዳ።#ማቶ 7፡28-29
33ኣይሁዳታ ዎሳ ኬን ቱና ኣያናይ ኦይኪዳ ኣዴይ ዴስ። ኢዚካ ባ ቃላ ቁ ሂስቲዲ፥ 34«ናዚሬቴ ዬሱሳ ሃኢ ታ ዋኖ? ኔናራ ታና ኣዚ ጋዴ? ኔ ዪዳይ ኑና ይሳናሴ? ኔ ኦናኮ ታ ኤራይስ፤ ኔ ጾሳ ጺሎዛ ጊዲኪ?» ጊዲ ዋሲዴስ።
35ዬሱሲካ ቱና ኣያናዛ ሃ ኣዴዛፔ፥ «ጮኡ ጋዳ ኬዛ» ጊዲ ሴሪዴስ፤ ቱና ኣያናዚካ ዳሮ ኣሳ ሲንን ኣዴዛ ቦላፌ ዬጊዲ ኢሲ ቆሆካ ጋንታ ዬዲ ኬዚዴስ።#ማር 1፡21-28
36ኣሳይ ዉሪካ ማላሌቲዲ ባ ጊዶን ኢሶይ ኢሳራ፥ «ኣሶ ሃይሲ ኣይ ጊዛ ቲሚርቴ? ጎዳቴራኔ ዎልቃራ ኢታ ኣያና ኣዛዜስ፤ ኢስቲካ ኬዜቴስ» ጊዲ ሃሳዬቲዳ። 37ዬሱሳ ጎባቴካ ኡባሶ ጋኪዴስ።
ዬሱሲ ዳሮ ሃርጋንቻታ ፓዴስ
(ማቶ 8፡14-17፤ ማር 1፡29-34)
38ሄሳፌ ጉዬ ዬሱሲ ኣይሁዳ ዎሳ ኬፌ ኬዚዲ ሲሞና ኬ ጌሊዴስ። ሲሞና ቦሎቴያ፥ «ዎልቃማ ሚሾ ሃርጌይ ኦይኪን ሳኬታዳ ዲሺን ዬሱሳ ኢዞ ፓርኪ!» ጊዲ ዎሲዳ። 39ዬሱሲካ ኢዚኮ ሺቂዲ ሚሾ ሃርጌዛ ሴሪዴስ። ሚሻ ሃርጌይካ ዬዲን ሄራካ ዴንዳ ኤቃዳ ኢማታ ሞካዱስ።
40ኣርሼይ ዉላና ጊሺን ዱማ ዱማ ሃርጌይ ኦይኪዳ ኣሳ ዉርሲ ኢዛኮ ኤኪ ዪዳ። ኢዚካ ሃርጊዛ ኣሳ ኡባ ቦላ ባ ኩሼ ዎዲ ፓዴስ። 41ቱና ኣያናቲ ቃሴካ ዬሱሳ፥ «ኔኒ ጾሳ ና» ጊሼኔ ዋሲሼ ዳሮ ኣሳታፔ ኬዚዳ፤ ጊዶ ኣቲን ኢዚ ኢስታ ሴሪዴስ፤ ቱና ኣያናቲ ኢዚ ኪርስቶሳ ጊዲዳይሳ ኤሪዛ ጊሻስ ኢስቲ ኢሲኖካ ሃሳያና ማላ ኮዪቤና።
ጋሊላን ዬሱሳ ቲሚርቴ
42ጋዴይ ዎንቲሺን ዬሱሲ ኢሲ ኣሲካ ባይንዳሶ ቢዴስ። ዳሮ ኣሳይካ ኢዛ ኮዪሼ ኢዚ ዲዛሶ ጋኪዴስ። ኢዚ ኢስታፌ ሻኬቲዲ ቦንታ ማላ ዲጋናስ ኮዪዳ። 43ጊዶ ኣቲን ኢስታስ፥ «ጌዴ ሃራ ካታማ ባዳ ጾሳ ካዎቴ ሚሺራቾ ቃላ ዮታናስ ታስ ቤሴስ፤ ታኒ ኪቴቲዳ ጊታ ቆፋይ ሄሳ» ጊዴስ።
44ኢዚካ ዩሁዳን ኣይሁዳታ ዎሳ ኬን ቃላ ጉጂ ዮቲዴስ።
Currently Selected:
ሉቃሳ ሚሺራቾ 4: ጋሞመጽቅበፊደል
Highlight
Share
Copy
Want to have your highlights saved across all your devices? Sign up or sign in
The Word for the World International amp The Word for the World Ethiopia
