Олӧм 11
11
Вавилонса башня
1Став му пасьтала вӧлі дзик ӧти кыв да ӧти сёрнисикас. 2Асыввылысь петӧм бӧрын йӧзыс аддзисны Сеннар муысь паськыдін да овмӧдчисны сэтчӧ. 3Ӧта-мӧдныслы шуисны: «Вӧчамӧй сёйысь биын сотӧмӧн кирпич». Тадзи из пыдди кутісны вӧдитчыны кирпичӧн, а кориз#11:3 кориз – известь пыдди – сьӧд сирӧн. 4Найӧ шуисны: «Лэптамӧй аслыным кар да башня, джуджданас мед лоӧ енэжӧдз. Тадзи нимӧдам асьнымӧс да став му пасьталаыс огӧ разалӧй».
5Господь лэччис видзӧдлыны лэптан карсӧ да башнясӧ. 6Сійӧ шуис: «Тайӧ йӧзыс – ӧти войтыр, налӧн ӧти кыв. Мый нӧ кутісны вӧчны! Найӧ кӧ босьтчисны, вайӧдасны помӧдз! 7Вай лэччам да сорлалам налысь кывсӧ, медым дугдасны гӧгӧрвоны ӧта-мӧднысӧ». 8И разӧдіс найӧс Господь сэтысянь став му пасьталаыс. Тадзи найӧ дугдісны лэптыны карсӧ [да башнясӧ]. 9Карыслы сетӧма Вавилон ним, ӧд сэні Господь сорлаліс йӧзлысь кывсӧ да сэтысянь разӧдіс найӧс став му пасьтала.
Симсянь чужысьяс
(1Кад. 1:24-27)
10Симсянь чужысьяс йылысь.
Симлы вӧлі сё арӧс, кор сылӧн чужис Арфаксад. Тайӧ лои ыджыд ойдлӧм бӧрын кык во мысти. 11Арфаксад чужӧмсянь Сим оліс витсё во. Сылӧн чужисны на пиян да нывъяс. [Сэсся сійӧ куліс.] 12Арфаксадлы вӧлі [сё] комын вит арӧс, кор сылӧн чужис [Кенан. Кенан чужӧмсянь Арфаксад оліс куимсё комын во, сылӧн чужисны на пиян да нывъяс. Сэсся сійӧ куліс. Кенанлы вӧлі сё комын арӧс, кор сылӧн чужис] Шелах. 13Шелах чужӧмсянь Арфаксад оліс нёльсё куим во#11:13 Септуагинтаын гижӧма: Кенан оліс куимсё комын во.. Сылӧн чужисны на пиян да нывъяс. [Сэсся сійӧ куліс.] 14Шелахлы вӧлі [сё] комын арӧс, кор сылӧн чужис Эвер. 15Эвер чужӧмсянь Шелах оліс нёльсё куим#11:15 Септуагинтаын гижӧма: 11:15 – куимсё комын, 11:17 – куимсё сизимдас, 11:24 сизимдас ӧкмыс, 11:25 – сё кызь ӧкмыс во. Сылӧн чужисны на пиян да нывъяс. [Сэсся сійӧ куліс.] 16Эверлы вӧлі [сё] комын нёль арӧс, кор сылӧн чужис Пелег. 17Пелег чужӧмсянь Эвер оліс нёльсё комын во. Сылӧн чужисны на пиян да нывъяс. [Сэсся сійӧ куліс.] 18Пелеглы вӧлі [сё] комын арӧс, кор сылӧн чужис Рагав. 19Рагав чужӧмсянь Пелег оліс кыксё ӧкмыс во. Сылӧн чужисны на пиян да нывъяс. [Сэсся сійӧ куліс.] 20Рагавлы вӧлі [сё] комын кык арӧс, кор сылӧн чужис Серуг. 21Серуг чужӧмсянь Рагав оліс кыксё сизим во. Сылӧн чужисны на пиян да нывъяс. [Сэсся сійӧ куліс.] 22Серуглы вӧлі [сё] комын арӧс, кор сылӧн чужис Нахор. 23Нахор чужӧмсянь Серуг оліс кыксё во. Сылӧн чужисны на пиян да нывъяс. [Сэсся сійӧ куліс.] 24Нахорлы вӧлі кызь ӧкмыс арӧс, кор сылӧн чужис Терах. 25Терах чужӧмсянь Нахор оліс сё дас ӧкмыс во. Сылӧн чужисны на пиян да нывъяс. [Сэсся сійӧ куліс.] 26Терахлы вӧлі сизимдас арӧс, кор сылӧн чужисны Ӧврам, Нахор да Харан.
27Терахсянь чужысьяс йылысь.
Терахлӧн чужисны Ӧврам, Нахор да Харан. Харанлӧн чужис Лот. 28Харан куліс аслас Терах батьыс дырйи на Ур карын, аслас Калдея чужан муын. 29Ӧврам да Нахор гӧтрасисны. Ӧврамлӧн гӧтырыс вӧлі Сара, а Нахорлӧн – Милка, Харанлӧн нылыс. Харан вӧлі Милкалӧн да Искалӧн бать. 30Саралӧн эз вӧв ныв-пиыс, эз вермы сьӧктынысӧ да.
31Терах босьтіс аскӧдыс Ӧврам писӧ, Харан пиыслысь Лот писӧ да Сара моньсӧ, Ӧврамлысь гӧтырсӧ. Калдея Урысь найӧ мӧдӧдчисны Ханаан мулань. Но кор воисны Харанӧ, сувтісны сэтчӧ. 32[Харанын] Терах оліс кыксё вит арӧсӧдз. Сійӧ куліс Харанын.
Currently Selected:
Олӧм 11: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
