Иоан 19

1Сэки Пилат тшӧктіс чорыда нӧйтны Исусӧс. 2Шыпуртаяс пуктісны Исуслы юрас лежнӧгысь кыӧм юркытш, пасьтӧдісны Сійӧс пемыдгӧрд паськӧмӧ 3да шуалісны: «Мед олас иудейяслӧн Ӧксы!» Сэсся кучкалісны чужӧмас.

4Пилат бара петіс иудейяс дінӧ да шуис: «Ме петкӧда Сійӧс тіян дінӧ. Тӧдӧй, мый ме некутшӧм мыж Сылысь ог аддзы». 5Исус петіс пемыдгӧрд паськӧма, юр вылас вӧлі лежнӧгысь юркытш. Пилат шуис йӧзыслы: «Со, тайӧ Мортыс». 6Исусӧс аддзигӧн аркирейяс да крам видзысьяс горӧдісны: «Тувъяв! Тувъяв Сійӧс!» Пилат шуис налы: «Ті асьныд босьтӧй да тувъялӧй Сійӧс. Ме некутшӧм мыж Сылысь ог аддзы». 7Найӧ вочавидзисны: «Миян эм Индӧд. Индӧдным серти Сылы колӧ кувны, ӧд Асьсӧ Сійӧ Ен Пиӧн шуӧ».

8Тайӧс кылӧм мысти Пилат ёнджыка на повзис. 9Сійӧ пырис керкаас да юаліс Исуслысь: «Тэ кытысь?» Исус сылы нинӧм эз вочавидз. 10Пилат шуис: «Он кӧсйы сёрнитны мекӧд? Он ӧмӧй Тэ тӧд, мый ме верма тувъявны Тэнӧ, верма и мездыны?» 11Исус вочавидзис: «Тэ эськӧ нинӧм эн вермы вӧчны Мекӧд, эз кӧ вӧв сетӧма тэныд вылісянь. Та вӧсна Менӧ вузалысь ёнджыка на мыжа».

12Та бӧрти Пилат збыльысь кӧсйис лэдзны Исусӧс, но иудейяс горзісны: «Сійӧс кӧ лэдзан, кесарлы тэ абу ёрт. Ӧд коді пуктӧ асьсӧ ӧксыӧ, сійӧ паныд сувтӧ кесарлы».

13Тайӧс кылӧм бӧрын Пилат петкӧдіс Исусӧс ывлаӧ, ачыс пуксис изэрдвывса мыждан пуклӧсӧ. Еврей ногӧн Изэрдыс шусис Габбата#19:13 Габбата – грек да роч кывъясын Гаввафа.. 14Тайӧ вӧлі Ыджыд лунлы паныд, луншӧрнас. Пилат шуис иудейяслы: «Со, тіян Ӧксыныд!» 15Найӧ горӧдісны: «Босьт, тувъяв Сійӧс!» Пилат юаліс: «Тіянлысь Ӧксынытӧ-ӧ тувъяла?» Аркирейяс вочавидзисны: «Кесарысь кындзи миян мӧд ӧксыыс абу». 16Сэки Пилат сетіс Исусӧс тувъявны крестӧ. Исусӧс нуӧдісны сэтысь.

Исусӧс тувъялӧм

(Мт. 27:32-44; Мк. 15:21-32; Лк. 23:26-43)

17Крестсӧ нуигтыр Исус кайис Юр лы нима керӧсӧ, еврей ногӧн Голгопа керӧсӧ. 18Сэні Сійӧс тувъялісны крестӧ. Сыкӧд орччӧн ӧтар-мӧдарсяньыс тувъялісны кык мортӧс, а шӧракостаныс – Исусӧс. 19Пӧвтор вылӧ Пилат тшӧктіс гижны: «Назаретса Исус, иудейяслӧн Ӧксы». Гижӧдсӧ ӧшӧдісны крест вылас. 20Тайӧ гижӧдсӧ иудейясысь унаӧн лыддисны, ӧд Исусӧс тувъяланіныс вӧлі карсяньыс матын. Гижӧдсӧ вӧлі гижӧма еврей, грек да латин кывйӧн. 21Аркирейяс шуисны Пилатлы: «Эн гиж: ”Иудейяслӧн Ӧксы”. Гиж, мый Сійӧ шуліс: ”Ме – иудейяслӧн Ӧксы”». 22Пилат вочавидзис: «Мый гижи, сійӧс гижӧма нин».

23Исусӧс тувъялӧм бӧрын шыпуртаяс босьтісны Сылысь паськӧмсӧ да юкисны нёль пельӧ, быдӧнлы мыйкӧ вичмис. Босьтісны тшӧтш дӧрӧмсӧ. Дӧрӧмыс вӧлі вурыстӧм, дзоньнас кыӧма. 24Найӧ шуисны ӧта-мӧдныслы: «Огӧ косявлӧй дӧрӧмсӧ, вай пудъясям, кодлы сійӧ вичмас». Тадзи иніс Гижӧдыс:

– Ас костаныс юклӧны Менсьым паськӧмӧс,

пудъясьӧны Менам дӧрӧм вӧсна.

Тадзи вӧчисны шыпуртаяс.

25Крест дорын сулалісны Исуслӧн мамыс, мамыслӧн чойыс, Клопаслӧн Марья нима гӧтырыс да Магдала Марья. 26Мамсӧ да сыкӧд сулалысь муса велӧдчысьсӧ аддзигӧн Исус шуис мамыслы: «Аньӧй, тайӧ тэнад пиыд». 27Сэсся велӧдчысьыслы шуис: «Тайӧ тэнад мамыд». Сэксянь тайӧ велӧдчысьыс босьтіс Марияӧс ас дінас.

Исуслӧн кулӧм

(Мт. 27:45-56; Мк. 15:33-41; Лк. 23:44-49)

28Исус тӧдіс, мый ставсӧ нин вӧчӧма. Сійӧ шуис: «Горшӧй косьмӧ». Тадзи иніс Гижӧдыс. 29Сэні сулаліс вина уксус тыра доз. Шыпуртаяс кӧтӧдісны вина уксусӧн губка#19:29 Видзӧд Мт. 27:48, сэсся иссоп бедь помӧ сатшкӧмӧн матыстісны сійӧс Исуслы вомдорас. 30Винасӧ видлӧм бӧрын Исус шуис: «Ставсӧ вӧчӧма!» Сэсся нёровтіс юрсӧ да лэдзис ловсӧ.

31Ставыс тайӧ вӧлі Ыджыд лунлы паныд лунӧ. Иудейяслӧн веськӧдлысьяс эз кӧсйыны, медым шойясыс колисны крест вылын ӧшавны шойччан лун кежлӧ, ӧд матыстчис Ыджыд лун. Та вӧсна корисны Пилатӧс, медым тшӧктіс чегъявны тувъялӧмаяслысь кокчӧр лыяссӧ да лэдзны найӧс крест вылысь. 32Шыпуртаяс локтісны да чегъялісны Исускӧд орччӧн тувъялӧмаяслысь кокчӧр лыяссӧ. 33Исус дінӧ матыстчӧм бӧрын найӧ аддзисны, мый Сійӧ кулӧма нин. Та вӧсна кокчӧр лыяссӧ Сылысь эз чегъявны. 34Шыпуртаяс пиысь ӧти бытшкис Исуслы шынас ордлы костас, сэтысь чепӧсйис вир да ва. 35Тайӧс аддзылысь висьталӧ та йылысь, медым ті эскинныд. Сылӧн висьталӧмыс веськыд. Сійӧ тӧдӧ, мый висьталӧ збыльсӧ. 36Ставыс лои Гижӧдыс серти: «Сылысь лысӧ оз ло чегъялӧма». 37Мӧдлаын тшӧтш гижӧма: «Найӧ видзӧдласны Сы вылӧ, кодӧс бытшкисны».

Исусӧс дзебӧм

(Мт. 27:57-61; Мк. 15:42-47; Лк. 23:50-56)

38Аримафеяысь Ӧсип вӧлі Исуслӧн гуся велӧдчысь, ӧд сійӧ поліс иудейяслӧн веськӧдлысьясысь. Сійӧ муніс Пилат дінӧ да корис Исуслысь шойсӧ, и Пилат лэдзис босьтны. Ӧсип муніс да босьтіс Исуслысь шойсӧ. 39Сэтчӧ локтіс тшӧтш Никодим, коді коркӧ войнас воліс Исус дінӧ. Сійӧ вайис комын кило кымын смирнаысь да алоэысь вӧчӧм мавтас. 40Найӧ босьтісны Исуслысь шойсӧ да гартыштісны сійӧс дзебан дӧраӧ. Дӧрасӧ вӧлі кӧтӧдӧма чӧскыд дука мавтасӧн. Тадзи дзеблісны иудейяс кулӧмаясӧс. 41Исусӧс тувъяланінсянь матын вӧлі сад йӧр. Сэні вӧлі выль дзебанін, кытчӧ некодӧс на эз дзеблыны. 42Матыстчис иудейяслӧн шойччан лун, та вӧсна Исуслысь шойсӧ пуктісны тайӧ дзебанінас, ӧд дзебаніныс вӧлі матын.

Currently Selected:

Иоан 19: КБ

Highlight

Copy