Иоан 21
21
Исус бара петкӧдчӧ велӧдчысьясыслы
1Та бӧрти Исус петкӧдчис велӧдчысьясыслы Тиверия ты дорын. Сійӧ петкӧдчис тадзи.
2Симон-Петыр, Двӧйнипӧв Фома, Канаысь, галилеяса карысь, Нафанаил, Зеведейлӧн пияныс да нӧшта кык велӧдчысь вӧліны ӧтлаынӧсь. 3Симон-Петыр шуис: «Ме муна чери кыйны». Сылы шуисны: «Ми тшӧтш тэкӧд мунам». Найӧ дзик пыр пуксисны пыжӧ да петісны ва вылӧ. Сійӧ войнас налы нинӧм эз шед.
4Водз асывнас Исус сулаліс вадорас, но велӧдчысьясыс эз тӧдны Сійӧс. 5Исус юаліс налысь: «Ёртъясӧй, шедіс-ӧ тіянлы чериныд?» Найӧ шуисны: «Эз». 6Исус шуис: «Чӧвтӧй тывнытӧ пыж веськыдладорас, сэки шедас». Найӧ чӧвтісны. Чериыс шедіс сэтшӧм уна, весиг васьыс тывсӧ эз вермыны кыскыны. 7Сэки велӧдчысьыс, коді вӧлі муса Исуслы, шуис Петырлы: «Тайӧ Господь». Симон-Петыр сэки вӧлі пӧрччысьӧма. Но кор кыліс, мый тайӧ Господь, сійӧ ӧдйӧ пасьтасис да чеччыштіс ваас. 8Мукӧд велӧдчысьыс локтісны пыжнас да кыскисны чери тыра тывсӧ. Найӧ вӧліны матынӧсь вадорсяньыс, воськов кыксё сайын.
9Вадорас матыстчӧм бӧрын найӧ аддзисны ӧгыръяс вылысь чери, орччӧн вӧлі нянь. 10Исус шуис налы: «Вайыштӧй кыйӧм черинытӧ». 11Симон-Петыр муніс да кыскис му вылас тывсӧ. Сэні тырыс вӧлі гырысь чери. Чериыс вӧлі сё ветымын куим, но тывйыс эз косяссьы. 12Исус шуис налы: «Локтӧй, сёйӧй». Велӧдчысьясыс эз лысьтны юавны Сылысь: «Коді Тэ?» Найӧ тӧдісны, мый Сійӧ Господь. 13Исус матыстчис, босьтіс няньсӧ да сетіс сійӧс велӧдчысьясыслы, черисӧ тшӧтш сетіс.
14Тайӧ вӧлі коймӧдысь нин, кор Исус петкӧдчис Аслас велӧдчысьяслы ловзьӧм бӧрас.
Исус да Петыр
15Сёйӧм бӧраныс Исус шуис Симон-Петырлы: «Симон, Ионалӧн пи, мусаджык-ӧ Ме тэныд налы дорысь?» Петыр шуис: «Мусаджык, Господьӧй! Тэ тӧдан, мый Тэ меным муса». Исус шуис сылы: «Йирсьӧд Менсьым баляясӧс». 16Сэсся мӧдысь юаліс Петырлысь: «Симон, Ионалӧн пи, муса-ӧ Ме тэныд?» Петыр шуис Сылы: «Муса, Господьӧй. Тэ тӧдан, мый Тэ меным муса». Исус шуис сылы: «Видз Менсьым ыжъясӧс». 17Сэсся коймӧдысь юаліс: «Симон, Ионалӧн пи, муса-ӧ Ме тэныд?» Петыр шогӧ усис, мый Исус коймӧдысь юаліс, муса-ӧ Сійӧ, да вочавидзис: «Господьӧй, Тэ ставсӧ тӧдан. Тэ тӧдан, мый Тэ меным муса». Исус шуис сылы: «Йирсьӧд Менсьым ыжъясӧс. 18Веськыда, веськыда висьтала тэныд: томдырйиыд тэ ачыд вӧнясьлін да ветлін, кытчӧ кӧсйин. Пӧрысьман да, нюжӧдан китӧ, сэки мӧд тэнӧ вӧньӧдас да нуӧдас, кытчӧ он кӧсйы».
19Тайӧс висьталӧмнас Исус сетіс тӧдны, кутшӧм ногӧн ковмас кувны Петырлы да нимӧдны Енмӧс. Сэсся шуис Петырлы: «Лок Ме бӧрся».
Исус да мӧд велӧдчысьыс
20Петыр бергӧдчыліс бӧрланьыс да аддзис, мый на бӧрся локтӧ сійӧ велӧдчысьыс, коді вӧлі муса Исуслы. Рытъя сёйигӧн Исуслы морӧс бердас топӧдчӧмӧн буретш сійӧ юавліс: «Господьӧй, коді нӧ Тэнӧ вузалас?» 21Сійӧс аддзигӧн Петыр юаліс Исуслысь: «Господьӧй, а сійӧс мый виччысьӧ?» 22Исус шуис Петырлы: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна? Тэ лок Ме бӧрся».
23Та вӧсна эскысьяс пӧвстын паськаліс сёрни, мый тайӧ велӧдчысьыс оз кув. Исус эз шу Петырлы, мый тайӧ велӧдчысьыс оз кув. Сійӧ шуис сӧмын: «Ме кӧ кӧсъя, медым сійӧ оліс Менам локтӧдз, мый тэ майшасян та вӧсна?»
24Буретш сійӧ велӧдчысьыс висьталӧ та йылысь, и сійӧ гижис ставсӧ тайӧс. И ми тӧдам, мый сылӧн висьталӧмыс веськыд.
25Уна мукӧдтор на вӧчис Исус. Но гижны кӧ та йылысь ставсӧ, сэки, ме чайта, муюгыдас эськӧ эз тӧр та мында небӧгыс. Аминь.
Currently Selected:
Иоан 21: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
