Лука 12

Видзчысьӧй кык бана оласногысь

(Мт. 10:26-27)

1Сэккості чукӧрмис уна сюрс морт, найӧ весиг дзескӧдісны ӧта-мӧднысӧ.

Исус медводз шыасис велӧдчысьяс дінас: «Видзчысьӧй фарисей няньшомысь, налӧн кодь кык бана оласногысь. 2Став дзебӧмаыс тыдовтчас да став гусяыс йӧзасяс. 3Пемыдын шуӧмтӧ кыласны югыдын, керка пытшкын пельӧ вашкӧдӧмтӧ юӧртасны керка вывсянь».

Кодысь колӧ повны?

(Мт. 10:28-31)

4«Ёртъясӧй, висьтала тіянлы: энӧ полӧй вир-яйтӧ виысьясысь, унджыксӧ найӧ сэсся вӧчны оз вермыны. 5Висьтала, кодысь колӧ повнысӧ. Полӧй Сыысь, коді виӧм бӧрас вермӧ шыбитны адӧ. Шуа тіянлы: Сыысь полӧй. 6Оз-ӧ сӧмын кык урысь вузавны вит пышкайӧс? На пиысь весиг ӧтиӧс абу вунӧдӧма Енмыс. 7А тіянлысь став юрсинытӧ лыддьӧма. Сідзкӧ, энӧ полӧй, ті ӧд донаджыкӧсь пышкайясысь».

Кристосысь соссьӧм

(Мт. 10:19-20,32-33; 12:32; Мк. 3:28-29)

8«Висьтала тіянлы: коді оз яндысь Меысь йӧз водзын, сыысь Морт Пи оз яндысь Енлӧн анделъяс водзын. 9Коді соссяс Меысь йӧз водзын, сыысь Ме сосся Енлӧн анделъяс водзын. 10Коді лёкӧдас Морт Пиӧс, сійӧс лоӧ прӧститӧма. Но коді омӧльтас Вежа Лолӧс, сійӧс оз ло прӧститӧма.

11Кор тіянӧс нуӧдасны синагогаясӧ да юралысь-веськӧдлысьяс водзӧ, энӧ майшасьӧй, кыдзи дорйыны асьнытӧ да мый шуны. 12Сійӧ кадас Вежа Лов туйдӧдас тіянӧс, мый колӧ шунысӧ».

Вежӧртӧм озыр морт йылысь велӧданвисьт

13Йӧз чукӧрысь ӧти морт шуис Исуслы: «Велӧдысь, шу вокӧйлы, мед бать-мамсянь кольӧм овмӧссӧ юкас мекӧд». 14Исус шуис: «Коді пуктіс Менӧ ёрдысьӧ, мед тіянлысь овмӧснытӧ юкны?» 15Сэсся шуис ставныслы: «Видзчысьӧй горшасьӧмысь, ӧд мортыдлӧн олӧмыс абу сылӧн ыджыд озырлун сайын».

16Исус висьталіс налы велӧданвисьт:

«Озыр мортлӧн муыс бур быдтас сетас. 17Сійӧ мӧвпыштас: ”Мый вӧчны? Быдтасӧй видзанінъясӧ оз тӧр”. 18Сэсся шуас: ”Косяла йӧртӧдъясӧс да вӧча гырысьджыкӧс, чукӧрта сэтчӧ став няньӧс да ассьым став эмбурӧс. 19Сэки шуа аслым: уна эмбур тэнад чӧжӧма, тырмас уна во кежлӧ – шойччы, сёй, ю да гажӧдчы!” 20А Ен шуас сылы: ”Вежӧртӧмӧй, тавой босьтасны тэнсьыд ловтӧ. Кодлы коляс тэнад чӧжӧмаыд?”

21Тадзи лоӧ быдӧнкӧд, коді аслыс чукӧртӧ озырлунсӧ, а оз Енсянь озырмӧдчы».

Энӧ майшасьӧй

(Мт. 6:19-21,25-34)

22Исус шуис велӧдчысьясыслы: «Та вӧсна шуа тіянлы: энӧ майшасьӧй сёян да паськӧм вӧсна. 23Олӧмныд ӧд донаджык сёянысь, вир-яйныд – паськӧмысь. 24Видзӧдлӧй кырнышъяс вылӧ: найӧ оз кӧдзны, оз вундыны, налӧн абу йӧртӧдъяс, абу эмбур видзанінъяс, но Енмыс вердӧ найӧс. Кымын пӧв ті донаджыкӧсь лэбачьясысь! 25Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ? 26Ті кӧ весиг ичӧтикторсӧ онӧ вермӧй, мыйла мукӧдторйыс вӧсна майшасянныд?

27Видзӧдлӧй видз вылын быдмысь дзоридзьяс вылӧ: найӧ оз мырсьыны, оз печкыны. Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка. 28Енмыс кӧ тадзи пасьтӧдӧ видзвыв турунӧс, коді талун быдмӧ, а аски веськалӧ пачӧ, оз ӧмӧй Сійӧ пасьтӧд тіянӧс, этша эскысьяс!

29Энӧ корсьысьӧй, мый сёйны-юны. Энӧ майшасьӧй та вӧсна. 30Тайӧ ставыс майшӧдлӧ ентӧдтӧмъясӧс. Но тіян Батьныд тӧдӧ, мый тайӧ колӧ тіянлы. 31Корсьӧй Енлысь Юралӧмсӧ, сэки тіян ставыс тайӧ лоӧ.

32Эн пов, ичӧт чукӧр! Ӧд тіян Батьныд шуис сетны тіянлы Юралӧм. 33Вузалӧй ассьыныд овмӧстӧ, сьӧмсӧ сетӧй гӧльяслы. Лӧсьӧдӧй аслыныд важмытӧм видзанінъяс да чӧжӧй бырлытӧм озырлун енэжӧ. Сэтчӧ гусясьысь оз пыр да сэні воз оз сёй. 34Кӧні ӧд озырлунныд, сэні лоӧ и сьӧлӧмныд».

Ыджыднысӧ виччысьысьяс

(Мт. 24:42-44)

35«Вӧнясьӧй да ӧзтӧй бинытӧ. 36Лоӧй кесйӧгъяс кодьӧсь, кодъяс виччысьӧны асланыс ыджыдлысь кӧлысь вылысь локтӧмсӧ. Воӧм бӧрас ыджыдныс тотшкӧдчас ӧдзӧсас, да найӧ пырысь-пыр восьтасны. 37Кесйӧгъяс шудаӧсь, ыджыдыс кӧ гортас воигӧн аддзас, мый найӧ виччысьӧны сійӧс. Веськыда висьтала тіянлы: ыджыдыс сэки вӧнясяс, корас кесйӧгъяссӧ пызан сайӧ да ачыс пондас кесъявны налы. 38Ыджыдыс кӧ воас весиг войшӧрнас либӧ войшӧр бӧрас да аддзас, мый кесйӧгъясыс виччысьӧны сійӧс – тайӧ кесйӧгъясыс шудаӧсь!

39Ті гӧгӧрвоанныд тайӧс: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас. 40Лоӧй дасьӧсь, ӧд Морт Пи локтас виччысьтӧг».

Бур кесйӧг да шогмытӧм кесйӧг йылысь велӧданвисьт

(Мт. 24:45-51)

41Петыр юаліс: «Господьӧй, тайӧ велӧданвисьтсӧ висьталан миянлы али быдӧнлы?»

42Господь шуис: «Лоӧй эскана да мывкыд кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ сетны налы сёян-юан. 43Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн. 44Збыльысь висьтала тіянлы: ыджыдыс пуктас сійӧс веськӧдлыны став аслас овмӧсӧн.

45Но кесйӧгыс вермас мӧвпыштны: ”Ыджыдӧй дыр на оз лок”. Сійӧ пондас нӧйтны мукӧд кесйӧгъясӧс, сёйны-юны да кодавны. 46Но виччысьтӧм лунӧ, лӧсявтӧм кадӧ, кесйӧглӧн ыджыдыс воас. Сійӧ кералас кесйӧгсӧ да шыбитас сійӧс эскытӧмъяс дінӧ.

47Кесйӧг кӧ тӧдӧ ыджыдыслысь кӧсйӧмсӧ да оз дасьтысь-вӧч сы ног, сійӧс чорыда нӧйтасны. 48А тӧдтӧг кӧ вӧчас мыжсӧ, сійӧс нӧйтасны этшаджык. Кодлы уна сетӧма, сылысь уна корасны. Кодлы уна эскӧма, сылысь уна юаласны».

Исус вайис торйӧдӧм, эз лӧнь олӧм

(Мт. 10:34-36)

49«Ме локті би вайны му вылӧ да ёна кӧсъя, медым сійӧ ӧзйис нин. 50Пыртчӧмӧн колӧ Меным пыртчыны, и Ме ёна сьӧкыдала, кытчӧдз тайӧ оз ло. 51Ті ног, Ме локті вайны му вылӧ лӧнь олӧм? Эг! Ме локті торйӧдны йӧзсӧ. 52Ӧнісянь ӧти керкаын вит олысь ӧта-мӧдныслы паныд сувтасны: куимыс – кыкыслы паныд, кыкыс – куимыслы. 53Батьыс паныд сувтас пиыслы, пиыс – батьыслы, мамыс – нылыслы, нылыс – мамыслы, энькаыс – моньыслы, моньыс – энькаыслы».

Кадлӧн пасъяс

(Мт. 16:2-3)

54Исус висьталіс йӧзыслы: «Рытыввывсянь кыпӧдчысь кымӧр аддзигӧн ті шуанныд, зэрмас пӧ. Тайӧ тадзи. 55Лун тӧв кӧ петас, шуанныд, пӧжны пӧ кутас. Тадзи и эм. 56Кык бана шаньгаяс! Енэжлысь да мулысь чужӧмбансӧ кужанныд тӧдмавны. А мыйла ӧнія кадсӧ онӧ вермӧй тӧдны?»

Мыжалыськӧд бурасьӧм

(Мт. 5:25-26)

57«Мыйла асьныд онӧ вермӧй гӧгӧрвоны, кыдзи колӧ вӧчнысӧ? 58Ковмас кӧ мунны ёрдӧ, зіль бурасьны тэнӧ мыжалыськӧд ёрдӧ вотӧдзыд на. Он кӧ вӧч тадзи, сійӧ нуӧдас тэнӧ ёрдысь дінӧ, ёрдысь сетас тэнӧ шыпурталы, а сійӧ йӧртас тэнӧ дзескыдінӧ. 59Висьтала тэныд: бӧръя сьӧмтӧ сеттӧдз он пет сэтысь».

Currently Selected:

Лука 12: КБ

Highlight

Copy