Лука 4

Исус овтӧминын

(Мт. 4:1-11; Мк. 1:12-13)

1Исус локтіс Йӧрдан ю дорысь. Сійӧ вӧлі тырӧма Вежа Лолӧн, и Лов нуӧдіс Сійӧс овтӧминӧ. 2Сэні нелямын лун чӧж омӧль ыштӧдіс Сійӧс. Став тайӧ кадсӧ Исус нинӧм эз сёй, бӧрыннас кынӧмыс сюммис. 3Сэки омӧль шуис Сылы: «Тэ кӧ Ен Пи, пӧрт тайӧ изсӧ няньӧ». 4Исус воча шуис: «Гижӧма: ”Оз куш няньӧн мортыд ов, а Енсянь быд шуӧм кывйӧн”».

5Омӧль вайӧдіс Исусӧс джуджыд керӧс йылӧ да петкӧдліс Сылы син лапнитігкості таладор югыдсьыс став мусӧ. 6Сэсся шуис: «Сета Тэныд став мусӧ мичлун-озырлуннас, ӧд ставсӧ тайӧс сетӧма меным. Ме верма сетны сійӧс кодлы кӧсъя. 7Копыртчылан кӧ меным, ставыс тайӧ лоӧ Тэнад». 8Исус вочавидзис: «Вешйы Ме дінысь, сӧтана! Гижӧма: ”Господьлы, аслад Енлы, копрась да сӧмын Сылы кесъяв”».

9Омӧль нуӧдіс Исусӧс Ерусалимӧ, сувтӧдіс Сійӧс крам вевт вылӧ да шуис: «Тэ кӧ Ен Пи, шыбитчы тасянь. 10Гижӧма ӧд: ”Аслас анделъяслы Сійӧ тшӧктӧ видзны Тэнӧ. 11Найӧ нуасны Тэнӧ ки выланыс, видзасны изйӧ крукасьӧмысь”». 12Исус воча шуис: «Шуӧма: ”Эн дӧзмӧд Господьӧс, ассьыд Ентӧ”».

13Быд ногыс ыштӧдӧм бӧрын омӧльыс кад кежлӧ эновтіс Исусӧс.

Исусӧс вӧтлӧны Аслас карысь

(Мт. 4:12-17; 13:53-58; Мк. 1:14-15; 6:1-6)

14Исус бӧр локтіс Галилеяӧ, Сійӧ вӧлі тырӧма Лов вынӧн. Сы йылысь сёрниыс паськаліс сэтчӧс му пасьтала. 15Исус велӧдіс синагогаясын, и став йӧзыс ошкисны Сійӧс.

16Исус локтіс Назаретӧ, кӧні Сійӧ быдмис. Шойччан лунӧ, кыдзи пыр вӧчліс, Сійӧ муніс синагогаӧ. Сэні сувтіс лыддьыны Гижӧд. 17Сылы сетісны Исай пророклысь небӧг. Исус восьтіс небӧгсӧ, корсис тайӧ кывъяссӧ да лыддис:

18– Господьлӧн Лолыс Ме вылын,

ӧд Сійӧ мавтыштіс Менӧ

висьтавны Бур Юӧр коньӧръяслы.

Сійӧ мӧдӧдіс Менӧ

бурдӧдны доймӧм сьӧлӧмаясӧс,

юӧртны дзескыдінӧ йӧршитӧмаяслы мездлун йылысь,

восьтны синтӧмъяслысь синсӧ,

мездыны нартитӧмаясӧс,

19юӧртны Господьлӧн буралан кад йылысь.

20Исус тупкис небӧгсӧ да сетіс синагогаса кесъялысьлы, Ачыс пуксис. Синагогаын ставӧн сюся видзӧдісны Сы вылӧ. 21Сэки Исус пондіс висьтавны налы: «Ӧні, тіян кывзігӧн, иніс тайӧ гижӧдыс». 22Ставӧн ошкисны Исусӧс да шензисны Сы вомысь петӧм буралан кывъясысь да шуалісны: «Абу-ӧ Сійӧ Ӧсиплӧн пи?»

23Исус шуис налы: «Ті, дерт, Меным шуанныд тайӧ кывйӧзсӧ: ”Бурдӧдысь, бурдӧд Асьтӧ”, да шуанныд: ”Ми кывлім Капернаум карын лоӧмтор йылысь. Вӧч сійӧс тшӧтш тані, Аслад карын”». 24Исус водзӧ шуис: «Веськыда висьтала тіянлы: пророкӧс ас муас оз сибӧдны. 25Збыльысь висьтала тіянлы: Илля пророк дырйи куим во да джын зэр тусь эз усьлы енэжсьыс, та вӧсна унаӧн тшыгъялісны му пасьталаыс. Сэки уна дӧва вӧлі Израильын. 26На пиысь весиг ӧти дінӧ эз вӧв мӧдӧдӧма Илляӧс, сӧмын Сарептаын, сидонса карын, олысь дӧва дінӧ. 27Елисей пророк дырйи Израильын унаӧн висисны проказаӧн, но сирияса Нееманысь кындзи некод эз бурд».

28Тайӧс кылӧм бӧрын синагогаын ставныс пузисны. 29Найӧ сувтісны, медым вӧтлыны Исусӧс карсьыс. Сійӧс нуӧдісны кыр йылӧ, кӧні сулаліс карыс, да сэсянь кӧсйисны йӧткыштны Сійӧс увлань. 30Но Исус муніс на пӧвстӧд да ылыстчис.

Пеж лолӧс вӧтлӧм

(Мк. 1:21-28)

31Сэсся Исус локтіс Капернаумӧ, галилеяса карӧ. Шойччан лунӧ Сійӧ велӧдіс сэні. 32Йӧзыс шензисны Сылӧн велӧдӧмысь, ӧд Сійӧ сёрнитіс ыджыдалысьӧ пуктӧм морт моз.

33Синагогаын вӧлі пеж лолӧн кутӧм морт. Сійӧ ыджыд шыӧн горӧдіс: 34«Мый Тэныд колӧ миянсянь, Назаретса Исус? Тэ локтін бырӧдны миянӧс? Тӧда, коді Тэ. Тэ – Енлӧн Вежаыс!» 35Исус ӧлӧдіс пеж лолӧс: «Ланьт! Пет сы пытшкысь». Пеж лов шыбитіс мортсӧ синагога джодж шӧрӧ, сэсся сійӧс дойдавтӧг петіс сы пытшкысь. 36Ставныс чуймисны да ӧта-мӧдныслы шуалісны: «Мый тайӧ? Сылӧн сэтшӧм вын! Весиг пеж ловъяс петӧны Сылӧн тшӧктӧмысь». 37Исус йылысь сёрниыс паськаліс сэтчӧс му пасьтала.

Висьысьясӧс бурдӧдӧм

(Мт. 8:14-17; Мк. 1:29-39)

38Синагогаысь петӧм бӧрын Исус локтіс Симон ордӧ. Симон гӧтырлӧн мамыс ёна висис биа висьӧмӧн. Исусӧс корисны отсавны сылы. 39Ань дінӧ матыстчӧмӧн Исус ӧлӧдіс биа висьӧмсӧ, и биа висьӧмыс эновтіс аньӧс. Сійӧ дзик пыр чеччис да пондіс кесъявны налы.

40Шонді лэччигӧн вайӧдісны Исус дінӧ быдсикас висьысьӧс. Кисӧ быдӧн вылӧ пуктылӧмӧн Сійӧ бурдӧдаліс найӧс. 41Пеж ловъяс петісны уна йӧз пытшкысь да горзісны: «Тэ – Кристос, Ен Пи!» Исус ӧлӧдіс тайӧс висьтавлӧмысь, ӧд найӧ тӧдісны, мый Сійӧ – Кристос.

42Асывводзнас Исус муніс сэтысь овтӧминӧ. Йӧзыс корсисны Сійӧс да аддзӧм бӧраныс эз лэдзны Сійӧс мунны на дінысь. 43Исус шуис налы: «Мукӧд каръясын Меным тшӧтш колӧ висьтавлыны Ен Юралӧм йылысь Бур Юӧрсӧ, ӧд та могысь Менӧ мӧдӧдӧма». 44Сійӧ ветлӧдліс Галилея муӧд да висьтавліс Бур Юӧр синагогаясын.

Currently Selected:

Лука 4: КБ

Highlight

Copy