Марк 12
12
Виноград быдтысьяс йылысь велӧданвисьт
(Мт. 21:33-46; Лк. 20:9-19)
1Исус кутіс висьтавны налы велӧданвисьтъясӧн:
«Морт пуктас аслас йӧрӧ виноград, гӧгӧрыс потшас, вотӧс пычкан гу кодъяс да башня лэптас. Сэсся йӧрсӧ виноград быдтысьяслы кӧртымӧ сетас, ачыс мунас.
2Вотӧс чукӧртан кадӧ овмӧс кутысь мӧдӧдас кесйӧгсӧ босьтны чукӧртӧм вотӧсысь ассьыс пайсӧ. 3Виноград быдтысьяс кутасны кесйӧгсӧ, нӧйтасны да вӧтласны сійӧс куш киӧн. 4Овмӧс кутысь мӧд кесйӧгӧс мӧдӧдас. Сійӧс вачкасны изйӧн юрас, лёкысь сераласны сы вылын да вӧтласны. 5Мӧдӧдас коймӧдӧс, а сійӧс виасны. Уна мукӧдӧс на мӧдӧдас, но ӧтиясӧс нӧйтасны, мӧдъясӧс виасны.
6Овмӧс кутысьлӧн нӧшта вӧлі ӧти – аслас муса пиыс. Медбӧрти виноград быдтысьяс дінӧ мӧдӧдас писӧ, мӧвпыштас: ”Менам пиысь, гашкӧ, яндысясны”. 7Виноград быдтысьяс шуасны ӧта-мӧдныслы: ”Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”. 8Найӧ кутасны сійӧс да виасны, шойсӧ виноград йӧр сайӧ шыбитасны.
9Мый вӧчас овмӧс кутысь? Сійӧ локтас, виноград быдтысьясӧс виас, а йӧрсӧ мукӧдлы сетас. 10Энӧ ӧмӧй Гижӧдсьыс лыддьылӧй тайӧс:
– Изйыс, кодӧс ӧтдортісны керка лэптысьяс,
лоис пельӧс изйӧн.
11Тайӧ Господьсянь
да шензьӧдӧ миянӧс».
12Найӧ гӧгӧрвоисны, мый велӧданвисьтыс вӧлі на йылысь. Кӧсйисны кутны Исусӧс, но полісны йӧзсьыс. Сэки эновтісны Сійӧс да мунісны.
Вот мынтӧм йылысь
(Мт. 22:15-22; Лк. 20:20-26)
13Сэсся найӧ мӧдӧдісны Исус дінӧ Ирӧдлысь йӧзсӧ да фарисейяс пиысь кодсюрӧӧс, медым Исусӧс кыйны сёрниас. 14Найӧ локтісны да шуисны Сылы: «Велӧдысь, ми тӧдам, мый Тэ веськыда сёрнитан да он пов йӧзлӧн шуасьӧмысь. Тэ он видзӧд морт вылӧ, а веськыда велӧдан Енлӧн туйӧ. Висьтав, миянлы позьӧ вот мынтыны кесарлы?» 15Исус тӧдіс, мый найӧ кык бана шаньгаяс, да шуис налы: «Мыйла ті зілянныд кыйны Менӧ? Петкӧдлӧй Меным динартӧ». 16Найӧ вайисны. Исус юаліс: «Кодлӧн тані чужӧмыс-нимыс?» Найӧ вочавидзисны: «Кесарлӧн». 17Исус шуис налы: «Кесарлысь сетӧй кесарлы, а Енлысь – Енлы». Исус шемӧсмӧдіс найӧс.
Саддукейяс юасьӧны ловзьӧм йылысь
(Мт. 22:23-33; Лк. 20:27-40)
18Исус дінӧ локтісны саддукейяс, кодъяс шуӧны, ловзьӧмыс пӧ абу. Найӧ юалісны Исуслысь: 19«Велӧдысь, Мӧисей гижӧма, мый ныв-питӧм морт кӧ кулас, вокыслы колӧ босьтны кулӧм вокыслысь дӧвасӧ гӧтырӧ да нюжӧдны вокыслысь рӧдсӧ. 20Сизим вок вӧлі. Ыджыдыс гӧтрасис, сэсся куліс, ныв-пиыс сылӧн эз вӧв. 21Гӧтырсӧ мӧд вокыс босьтіс, сійӧ тшӧтш ныв-питӧг куліс. Сэсся коймӧдыс босьтіс. 22Тадзи сизимнанныс гӧтрасисны да кулісны ныв-питӧг. Медбӧрын аньыс куліс. 23Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?» 24Исус вочавидзис: «Гижӧдъяссӧ да Енлысь вынсӧ ті онӧ тӧдӧй, та вӧсна ылалӧмныд. 25Ловзьӧмаяс оз гӧтрасьны да верӧс сайӧ оз мунны. Найӧ енэжвыв анделъяс кодьӧсь. 26Ловзьӧм йылысь шуа – ті ӧмӧй энӧ лыддьылӧй Мӧисей небӧгысь сотчысь лежнӧг дорын вӧвлӧмтор йылысь? Ен шуис Мӧисейлы: ”Ме Ӧвраамлӧн Ен, Исааклӧн Ен да Яковлӧн Ен”. 27Енмыс абу кулӧмаяслӧн Ен, Сійӧ ловъяяслӧн Ен. Ті ёна ылалӧмныд».
Медыджыд тшӧктӧм
(Мт. 22:34-40; Лк. 10:25-28)
28Индӧдӧ велӧдысьясысь ӧти казяліс вензьӧмсӧ да кыліс Исуслысь бура вочавидзӧмсӧ. Сійӧ матыстчис Исус дінӧ да юаліс: «Став тшӧктӧм пиысь кутшӧм медыджыдыс?» 29-30Исус вочавидзис: «Кывзы, Израиль! Господь, миян Енным, эм ӧти Господь. Радейт Господьӧс, ассьыд Ентӧ, став сьӧлӧмнад, став олӧмнад, став мывкыднад да став выннад. Тайӧ медыджыд тшӧктӧм. 31Мӧд тшӧктӧмыс – радейт матыссатӧ асьтӧ моз. Тайӧ кык тшӧктӧмыс ӧткодь, наысь ыджыдджыкыс абу». 32Индӧдӧ велӧдысь шуис Исуслы: «Тадз, Велӧдысьӧй! Тэ веськыда висьталін, эм ӧти Ен, мӧдыс абу. 33Енмӧс колӧ радейтны став сьӧлӧмнад, став мывкыднад, став олӧмнад да став выннад, и матыссатӧ колӧ радейтны асьтӧ моз. Сотан вись да мукӧд вись дорысь тайӧ коланаджык». 34Исус аддзис, мый сійӧ сюся сёрнитӧ, да шуис: «Тэ абу ылын Енлӧн Юралӧмысь». Та бӧрын некод нин эз лысьт юасьны Исуслысь.
Давид пи йылысь юалӧм
(Мт. 22:41-46; Лк. 20:41-44)
35Крамын велӧдігӧн Исус шуис: «Мыйла нӧ Индӧдӧ велӧдысьяс шуӧны, Кристос пӧ Давид пи? 36Вежа Ловсянь сёрнитігас Давид ачыс шуӧ:
– Господь шуис менам Ыджыдлы:
”Пукав Менам веськыдладорын,
кытчӧдз ог пукты Тэнад кок улӧ Тэнӧ мустӧмтысьясӧс”.
37Давид шуӧ Сійӧс Господьӧн. Кыдзи нӧ Сійӧ Давидлы пиӧн лоӧ?»
Видзчысьӧй Индӧдӧ велӧдысьясысь!
(Мт. 23:1-36; Лк. 20:45-47)
Унаӧн окотапырысь кывзісны Исусӧс. 38Велӧдігас Сійӧ висьтавліс: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, 39синагогаын водзын пукавны да гажӧдчанінын бурджыклаӧ пуксьыны. 40Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».
Дӧвалӧн сьӧм сетӧм
(Лк. 21:1-4)
41Исус пуксис сьӧм чукӧртан кудлы паныд да видзӧдіс, кыдзи йӧзыс пуктісны сэтчӧ сьӧм. Озыръяс уна пуктісны. 42Локтіс гӧль дӧва да пуктіс кык ыргӧн сьӧм, тайӧ лоӧ ӧти ур мында. 43Исус корис велӧдчысьяссӧ да шуис налы: «Веськыда висьтала тіянлы: тайӧ гӧль дӧваыс быдӧнысь унджык пуктіс. 44Ставныс унасьыс чуктӧдісны, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».
Currently Selected:
Марк 12: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
