ዮሃንሳ 18
18
የሱሲ ኦይከትስ
(ማቶ 26:47-56፤ ማር 14:43-50፤ ሉቃ 22:47-53)
1የሱሲ ዎሳ ኦንግዳፐ ጉየ፥ ባ ታማረታራ ቀድሮና ዛንጋራ ፕንድ፥ ሄ በሳን ደእያ አታክልትያ ግዶ ገልዶሶና። 2የሱሲ ኡባ ዎደ ባ ታማረታራ ያን ሺቅያ ግሾ የሱሳ አድ እምዳ ይሁድ ሄ በሳ ኤሬስ። 3ሄሳ ግሾ፥ ይሁድ ፓኖሰ፥ ፆምፐ፥ ቶራነ ጎንዳለ ኦይክዳ ዳሮ ዎታዳረታ፥ ካህነ ሀላቃትነ ፋርሳወት ኪትዳ ፆሳ ኬ ናግያ ዎታዳረታ ካለ ኤክድ፥ ሄ በሳ ብስ።
4የሱሲ ባና ጋካና ሀንያባ ኡባ ኤርድ፥ ጋፃ ከይድ፥ “ኦና ኮዬቲ?” ያግስ።
5ኤንቲ ዛሪድ፥ “ናዝረተ የሱሳ ኮዮስ” ያግዶሶና።
እ ዛሪድ፥ “ታኒ የሱሳ” ያግስ።
የሱሳ አድ እምዳ ይሁድ ያን ኤንታራ ኤቅስ። 6እ፥ “ታኒ የሱሳ” ግዳ ዎደ ኤንቲ ጉየ ሺቅድ፥ ሳአን ኩንድዶሶና። 7የሱሲ ቃስካ፥ “ኦና ኮዬቲ?” ያግድ ኦይችስ።
ኤንቲ፥ “ናዝረተ የሱሳ ኮዮስ” ያግዶሶና።
8እ ዛሪድ፥ “ታኒ የሱሳ ግደይሳ ህንተዉ ኦዳስ። ህዛ፥ ህንተ ታና ኮያባ ግድኮ ሀይሳታ የድተ” ያግስ። 9እ ሄሳ ግዳይ፥ “አዋዉ፥ ኔኒ ታዉ እምዳይሳታፐ ሀር አቶሽን እሱዋካ ይሳብከ” ግዳይስ ፖለታና መላሳ።
10ስሞን ጰፅሮሳስ ማሻይ ደኤስ። እ ሄ ማሻ ሾድድ ካህነ ሀላቃ አይልያስ ኡሻቻ ሀይ ሾጭድ፥ ቃንፅ የግስ። ሄ አይልያ ሱንይ ማልኮሳ። 11የሱሲ ጰፅሮሳኮ፥ “ነ ማሻ ሾሁዋን ዛራ። ታ አዋይ ታዉ እምዳ ፁአፐ ታኒ ኡዮናባ ነዉ ዳኒ?” ያግስ።#ማቶ 26:39፤ ማር 14:36፤ ሉቃ 22:42.
የሱሲ ሃና ስንን
(ማቶ 26:57-58፤ ማር 14:53-54፤ ሉቃ 22:54)
12ሮመ ዎታዳረትነ ኤንታ ሀላቃይ ፆሳ ኬ ናግያ ዎታዳረታራ እስፈ የሱሳ ኦይክድ ቃችዶሶና። 13ኮይሮ የሱሳ ሃናኮ ኤፍዶሶና። ሃን ሄ ላይ ካህነ ሀላቃ ግድያ ቃያፋ ቦሎ። 14ቃያፍ፥ “አሳ ኡባ ግሾ፥ እስ አስ ሀይቅኮ ሎኦ” ግድ ካሰ አይሁደታ ዞርዳይሳ።#ዮሀ 11:49-50.
ጰፅሮስ የሱሳ ኮይሮ ካዱዋ
(ማቶ 26:69-70፤ ማር 14:66-68፤ ሉቃ 22:55-57)
15ስሞን ጰፅሮስነ ሀራ እስ ታማረይ የሱሳ ካልድ ብዶሶና። ካህነ ሀላቃይ ሄ ሀራ ታማርያ ሎይ ኤሬስ። ሄሳ ግሾ፥ እ የሱሳራ ካህነ ሀላቃ ዛባ ገልስ። 16ሽን ጰፅሮስ ካረራ ድርሳ ፐንገን ኤቅስ። ካህነ ሀላቃይ ኤርያ ሀራ ታማረይ ካረ ከይድ፥ ፐንግያ ናግያ ናኤስ ኦድድ፥ ጰፅሮሳ ጋ ገልስስ። 17ፐንግያ ናግያ ናእያ ጰፅሮሳኮ፥ “ኔኒ፥ ሄ አድያ ታማረታፐ እሱዋ ግድኪ?” ያጋሱ።
ጰፅሮስ ዛሪድ፥ “አካይ፥ ታኒ ግድከ” ያግስ።
18ሳአይ ሜግያ ግሾ፥ አይለትነ ናገይሳት ፂፋ ታማ ኤድ፥ ካዮሶና። ጰፅሮስካ ኤንታራ ኤቅድ ታማ ካዬስ።
ካህነ ሀላቃይ የሱሳ ኦይችስ
(ማቶ 26:59-66፤ ማር 14:55-64፤ ሉቃ 22:66-71)
19ካህነ ሀላቃይ የሱሳ፥ እያ ታማረታባነ እያ ትምርትያባ ኦይችስ። 20የሱሲ ዛሪድ፥ “ታኒ አሳ ኡባስ ቆንጨን ኦዳስ። ታኒ አይሁደ ኡባይ ሺቅያ አይሁደ ዎሳ ኬንነ ፆሳ ኬን ኡባ ዎደ ታማርሳስ። ጌማን አይኮካ ኦዳብከ። 21ያትን፥ ኔኒ ታና አይስ ኦይቻይ? ታ ኦድሽን ስእዳ አሳ ኦይቻ። ሄ አሳይ ታኒ ኦድዳይሳ ኤሮሶና” ያግስ።
22የሱሲ ሄሳ ግዳ ዎደ፥ ሄ በሳን ኤቅዳ ዎታዳረታፐ እሶይ የሱሳ ባቅድ፥ “ካህነ ሀላቃስ ሀይሳዳ ዛራይ?” ያግስ።
23የሱሲ ዛሪድ፥ “ታኒ ኢታባ ኦድዳባ ግድኮ ሀይሳን ደእያ አሳ ኡባ ስንን ኦዳ። ሽን ታኒ ቱማ ኦድዳባ ግድኮ ታና አይስ ባቃይ?” ያግስ።
24ሄሳ ግሾ፥ ሃን፥ የሱሲ ቃሸትዳ መላ ካህነ ሀላቃ ቃያፋኮ የድስ።
ጰፅሮስ የሱሳ ናምአን ካድስ
(ማቶ 26:71-75፤ ማር 14:69-72፤ ሉቃ 22:58-62)
25ጰፅሮስ ያን ኤቅድ፥ ታማ ካይሽን፥ ሀራት እያኮ፥ “ኔኒ ሀ አድያ ታማረታፐ እሱዋ ግድኪ?” ያግስ።
ጰፅሮስ ዛሪድ፥ “አካይ፥ ታኒ ግድከ” ያግድ ካድስ።
26ካህነ ሀላቃ አይለታፐ እሶይ፥ ጰፅሮስ ሀይ ቃንፅዳ አድያ ዳቦይ፥ ጰፅሮሳኮ፥ “ታኒ ነና እያራ አታክልትያ ግዶን በአብክና?” ያግድ ኦይችስ።
27ጰፅሮስ ቃስካ ካድስ፤ ኤለስድ ኩቶይ ዋስ አግስ።
የሱሲ ጵላፆሳ ስንን
(ማቶ 27:1-2፥ 11-14፤ ማር 15:1-5፤ ሉቃ 23:1-5)
28ዎንታ ጉራ፥ ኤንቲ የሱሳ ቃያፋ ሶፐ ደርያ ሃረይሳ ኦሶ ኬ ኤክ ኤፍዶሶና። አይሁደት ፓስካ ባኣለ ካ ማናዉ ባንታና ቱንሶና መላ ደርያ ሃረይሳ ኦሶ ኬ ገልቦኮና። 29ሄሳ ግሾ፥ ጵላፆስ ኤንታኮ ካረ ከይድ፥ “ሀ አድያ አይስ ሞተቲ?” ያግስ።
30ኤንቲ፥ “እ ኢታ ኦናባ ግድያኮ ኑኒ እያ ኔኮ ኤሆኮ” ያግዶሶና።
31ጵላፆስ ዛሪድ፥ “ህንተ እያ ኤክ ኤፍድ፥ ህንተ ህገይ ገይሳዳ እያ ቦላ ፕርድተ” ያግስ።
አይሁደት፥ “ኦናካ ዎያ ማት ኑስ ባዋ” ያግዶሶና፤ 32ሄስ ሀንዳይ የሱሲ አይ መላ ሀይቆ ሀይቃነኮ ኤርሳናዉ ኦድዳይስ ፖለታናሳ።#ዮሀ 3:14፤ 12:32.
33ጵላፆስ ባ ኦሶ ኬ ዛር ገልድ፥ የሱሳ ፄግድ፥ “ኔኒ አይሁደ ካዎ?” ያግድ ኦይችስ።
34የሱሲ ጵላፆሳ፥ “ሀ ኦይሻ ኔኒ ኔፐ ኦይቻየ ዎይኮ ሀራ አስ ነዉ ታባ ኦድዴ?” ያግስ።
35ጵላፆስ ዛሪድ፥ “ታ አይሁደ አሴ? ነ አሳይነ ካህነ ሀላቃት ነና ታዉ አድ እምዶሶና። ነ አይ ኦዲ?” ያግስ።
36የሱሲ፥ “ታ ካዎተይ ሀ አላምያና ግደና። እ ሀይሳን ግድያኮ ታ አይሁደታ ሀላቃታስ አዳ እመቶና መላ ታ አይለት ታዉ ኦለታና። ሽን ታ ካዎተይ ሀ አላምያና ግደና” ያግስ።
37ሄሳ ግሾ፥ ጵላፆስ የሱሳኮ፥ “ያትን፥ ኔኒ ካዎዬ?” ያግድ ኦይችስ።
የሱሲ ዛሪድ፥ “ቱማ ታ ካዎ ግደይሳ ነ ጋዳሳ። ታኒ የለትዳይነ ሀ አላምያ ይዳይ ቱማተስ ማርካታናሳ። ቱማ ባጋ ግድዳ ኦንካ ታኒ ገይሳ ስኤስ” ያግስ።
38ጵላፆስ፥ “ቱም አይቤ?” ያግስ።
ጵላፆስ ሄሳ ግዳፐ ጉየ አይሁደታኮ ካረ ከይድ፥ “ታኒ እያፐ አይ ኢታካ ደማብከ። 39ሽን ፓስካ ባኣለ ጋላስ፥ እስ አሰ ህንተዉ ቃሾፐ ብልያ ሜዘይ ደኤስ። ታኒ ህንተዉ አይሁደታ ካዋ ብላና መላ ኮዬቲ?” ያግስ።
40ኤንቲ ዛሪድ፥ ባንታ ቃላ ቁ ኦድ፥ “ባርባና ብላፈ አትሽን፥ እያ ግደና” ያግዶሶና። ሽን ባርባን ፓንጋ።
Currently Selected:
ዮሃንሳ 18: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
