Эхин 31
31
Яков Лаваанһаа зугадана
1Лаваанай хүбүүд хоорондоо иигэжэ хөөрэлдэдэг болобо:
– Яков гээшэ эсэгымнай хамаг зөөри түрижэ абаа. Манай эсэгын баялигаар тэрэ өөдэлбэ.
Яков иимэ үгэнүүдыень дуулахаһаа гадна 2Лаваанай урданайхиһаа ондоохоноор өөртэнь хандажа эхилһые ажаглаба.
3Эзэн тэрээндэ иигэжэ айладхаба:
– Ши үбгэ эсэгынгээ, түрэл гаралайнгаа нютаг буса. Би хододоо шамтай байлсахаб.
4Яков Рахээл Лэһаа хоёрые хониной бэлшээри, хээрэ газар руу дуудажа ерүүлээд, 5иигэжэ хэлэбэ:
– Би танай эсэгэ намда анханайхиһаа ондоогоор хандадаг болоо гэжэ хаража байнаб. Зүгөөр минии эсэгын Бурхан намтай. 6Эсэгынтнай ажалда бүхы шадалаараа хүдэлһыем таанад өөһэдөө мэдэнэт. 7Харин тэрэ намай мэхэлдэг, хэлсэһэн түлөөһэеэ арба дахин хубилгадаг байгаа. Гансал Бурхан намда муу юумэ хүүлэдэггүй һэн. 8Эсэгынтнай «толботой бүхы малые хүлһэн болгожо аба» гэхэдэ, бүхы мал толботой түл гаргадаг болоо. «Бүхы алаг зүһэтэй мал хүлһэн болгожо аба» гэхэдэнь, бүхы мал алаг түл гаргажа захалаа. 9Эгээл иигэжэ Бурхан танай эсэгын мал һүрэг намда дамжуулаа.
10Нэгэтэ малай ороондо орохо хаһада би зүүдэ зүүдэлбэб: ямаадые тэхэдэжэ байһан тэхэнүүд бүгэдэ толботой, алаг гээд харагдаба. 11Тиигээд Эльгээмэлэй намайе тэрэ зүүдэндэмни «Яков!» гэжэ ооглоходо, би «Эндэ байнаб» гэжэ харюусааб. 12Тиихэдэмни тэрэ хэлэбэ:
– Харыш, ямаа тэхэдэжэ байһан бүхы тэхэнүүд толботойнууд гү, али алагууд. Би Лаваанай шамайе мэхэлжэ байһые харанаб. 13Хэдэн жэлэй урда би эндэ ерэхэ замдашни шамтай хөөрэлдөө бэлэйб. Ши тэрэ газарые Бэт-Ээл гэжэ нэрлээд, хадын шулуу хүшөө мэтээр бодхоод, олива модоной шэнгэн тоһо дээрэнь адхажа, Намда үгэеэ үгэжэ, тангариг үргэһэнөө һанана гүш? Би болбол тэндэ шамтай хөөрэлдэһэн Эзэн Бурхан мүнби. Ши энэ нютаг дары орхижо, түрэһэн нютагаа буса.
14Рахээл Лэһаа хоёр Яковта иигэжэ харюусаба:
– Эсэгымнай зөөриһөө манда хүртэхэ юумэн бидэ хоёрто бии гээшэ гү? 15Тэрэмнай маанадые хариин гэжэ тоолодог. Маанадые эд бараан шэнгеэр худалдаа, харин манай түлөө абаһан бүхы мүнгөө өөртөө хэрэглээд дууһаа. 16Тиимэ хадань, Бурханай манай эсэгэһээ абаһан зөөри зөөшэ бидэнэй мүн үхибүүдэймнай гээшэ. Тиимэһээ Бурханай үгэ дуулаха ёһотойш.
17Яков хүүгэдээ, һамгадаа тэмээнүүдтэ һуулгаба. 18Эсэгынгээ амидаржа байһан Ханаһаан орон руу ябахаяа зэһэжэ, Месопотамида суглуулһан хамаг зөөриеэ бүридхөөд, адуу малаа туужа, аян замда гараба. 19Тэрэ үедэ Лаваан хонидойнгоо нооһо хайшалхаяа хүдөө ошоһон байгаа. Тиихэдэнь Рахээл эсэгынгээ майханда ороод, онгонуудыень һэмээхэн абажархиба. 20Араам яһатан Лаваанда гаража ошохо тухайгаа Яков хэлэнгүй, тэрэниие мэхэлһэн болобо. 21Иигэжэ Яков бүхы юумэеэ абаад, түргөөр тэндэһээ гаран ошоо бэлэй. Тэрэ Евфрат мүрэниие гаталжа, Ханаһаан орон нютагта оршодог Галаад нютаг руу зорибо.
Лаваан Яковтай хэлсээ батална
22Яковай ябаһанай удаа гурбан хоногой үнгэрһэн хойно Лаваан энээн тухай дуулаад, 23түрэл гаралаа суглуулаад, Яковые мүрдэн ошобо. Долоон хоногой удаа тэдэ Яковые Ханаһаанай Галаад гэдэг хадалиг үндэр нютагта хүсэбэ.
24Һүни боложо, хээрэ хоноходоо, араам обогой Лаваанай зүүдэндэ Бурхан үзэгдэн, иигэжэ айладхал буулгаба:
– Яковта һайн, муушье үгэ бү хэлэ, болгоомжоло!
25Яков Галаад хадада майхан табяад байгаа. Лаваан тэрэниие мүрдэн хүсэжэ, ойрохононь майхан мүн лэ татаад тогтобо. 26Тиигээд Лаваан Яковта ерээд, иигэжэ хэлэбэ:
– Ши юундэ намайе мэхэлжэ, хоёр басагадыем баряанда абаад ошоһондол ошобош? 27Нюусаар тэрьедэхэ, намһаа хорохо, намайе мэхэлхэ ямар ушар байгааб? Хэрбээ шинии намда хэлэһэн һаа, ябахадашни найр наадатай, дуутай, хэнгэрэг, ятага дуугарган үдэшэхэ байгаабди. 28Харин ши намда басагадаа, зээнэрээ таалаха аргашье үгөөгүйш! Тэнэг юумэ гаргааш! 29Би тэрэнэйш түлөө шамайе нилээд мэгдэхээхэ һэм, зүгөөр энэ һүни шинии эсэгын шүтэдэг Бурхан намда үзэгдөөд, «Яковта һайн, муушье үгэ бү хэлэ!» гэжэ айладхаа. 30Зай, яахаб, ши түрэһэн гэрээ һанаад намһаа ошобо гэлэйш. Зүгөөр гал гуламтыемни хамгаалдаг бурхадыем юундэ хулгайлаабши?
31– Хоёр басагадаа та намһаа хүсөөр абажа үлээжэ болохот гээд би һэжэг түрөөб, – гэжэ Яков Лаваанда харюусаба. – 32Харин танай бурхад тушаа би юушье мэдэнэгүйб. Бүхы юумыемнай нэгжэхэдэтнай болохо, танай гэхэ юумэнэй олдобол, абагты! Зүгөөр хэн нэгэндэ бурхадтнай олдоо һаань, тэрэ хүн амиды мэндэ үлэхэгүй!
Лаваанай онгонуудые Рахээл хулгайлаа гэжэ Яков ой ухаандаашье оруулаагүй.
33Лаваан Яковай, Лэһаагай, Зилпаа, Билһаа гэжэ хоёр зараса эхэнэрнүүдэй майхангуудаар ябажа, нэгжэбэшье, юумэ олобогүй. Тэрэ Лэһаагай майхан нэгжээд, Рахээлэй майхан руу оробо. 34Рахээл хулгайлһан онгонуудаа тэмээнэй тохом доро табяад, өөрөө дээрэнь һуугаад байба. Лаваан майхан соо нэгжээд, юушье олобогүй. 35Рахээл тэрээндэ:
– Хүндэтэ абамни! Эхэнэрэй һарынхи намда ушаржа, урдатнай бодоод зогсожо шадахагүй байһандамни намайе хүлисыт, – гэжэ хэлэбэ.
Лаваан бүхы юумэ нэгжээшье хадаа онгонуудаа олоогүй 36ушарһаань Яков сухалдажа, Лавааниие зэмэлжэ захалба:
– Би ямар гэм танай урда хээбиб, ямар нүгэл үйлэдэбиб, юундэ намай намнаха, мүрдэхэ мүшхэхэ болобот? 37Та минии хамаг эд зөөри урбуулбат, теэд өөрынгөө гэхэ юумэ олобо гүт? Олоо һаа, түрэл гаралнуудаймнай урда табижа харуулагты! Тэдэ маанадай зүб, бурууе шиидхэг. 38Хорин жэл би танда ажал хээб. Энэ саг соо нэгэшье хонин, нэгэшье ямаан түл хаяагүй. Би танай мал һүрэгһөө нэгэшье хуса, тэхэ гаргажа эдеэгүйб. 39Малда арьяатанай добтолоо хадань, би танда һэеыень асаржа, өөрөө түлэнгүй үнгэржэ байгаагүйб. Хороһыень өөрынгөө зөөреэр хаадаг һэм. Үдэршье байг, һүнишье байг, малай хулгайда ороо һаань, та намаар түлүүлдэг байһан бэшэ гүт? 40Үдэрэй халуунда халуудажа, һүниндөө дааража байгаад, нюдөөшье анингүй малыетнай харууһалааб. 41Хорин жэлэй туршада би танда ажал хэжэ байгааб. Басагадыеш абахын тула арбан дүрбэн жэл соо богоол мэтэ хүдэлөөб, удаань өөрын гэхэ малтай болохын тула үшөө зургаан жэл соо хүдэлөөб. Харин та хүлһэнэй мүнгыемни арба дахин ондоо болгожо, мэхэлжэ байгаат. 42Хэрбэеэ эсэгымни Бурханай, Абраһаамай Бурханай, Исаагай Түбэгшөөлэй, намда туһалаагүй һаань, би танайхиһаа гар хооһон гараха байгааб. Бурхан минии хүшэр хүндэ ажал, зоболонгыем хаража, энэ үнгэрһэн һүни намайе хамгаалаал!
43Лаваан Яковта харюу үгэн:
– Хоёр һамгадшни яагааш һаа, минии басагад, хүүгэдшни минии зээнэр. Эдэ бүхы мал, эндэ хаража байгаа бүхы юумэншни минии. Зүгөөр би түрэһэн басагадаа гомдохоохо аалби? Али зээнэрээ? 44Зай, тиигээ хадаа хоюулаа хоорондоо хэлсээ баталая, тиигээд хэлсээнэймнай гэршэ байха ёһотой, – гэжэ хэлэбэ.
45Тиихэдэнь Яков томо шулуу хүшөө мэтээр бодхожо һуулгаад, 46түрэл гаралнуудтаа хэлэн, олон шулуу хамта обоолжо, хоорондоо тогтооһон хэлсээгээ гэршэлэн баталжа, бултадаа шулуун обоо тойрон һуужа, хамта эдеэ хоол бариба. 47Лаваан араам хэлэтэй һэн тула энэ шулуун добые «Егаар-Саһадутаа» гэжэ нэрлэбэ, харин Яков еврей хэлээрээ «Галиэд» гэжэ нэрэ үгэбэ.
48Удаань Лаваан Яковта иигэжэ хэлэбэ:
– Энэ обоо ши бидэ хоёрой хоорондоо баталһан хэлсээнэй гэршэ мүн!
Энээнһээ хойшо тэрэ газар Галиэд гэгдэдэг. 49Тиигээд үшөө ондоогоор «Мицпаа», оршуулбал, «Харуулай газар», гэдэг. Юундэб гэхэдэ, Лаваан нэмэжэ саашань хэлээ һэн:
– Бэе бэеһээ таһаржа, харалсахаяа болиходомнай, Эзэн маанадые байһан газартамнай анхаран хаража, бидэ али алиндаа урдань харюусаха болонобди. 50Хэрбэеэ ши минии басагадые доромжолоо һаа гү, үгышье һаа, тэдэнэй хажуугаар шэнэ һамгадые абаа һаа, һанажа яба: минии нюдэнһөө далда байгаашье һааш, Бурхан ши бидэ хоёрой бүхы үйлэ хэрэг хаража, гэршэлжэ байха! 51Хаража бай, бидэ хоёр түрэһэн нютагуудайнгаа хилэ дээрэ энэ шулуун обоо бодхообди. 52Би эндэһээ саашаа газар руу, шинии урдаһаа дайлан орохогүйб, шишье эндэһээ наашаа гаража, минии урдаһаа дайлахагүйш. Энэ добо бидэ хоёрой хоорондоо тогтооһон хани барисаанай гэршэ мүн. 53Манай зүб бурууе шинии үбгэ эсэгэ Абраһаамай, минии үбгэ эсэгэ Нахоорой шүтэн зальбардаг Бурхан шүүбэрилжэ шиидхэг лэ.
Тиихэдэнь Яков өөрынгөө эсэгэ Исаагай шүтэн зальбардаг Эзэн Бурханай нэрээр тангариг үргэбэ. 54Һүүлээрнь тэрэ мал үүсэлэн гаргаад, шатаажа, Эзэн Бурханда үргэбэ. Удаань Яков бүгэдэндэ зорюулан, найр хэбэ. Иигэжэ тэрэ һүниндөө тэдэ бултадаа хада уула дээрэ хоноо бэлэй.
Яковай Эсаавтай эблэрэлгэ
55Үглөөгүүрынь Лаваан эртэлэн бодоод, зээнэрээ, басагадаа таалаад, үреэгөөд, нютагаа бусаба.
Currently Selected:
Эхин 31: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
