Эхин 40
40
Иосиф шорондо
1Иосифой түрмэдэ ороһоной удаа нэгэ хэды сагай үнгэрөөд байхада Египедэй хаанай ахалагша манзашан, үзэмэй дараһан архи аягалагшан хоёр эзэн хаанайнгаа урда зэмэтэй болобо. 2Фараон өөрынгөө эдэ хоёр түшэмэлдэ уурлан, 3тэдэниие Иосифой һууһан түрмэ шороной ноёдто тушаажа, тэрэ шорон руу хаяхыень захирба. 4Тиихэдэнь шороной дарга тэдэниие Иосифой гарта дамжуулжа, хаража байхыень даалгаба ха.
Тэдэ хоёр түшэмэл түрмэдэ удаан сагта һуухадаа 5нэгэтэ һүни, нэгэн доро тус тустаа һонин зүүдэ зүүдэлбэд.
6Иосифой үглөөгүүр тэдээндэ ерэхэдэ, тэдэ хоёр ехэл сэдьхэлээ хүдэлгэһэн янзатайнууд байба.
7– Ямар юумэнһээ һанаагаа зобобот? – гэжэ Иосиф асууба.
8– Бидэ хоёр зүүдэ хараабди, зүгөөр удхыень тайлбарилха хүн эндэ үгы, – гэжэ тэдэ харюусаба.
– Бурханһаа ондоо хэншье зүүдэнэй удха зүб тайлбарилжа шадахагүй. Намда зүүдээ хөөрэжэ үгыт, – гэбэ Иосиф.
9Тиигээд хаанай ахалагша үзэмэй дараһан архи аягалагшан зүүдээ хөөрэбэ:
– Минии урда үзэмэй модоной һөөг ургажа байна гэжэ зүүдэлээб. 10Тэрэ һөөг гурбан һалаатай. Тиигээд тэрэмни гэнтэ һалбаржа эхилбэ, сэсэглэбэ, тиигээд сэсэгэй һуурида жэмэс эдеэшэбэ. 11Гартамни фараоной хундага байһан ушарһаа би тэрэ үзэмэй шүүһые шахажа, архи болгоод, хундага руу юулээд, түргөөр гартань барюулааб.
12– Зүүдэнэйтнай тайлбари иимэ, – гэжэ Иосиф хэлэбэ. – Гурбан һалаа гурбан хоног гээшэ. 13Гурба хоноод байхада фараон таниие дахин дээшэнь үргэхэ, анхан эзэлжэ байһан тушаалдатнай бусааха, урданайхидаал мэтэ тэрээндээ хундага баридаг болохот. 14Зүгөөр та бүхы юумэнэйнгээ һайжархада, нам тухай һанаарайт. Намда үршөөл хайраяа үзүүлжэ, фараондо нам тухай хэлэжэ, энэ түрмэһөө сүлөөлхэ арга хыт даа. 15Үнэн дээрээ би ямаршье гэм хээгүй аад, өөрын еврей орон нютагһаа хүсөөр гаргагдажа, тэрээнһээ доройтон энэ харанхы нүхэн руу хаягдааб!
16Египедэй фараоной ахалагша манзашан нүгөө түшэмэлэй зүүдэ ехэ һайнаар тайлбарилаа гэжэ һанаад, Иосифто хандаба:
– Минии зүүдэнэй удха тайлбарилжа үгыт. Би толгой дээрээ хилээмэнэй гурбан дабхар түрсүүг табяад зогсожо байнаб гэжэ зүүдэлээб. 17Тон дээрэхи түрсүүг соо фараондо гэжэ бариһан элдэб хилээмэнэй зүйл, тиигээд тэрэниие шубууд тоншоно гэжэ зүүдэ харааб.
18– Танай зүүдэнэй тайлбари иимэ, – гэбэ Иосиф. – Гурбан түрсүүг – энэ гурбан үдэр гээшэ. 19Гурба хоноод байхада Египедэй хаан таниие түрмэһөө гаргажа, толгойетнай таһа сабшаад, бэеыетнай модондо үлгэхэ. Тиигээд шубууд үхэһэн бэеыетнай тоншожо эдихэ.
20Гурба хоноод, Египедэй хаанай түрэһэн үдэр боложо, тэрэ бүхы түшэмэлнүүдээ суглуулан, найр наада түхеэрбэ. Тэрэ үдэртөө эзэн хаан ахалагша манзашан болон үзэмэй дараһан архи аягалагшан тухайгаа һанажа, шоронһоо гаргуулан, олоной урда ерүүлээд, 21ахалагша архи аягалагшаниие урид эзэлжэ байгаа тушаалдань бусаажа, тэрэ хаандаа дахин хундага баридаг хүн болобо. 22Харин ахамад манзашаниие үлгэбэ. Иигэжэ бүгэдэ Иосифой хэлэгшэ, таагшаар болобо.
23Египедэй хаанай ахамад архи аягалагша түрмэһөө гараһан болобошье, Иосиф тушаа огто мартажархёо бэлэй.
Currently Selected:
Эхин 40: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
