Эхин 46
46
Иосифой аханар Египет руу гурбадахияа эсэгэтэеэ хамта ерэбэ
1Тиигэжэ Израиль хамаг зөөриеэ бүридхөөд, аян замда гараба. Замдаа тэрэ Бэһээр-Шээбэ хүрэжэ, Исаак эсэгэдээ адляар Бурхандаа үргэл хэбэ. 2Нэгэ һүни Бурхан Израильда үзэгдэл харуулан, ооголбо:
– Яков, Яков!
– Би эндэ байнаб, – гэжэ тэрэ харюусаба. 3Бурхан тэрээндэ иигэжэ айладхаба:
– Би болбол шинии үбгэ эсэгын хүндэлдэг Бурхамби. Египет ошохоһоо бү ай. Би тэндэ шинии уг удамһаа агууехэ арад зониие бии болгохоб. 4Өөрөө шамтай суг Египет ябалсахаб. Би Өөрөө тэндэһээ шинии уг удамые гаргахаб. Наһа барахадашни, Иосиф өөрынгөө гараар нюдыеш бүглэхэ.
5Тиигээд Яков Бэһээр-Шээбые орхин саашалба. Фараоной үгэһэн хүнгэн тэргэнүүд дээрэ Израилиин хүбүүд эсэгэеэ, үхибүүд, һамгадаа һуулгаад, 6адууһа малаа урдаа туугаад, Ханаһаанда олоһон эд зөөриеэ шэрээд дабшаба. Иигэжэ Яков хамаг үри һадаһадтаяа Египет зөөгөө һэн. 7Тэдэнэй тоодо хүбүүдынь, ашанарынь, басагадынь, зээнэрынь, бүхы уг унгинь Египет ерэлсээ бэлэй.
8Египет зөөһэн Израилиин хүбүүдэй нэрэнүүд иимэ: Яковай ууган хүбүүн Рэүбээн, 9Рэүбээнэй дүрбэн хүбүүд Эноох, Паллуу, Хэцроон ба Хармии; 10Симеон, тэрэнэй зургаан хүбүүд Емүһээл, Ямиин, Ооһад, Яхиин, Цохаар ба ханаһаан яһанай һамганһаань түрэһэн Саул; 11Левий, тэрэнэй гурбан хүбүүд Гэршоон, Кэһаат ба Мэрарии; 12Иуда, тэрэнэй гурбан хүбүүд Шэлаа, Пээрэц ба Зээрах. Ээр Онаан хоёр хүбүүдынь бүри Ханаһаанда байхадаа гээгдээ һэн. Пээрэцэй хоёр хүбүүд Хэцроон ба Хамуул; 13Иссахаар, тэрэнэй дүрбэн хүбүүд Толаа, Пувваа, Иһооб ба Шимроон; 14Зэбүлүүн, тэрэнэй гурбан хүбүүд Сээрэд, Элоон ба Яхлээл. 15Яковтанай Месопотамида байхада Лэһаа һамганһаань Яковта дээрэ дурдагдаһан зургаан хүбүүн, нэгэ Диина басаган түрөө бэлэй. Яковай һамган Лэһаагай хүбүүд болон ашанарынь хамтадаа гушан гурбан хүн болоо һэн.
16Египет руу ошоһон зоной дунда Яковай хүбүүн Гаад, Гаадай долоон хүбүүд Ципиһоон, Хаггии, Шунии, Эцбоон, Эрии, Ародии, Арэлии; 17Ашээр, Ашээрэй дүрбэн хүбүүд Имнаа, Ишваа, Ишвии, Бэрияа, басаган Сээраа; Бэрияагай хоёр хүбүүд Хээбэр ба Малхиһээл; 18Яковай Лэһаае һамга абахада, Лаваан эсэгэнь басагандаа зараса болгон Зилпаа гэдэг эхэнэрые үгөө бэлэй. Зилпаа удаань Яковай бага һамган боложо, хоёр хүбүүдые гаргаа. Тэрэ хоёр хүбүүдынь үринэрээ абаад, Яков эсэгэтэеэ хамта Египет ошоо һэн. Яковай бага һамган Зилпаагай хүбүүд, ашанарынь хамта арбан зургаан хүн болоно.
19Яковай һамган Рахээлһээ гараһан хоёр хүбүүд Иосиф, Бэньямиин гэгшэд байлсаа. 20Иосиф Египедэй Оон хотын дээдэ тахилшан Поотипээрэй басаган Асэнаадтай гэрлээд, Мэнашшээ, Эпрааим гэдэг хоёр хүбүүдтэй болоо һэн. 21Рахээлһээ гараһан хүбүүн Бэньямиин, Бэньямиинэй арбан хүбүүд Бээла, Бээхэр, Ашбээл, Гэраа, Наамаан, Эхии, Роош, Муппиим, Хуппиим ба Аард тэдэнэй дунда байгаа. 22Эдэ Рахээлһээ гараһан Яковай үри һадаһад – арбан дүрбэн хүн – мүн лэ Египет ерэлсээ.
23Яковай хүбүүн Даан, Даанай хүбүүн Хушиим; 24нүгөө хүбүүн Напталии, Напталиигай дүрбэн хүбүүд Яхцээл, Гунии, Еэцэр ба Шиллээм гэгшэд байлсаа. 25Яковай Рахээлые һамга абахада, Лаваан эсэгэнь басагандаа зараса болгон Билһаа гэдэг эхэнэрые үгөө бэлэй. Удаань тэрэ зараса эхэнэр Яковай бага һамган болоод, хоёр хүбүү гаргаа һэн. Эдэ хоёр хүбүүд болон үри һадаһадынь, дүн хамта долоон хүн Яковтай хамта Египет ерээ.
26Яковай үхи хүүгэдэй тоо гэбэл, өөрыень, һамгадыень, Иосифые оруулангүйгөөр тоолобол, жаран зургаан хүн Египет ерэһэн байна. 27Энээнһээ гадна Египедтэ түрэһэн Иосифой хоёр хүбүүд болон Яковые, Иосифые нэмэхэдэ, Яковай гэр бүлын тоо дала болоно.
Яков Египедтэ
28Яков Гоошэн дайдын хаана һуурижаха ёһотойгоо заалгахын тула Иудые Иосифто өөрһөө урид эльгээгээ һэн. Иигэжэ тэдэнэй Гоошэн аймагта ерэһэнэйнь удаа 29Иосиф хүлэг мори хүллэһэн хүнгэн тэргээр Гоошэн руу хүрэжэ ерэбэ. Израиль эсэгэеэ харамсаараа Иосиф буугаад, хүзүүдэн тэбэрижэ, удаан уйлаа бэлэй. 30Тиихэдэнь Израиль Иосифто хэлэбэ:
– Мүнөө шиниингээ амиды мэндэ ябахыеш хараа хадаа үхэхэдэмнишье болохо!
31Тиигээд Иосиф аха дүүнэртээ, түрэл саданартаа иигэжэ хэлэбэ:
– Зай, мүнөө би эзэн хаанда ошожо, «аха дүүнэрни болон эсэгымни бүхы түрэл гаралнууд намдаа Ханаһаан оронһоо ерээ. 32Тэдэмни бултадаа малша зон, мал һүрэгөө, бүхы байһан юумэеэ ашаад, наашаа нүүжэ ерээ» гэжэ хэлэхэм. 33Харин таанадһаа ямар ажал хэдэг зомта гэжэ Египедэй хаанай һураа һаань, 34«Танай богоол болохо бидэнэр бага наһанһаа хойшо мүнөө болотор, манай эсэгэнэр мэтэ, мал адуулдаг зомди» гэжэ хэлээрэйгты. Тиихэдэтнай таанадые Гоошэн гэдэг газар нютагта һуурижуулха.
Египедэй зон хүдөө нютагай нүүдэлшэ малшадта дээрэлхүүгээр хандадаг ушарһаа Иосиф энээниие хэрэглэн, аха дүүнэртээ эгээл һайхан газар дайда үгэхэ гэжэ һанаһан байгаа.
Currently Selected:
Эхин 46: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
