Иоанн 13
13
(Мт 21:4-9; Мк 11:7-10; Лк 19:35-38)
Иисүүс шабинарайгаа хүл угааба
1Иимэ ушар Паасхын һайндэрэй урдахана болоо һэн. Энэ дэлхэйе орхёод, Эсэгэдээ бусаха сагни ерэбэ гэжэ Иисүүс мэдэжэ байгаа. Энэ дэлхэйдэ үлэхэ шабинартаа Тэрэ аргагүй дуратай һэн. Мүнөө тэрэнээ Иисүүс тон элеэр харуулба. 2Үдэшэлэн шабинартайгаа хамта хоол барихаяа байба. Симон Искариодой Иуда гэжэ хүбүүндэ шолмос Иисүүстэ урбаха гэһэн һанал бодол идхан түрүүлбэ. 3Эсэгэмни бүхы юумэ Намда үгөө, Би Бурханһаа ерээб, мүнөө иигээд һөөргөө бусахамни гэжэ Иисус мэдэжэ байгаа. 4Тэрэ шэрээгэй саанаһаа бодожо, гадар хубсаһаа тайлаад, аршуул абажа бэһэлбэ. 5Удаань хүнэг соо уһа хээд, шабинарайгаа хүл угаажа, бэһэлһэн аршуулаараа хүлыень аршажа эхилбэ. 6Симон Пётрто Иисүүс ошобо.
– Эзэн аа! Та минии хүл угаахаяа һанаба гүт? – гэбэ Пётр.
7– Минии юу хэжэ байһые ши ойлгоногүйш. Һүүлдэ ойлгохош, – гэжэ Иисүүс харюусаба.
8– Минии хүл угаахатнай гү? Яабашье угаалгахагүйб!
– Хэрбээ шамайе угаагаагүй һаамни, ши хойшодоо минии бэшэш.
9– Эзэн аа! Тиигээ һаа, хүлыемни угаахаһаа гадна, мүн гарыемни, толгойемни угаагыт! – гэжэ Пётр хэлэбэ.
10– Угаагдаһан хүнэй хүлыень лэ угааха хэрэгтэй – тэрэ хүн арюун сэбэр байна ха юм. Мүн таанаршье арюун сэбэр хүнүүд гээшэт, зүгөөр бултадаа арюун сэбэр бэшэт, – гэжэ Иисүүс харюусаба.
11Өөрыень хэн барижа үгэхэб гэжэ Иисүүс мэдэжэ байгаа, тиимэһээ «Бултадаа арюун сэбэр бэшэт» гэжэ Тэрэ хэлээ.
12Шабинарайгаа хүл угааһанай удаа хубсаһаа үмдөөд, тохоногоороо дэрэ тулан һуужа, Тэрэ иигэжэ хэлэбэ:
– Минии таанарта юу хэһэн тухай мэдэнэ гүт? 13Таанар Намайе багша, Эзэн гэжэ нэрлэнэт, энэ зүб – Би үнэндөө тиимэб. 14Тиин Эзэн, багша байһан аад, Би таанарай хүл угаагааб, тиимэһээ таанаршье бэе бэеынгээ хүл угааха ёһотойт. 15Намдал адли юумэ хэжэ байхынтнай тула Би таанарта жэшээ харуулбаб. 16Би үнэн зүбые хэлэнэб: зараса өөрынгөө эзэнһээ ехэ бэшэ, Эльгээмэл эльгээгшэһээ ехэ бэшэ юм. 17Энэ мэдэжэ абаһан юумэеэ бэелүүлээ һаа, таанар аза жаргалтай байхат.
Иисүүстэ урбаха хүн тухай
18Бултанайтнай тухай Би хэлэнэгүйб, хэдыетнай шэлэжэ абаһанаа мэдэнэб. Теэд «Намтай хамта хилээмэ эдижэ байһан хүн Минии урдаһаа эсэргүүсэбэ» гэһэн Нангин Бэшэгэй үгэнүүд бодото дээрээ хүсэлдэг лэ даа. 19Би таанарта энэ үйлэ хэрэгэй болохоһоо урда хэлэжэ байнаб. Харин бэелхэдэнь, Намайе «Би байна» гэжэ таанар этигэхэт.
20Таанарта үнэн зүбые хэлэнэб: Минии эльгээһэн хүниие угтажа абаһан хүн Намайе угтажа абана гээшэ, Намайе угтажа абаһан хүн Намайе эльгээһэн Эсэгые угтажа абана гээшэ.
21Тиигээд, Иисүүс ехэ һанаагаа зобожо хэлэбэ:
– Таанарай нэгэнтнай Намайе барижа үгэхэнь, Би үнэхөөрөө баталгаатай хэлэнэб.
22Хэн тухаймнай хэлэнэ гээшэб гэжэ ойлгожо ядан, шабинарань урда урдаһаан харалсаба. 23Иисүүстэй зэргэлээд, тэрэнэй дуратай шабинь толгойгоо сээжэдэнь налаад һуугаа. 24Энэ хэн тухай хэлэнэб гэжэ Иисүүсһээ һурахыень, Симон Пётр тэрэ шабида дохёо тэмдэг үгэбэ. 25Тэрэнь Иисүүстэ хандан:
– Эзэн аа, тэрэ урбагша хэн гээшэб? – гэжэ асууба.
26– Табаг соо хилээмэ дэбтээгээд, Намда урбаха нэгэндэтнай үгэхэб, – гэжэ Иисүүс харюусаба.
Тиигээд Иисүүс зүһэм хилээмэ табаг соо дэбтээгээд, Симон Искариодой Иудада үгэбэ. 27Хилээмэ абахатай сасуу, Иудын досоо сатана ороодхибо.
– Хэхэ гэжэ һанаһан юумэеэ үтэр хэ, – гээд Иудада Иисүүс хэлэбэ.
28Юундэ Иисүүсэй тиигэжэ хэлэһыень шэрээдэ һуугшадай хэнииньшье ойлгобогүй. 29Хамтын мүнгэ Иудын барижа байһан тула «Һайндэртэ хэрэгтэй юумэ бидэндэ худалдажа аба» гэжэ тэрээндэ Иисүүс хэлээ гээшэ ха, али үгышье һаа, үгытэй зондо юумэ абажа үгэхыень захяа ха гэжэ зариманиинь бодобо. 30Иуда хилээмэеэ абаад, тэрэ дороо газаашаа гараба. Һүни болоод байгаа.
Шэнэ захяа заабари
31Иудын газаа гараһан хойно Иисүүс хэлэбэ:
– Одоол мүнөө Хүн түрэлхитэнэй Хүбүүнэй алдаршаха саг ерэбэ, Хүн түрэлхитэнэй Хүбүүнэй алдар солонь Бурханай алдар соло гээшэ. 32Хүн түрэлхитэнэй Хүбүүнэй алдар солонь Бурханай алдар солые элирүүлбэл, Бурханшье Өөрөө Хүн түрэлхитэнэй Хүбүүниие алдаршуулха. Бурхан энээниие мэнэ гэһээр бүтээхэ. 33Үхибүүдни, таанартай суг хамта байха сагни бага үлөө. Таанар Намайе бэдэрхэт, теэд еврейнүүдэй ахамадуудта хэлэһэндэл адляар, Би таанарташье мүнөө хэлэхэмни: «Минии ошохо газарта таанар ерэжэ шадахагүйт». 34Би таанарта шэнэ захяа заабари үгэнэб: бэе бэедээ дуратай байгты. Би таанарта дуратай байгааб, тэрээндэл адляар таанаршье бэе бэедээ дуратай байгты. 35Хэрбээ таанадай бэе бэедээ дуратай байгаа һаа, Минии шабинар гэжэ хүнүүд барандаа мэдэхэ.
Пётрой арсаха тухай Иисүүс уридшалан хэлэбэ
36– Эзэн аа, Та хайшаа ошохотнайб? – гэжэ Симон Пётр Иисүүсһээ һураба.
– Мүнөө дээрээ ши минии хойноһоо ябажа шадахагүйш, теэд хожомшог хойноһоомни ерэхэш, – гэжэ Иисүүс харюусаба.
37– Эзэн аа! Би мүнөө Танай хойноһоо юундэ ошожо шадахагүй хүнбиб? Танай түлөө үхэхэшье болобол, би бэлэн байналби!
38– Минии түлөө үхэхэб гэнэ гүш? Эрэ тахяагай дуугархаһаань урда ши намһаа гурба дахин арсахалши гэжэ баталгаатай хэлэнэб! – гээд Иисүүс харюусаба.
Currently Selected:
Иоанн 13: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
