Иоанн 18

(Мт 26:47-56; Мк 14:43-50; Лк 22:47-53)

1Иигэжэ хэлэһэнэйнгээ һүүлээр Иисүүс шабинартаяа хамта Кидроон голой саада бэедэ байһан сэсэрлиг тээшэ шэглэн зорибо. Тэдэ бүгэдөөрөө сэсэрлиг руу ошобо. 2Урбагша Иуда энэ газарые мэдэхэ байгаа, Иисүүс шабинартаяа хамта тэндэ ходо суглардаг һэн. 3Иуда Римэй бүлэг сэрэгшэдые, мүн түрүү санаартанай, фарисейнүүдэй эльгээһэн Һүмын харуулшадые абаад, баһа сэсэрлиг руу ерэбэ; тэдэнэр бултадаа буу зэбсэг, гэрэл шиидам, гал түүдэгүүдые гартаа барижа ябаа. 4Иисүүс Өөртэйнь ямар юумэ тохёолдохые уридшалан мэдэжэ байһанһаа, урдаһаань гаража:

– Таанар хэниие бэдэрнэбта? – гэжэ һураба.

5– Назаредэй Иисүүсые бэдэрнэбди, – гэжэ тэдэнь харюусаба.

– Энэ Биб, – гэбэ Иисүүс.

Иуда урбагша баһал тэдэнтэй хамта байлсаа. 6«Энэ Биб» гэжэ Иисүүсэй хэлэмсээр, тэдэнь гэдэргээ сухарин, газарта унашабад.

7– Таанар хэниие бэдэрнэбта? – гэжэ Иисүүс дахин тэдэнһээ асууба.

– Назаредэй Иисүүсые бэдэрнэбди, – гэжэ тэдэнь харюусаба.

8– Энэ Биб гэжэ таанарта хэлээ хамнайб. Хэрбээ таанарта Би хэрэгтэй һаа, эдэ хүнүүдые табигты, – гэбэ Иисүүс. 9Тэрэ юундэ тиигэжэ хэлээб гэбэл:

«Намда Танай үгэһэн хүнүүдэй

нэгэнииньшье хосороогүй», – гэжэ Иисүүсэй хэлэһэн үгэнүүд хүсэлдэн бэелүүлэгдэхэ ёһотой байгаа.

10Һэлмэтэй байһан Симон Пётр һэлмэеэ гаргаһан бэеэрээ ахамад санаартын зарасын баруун шэхые таһа сабшаба. Тэрэ зарасань Малх гэжэ нэрэтэй һэн.

11– Һэлмэеэ хуйдань хэ! Иимэ хуби заяа Эсэгэмни Намда үгөө. Энээнһээ Би арсаха аалби? – гэжэ Пётрто Иисүүс хэлэбэ.

Ахамад санаарта мүшхэбэ

12Тиихэдэнь Римэй сэрэгшэд даргатаяа хамта, мүн ахамад санаартын болон фарисейнүүдэй эльгээһэн Һүмын харуулшад Иисүүсые барижа хүлибэ. 13Тэрээниие түрүүн тэрэ жэлдэ ахамад санаарта байһан Кайафа гэгшын хадам эсэгэнь болохо Аннада абаашаба. 14Бүхы еврей зоной орондо гансал хүн хосороо һаа дээрэ байха гэжэ еврейнүүдэй ахамадуудта зүбшэл үгэһэн хүниинь эгээл тэрэ Кайафа байгаа.

Пётрой арсалга

15Иисүүсэй хойноһоо Симон Пётр, баһа нэгэ шабинь дахажа ябаа. Тэрэ шабинь ахамад санаартатай танил байһан дээрэһээ ахамад санаартын буусада Иисүүстэй хамта оробо. 16Харин Пётр бартаагай саана үлэбэ. Удаань ахамад санаартатай танил шабинь газаа гаража, бартаагай үүдэ һахидаг зараса эхэнэртэй хөөрэлдөөд, Пётрые хорёо соо оруулба.

17– Ши энэ хүнэй шабинь хаяаш? – гэжэ зараса эхэнэрынь Пётрто хэлэбэ.

– Бэшэб даа, – гэжэ Пётр харюусаа.

18Газаа хүйтэн байгаа. Зарасанар болон Һүмын харуулшад гал түүдэг носоогоод, хажуудань дулаасажа һуугаа. Мүн Пётршье тэдэнэй хажууда зогсоод, дулаасажа байгаа. 19Тэрэ үедэнь ахамад санаарта Иисүүсэй шабинар тухай, Тэрэнэй һургаал номнол тухай Иисүүсһээ асуулта абажа байба.

20– Би бүгэдэ зоной урда сэхэ хэлэдэг һэнби. Би мүргэлэй гэрнүүд соо ба Һүмэ соо хододоо һургаалаа номногшо һэм. Тэндэ бүхы еврейнүүд ерэдэг һэн, – гэжэ Иисүүс харюусаба. – Нюуса юумэ Би огто хэлээгүйб. 21Юундэ таанар Намайе мүрдэжэ мүшхэжэ байнабта? Юу хэлэһэн тухаймни Минии шагнагшадһаа һурыт, юун гэжэ хэлэһыемни тэдэ мэдэхэл.

22Иигэжэ хэлэхэдэнь, Иисүүсэй хажууда зогсожо байһан харуулшадай нэгэниинь Тэрэнэй нюурыень альгадаад:

– Ахамад санаартын урдаһаа юундэ иигэжэ дуугарнабта! – гэжэ зандаран хэлэбэ.

23– Хэрбээ али-нэгэн буруу юумэ Минии хэлээ һаа, ямар юумэниинь бурууб гэжэ Намда хэлыш. Хэрбээ үнэн зүб юумэ хэлээ һаамни, ши Намайе юундэ сохибош, – гэбэ Иисүүс.

24Тиихэдэнь Анна Иисүүсые хүлеэтэй зандань ахамад санаарта Кайафада эльгээбэ#18:24 Римэйхинэй Кайафые ахамад санаартаар томилжо табихын урда тээнь ахамад санаартын үүргэ Анна гүйсэдхэжэ байгаа, тиин һолигдоһонойгоо һүүлээршье тэрэ хүн зоной дунда ахамад санаартын нэрэ хүндэтэй ябаа.. 25Симон Пётр газаа дулаасажа байба.

– Ши баһа Иисүүсэй шабинь хаяаш? – гэжэ тэрээндэ хэлэбэд.

– Бэшэб, – гэжэ Пётр харюусаба.

26– Сэсэрлиг соо шамайел Иисүүстэй хамта би хараа бэшэ һэн аалби? – гэжэ ахамад санаартын зарасанарай нэгэн асууба. Тэрэ зарасын түрэл болохо хүнэй шэхэ Пётр һэлмээрээ таһа сабшаһан байгаа.

27– Би шабинь бэшэб, – гэжэ Пётр баһа мэлзэбэ. Тиигэмсээрнь эрэ тахяа дуугарба.

Иисүүс Пиладай урда зогсоно

28Эртэ үглөөгүүр еврейнүүд Иисүүсые удамаршын#18:28 Иудейдэ дүүрэн эрхэтэй Римэй засаглагша. ордондо Кайафаһаа асарба. Бэеэ бузарлахагүйн тула тэдэ римэй засаглагшын ордондо оробогүй, тэндэ ороо һаа, тэдээндэ Паасхын зоог барижа болохогүй байгаа. 29Тиимэһээ удамарша Пилат#18:29 Понтий Пилат – иудейн можодо дүүрэн эрхэтэй Римэй захирагша (26–36-дахи онууд). өөрөө гараба.

– Энэ хүниие таанар юун гэжэ зэмэлнэбта? – гээд асууба.

30– Хэрбээ гэм хээгүй һаань, бидэ Энээниие танда асархагүй һэмди, – гээд тэдэнь харюусаба.

31– Һөөргэнь абаашаад, өөһэдынгөө хуулиин ёһоор шүүбэрилэгты, – гэбэ Пилат.

– Римэй засагаархин хүниие саазалха эрхэ бидэндэ олгоногүй, – гэжэ тэдэнь арсаба.

32Иигэжэ ямар үхэлөөр үхэхэ тухайгаа Иисүүсэй хэлэһэн үгэнүүд хүсэлдэн бэелүүлэгдэбэ. 33Пилат ордондоо дахин ороод, Иисүүсые дуудажа:

– Та еврейнүүдэй хаан гүт? – гэжэ асууба.

34– Нам тухай та өөрөө тиигэжэ һанаба гүт, али ондоо хүнүүд танда тиигэжэ хэлээ гү? – гээд Иисүүс һураба.

35– Би еврей аалби? Танай Өөрынтнай нютагаархин, түрүү санаартан Таниие намда асаржа тушаагаа. Ямар тиимэ муу юумэ хээбта? – гэбэ Пилат.

36Иисүүс харюусаба:

– Минии хаан түрэ энэ дэлхэй дээрэхи засаг түрэдэл адли бэшэ. Хэрбээ Минии хаан түрэ энэ дэлхэйн байбал, Минии албатан Намайе еврейнүүдэй ахамадуудай гарта оруулхагүй гэжэ оролдохо һэн. Минии мэдэлэй хаан түрэ энэ дэлхэйн бэшэ.

37– Тиихэдээ Та яабашье һаа, хаан боложо таарана гүт? – гэжэ Пилат асууба.

– Та өөрөө Намайе Хаан гэнэт. Би үнэн зүйлые гэршэлхын тула түрэһэн, дэлхэйдэ ерэһэн байнаб. Үнэн зүйлые баримталагшад бултадаа Минии хэлэһые дуулана, – гэбэ Иисүүс.

38– Үнэн зүйл гэжэ юун бэ? – гээд Пилат асууба.

Иисүүсые саазалха шиидхэбэри гаргабад

Пилат дахин еврейнүүдтэй уулзахаяа гаража:

– Би энэ Хүндэ зэмэ тохохо ямаршье баримта олоногүйб, – гэбэ. – 39Таанадай баримталдаг ёһо заншалаар Паасхын үедэ би нэгэ хүниие саазаһаа сүлөөлжэ үгэдэгби. Еврейнүүдэй хааниие табихыемни хүсэнэ гүт?

40– Үгы! Тэрээниие бэшэ! Бараббаае бидэндэ таби! – гээд тэдэнь хашхаралдаба. Харин Бараббаа гэдэгынь үймүүлэгшэ байгаа.

Currently Selected:

Иоанн 18: BurBBL2024

Highlight

Copy