Иоанн 21

(Мт 28:16-20; Мк 16:14-18; Лк 24:36-49)

Долоон шабинь Иисүүстэй уулзаба

1Энээнэй удаа Тибериада нуурай#21:1 Ондоогоор Галилейн далай гэжэ нэрлэгдэдэг. хажууда байһан шабинартаа Иисүүс дахин Өөрыгөө үзүүлбэ. Энэ ушар иигээд болоһон байна. 2Симон Пётр, Эхир гэжэ ара нэрэтэй Фома, Галилейн Каанаһаа гарбалтай Натанаил, Зэбэдэйн хүбүүд, Иисүүсэй ондоо хоёр шабинар бултадаа сугларба.

3– Би загаһа барихаяа ошохомни, – гэжэ Симон Пётр тэдэндэ хэлээ.

– Бидэшье шамтай ошолсохомнай, – гэжэ бэшэниинь хэлэбэ.

Тэдэнэр онгосодо һуугаад, нуураар тамарба, теэд тэрэ һүни нэгэшье загаһа барибагүй. 4Үүр сайжа эхилхэдэ Иисүүс нуурай эрьедэ зогсожо байба. Теэд шабинарынь Иисүүсые танибагүй.

5– Хүбүүд, загаһа бариба гүт? – гэжэ Иисүүс тэдэнһээ асууба.

– Баряагүйбди, – гэжэ тэдэнь харюусаба.

6– Губшуураа онгосынгоо баруун тээнь хаягты, тиигээ һаа, барихат, – гэбэ Иисүүс.

Тэдэнь гүльмэеэ хаяба, тиихэдэнь гүльмэ соонь татажа гаргахын аргагүй олон загаһа орошоод байба.

7– Энэ Эзэн байна! – гэжэ Иисүүсэй дуратай шабинь Пётрто хэлэбэ.

Энэ Эзэн байна гэжэ дуулахадаа, Симон Пётр гадар хубсаһаа үмдөөд, уһа руу һүрэбэ. Энээнэй түрүүн Симон Пётр загаһа барихаяа гадар хубсаһаа тайлаад байгаа. 8Нүгөөдэ шабинарынь загаһатай гүльмэеэ хойноһоо шэрээд, онгосоороо эрье тээшэ тамарба. Нуурайнь эрье холо бэшэ һэн – хоёр зуугаад тохой байгаа. 9Уһанай эрьедэ гарахадаа, носожо байһан улаан сог, дээрэнь загаһа, хажуудань хилээмэ байхые шабинарынь хараба.

10– Мүнөө бариһан загаһанһаа үшөө нэгэ хэдые асарагты, – гэжэ Иисүүс тэдэндэ хэлэбэ.

11Симон Пётр уһанай эрьедэ гараад, гүльмэеэ татажа гаргаба, тэндэнь зуун табин гурбан томо гэгшын загаһа дүүрэн ороод байба. Тиимэ олон загаһа ороод байбашье, гүльмэнь таһарбагүй.

12– Үглөөнэй хоол барихаяа һуугты, – гэбэ Иисүүс.

Та хэн гээшэбта гэжэ Тэрээнһээ асуухаяа шабинарай хэнииньшье зүрхэлбэгүй. Энэмнай Эзэн байна гэжэ тэдэнь мэдээ ха юм. 13Иисүүс хажуудань ерэжэ, хилээмэ абаад, тэдэндээ хубааба, мүн загаһа хубаажа үгэбэ. 14Амидырһанайнгаа һүүлдэ шабинартаа Иисүүсэй гурбадахияа Өөрыгөө үзүүлхэдэнь, тиимэ ушар болоо һэн.

Иисүүс Пётр хоёр

15Тэдэнэй эдеэлһэн хойно Иисүүс Симон Пётрто хандан:

– Иоаннай хүбүүн Симон, ши Намда эдэнһээ бүри ехээр дуратай гүш? – гэжэ асууба.

– Тиимэ даа, Эзэн, Танда минии дуратайе Та мэдэнэ ха юмта, – гэжэ Пётр харюусаба.

– Минии хурьгадые харууһалжа бай, – гэбэ Иисүүс. 16Тэрээнһээ хоёрдохиёо:

– Иоаннай хүбүүн Симон, ши Намда дуратай гүш? – гэжэ һураба.

– Тиимэ даа, Эзэн, Танда минии дуратайе Та мэдэнэ ха юмта, – гэжэ Пётр харюусаба.

– Минии хонидые харууһалжа бай.

17Иисүүс тэрээнһээ гурбадахияа:

– Иоаннай хүбүүн Симон, ши Намда дуратай гүш? – гэжэ һураба.

Намда дуратай гүш гэжэ Иисүүсэй гурбадахияа һурахадань, Пётрой досоо уйдхартай байба.

– Эзэн, Та бултыень мэдэнэт. Танда минии дуратайе мэдэнэ ха юмта, – гэжэ Иисүүстэ Пётр харюусаба.

Иисүүс тэрээндэ:

– Минии хонидые харууһалжа бай. 18Шамда үнэн зүбые хэлэнэб: залуу ябахадаа бүһэеэ ши өөрөө бүһэлөөд, дуратай тээшээ ошодог байгааш. Харин үтэлхэдэшни гарыешни уяад, шинии ошохо дурагүй газарта шамайе хүтэлөөд абаашаха, – гэжэ хэлэбэ.

19Иигээд хэлэхэдээ, Пётр ямар үхэлөөр үхэжэ Бурханиие алдаршуулхаб гэжэ Иисүүс ойлгуулһан байгаа. Тиигээд:

– Минии хойноһоо дахаад яба! – гэжэ Пётрто хэлэбэ.

Иисүүс ба Тэрэнэй дуратай шабинь

20Пётрой гэдэргээ эрьеэд харахадань, Иисүүсэй дуратай шабинь Пётрой арада ябаба. Һүүлшын үдэшэ хоол барижа байха үедэ эгээл тэрэ шабинь Иисүүсэй сээжэдэ толгойгоо налаад һуужа байһанаа: «Эзэн аа! Таниие хэн барижа үгэхэеэ байнаб?» – гэжэ һураа бэлэй. 21Пётр тэрэ шабииень хараад, Иисүүсһээ:

– Эзэн аа, энэмнай яахань гээшэб? – гэжэ һураба.

22– Һөөргөө бусажа ерэтэрни энэ шабиингаа амиды байхые Минии хүсөөшье һаамни, шамда ямар хэрэг байнаб? Ши Минии хойноһоо дахаад яба! – гэжэ Иисүүс хэлэбэ.

23Тиимэл ушарһаа тэрэ шабинь үхэхэгүй гэһэн һураг бэшэнүүдэйнь дунда тараба. Теэд үхэхэгүй гэжэ Иисүүс хэлээгүй, харин: «Һөөргөө бусажа ерэтэрни энэ шабиингаа амиды байхые Минии хүсөөшье һаамни, шамда ямар хэрэг байнаб?» – гэжэ хэлээ һэн.

24Тэрэл шабинь энээн тухай хөөрэһэн, эдэ бүгэдые бэшэһэн байна. Тэрэ шабиинь энэ гэршэ баримта үнэн юм гэжэ бидэ мэдэнэбди.

25Иисүүс үшөөшье олон хэрэгүүдые бүтээгээ. Хэрбээ эдэ бүгэдыень тодорхойгоор бэшээ һаа, тиимэ олон номууд бүхы дэлхэйдэшье багтахагүй һэн гэжэ һананаб.

Currently Selected:

Иоанн 21: BurBBL2024

Highlight

Copy