Лука 1
1
1Эрхим хүндэтэ Теофил! Манай дунда болоһон ушар ябадалнууд тухай туужа олон зон бэшэхэ гэжэ һэдэнэ. 2Эхинһээнь байлсаһан, болоһон бүгэдые хараһан зоной маанадта хөөрэһые тэдэ нүхэд буулгажа бэшэнэ. 3-4Бишье баһа болоһон бүгэдые эхинһээнь нарин нягтаар шудалаад, шамда номногдоһон һургаалай сохом үнэниие мэдэжэ байхыншни тула тохёолдоһон бүгэдые үнэн байдалаарнь хойно хойноһоонь дараалан шамда бэшэжэ дамжуулха гэжэ шиидэбэб.
Уһаар Арюудхагша Иоаннай мүндэлэлгэ айладхагдаба
5Иудейн орон нютагые Ирод хаанай зонхилжо байхада Захарияа ба Елизавета гэжэ нэрэтэй үбгэ һамга хоёр ажаһуугаа: үбгэниинь Абияа бүлэгэй санаартан, тиин һамганиинь Аарон гэжэ ахамад санаартанай үри һадаһан мүн байгаа. 6Тэдэ хоюулан Бурханай хүсэл бодото дээрэнь бэелүүлэн, Хуулиин захяа заабаринуудые жэншэдгүй һайханаар сахидаг һэн. 7Елизавета һамганиинь анханай үригүй байжа, тэдэ хоёр үндэр наһа наһалтараа үхибүүгүй байгаа.
8-9Нэгэтэ Захарияа санаартанай Бурханда алба хэхэ уялгата үдэрэй ерэхэдэ, тэрээндэ жээрэбээр Эзэнэй Һүмэ соо орожо, сан табиха ехэ үршөөл тудаба. 10Сан санзай уталгын тэрэ үедэ үй түмэн зон Һүмын хорёо соо мүргэжэ байба. 11Харин Һүмэ дотор сан табидаг шэрээгэй баруун таладань гэнтэ Бурханай Эльгээмэл бии болобо. 12Тэрэниие хараад, Захарияа мэгдэбэ, айба. 13Харин Эльгээмэл хэлэбэ:
– Захарияа, бү ай, шинии зальбаралые Бурхан дуулаа, Елизавета һамганшни шамда хүбүү түрэхэ. Хүбүүгээ Иоанн гэжэ нэрлэхэш. 14Ши ехээр баярлаха, хүхихэш, тиин үшөөшье олон бусад зон хүбүүнэйшни түрэһэндэ баярлаха, 15юундэб гэхэдэ, хүбүүншни Бурханай нюдэндэ агууехэ хүн байха: үзэмэй дараһан архи амсахагүй, бүри эхынгээ умайда байхадаа Арюун Һүлдэ тогтоожо абаха, 16Израилиин олон зониие өөһэдынь Бурхан болохо Эзэндэ һөөргэнь бусаажа хандуулха. 17Хүбүүншни Эзэнэй урда Элияадал адли һүр хүсөөр, һүнэһэ һүлдөөр дүүрэн ерэхэ. Тиигэжэ үбгэ эсэгэнэрые үри хүүгэдтэйнь эблэрүүлхэ, өөрынхеэрээ ябадаг хүнүүдые Бурханай эрхэ хүсэл бэелүүлхэ тээшэнь тэгүүлхэ. Иигэжэ арад зониие Эзэнтэй уулзуулхада бэлэн болгожо байха.
18– Би үбгэрөөб, һамгамнишье наһатай болонхой. Тиимэһээ хэлэһэн үгэнүүдтнай хүсэлдэхэ гэжэ би яагаад мэдэхэ гээшэбиб? – гэжэ Захарияа Эльгээмэлһээ асууба.
19– Би болбол Бурханай ойро оршодог Габриһээл гээшэб. Энэ һайн мэдээсэл дуулгахыемни Бурхан намайе шамда эльгээгээ юм. 20Сагайнгаа ерэхэдэ хүсэлдэхэ эдэ үгэнүүдтэмни этигээгүй юм хадаа, эдэ бүгэдын тохёолдохо үдэр болотор ши аниргүй, дуугаржа шадахагүй ябахаш, – гэжэ Эльгээмэл айладаба.
21Тэрэ үедэ арад зон Захарияагай гарахые хүлеэжэ, Һүмэ соо яагаа удаан болоноб гэжэ гайхажа байгаа һэн. 22Тэрэнэй Һүмэһөө гараад, дуугаржа шадахагүй байхыень харахадаа, Һүмэ соо хий үзэгдэл хараа байна гэжэ зон ойлгобо. Хэлэгүй болоһон Захарияа гар хургаараа заажа байгаад зонтой ойлголсобо. 23Албаяа хэжэ дүүргээд, Захарияа гэртээ хариба. 24Уданшьегүй тэрэнэй Елизавета һамганиинь хээлитэй болоод, табан һарын туршада гэрһээн гарабагүй.
25– Одоошье Эзэн намайе үршөөгөө, хүн зоной хэлэ аманһаа хамгаалаа, – гэжэ тэрэ эхэнэр өөртөө хэлэжэ байба.
26Елизаветын зургаадахи һарадаа ябахада, Бурхан Габриһээл гэдэг Эльгээмэлээ Галилейн Назарет хотодо ажаһуудаг 27Мария басаганда эльгээбэ. Тэрэ басаган Давид хаанай үри һадаһан болохо Иосиф гэжэ хүнтэй хуби заяагаа холбохоо байгаа. 28Бурханай Эльгээмэл Марияда ерээд:
– Амар мэндэ, аза жаргалтай басаган! Эзэн шамтай байна, шамайе буян хэшэгтээ элбэг дэлбэгээр хүртөөбэ! – гэжэ хэлэбэ. 29Иимэ юумэ дуулахадаа, Мария ехээр мэгдэжэ сошобо, юун гэбэ гээшэб гэжэ бодобо.
30– Бү ай, Мария, ши Бурханай буян хэшэгтэ хүртэбэш. 31Ши хүндэ болохош, хүбүү түрэхэш, тэрээндээ Иисүүс гэжэ нэрэ үгэхэш. 32Тэрэшни агууехэ хүн болохо, Дээдэ Бурханай Хүбүүн гэжэ нэршэхэ. Эзэн Бурхан хүбүүешни үбгэ эсэгэ Давидтайнь адли хаан болгохо. 33Тиигэжэ Тэрэ Яковай үри һадаһадые хэтын хэтэдэ захирха, Тэрэнэй хаан түрэ хэзээш һүнэхэгүй, – гэжэ Эльгээмэл хэлэбэ.
34– Минии хадамда гараагүй байхада яажа тиимэ юумэн болохоб? – гэжэ Мария асууба.
35Эльгээмэл харюусаба:
– Арюун Һүлдэ шам дээрэ бууха, Дээдэ Бурханай хүсэн шамайе хушаха. Тиимэһээл түрэхэ нангин үришни Бурханай Хүбүүн гэжэ нэрлэгдэхэ. 36Тиихэдэ шинии түрэл садан Елизавета наһатай болоошье һаа, баһал хүбүүтэй болохо гэжэ байна. Үригүй гэжэ хэлүүлдэг байһан аад, мүнөө зургаадахи һара дээрээ ябана. 37Бурханай хэжэ шадахагүй юумэн үгы ха юм.
38– Эзэн Бурханай мэдэлдэ ха юмбиб даа. Хэлэһэнтнай бэелхэнь болтогой! – гэжэ Мария хэлэбэ. Тиигээд Эльгээмэл басаганһаа холодобо.
39Удангүй Мария яаралтайгаар харгыда гаража, хадалиг Иудей уласай хото хүрөөд, 40Захарияагай гэртэ орожо, Елизаветые мэндэшэлбэ. 41Мариягай мэндэеэ хэлэхэтэйнь адли Елизаветын хэбэлдэ байһан үхибүүн тэршэлээд абаа һэн ха. Тэрэ дороо Елизавета Арюун Һүлдөөр дүүрэбэ, 42тиигээд шангаар хэлэбэ:
– Ши бусад эхэнэрнүүдһээ үлүү ехээр Бурханай үршөөлдэ хүртэбэш, мүн хэбэл соо хэбтэһэн үришни үршөөлдэ хүртэбэ! 43Минии Эзэнэймни эжы, иимэ һайнаар намда орожо ерэһэндэшни би баяртай байнаб. 44Шинии мэндэшэлгэ дуулахатаймни сасуу, хүбүүмни хэбэл соом баясажа тэршэлээл. 45Эзэн Бурханай айладхаһан үгэ бэелхэ гэжэ этигэһэн ши амар жаргалтайш!
46Тиихэдэнь Мария иигэжэ үгэлбэ:
– Би үнэнхэ сэдьхэлһээ
Эзэнээ алдаршуулан магтанаб,
47Бурхан тухай, намайе Абарагша тухай сэдьхэн,
һүр һүлдэмни урма баяраар халина.
48Ахир жаахан намайе Бурхан хаража,
агуу эбигээл хайрадаа хүртөөбэ.
Бүхы угсаата зон энээнһээ хойшо намайе
амар жаргалтай эхэнэр гэжэ
нэрлэдэг болохонь гээшэл.
49Түгэс Хүсэтэ Бурхан
туйлай ехэ хэрэг намда бүтээгээл,
Тэрэнэй алдар нэрэнь арюун нангин лэ!
50Өөртэнь бэшэрдэг, этигэдэг зониие
үршөөл хайрадаа Тэрэ
үеын үедэ хүртөөжэ байдаг лэ!
51Тэрэ агуу хүсэтэ гараа һунган,
ехэрхүү һайзгайнарые һарнюулаа.
52Засаг баригшадые хаан шэрээһээнь буулгаад,
доромжологдоһон даруу зониие дээшэнь үргөө.
53Үлэсхэлэн үгытэйшүүлдэ
элбэг дэлбэг юумэ үгөөд,
дээрэлхүү баяшуулые
гар хооһон ябуулаал.
54Үбгэ эсэгэнэртэмнай амалһанаа
Тэрэ гүйсэд бэелүүлээл,
Израиль зарасадаа аша туһатай байгаал,
55манай үдэрнүүд хүрэтэр мартангүй
Абраһаамда болон тэрэнэй үри һадаһадтань
үеын үедэ үршөөл хайраа хайрлажа байгаал!
56Мария гурба һара шахуу Елизаветэтэй хамта байгаад, гэртээ харяа бэлэй.
Уһаар Арюудхагша Иоаннай түрэһэн түүхэ
57Елизаветын хүнгэрхэ саг ерэжэ, тэрэ хүбүү түрэбэ. 58Эзэнэй Елизаветэдэ хүртөөһэн эбигээл хайра арьбажаа гэжэ дуулахадаа, хүршэнэрынь, түрэл саданиинь тэрээнтэй хамта ехэтэ баярлаба.
59Түрэһөөр наймадахи үдэртэнь нарай хүбүүнэй бэлгэ отолуулха ёһололдо зон сугларжа, тэрээндэ Захарияа гэжэ эсэгынь нэрэ үгэхэ гэлсэбэ. 60Тиихэдэнь эхэнь:
– Үгы, хүбүүндээ Иоанн гэжэ нэрэ үгэхэбди, – гэбэ.
61– Түрэл саданайтнай дунда тиимэ нэрэтэй хүн оройдоо үгыл, – гэжэ Елизаветэдэ хэлэбэд. 62Тиигээд хэн гэжэ нэрэ хүбүүндээ үгэхэбши гэжэ эсэгэһээнь гараараа заажа харуулжа байгаад асуухадань, 63Захарияа багахан хабтагай асаруулаад, «Хүбүүнэймни нэрэ – Иоанн!» гэжэ бэшэбэ. Зон булта гайхаа һэн. 64Тэрэ дары Захарияагай аман нээгдэжэ, хэлэниинь табигдажа, тэрэ Бурханиие магтажа оробо. 65Энэ ушарһан гайхамшагта үйлэ хэрэг тухай һураг бүхы Иудейн хадалиг улас соогуур таража, хажуугаарнь ажаһуудаг хүршэ зон булта айн һүрдэбэ. 66Дуулаһан зон энээниие сэдьхэлдээ бүхөөр хадуужа:
– Энэ хүбүүн хэн юун болохо хаб? – гэлдэбэ. Үнэхөөрөөшье Иоаннай хажууда Эзэнэй оршожо байһань эли байба.
Захарияа Эзэнэй абарал буулгана
67Нарай хүбүүнэй эсэгэ Захарияа Арюун Һүлдөөр дүүрэжэ, иимэ лүндэн табиба:
68– Израилиин Бурхан болохо
Эзэндэ алдар соло дуудаял!
Аюул тодхорһоо абархаяа
Тэрэ арадтаа ерээ.
69Зараса Давидайнгаа үри һадаһадһаа
манда һүр хүсэтэй Абарагшые үгөөл.
70-71Дайсадһаатнай, таниие үзэн ядагша
бүхы зонһоо абархаб гэжэ
Тэрэ эртэ урдын сагта
арюун лүндэншэдөөрөө дамжуулан,
72үбгэ эсэгэнэртэтнай найдуулһан ёһоор
таанадые үршөөл хайрада хүртөөхэб,
мүн Өөрынгөө нангин хэлсээ,
73танай үбгэ эсэгэ Абраһаамда үгэһэн
тангаригаа һанан байхаб,
74дайсадайтнай гарһаа мулталан абархаб гээ.
Тиимэһээ бидэ айлтагүйгөөр Эзэндээ алба хэжэ,
75наһан туршадаа арюун һайханаар,
боди сэдьхэлээр Тэрээндэ
мүргэл хэжэ ябаха заяатайбди.
76Тиин ши, жаахан хүбүүмни,
Дээдэ Бурханай лүндэншэ гэжэ нэрлэгдэхэш,
Эзэнэй урдань ябажа,
заларха замыень бэлдэхэш.
77Нүгэлөө арилгажа абарагдахат гэжэ
Бурханай арадта ши айладхахаш.
78Бурхамнай гүн ехэ хайраараа
огторгойһоо шараһан Гэгээн Наран мэтээр
79үхэлэй харанхы һүүдэртэ хушагдаһан маанадые гэрэлтүүлхэ,
энхэ тайбанай замаар хүтэлэн,
алхам бүхэнииемнай шэглүүлхэ.
80Хүбүүхэн боргожон бэежэжэ, сэдьхэл зоригынь хатуужажа байба. Израилиин арадта айладхаха сагайнгаа ерэтэр тэрэ хүбүүн сүл губида байба.
Currently Selected:
Лука 1: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
