Лука 5

(Мт 4:18-22; Мк 1:16-20; Ин 1:40-42)

1Нэгэтэ хүн зон олоороо Иисүүсые тойроод, шахасалдан, Бурханай үгэ номнохыень шагнаба. Иисүүс тиихэдэ Гэннэсарээт далайн эрьедэ зогсожо байгаа. 2Далайн эрьедэ хоёр онгосын байхые Иисүүс хараба. Загаһашад эрье дээрэ гаража, гүльмэеэ угаажа заһана. 3Тэдэ хоёр онгосын нэгэниинь Симонэй байгаа. Иисүүс тэрэ онгосодо һуужа:

– Эрьеһээ нэгэ бага холо болоё, – гэжэ Симондэ хэлэбэ. Тиигээд онгосоһоо арад зониие һургаба.

4Иисүүс һургаалаа дүүргээд:

– Гүнзэгы газарта ошожо, загаһа баридаг губшуураа хаягты, – гэжэ Симондэ хэлэбэ.

5– Багша аа, бидэ бүхэли һүниндөө загаһашалаад, юушье баряагүйбди. Теэд Танай хэлээ хада губшуураа хаяһуул даа, – гэжэ Симон харюусаба. 6Загаһашад губшуураа хаяжа, аргагүй ехэ загаһа бариба. Даажа ядаһан губшуурынь таһаржа хахаржа байба. 7Тиигээд тэдэнэр нүгөө онгосынхидоо даллан, ерэжэ туһалхыень дуудаба. Тэдэнь ерэжэ, хоёр онгосоёо загаһаар дүүргэбэ. Тиихэдэнь онгосонуудынь уһанда шэнгэхэһээ нааша болоо бэлэй. 8Иимэ олзотой болоһон Симон Пётр Иисүүсэй урда үбдэглэн һэхэрэн һүгэдэжэ:

– Эзэн аа, намайе орхижо ошогты! Би нүгэлтэй хүнби, – гэжэ хэлэбэ.

9Иимэ ехэ загаһа бариһандаа Симон болон тэрээнтэй ябаһан бүхы хүнүүд, 10мүн тэрэшэлэн Зэбэдэйн хүбүүд, Симонэй нүхэд Яков Иоанн хоёр гайхажа һүрдэжэ байбад.

– Бү ай, ши энээнһээ хойшо загаһа барихын орондо хүнүүдые Намда хандуулдаг болохош, – гэжэ Иисүүс Симондэ хэлэбэ. 11Онгосоёо эрье дээрэ гаргаад, загаһашад бүхы юумэеэ тэндээ орхижо, Иисүүсэй хойноһоо ябабад.

Иисүүс үбшэн хүниие эдэгээнэ

12Иисүүсэй нэгэ хотодо ошоод байхадань, арһанай халдабарита үбшэнтэй хүн ерэбэ. Иисүүсые хараһаар, урдань газар мүргэн унажа:

– Эзэн, аа! Хэрбээ Та хүсэбэл, намайе арюудхан эдэгээжэ шадахат, – гэжэ гуйба. 13Иисүүс тэрээндэ гараараа халта хүрэжэ:

– Эдэгээхэ хүсэлтэйб, арюун болыш даа, – гэбэ. Тэрэ дороо арһанай халдабарита үбшэниинь эдэгэшэбэ.

14– Энээн тухай хэндэшье бү дуулгаарай. Зүгөөр санаартанда ошожо, бэеэ үзүүлээрэй, тиигээд эдэгэһэнээ бултанда гэршэлхын тула ши Моисейн зарлигай ёһоор үргэл хээрэй, – гэжэ Иисүүс хэлэбэ.

15Тиибэшье Иисүүс тухай мэдээсэл бүри холуур таража, арад зон бүри олоороо Тэрэниие шагнахаяа, үбшэнөө аргалуулхаяа ерэжэл, ерэжэл байба. 16Харин Иисүүс Өөрөө үе үе болоод лэ эзэгүй газарта ошожо, Бурханда мүргэдэг бэлэй.

Иисүүс саа үбшэнтэниие эдэгээнэ

17Нэгэтэ Галилей болон Иудей можын бүхы нютагуудһаа, Иерусалимһаа ерэһэн фарисейнүүдэй#5:17 Фарисейнүүд болбол еврей шажанай шухала гурбан бүлгэмэй нэгэн болоно. Фарисейнүүд Моисейн Хуулиин бүхы зүйлнүүдые, мүн шажан тахилай дүримүүдые нарин нягтаар гүйсэдхэхые шаардана. Тэдэ Иисүүс Христоосто эсэргүүсэгшэд һэн. болон Хуули заадаг багшанарай суглараад һуухада, Иисүүс хүнүүдые һургажа байба. Бурханһаа үгтэһэн шэдитэ хүсөөр Иисүүс ямаршье үбшэн эдэгээжэ шадаха байгаа. 18Энэ үедэ саа үбшэндэ дайруулһан нэгэ хүниие шэрдэгтэйнь тэлээд абажа ерэбэ. Үбшэнтэниие гэртэ оруулжа, Иисүүсэй урда табиха гэбэ. 19Теэд хара мянган зоной дундуур оруулха аргагүй байжа, гэрэй орой дээрэ гаража, хушалтыень задалаад, гараһан нүхөөр үбшэнтэнөө шэрдэгтэйнь Иисүүсэй урда доошонь буулгаба. 20Тэдэнэй аргагүй ехэ этигэлтэй байһыень хаража:

– Нүгэлнүүдшни хүлисэгдэбэ, нүхэрни, – гэжэ Иисүүс тэрэ хүндэ айладхаба.

21Хуули заадаг багшанар болон фарисейнүүд хоорондоо зүбшэжэ:

– Энэмнай хэн гээшэб? Бурханиие доромжолжо байнал. Ганса Бурханһаа ондоо хэн хүнэй нүгэл хүлисэдэг юм? – гэлдэбэ. 22Иисүүс тэдэнэй юун тухай бодожо байхые мэдээд:

– Юундэ тиигэжэ сэдьхэлдээ бодобот? 23«Нүгэлнүүдшни хүлисэгдэбэ» гэхэдэ бэлэн гү, али «Бодоод яба!» гэхэдэ гү? 24Хүн түрэлхитэнэй Хүбүүнэй газар дэлхэй дээрэ нүгэл шэбэлнүүдые хүлисэхэ эрхэтэй байһые таанар мүнөө мэдэхэт, – гэжэ Иисүүс хэлэбэ. Тиигээд саа үбшэнтэй хүндэ хандан:

– Бодоод, дэбисхэрээ абаад, гэртээ хари, – гэбэ. 25Тэрэнь хүнүүдэй хараһаар байтар бодоод, хэбтэһэн шэрдэгээ абажа, Бурханиие магтан зальбарһаар гэртээ хариба. 26Хүн зон булта гайхан сошожо, Бурханаа алдаршуулан:

– Гайхалтай юумэ энэ үдэр үзэбэбди даа! – гэжэ айн һүрдэн үгэлбэд.

Иисүүс Матвей Левийе шэлэжэ абана

27Энээнэй һүүлээр Иисүүс газаашаа гарахадаа, алба татааша Левий гэгшын татабари суглуулдаг газартаа һуухыень хараад:

– Хойноһоомни яба, – гэбэ. 28Тэрэнь бодожо, бүхы юумэеэ орхёод, Иисүүсэй хойноһоо ябаба.

29Левий Иисүүсые гэртээ урижа, ехэ һайнаар хүндэлбэ. Тэндэнь Иисүүстэй хамта алба татагшад, мүн бусадшье олон хүнүүд һуулсаа.

30– Юундэ таанад алба татаашадтай, нүгэл хэгшэдтэй хамта эдеэлжэ, ундалжа һуунабта? – гэжэ фарисейнүүд болон Хуули заадаг багшанар Иисүүсэй шабинарта хандажа, гэмэр-гутар гэлдэбэ.

31– Элүүр уладта эмшэн хэрэггүй, харин үбшэн хүнүүдтэ хэрэгтэй юм. 32Бурханда хандахыень би үнэн сэдьхэлтэниие бэшэ, харин нүгэл хэгшэдые дуудахаяа ерээ хүнби! – гэжэ Иисүүс тэдээндэ харюусаба.

Масаг сахиха тухай асуудал

33– Иоаннайшье, фарисейнүүдэйшье шабинар үргэлжэ масаг сахижа, Бурхандаа мүргэжэ байдаг лэ, харин Танай шабинар эдихэ, уухыел мэдэнэл, – гэжэ фарисейнүүд ба Хуули заадаг багшанар Иисүүстэ хэлэбэ. 34Тиихэдэнь Иисүүс тэдээндэ харюусаба:

– Таанар түрэ хурим дээрэ найрлажа байһан айлшадые хүрьгэн хүбүүнэй байха сагта масаг сахигты гэжэ баадхаха аалта? 35Зүгөөр хүрьгэн хүбүүниие тэдэнһээ абаад ябаха үдэрэй ерэхэдэнь, тэдэ айлшад масаглахал.

36Иисүүс тэдээндэ иимэ һургаалта үгэнүүдые хэлэбэ:

– Хэншье хуушан хубсаһанда шэнэ бүдөөр халааһа табидаггүй бшуу. Тиигэхэ болоо һаа, шэнэ хубсаһаа хахалжа хаяад, хуушандааш тааруулжа шадахагүйл. 37Һая нэрэһэн үзэмэй дараһан архияа хуушан туламда хэдэггүйл, хээ һаань, тэрэ архинь эһээд, хуушан туламаа хахалжа, архиньшье, туламыньшье хэндээшье хэрэггүй болохол. 38Шэнэ үзэмэй дараһан архиие шэнэ хүхүүртэл юулэхэ ёһотой. 39Хуушан архи уужа үзэһэн хүн шэнэ архи амталха дурагүй байдаг, юундэб гэхэдэ, «хуушан архинь дээрэ» гэдэг ха юм.

Currently Selected:

Лука 5: BurBBL2024

Highlight

Copy