Лука 9
9
(Мт 10:9-14; Мк 6:7-13)
1Иисүүс арбан хоёр шабияа дуудажа, бүхы ада шүдхэрнүүдые даран гаргаха, үбшэнүүдые аргалха хүсэ шадабари, эрхэ засаг тэдэндээ олгобо. 2Удаань Бурханай хаан түрэ тухай номнохыень, үбшэнтэниие эдэгээхыень тэдэнээ эльгээбэ.
3– Харгыдаа тулга таягшье, туулмаг сүүмхэшье, эдихэ юумэшье, алта мүнгэшье, һэлгэхэ хубсаһашье, бүри юушье бү абагты. 4Шэнэ газар ерээд, ямар айлда буунабта, тэрэ нютагһаа гаража ошотороо тэрэл айлдаа байгты. 5Харин таанадые хүн зоной хүлеэжэ абахагүй байбалнь, хотоһоонь гарахадаа, хүлдэтнай халдаһан тооһо һэжэрэн дурагүйлхэһэнөө мэдүүлээрэйгты, – гээд Иисүүс захиба. 6Тиин шабинарынь хүдөө нютагуудаар ябажа, Һайн Мэдээсэл номнобо, ябаһан газартаал үбшэнтэниие эдэгээбэ.
Иродэй мэгдэлгэ
7Боложо байһан эдэ ушарнууд тухай дуулаад, Ирод хаан ехэл сошожо мэгдэбэ, юундэб гэхэдэ, нэгэ зариман Иоанн үхэһэнөө амидыраа гэжэ хэлсээ. 8Нүгөө зариман Элияа ерээ гэлдээ, баһа бусад зониинь эртэ урдын лүндэншэдэй нэгэн амидыраа гэжэ хэлсээ.
9– Би Иоаннай тархи таһалуулаа бэлэйлби. Теэд хүн зоной анхарал иигэжэ татажа байһан энэ хэн гээшэб? – гэжэ Ирод хэлээд, Иисүүстэй уулзахаяа һанаа һэн ха.
Иисүүс таба мянган хүниие эдеэлүүлжэ садхааба
10Элшэнэр Иисүүстэ бусажа ерээд, юу хэһэн тухайгаа хөөрэбэ. Иисүүс тэдэнээ дахуулжа, бусадһаа холодон, Бэтсаидаа хото ошобо. 11Теэд зон хайшаа ошоһыень мэдээд, хойноһоонь дахабад. Иисүүс тэдэниие һайнаар угтажа, Бурханай хаан түрэ тухай айладхаба, бэе муутайшуулые аргалжа эдэгээбэ.
12Нара орохо сагта арбан хоёр шабинарынь Иисүүстэ ерэжэ:
– Бидэ мүнөө эзэгүй сүл газарта байнабди, дахажа ябаһан эдэ олон зоноо хажуугаархи тосхон, хүдөө нютаг руу эльгээгыт, тэндэ хонохо, эдеэлхэ газараа олог лэ, – гэбэд.
13– Таанад өөһэдөө эдэ зондо эдихэ юумэ үгэгты, – гэжэ Иисүүс шабинартаа хэлэбэ.
– Бидэ оройдоол табан монсогор хилээмэтэй, хоёр загаһатай байнабди. Эдэ зондо эдихэ юумэ худалдажа абаагүй һаа, бултандань хүртэхэгүйл, – гэжэ тэдэнь харюусаба. 14Табан мянга шахуу ганса эрэшүүл тэндэ байлсаа бшуу.
– Эдэ зониие таби-табин хүнөөр бүлэглүүлэн һуулгагты! – гэжэ Иисүүс шабинартаа хэлэбэ. 15Тэдэнь бүхы зониие бүлэг бүлэгөөрнь таһалжа һуулгаба. 16Иисүүс тэрэ табан монсогор хилээмэ, хоёр загаһа абаад, тэнгэри өөдэ шэртэн, Бурханда баяр баясхалан хүргөөд, хилээмэ загаһаяа хухалаад, зондо хубаахыень шабинартаа дамжуулба. 17Хүнүүд булта эдеэлжэ садаа. Үлөөдэһыень суглуулхадань, арбан хоёр түрсүүг болоо һэн.
Иисүүс гээшэмнай Хэн бэ?
18Нэгэтэ Иисүүсэй гансаараа Бурханда зальбаржа байхада, шабинарынь ерэбэ.
– Намайе арад зон хэн гэжэ һананаб? – гэжэ Иисүүс тэдэнһээ һураба.
19– Зариман Таниие Уһаар Арюудхагша Иоанн гэлсэнэ, нүгөө зариман Элияа гэлсэнэ, харин бусадынь эртэ урдын лүндэншэдэй нэгэниинь амидыраа гэжэ һанана, – гээд шабинарынь харюусаба.
20– Таанар Намайе хэн гэжэ һананабта? – гэжэ Иисүүс һураба.
– Бурханай табисууртат, – гэжэ Пётр харюусаба.
Иисүүс зобохо, үхэхэ тухайгаа хэлэнэ
21– Энээн тухай хэндэшье ама бү гарагты, – гэжэ Иисүүс шабинартаа хатуугаар захиба. 22Тиигээд үшөө хэлэбэ: – Хүн түрэлхитэнэй Хүбүүн аргагүй ехээр зобохо, ахамадууд, ахамад санаартан болон Хуули заадаг багшанар Тэрээнһээ арсаха, алаха, харин гурбадахи үдэртөө Тэрэ амидырха.
23Тиигээд Иисүүс бүхы хүнүүдтэ хандажа хэлэбэ:
– Намтай ябалсаха дуратай хүн өөр тухайгаа бодохоёо болёод, үдэр бүхэн хэрээһэеэ үргэлөөд#9:23 Зоболон туйлахадашье, үхэлэй саазада хүртэхэдэшье бэлэн байха гэһэн удхатай., хойноһоомни яба. 24Ушарынь хэлэбэл, ами наһаяа абарха һанаатай хүн тэрэнээ алдаха, харин Минии түлөө ами наһаяа үгэбэл, тэрэнээ абарха. 25Хүн бүхы дэлхэйе олзолоод, харин ами бэеэ һүнөөһэн гү, али гэмтээһэн байбал, ямар ашаг олзотой байхаб даа? 26Намһаа, Минии һургаалһаа эшэбэлтнай, Би, Хүн түрэлхитэнэй Хүбүүн хожом Өөрынгөө, Эсэгынгээ, мүн Бурханай Эльгээмэлнүүдэй алдар нэрэ нэрлүүлэн, энэ дэлхэйдэ ерэхэдээ, таанадһаа Өөрөөшье эшэхэб. 27Эндэ байгшадай зариман Бурханай хаан түрэ үзөөгүйдөө үхэхэгүй гэжэ таанадта үнэн зүрхэнһөө хэлэнэб!
Иисүүсэй бодото алдар
28Иигэжэ хэлэһэнэйнгээ һүүлээр найма хоноод, Иисүүс Пётр, Иоанн, Яков гурбые абаад, Бурхандаа зальбархаяа хадын оройдо гараба. 29Мүргэжэ байхадань, Иисүүсэй шэг шарай гэнтэ хубилжа, хубсаһаниинь ялалзан, һаргама сагаан болоо. 30Гэнтэ Иисүүстэй хөөрэлдэжэ байһан хоёр хүн харагдаба. Тэдэ Моисей Элияа хоёр байгаа. 31Тэнгэриин алдараар толорон бии болоһон тэдэ хоёр Иерусалимда Иисүүсэй нүгшэлэй ямар удхатай байха тухай хэлээ. 32Пётр болон нүгөө хоёрынь бүхөөр унтажа байһанаа гэнтэ һэрин гэхэдээ, Иисүүсэй һүр жабхаланта байдалые, мүн хажуудань хоёр хүнэй зогсохые хараба. 33Тэдэ хоёрой Иисүүстэй хахасажа байхада:
– Багша! Эндэ байхадамнай манда ямар һайн гээшэб! Гурбан майхан бодхоое, нэгыень Танда, нэгыень Моисейдэ, үшөө нэгыень Элияада, – гэжэ Пётр юун гэжэ байһанаа өөрөөш мэдэнгүй дуугаржархиба. 34Тиигэжэ Пётрой хэлэһээр байтарынь үүлэн буужа, тэдэниие һүүдэрээрээ хушаба. Үүлэндэ хушагдахадаа, тэдэнэр айжа абаба.
35– Энэ Минии шэлэжэ абаһан Хүбүүн юм! Тэрэнэй үгөөр ябагты! – гэжэ абяан үүлэн сооһоо хэлэбэ. 36Тэрэ абяанай дуулдахаяа болиходонь, Иисүүс гансаараа байба. Пётр, Иоанн, Яков гурбан тиихэдэ хараһан үзэһэнөө нюужа, хэндэшье хэлэбэгүй.
Иисүүс ада шүдхэртэ барюулһан хүбүүе эдэгээбэ
37Үглөөдэрынь Иисүүсэй гурбан шабитаяа хадаһаа буухада, тэдэниие ехэ олон зон угтажа байгаа. 38Зоной дундаһаа гэнтэ нэгэ хүн Иисүүстэ хандажа хашхарба:
– Багша аа, минии хүбүүе үзэжэ үгыт даа, би Таниие ехэтэ гуйнаб. Энэ ори ганса хүбүүмни юумэл! 39Ада шүдхэрэй добтолходо, хүбүүмни гэнтэ хашхаран хуугайлна, шүрбэһэниинь таталдажа, амаараа хөөһэ бурана, шадал тэнхээнь барагдажа, ехээр ядарһанайнь лэ һүүлээр тэрэ ада шүдхэр тэрэниие орхижо ошоно. 40Тэрэ ада шүдхэрые намнажа үгыт гээд шабинарыетнай гуйхадамни, тэдэтнай оролдоод шадабагүй.
41– Этигэл һүзэггүй, забхай ябадалтай зон аа! Үшөө хэды шэнээн таанадтай байхабиб? Үшөө хэды болотор таанадые тэсэжэ байхабиб? Хүбүүгээ абаад ерэ! – гэжэ Иисүүс тэрээндэ хэлэбэ. 42Хүбүүнэй дүтэлжэ ябахада, шэгэһэн ада шүдхэр тэрэниие газарта унагаагаад, шүрбэһыень таталдуулжа оробо. Харин Иисүүс ада шүдхэрые хорижо, хүбүүе эдэгээгээд, эсэгэдэнь тушааба. 43Бурханай агууехэ хүсэ шадалые хараһан бүгэдэ зон гайхалдаа һэн.
Иисүүс дахин үхэхэ тухайгаа хэлэнэ
Иисүүсэй бүтээһэн шэдитэ үйлэ хэрэгүүдтэ хүн зоной гайхан ханажа байхада:
44– Хэлэхэ юумыемни бүхөөр хадуужа абагты: Хүн түрэлхитэнэй Хүбүүн хүнүүдэй гарта тушаагдахань, – гэжэ Иисүүс шабинартаа хэлэбэ. 45Теэд шабинарынь хэлэһэн үгэнүүдэйнь удха ойлгобогүй, юундэб гэхэдэ, үнэн удха тэдэнһээ далдалаатай байгаа бшуу. Тиигээдшье тайлбарилан багшаһаа һурахаяа зүрхэлбэгүй.
Хэн агууехэб?
46Тиигэжэ байтараа, хэмнай агууехэб гэжэ шабинарынь доро дороо бодобо. 47Тэдэнэйнгээ һанал бодол мэдэһэн Иисүүс нэгэ үхибүүе абажа, хажуудаа байлгаад, 48иигэжэ хэлэбэ:
– Минии нэрээр энэ үхибүүе хүлеэжэ абаһан хүн Намайе хүлеэжэ абаһан болоно, Намайе хүлеэжэ абаһан хүн Намайе иишэ эльгээһэн Бурханиие хүлеэжэ абаһан болоно. Юундэб гэхэдэ, таанадай эгээн даруу номгонтнай эгээл агууехэтнай гээшэ.
Иисүүсэй талада, мүн тэрээндэ эсэргүү талада байһан зон
49– Багша аа, Танай нэрээр ада шүдхэрнүүдые дарадаг хүниие бидэ хараабди. Тиин маанадаар суг ябалсаагүй хадань бидэ тэрэниие хорёобди, – гэжэ Иоанн хэлэбэ.
50– Хорихо гэжэ бү оролдогты! Танда эсэргүүсээгүй хүн танай талада байна, – гэжэ Иисүүс Иоаннда болон бусад шабинартаа хэлэбэ.
Самаряан тосхонойхид Иисүүсые угтажа абахаяа арсаба
51Тэнгэридэ абтаха сагайнгаа ойртожо байхада Иисүүс Иерусалим ошохо гэжэ хатуугаар шиидэбэ. 52Түрүүлэн Тэрэ хэдэн түлөөлэгшэдөө хэрэгтэй бүхы юумэ бэлдэжэ байхаарнь самаряан тосхон эльгээбэ. 53Теэд Иисүүсэй Иерусалим ошожо байһые мэдэһэн тосхонойхид Тэрэниие угтажа абахаяа арсаа бэлэй. 54Тиихэдэнь Яков Иоанн хоёр шабинарынь:
– Эзэн аа, тэнгэриһээ гал буулгажа#9:54 Зарим эхэ бэшэгүүд соо: «хэзээ нэгэтэ Элияагай хэһэндэл адляар» гэжэ нэмээтэй байдаг., эдэ зониие бултыень шатаахамнай гү? – гэжэ багшаһаа һураба. 55Тиихэдэнь Иисүүс эрьен хаража, тэдэниие хорибо#9:55 Зарим эхэ бэшэгүүд соо иигэжэ нэмээтэй байдаг: «Ямар һүлдэтэй байһанаа таанад мэдэнэгүй гүт? Хүн түрэлхитэнэй Хүбүүн хүнүүдэй ами һүнөөхэеэ бэшэ, харин абархаяа ерээ юм», – гэжэ хэлэбэ.. 56Тиигээд тэдэ ондоо тосхон ошоо бэлэй.
Иисүүсые дахаха дуратай байһан гурбан хүн
57Замда ябахадань нэгэ хүн Иисүүстэ:
– Танай хаанашье ошоо һаа, би һалангүй дахаад ябахаб, – гэжэ хэлэбэ.
58– Араата үнэгэн орохо нүхэтэй, тэнгэриин шубуун хонохо уургайтай юм, харин Хүн түрэлхитэнэй Хүбүүн толгойгоо табижа амарха газаргүйл, – гэжэ Иисүүс тэрээндэ хэлэбэ.
59Үшөө нэгэ хүндэ Иисүүс:
– Намайе дахажа яба, – гэбэ.
– Эзэн, аа! Түрүүшээр гэртээ харижа, эсэгэеэ хүдөөлүүлээд ерэхыемни табиит даа, – гэжэ тэрэнь урдаһаань хэлэбэ.
60– Үхэһэн хүнүүд өөһэдөө үхөөшэдөө хүдөөлүүлэг лэ. Харин ши ябажа, Бурханай хаан түрэ тухай номно, – гэжэ Иисүүс тэрээндэ хэлэбэ.
61– Эзэн аа, би Таниие дахахал байнаб. Теэд түрүүн гэр бүлынхидтэеэ баяраа хэлсээд ерэхыемни зүбшөөгыт, – гэжэ баһа нэгэ хүн хэлэбэ.
62– Газар хахалхаяа анзаһа бариһан аад, гэдэргээ хаража сухариһан хүн Бурханай хаан түрэдэ хэрэггүй, – гэжэ Иисүүс тэрээндэ хэлэбэ.
Currently Selected:
Лука 9: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
