YOANO 7

1KUNYUMA kwa bintu bebi, Yisu akakwenda mu Ngalili, bwalo bwakanyafianayi kwenda mu Yudiya, bwalo bwakapalala bena Yuda kumuxipa. 2Kitula lolo kia bena Yuda kia bitanda kiakadi pepe. 3Mbwôso bena kwanci bakamwambila, ene, Ncuka kunu, yaka ku Yudiya, bixemona beyi bebe kabidi makisa ebe akisa kisa Owe. 4Bwalo butasokwenca muntu kintu kioso ku busoko, pakala mikyenci lolo amapalala kululukibwa ku mpala ya bantu. Ndo wakisa bintu bebi, udiebesi mikyebe ku loboko. 5Bwalo butamwetabuxila isanga bena kwanci. 6Mbwôso Yisu akabambila ene, Kikondo kiamene kikidi kakifikili, mo kikondo kienu kiamafika dituku dioso. 7Loboko kalubiyi kununyañana, kaninga meme ndo amanyañanalu, bwalo bungwatôbôla ku bwalo bwalu, ene, makisa alu adi mabi. 8Nuximuni nonu ku kitula. Meme kisobeximuna ku kitula kieki, bwalo butafikili kikondo kiamene. 9Pakadi amabatôyela bintu bebi, akasala mu Ngalili.

10Kaninga pakadi bena kwanci bamaximuna, kunyuma yei kabidi akaximuna ku kitula, kumoni ku mpala ya bantu, kate bea ku busoko. 11Mbwôso bena Yuda bakamupalala ku kitula, yi bakatôya ene, Yei udi kupai ? 12Yi bopindo bungi bwakapindudibwa ku bwalo bwanci kudi bimbukuma. Bamo ene, Udi kunengela ; bamo ene, Kañana ; kate adimba bantu. 13Kaninga kakwakadi muntu umoumwe akatôya dyendeli ku bwalo bwanci, bwalo bwa bowa bwabo bwa bena Yuda.

14Mo pakadi batani nkyekyu pakacikaci pa kitula, pakaya Yisu munda mwa tempelo yi akakweyesa. 15Mbwôso bena Yuda bakakama ene, You muntu ubili mikanda beci ? bwalo butakweyayi pô. 16Mbwôso Yisu akabapingasa ene, Kweyesa kwamene kakuna kwamene, kate kwanci kwa you akangutuma. 17Aka muntu akyeba kwenca nyinga yenci, unalubukwa dia kweyesa, ndo kudi kwa Ncembi, sungu ndo namaditôyela biamene kanana. 18You udiatôyela bienci, amapalala kinemu kienci ; mo you apalala kinemu kienci kia you akamutuma, yei udi sôsôlwo, yi disalu kadina munda mwanci. 19Ki Mosese akanupa bwadi, yi kakuna muntu enu umoumwe encenca bwadi. Kukai nonu nwamapalala kunguxipa ? 20Kimbukuma kia bantu bakatôya ene, Udi yi kidimu kibi ; ñani amapalala kukuxipa ? 21Yisu akapingasa yi akabambila ene, Meme nakakwenca dikisa dimodimwe, yi nonu nwamakama bungi bwenu. 22Ndo biakanwelesa Mosese bwadi, (kaninga kabuna ndo bwa Mosese, kate kudi babakulu ba kalikali), yi nonu nwelela muntu bwadi ku sabado. 23Ndo muntu elebwa bwadi ku sabado, bitaxexipibwa bwadi bwa Mosese, nonu nwamangwombwela bituku bwalo bunamancincidisa muntu nya ku sabado ? 24Kanusambodi ku meso kanana, kate nusamboli kusambola kwa nkwami.

25Banga lolo ba bena Yelusaleme bakatôya ene, Ki yei ndo muntu apalalabo kumuxipa ? 26Mona, atôya ku mpala, yi kabasomutôyela bwalo. Bantu banene lolo bamalembetela sôsôlwo ene, you udi Kalistu ? 27Kaninga you noku, tumubili kulolwayi. Kate Kalistu, bilolwayi, kakuna muntu umubili kulolwayi.

28Mbwôso Yisu akakwamena munda mwa tempelo, udi mu kweyesa yi kutôya ene, Nungwalubukwa meme, yi nwalubukwa kundolwa ; yi kisodilula mikyemi, kate you akangutuma udi sôsôlwo, unutasolubukwa nonu. 29Meme mubili, bwaio bundolwa kudiyi, yi yei akangutuma. 30Biakapalalabo kumukwata, kaninga kakwakadi muntu umwabaka kianca, bwalo butafikili kikondo kienci. 31Mo bena kimbukuma bangi bakamwetabuxila, yi bakatôya ene, Kalistu, oka ulolwa, unadika iwedi lwa bilayixilu kwenca biamakwenca muntu you ?

32BaFalixi bakakwombwa kimbukuma badi mu kupindudila malo aa ku bwalo bwanci, yi makanda manene yi baFalixi bakatuma basadi, ene, bamukwati. 33Biakatôya Yisu ene, Kakondo kabende kakiasala kantani yinenu yi nceya kudiyi akangutuma. 34Nunangupalala yi kanunangusokolola, yi kungwakala, nonu kanubiyi kulwa. 35Mbwôso bena Yuda bakatôyañana ene, Ape unaya kupai kututasomusokolola coco ? Unaya kudi bantu ba Lucakacaka kudi bena Ngiliki kuya eyesa bena Ngiliki ? 36Diyi kai dedi diatôyayi ene, Nunangupalala yi kanunangusokolola ; yi kungwakala, nonu kanubiyi kulwa ?

37Ku dituku dia ku sula, ku diba dinene dia kitula, kwakakwemana Yisu yi akatôya ene, Aka muntu mwoso ombombwa nyota, alwi kundi, anwi. 38You ungwetabuxila meme, bea biatôya mukanda ă Ncembi, mu difu dienci munakyela ncedi ya mai a môyo. 39Kaninga akatôya noku dia Mwoxixi, uxeangata bantu bakamwetabuxila ; bwalo bwakadi Mwoxixi ukidi kafikili, bwalo butabandixibwa Yisu kulu ku kikondo kieki. 40Mbwôso banga bena kimbukuma, pakakwombwabo malo aa, bakatôya ene, You udi mudimuxi sôsôlwo. 41Bamo ene, You udi Kalistu. Banga ene, Kalistu lolo abatuka mu Ngalili ? 42Ki mukanda ă Ncembi ămatôya ene, Kalistu ulolwa kudi bana ba Dafidi ? yi ku bula bwa Beteleme, kwakadi Dafidi ? 43Mbwôso bakanamukanana bonamu kudi bantu ku bwalo bwanci. 44Mo banga bakakyeba kumukwata ; kate kakwakadi muntu umwabaka bianca.

45Mbwôso basadi bakalwa kudi makanda manene yi kudi baFalixi ; yi bobo bakabambila ene, Kukai nwakadi kanusomucwala ? 46Basadi bakatôya ene, Kalikali muntu kutôya noku nyô, bea biatôya muntu you. 47BaFalixi lolo bakapingasa ene, Nonu kabidi nwamadimbibwa ? 48Muntu udiko a bantu banene amamwetabuxila, ndo a baFalixi ? 49Kate kimbukuma kieki kia bantu batabiyi bwadi badi bena mulau. 50Nikodemo akabambila (you akalwa kudiyi buxi, akadi muntu abo mikyeabo) 51ene, Bwadi bwecu bwabela muntu, buxi bwa kumwombwa mikyenci, yi buxi bwa kulubukwa mwencencayi ? 52Bakamupingasa yi bakatôya ene, Owe kabidi udi muna Ngalili ? Palala yi lembetela ene, mu Ngalili kamusobatuka mudimuxi. 53Yi bakancuka muntu ku ncibo anci, muntu ku ncibo anci.

Currently Selected:

YOANO 7: Luna_NT

Highlight

Copy