लूको 1
1
परिचय
1आदरणीय थियुफिलुस, महसे मीहज़ी ञेंहतु बिचंङ शुहचे दुह गप्पाओ पाहठी च़ेचिमी कोशिश लहसी ततो। 2छना कि दोच़ी ठीक ध्वांए च़ेआतो अंऊ ञेंतिंङ दुह मीहतु दोरच़ी कांहषी तोहई, अच़ि दोबि यीशु सेवकाईओ शुरुवात बेहच़ी खांषी तातेर दंङ अंऊ थले परमेश्वरो बचनो सेवक बणेंक इलिर। 3दिऊ थल्जी गेह ला दिह भत्ते गप्पातु ध्यानारंङ साते परख लहज़ातग दंङ गिह्बी दिह रुठे अति कि गेह कांह थल्जी दिह गप्पारे छना ठ्रोह शुह्ते, ध्वांए शुरूआत बेहच़ी इच्च़ा-इच्च़ा लेह च़ेओग। 4गेह दिह दिऊ थल्जी चेहच़ातग कि कनिंङ हर दुह गप्पाओ भत्ते सच्चाई पता लेह्पोतो अंऊ मीहतु दोरच़ी कनिंङ कांहषी तोह।
युह्न्नो जेह्कपिमी घोषणा
5अपेहल हेरोदेस यहुदिया देशो रज्ज़ा तोहई, जकर्याह यहुदी पुरोहिता तु दुह झुण्डो बिचंङज़ि तोहई दोऊ मेच़ो मिन एलीशिबा तोहई अंऊ अबिय्या झुण्ड यहुदी पुरोहितो मिंदंङ बणाएठ्री तोहई, दंङ दुह ला इस्राएल बे तुहई यहुदी पुरोहित हारूनो खानदानो तोहई। 6जकर्याह ए एलीशिबा झुड्ला परमेश्वरो तुईज़ी धर्मी तोईरे, दंङ दोरे प्रभुऊ भत्ते आज्ञाओ ए कानूनो टोईच़ी निर्दोष ज़ोज़ा तोईरे। 7पर दोतु अरीला कटु माह तोहई, छना कुचे एलीशिबा कटु मेह मेच़िमी तोहई, दंङ दुरे झुड्ला यहंङषि इलजी तोहई।
8इच्च़ा ध्याड़ारिंङ अपेहल जकर्याह यरूशलेम शहरो यहुदी मंदिरंङ परमेश्वर ओ तुईज़ी यहुदी पुरोहितो कम लहच़ी लेहकी तोहई, छना कुचे दुह हप्तारिंङ दोऊ झुण्डो यहुदी पुरोहितो कम लहज़िमी बारी तोहई। 9दंङ यहुदी पुरोहितो रीतीऊ हिसाबे दोऊ मिन्दु टोईच़ी चिट्ठ हुंच़िरी कि प्रभुऊ मंदिरंङ इलजे धूप तुप्चु। 10धूप तुप्च़िमी मुक्का मीहतु भत्ते मंडली यहुदी मंदिरो ल्वाड़िंङ प्रार्थना लहज़ी लेहकी तोहई। 11दुह मुक्का प्रभुऊ इच्च़ा स्वर्गदूत धूपो बेदीऊ सुचंङ हासी खड़े शुहचे जकर्याह बि तंङसिरी। 12जकर्याह दोबि खांई महसे बेआ इलि। 13पर स्वर्गदूते दोरंङ साते कुतोह, “हे जकर्याह, थाह बेऊ, छना कुचे परमेश्वरे कांह प्रार्थना रेंई केहतो, दंङ केनोह मेच़ा एलीशिबा बि इच्च़ा योह ज़ेहपोतो, दंङ केई दोऊ मिन यूहन्ना केऊ। 14कनिंङ खुशी ए महस खुशी शोतो; दंङ महस मीहरे दोऊ जन्मो बजेह खुश शोर। 15छना कुचे दुह गंङकटु प्रभु तुईज़ी महान शोतो; दुह दाखरस ए सरा अपेहल ला तुंङमी माह जूंस, दंङ एनोह याहू खोकटुंङज़ि ए पवित्र आत्मा रंङ साते बिंङे शोतो; 16दंङ इस्राएली मीहतु बिचंङज़ि महसे मीहतिंङ प्रभु परमेश्वरो कछंङ हपतो। 17यूहन्ना एलियाह भविष्यवक्ताओ ठ्रोह आत्मिक ए सामर्थरंङ शुहचे दोऊ तुंखा-तुंखा जोतो कि बाहओ सेहम कटुतु हखा किरज़ी लोहतो; दंङ आज्ञा मा मनेक्च़ा दोतु अगुवाई लोहतो ताकि दोरे धर्मी मीहतु समझो अमरिंङ जोओर। दंङ प्रभुऊ थल्जी इच्च़ा लायक प्रजा तेयार लोहतो।”
18जकर्याह स्वर्गदूत रुहक्ती, “गेह दिऊ टोहकठे छना विशवास लोहग कि ञेंतंङ साते झांह शोतो? छना कुचे गेह ता यांङदे शुगाह; दंङ गिऊ मेच़ा ला यंङषी इलजी तोद।”
19स्वर्गदूते दोबि जुबाब रेंई, “गेह ज़िब्राइल शुगाह, अंऊ परमेश्वरो तुईज़ी खड़े श्वातेग, दंङ गेह करंङ साते गप्पा लहज़िमी थल्जी ए दीह रूठे खबर कुट्रिमी थल्जी च़रसी शुगाह।” 20दंङ अंऊ गप्पा गेह करंङ साते कुट्रातग, केई दोऊ बिशवास माह लहतन, दंङ अपेहल तचेक कांह गंङकटु माह जेह्कपोतो धोंण तचेक कह टटे शुहचे बंङज़ोन। दंङ छि लाह कुट्री माह रपोन। 21दुह मुक्का मीहरे जकर्याह बि रुमज़ा तोईरे दंङ हेरान शुहचे लेहकी तोईरे कि दोबि मंदिरंङ धोंण टेम छना लेहती। 22अपेहल दुह धह्कते अति, ता दोतंङ साते कुट्री मरति दंङ दोच़ी ञेंह केहरी कि दोई मंदिरंङ छा छी दर्शन तंङशी शुह; दंङ दुह दोतंङ साते इशारा लहज़ा लाहते, दंङ टटे केह्षा इलि। 23अपेहल यहुदी मंदिरंङ इच्च़ा यहुदी पुरोहितो रुपंङ दोऊ सेवा लहज़िमी हफ्ता पुरे शुहचे इलि, ता दुह यरूशलेम शहरंङ एनोह चुंखा अच़ा इलि।
24थोड़े ध्याड़ो थल दोऊ मेच़ा एलीशिबा खोकटुंङ शुहचे इलि, दंङ ङा लाह ऐनाबि मीहतु दोरच़ी प्याके तरी, 25“मीहतु बिचंङ गिऊ इज्ज़त बणेंक तहच़िमी थल्जी, प्रभु ई गिऊ थल्जी दिह रुठे कम लहतो। ए दी ध्याड़ा रिंङ कृपा लहजे गिऊ थल्जी झांह लहसी शुह।”
यीशु जेह्कपिमी घोषणा
26एलीशिबा ओ खोकटुंङ शुबिमी त्रुई लाह रिंङ परमेश्वरो दोरच़ी ज़िब्राइल स्वर्गदूताबि, गलील प्रदेशो नासरत नगरंङ, 27इच्च़ा कुंवारीऊ कछंङ च़रति अतु मंगनी यूसुफ मिन्दु राजा दाऊदो खानदानो इच्च़ा गंङमी मीह रंङ साते शुहचे तोहई: दुह कुंवारीऊ मिन मरियम तोहई। 28दंङ स्वर्गदूते दोऊ कछंङ इलजे दोरंङ साते कुतोह, “खुशी ए जय कांह शोतो, परमेश्वरे कनिंङ महसे आशीर्वाद रांहषी ततो। प्रभु करंङ साते तोह।”
29अपेहल मरियमे दोऊ बचनरे रेड्रातो ता दुह महसे बेवा इलि दंङ सोचेक्सी लेहती कि दिह नमस्कारो छि मतलब शुह? 30स्वर्गदूते दोरंङ साते कुतोह, “हे मरियम! थाह बेऊ, छना कुचे परमेश्वरो मोह्ड़े दाह कांह टोईच़ी शुहचे तोह। 31दंङ खंणु कांह खोकटुंङ शोन, केई इच्च़ा योह बि जन्म रमोंन; केई दोऊ मिन यीशु केहू। 32दुह महान शोतो; दंङ परमप्रधान परमेश्वरो योह शोतो; दंङ प्रभु परमेश्वर दोऊ बाह-मेमे रज्ज़ा दाऊदो सिहासन दोबि रमतो, 33दंङ दुह याकूबो खानदानो टोईच़ी हमेशा राज लोहतो, दंङ दुह हमेशाऊ थल्जी रज्ज़ा बणेंक राज लोहतो।” 34मरियमे स्वर्गदूतारंङ साते कुतोह, “दीह छना शोतो? गेह ता कुंवारी शुगाह।” 35स्वर्गदूते दोबि जुबाब रेंई, “पवित्र आत्मा कनु टोईच़ी अपतो, दंङ परमप्रधान परमेश्वरो सामर्थ कनु टोईच़ी अपतो; दिऊ थल्जी कांह दोरच़ी जेह्की गंङकटु पवित्र शोतो दंङ, परमेश्वरो योह कहलाहएपोतो। 36दंङ रेड्रु, कांह नाति एलीशिबा ला यंङषी मुका खुकटुंङ तोह, दीह दोऊ, अच़ि कटु जेहक्पी मरच़ाते दुह त्रुई लाहऊ खोकटुंङ तोह। 37परमेश्वरे भत्ते धिर लेह तरच़ी।” 38मरियमे कुतोह, “खंणु, गेह प्रभुऊ दासी शुगाह छना केई कुहतन ध्वांए गेरंङ साते शुबि जूंस।” दोऊ थल स्वर्गदूत दोऊ कछंङ ज़ि अच़ा इलि।
मरियमो एलीशिबा रंङ साते दोई इबी
39थोड़े ध्याड़ो थल मरियम खड़े अच़ा युरनाह यहुदिया प्रदेशो पहाड़ी इलाकाओ इच्च़ा नगरंङ इलि। 40दंङ जकर्याहो चुंङ इलजे एलीशिबा बि नमस्कार लहरी। 41छना ए एलीशिबे मरियमो नमस्कार थक्शी, ध्यांए कटु दोऊ खोकटुंङ छ्वा रेंई, दंङ एलीशिबा पवित्र आत्मा रंङ साते पिंङषा इलि। 42दंङ दोई खुशी रंङ मोह्ड़े सग रंङ साते हाऊष रेह कुतोह, “कांह मेच़मीतु बिचंङ धन्य शुनाह, दंङ कांह दोरच़ी जन्म लेहच़ा गंङकटु धन्य शोतो। 43दीह महस इज्ज़तो गप्पा शुह कि गिऊ प्रभुऊ याह गिऊ कछंङ दोई अन्जी तोद! 44दंङ खंणु, अपेहल गेह कांह नमस्ते सग थक्शातेग, ध्वांए कटुई गिऊ खोकटुंङ खुशी रंङ साते छ्वा रेंई। 45कांह धन्य शुनाह छना कुचे केई बिशवास लहतन कि प्रभुज़ि अंऊ दोबि कुहतो परमेश्वरे दोबि पुरा लोहतो।”
मरियमो स्तुति गान
46दंङ मरियमे कुतोह,
“गेह परमेश्वरो स्तुति लहज़ातग।
47दंङ गिऊ आत्मा गिऊ उद्धार लहज़ा परमेश्वरो दोरच़ी खुश शुहचे इलि।
48छना कुचे दोई गेह, घेंङौ दासीऊ
दीनता ऊ टोहकठे ध्यान लहसी ततो; दिऊ थल्जी खांई, तोद बे भत्ते जुग-जुगो मीहरे गिह्बी धन्य कोहर।
49छना कुचे दुह शक्तिमाने गिऊ थल्जी मोह्ड़े-मोह्ड़े कम लहसी शुह, दंङ दोऊ मिन पवित्र शुह,
50दंङ दोऊ दया दुह मीहतु टोईच़ी शुबी, अंऊ पीढ़ी बे पीढ़ी दोऊ बेह्द चेहच़ातोर।
51शक्तिशाली कम लहज़िमी थल्जी दोई एनोह मोह्ड़े सामर्थ बि इस्तेमाल लहरी। दंङ अंऊ दोरे घमंडी तोईरे दोतिंङ तितर-बितर लेह च़रति।
52दोई राज लहज़ातिंङ दोतु सिहासनो दोरच़ी थचे च़रति,
दंङ गरीबातिंङ इज्ज़त रांई।
53दोई योंई मीहतिंङ रुठे चीज़ङ साते कापि लहरी,
दंङ साहुकारातिंङ सल्ज़ी गुट्री हुंच़े च़रति।
54दोई ञेंहतु बाह-मेमेतु थल्जी एनोह वाईदाबि हिद ततो दंङ एनोह सेवक इस्राएलो मीहतु मदत लेह अंज़े तोह। 55दोई अब्राहम ए दोऊ भत्ते खानदानो मीहतिंङ हमेशाऊ दाह कंड्रिमी थल्जी हिद लहसी ततो।”
56मरियम लगभग श्रुम लाह दोरंङ साते बंङज़ा एनोह चुंखा अच़ा इलि।
यूहन्ना बपतिस्मा रंड्राढो जन्म
57दंङ एलीशिबा ओ लिह्क्पिमी टेम पुरे शुहचे इलि, दंङ दोई योह बि जन्म रेंई। 58दोऊ पड़ोसी ए नाताज़ि दी रेड्रा कि प्रभुज़ि दोऊ टोईच़ी महस दया लहरी, दोरंङ साते खुशी मनाएती, 59दंङ रेह ध्याड़ारिंङ दोरे कटुऊ खतना लहज़िमी थल्जी अतिरे। दोरे दोऊ मिन दोऊ बाहू मिन्दिंङ जकर्याह केट्री तातेर। 60दंङ दोऊ याह ज़ि जुबाब रेंई, “मेस; पर दोऊ मिन यूहन्ना केंईन।”
61दंङ दोच़ी एलीशिबा बि कुतोह, “कांह नातिऊ बिचंङ अतु ला दीह मिन माह।” 62दंङ दोच़ी दोऊ बाह जकर्याहू हखा इशारा रे रुहक्ती कि केई केनोह योहू छि मिन केट्री तातन? 63दोई च़ेचिमी तकती पेट्रा दोऊ टोहकठे चेंह च़रति, “दिऊ मिन यूहन्ना शुह,” 64दंङ भत्ते हेरान शुहचे इलिरे। दंङ जकर्याहो आह ए लेह दोहथल ए युप्सा इलि; दंङ दुह कुट्री लेहती दंङ परमेश्वरो धन्यवाद लहज़ी लेहती। 65दंङ दोरे भत्ते बेवा इलिर; दंङ दुह भत्ते गप्पो चर्चा यहुदिया प्रदेशो पहाड़ी इलाकंङ फेलेके इलि। 66दंङ भत्ते रेड्रा दोच़ी एनोह-एनोह सेहमरिंङ बिचार लहजे कुतोह, “दीह गंङकटु छना शोतो?” छना कुचे प्रभुऊ सामर्थ दोरंङ साते तोह।
जकर्याह ओ स्तुति गान
67दंङ दोऊ बाह जकर्याह पवित्र आत्मा रंङ साते पिंङे इलि, दंङ भविष्यवाणी लहज़ी लेहती;
68“प्रभु इस्राएलो परमेश्वरो स्तुति लांई, छना कुचे दुह एनोह मीहतु थल्जी अंज़े तोह दंङ दोतु छुटकारा लहरि,
69दंङ अरी दोऊ सेवक रज्ज़ा दाऊदो खानदानो शुह, दोई ञेंहतु थल्जी इच्च़ा शक्तिशाली उद्धार लहच़ाबि च़रसी ततो।”
70महस तुई, प्रभुज़ि एनोह भविष्यवक्तातु दोरच़ी कुहतो कि,
71दोई ञेंतिंङ ञेंहतु बेरीतु दोरच़ी बचाएपोतो अच़ि ञेंतंङ साते नफरत लहज़ातोर।
72दोई एनोह पवित्र वाईदा हिद लेह, ञेंहतु बाह-मेमेतु टोईच़ी दया लोहतो,
73दंङ दुह वाईदा
अंऊ परमेश्वरा ज़ि ञेंहतु बाह-मेमे अब्राहम रंङ साते जासि तते,
74दोई ञेंहतिंङ ञेंहतु बेरीतु दोरच़ी छुड़ाके, 75दोऊ तुईज़ी पवित्र ए धर्मिकता रंङ साते जीवन पुरे
निडर बंङज़ा दोऊ सेवा लहज़ा लोंहि।
76दंङ केई हे, गंङकटु, परमप्रधानो भविष्यवक्ता कह्लापोंन, छना कुचे कांह प्रभुऊ अम तेयार लहज़िमी थल्जी दोऊ तुईज़ी-तुईज़ी जोज़ोन,
77कि दुह एनोह मीहतु पापो माफ लहज़िमीरंङ साते दोतिंङ उद्धारो पाहठी ज्ञान रमोतो।
78दीह ञेंहतु परमेश्वरो मोह्ड़े दाह रंङ साते शोतो; छना ऐके ञेंतिंङ छंङी रंड्रीमी थल्जी छंङी शवाह ध्वांए मसीह ला ञेंहतु कछंङ अपतो।
79पापारिंङ जोज़ा ए सीमी बेह्दारिंङ बंङज़ा दोतिंङ छंङी रंड्रीमी थल्जी, कि दिह छंङी ञेंतिंङ दुह अमो मार्गदर्शन लोहतो शांति ओ अम रिंङ सीधा चलाएपोतो।
80दंङ दुह गंङकटु यूहन्ना, मोह्ड़े दंङ आत्मारिंङ ताकतवर शुहआ लहरी, दंङ दुह इस्राएलो मीहतु बिचंङ शिक्षा रंड्रीमी ध्याड़ा तचेक सुनसान ठाहरीरिंङ बंङज़ा तोहई।
Currently Selected:
लूको 1: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
लूको 1
1
परिचय
1आदरणीय थियुफिलुस, महसे मीहज़ी ञेंहतु बिचंङ शुहचे दुह गप्पाओ पाहठी च़ेचिमी कोशिश लहसी ततो। 2छना कि दोच़ी ठीक ध्वांए च़ेआतो अंऊ ञेंतिंङ दुह मीहतु दोरच़ी कांहषी तोहई, अच़ि दोबि यीशु सेवकाईओ शुरुवात बेहच़ी खांषी तातेर दंङ अंऊ थले परमेश्वरो बचनो सेवक बणेंक इलिर। 3दिऊ थल्जी गेह ला दिह भत्ते गप्पातु ध्यानारंङ साते परख लहज़ातग दंङ गिह्बी दिह रुठे अति कि गेह कांह थल्जी दिह गप्पारे छना ठ्रोह शुह्ते, ध्वांए शुरूआत बेहच़ी इच्च़ा-इच्च़ा लेह च़ेओग। 4गेह दिह दिऊ थल्जी चेहच़ातग कि कनिंङ हर दुह गप्पाओ भत्ते सच्चाई पता लेह्पोतो अंऊ मीहतु दोरच़ी कनिंङ कांहषी तोह।
युह्न्नो जेह्कपिमी घोषणा
5अपेहल हेरोदेस यहुदिया देशो रज्ज़ा तोहई, जकर्याह यहुदी पुरोहिता तु दुह झुण्डो बिचंङज़ि तोहई दोऊ मेच़ो मिन एलीशिबा तोहई अंऊ अबिय्या झुण्ड यहुदी पुरोहितो मिंदंङ बणाएठ्री तोहई, दंङ दुह ला इस्राएल बे तुहई यहुदी पुरोहित हारूनो खानदानो तोहई। 6जकर्याह ए एलीशिबा झुड्ला परमेश्वरो तुईज़ी धर्मी तोईरे, दंङ दोरे प्रभुऊ भत्ते आज्ञाओ ए कानूनो टोईच़ी निर्दोष ज़ोज़ा तोईरे। 7पर दोतु अरीला कटु माह तोहई, छना कुचे एलीशिबा कटु मेह मेच़िमी तोहई, दंङ दुरे झुड्ला यहंङषि इलजी तोहई।
8इच्च़ा ध्याड़ारिंङ अपेहल जकर्याह यरूशलेम शहरो यहुदी मंदिरंङ परमेश्वर ओ तुईज़ी यहुदी पुरोहितो कम लहच़ी लेहकी तोहई, छना कुचे दुह हप्तारिंङ दोऊ झुण्डो यहुदी पुरोहितो कम लहज़िमी बारी तोहई। 9दंङ यहुदी पुरोहितो रीतीऊ हिसाबे दोऊ मिन्दु टोईच़ी चिट्ठ हुंच़िरी कि प्रभुऊ मंदिरंङ इलजे धूप तुप्चु। 10धूप तुप्च़िमी मुक्का मीहतु भत्ते मंडली यहुदी मंदिरो ल्वाड़िंङ प्रार्थना लहज़ी लेहकी तोहई। 11दुह मुक्का प्रभुऊ इच्च़ा स्वर्गदूत धूपो बेदीऊ सुचंङ हासी खड़े शुहचे जकर्याह बि तंङसिरी। 12जकर्याह दोबि खांई महसे बेआ इलि। 13पर स्वर्गदूते दोरंङ साते कुतोह, “हे जकर्याह, थाह बेऊ, छना कुचे परमेश्वरे कांह प्रार्थना रेंई केहतो, दंङ केनोह मेच़ा एलीशिबा बि इच्च़ा योह ज़ेहपोतो, दंङ केई दोऊ मिन यूहन्ना केऊ। 14कनिंङ खुशी ए महस खुशी शोतो; दंङ महस मीहरे दोऊ जन्मो बजेह खुश शोर। 15छना कुचे दुह गंङकटु प्रभु तुईज़ी महान शोतो; दुह दाखरस ए सरा अपेहल ला तुंङमी माह जूंस, दंङ एनोह याहू खोकटुंङज़ि ए पवित्र आत्मा रंङ साते बिंङे शोतो; 16दंङ इस्राएली मीहतु बिचंङज़ि महसे मीहतिंङ प्रभु परमेश्वरो कछंङ हपतो। 17यूहन्ना एलियाह भविष्यवक्ताओ ठ्रोह आत्मिक ए सामर्थरंङ शुहचे दोऊ तुंखा-तुंखा जोतो कि बाहओ सेहम कटुतु हखा किरज़ी लोहतो; दंङ आज्ञा मा मनेक्च़ा दोतु अगुवाई लोहतो ताकि दोरे धर्मी मीहतु समझो अमरिंङ जोओर। दंङ प्रभुऊ थल्जी इच्च़ा लायक प्रजा तेयार लोहतो।”
18जकर्याह स्वर्गदूत रुहक्ती, “गेह दिऊ टोहकठे छना विशवास लोहग कि ञेंतंङ साते झांह शोतो? छना कुचे गेह ता यांङदे शुगाह; दंङ गिऊ मेच़ा ला यंङषी इलजी तोद।”
19स्वर्गदूते दोबि जुबाब रेंई, “गेह ज़िब्राइल शुगाह, अंऊ परमेश्वरो तुईज़ी खड़े श्वातेग, दंङ गेह करंङ साते गप्पा लहज़िमी थल्जी ए दीह रूठे खबर कुट्रिमी थल्जी च़रसी शुगाह।” 20दंङ अंऊ गप्पा गेह करंङ साते कुट्रातग, केई दोऊ बिशवास माह लहतन, दंङ अपेहल तचेक कांह गंङकटु माह जेह्कपोतो धोंण तचेक कह टटे शुहचे बंङज़ोन। दंङ छि लाह कुट्री माह रपोन। 21दुह मुक्का मीहरे जकर्याह बि रुमज़ा तोईरे दंङ हेरान शुहचे लेहकी तोईरे कि दोबि मंदिरंङ धोंण टेम छना लेहती। 22अपेहल दुह धह्कते अति, ता दोतंङ साते कुट्री मरति दंङ दोच़ी ञेंह केहरी कि दोई मंदिरंङ छा छी दर्शन तंङशी शुह; दंङ दुह दोतंङ साते इशारा लहज़ा लाहते, दंङ टटे केह्षा इलि। 23अपेहल यहुदी मंदिरंङ इच्च़ा यहुदी पुरोहितो रुपंङ दोऊ सेवा लहज़िमी हफ्ता पुरे शुहचे इलि, ता दुह यरूशलेम शहरंङ एनोह चुंखा अच़ा इलि।
24थोड़े ध्याड़ो थल दोऊ मेच़ा एलीशिबा खोकटुंङ शुहचे इलि, दंङ ङा लाह ऐनाबि मीहतु दोरच़ी प्याके तरी, 25“मीहतु बिचंङ गिऊ इज्ज़त बणेंक तहच़िमी थल्जी, प्रभु ई गिऊ थल्जी दिह रुठे कम लहतो। ए दी ध्याड़ा रिंङ कृपा लहजे गिऊ थल्जी झांह लहसी शुह।”
यीशु जेह्कपिमी घोषणा
26एलीशिबा ओ खोकटुंङ शुबिमी त्रुई लाह रिंङ परमेश्वरो दोरच़ी ज़िब्राइल स्वर्गदूताबि, गलील प्रदेशो नासरत नगरंङ, 27इच्च़ा कुंवारीऊ कछंङ च़रति अतु मंगनी यूसुफ मिन्दु राजा दाऊदो खानदानो इच्च़ा गंङमी मीह रंङ साते शुहचे तोहई: दुह कुंवारीऊ मिन मरियम तोहई। 28दंङ स्वर्गदूते दोऊ कछंङ इलजे दोरंङ साते कुतोह, “खुशी ए जय कांह शोतो, परमेश्वरे कनिंङ महसे आशीर्वाद रांहषी ततो। प्रभु करंङ साते तोह।”
29अपेहल मरियमे दोऊ बचनरे रेड्रातो ता दुह महसे बेवा इलि दंङ सोचेक्सी लेहती कि दिह नमस्कारो छि मतलब शुह? 30स्वर्गदूते दोरंङ साते कुतोह, “हे मरियम! थाह बेऊ, छना कुचे परमेश्वरो मोह्ड़े दाह कांह टोईच़ी शुहचे तोह। 31दंङ खंणु कांह खोकटुंङ शोन, केई इच्च़ा योह बि जन्म रमोंन; केई दोऊ मिन यीशु केहू। 32दुह महान शोतो; दंङ परमप्रधान परमेश्वरो योह शोतो; दंङ प्रभु परमेश्वर दोऊ बाह-मेमे रज्ज़ा दाऊदो सिहासन दोबि रमतो, 33दंङ दुह याकूबो खानदानो टोईच़ी हमेशा राज लोहतो, दंङ दुह हमेशाऊ थल्जी रज्ज़ा बणेंक राज लोहतो।” 34मरियमे स्वर्गदूतारंङ साते कुतोह, “दीह छना शोतो? गेह ता कुंवारी शुगाह।” 35स्वर्गदूते दोबि जुबाब रेंई, “पवित्र आत्मा कनु टोईच़ी अपतो, दंङ परमप्रधान परमेश्वरो सामर्थ कनु टोईच़ी अपतो; दिऊ थल्जी कांह दोरच़ी जेह्की गंङकटु पवित्र शोतो दंङ, परमेश्वरो योह कहलाहएपोतो। 36दंङ रेड्रु, कांह नाति एलीशिबा ला यंङषी मुका खुकटुंङ तोह, दीह दोऊ, अच़ि कटु जेहक्पी मरच़ाते दुह त्रुई लाहऊ खोकटुंङ तोह। 37परमेश्वरे भत्ते धिर लेह तरच़ी।” 38मरियमे कुतोह, “खंणु, गेह प्रभुऊ दासी शुगाह छना केई कुहतन ध्वांए गेरंङ साते शुबि जूंस।” दोऊ थल स्वर्गदूत दोऊ कछंङ ज़ि अच़ा इलि।
मरियमो एलीशिबा रंङ साते दोई इबी
39थोड़े ध्याड़ो थल मरियम खड़े अच़ा युरनाह यहुदिया प्रदेशो पहाड़ी इलाकाओ इच्च़ा नगरंङ इलि। 40दंङ जकर्याहो चुंङ इलजे एलीशिबा बि नमस्कार लहरी। 41छना ए एलीशिबे मरियमो नमस्कार थक्शी, ध्यांए कटु दोऊ खोकटुंङ छ्वा रेंई, दंङ एलीशिबा पवित्र आत्मा रंङ साते पिंङषा इलि। 42दंङ दोई खुशी रंङ मोह्ड़े सग रंङ साते हाऊष रेह कुतोह, “कांह मेच़मीतु बिचंङ धन्य शुनाह, दंङ कांह दोरच़ी जन्म लेहच़ा गंङकटु धन्य शोतो। 43दीह महस इज्ज़तो गप्पा शुह कि गिऊ प्रभुऊ याह गिऊ कछंङ दोई अन्जी तोद! 44दंङ खंणु, अपेहल गेह कांह नमस्ते सग थक्शातेग, ध्वांए कटुई गिऊ खोकटुंङ खुशी रंङ साते छ्वा रेंई। 45कांह धन्य शुनाह छना कुचे केई बिशवास लहतन कि प्रभुज़ि अंऊ दोबि कुहतो परमेश्वरे दोबि पुरा लोहतो।”
मरियमो स्तुति गान
46दंङ मरियमे कुतोह,
“गेह परमेश्वरो स्तुति लहज़ातग।
47दंङ गिऊ आत्मा गिऊ उद्धार लहज़ा परमेश्वरो दोरच़ी खुश शुहचे इलि।
48छना कुचे दोई गेह, घेंङौ दासीऊ
दीनता ऊ टोहकठे ध्यान लहसी ततो; दिऊ थल्जी खांई, तोद बे भत्ते जुग-जुगो मीहरे गिह्बी धन्य कोहर।
49छना कुचे दुह शक्तिमाने गिऊ थल्जी मोह्ड़े-मोह्ड़े कम लहसी शुह, दंङ दोऊ मिन पवित्र शुह,
50दंङ दोऊ दया दुह मीहतु टोईच़ी शुबी, अंऊ पीढ़ी बे पीढ़ी दोऊ बेह्द चेहच़ातोर।
51शक्तिशाली कम लहज़िमी थल्जी दोई एनोह मोह्ड़े सामर्थ बि इस्तेमाल लहरी। दंङ अंऊ दोरे घमंडी तोईरे दोतिंङ तितर-बितर लेह च़रति।
52दोई राज लहज़ातिंङ दोतु सिहासनो दोरच़ी थचे च़रति,
दंङ गरीबातिंङ इज्ज़त रांई।
53दोई योंई मीहतिंङ रुठे चीज़ङ साते कापि लहरी,
दंङ साहुकारातिंङ सल्ज़ी गुट्री हुंच़े च़रति।
54दोई ञेंहतु बाह-मेमेतु थल्जी एनोह वाईदाबि हिद ततो दंङ एनोह सेवक इस्राएलो मीहतु मदत लेह अंज़े तोह। 55दोई अब्राहम ए दोऊ भत्ते खानदानो मीहतिंङ हमेशाऊ दाह कंड्रिमी थल्जी हिद लहसी ततो।”
56मरियम लगभग श्रुम लाह दोरंङ साते बंङज़ा एनोह चुंखा अच़ा इलि।
यूहन्ना बपतिस्मा रंड्राढो जन्म
57दंङ एलीशिबा ओ लिह्क्पिमी टेम पुरे शुहचे इलि, दंङ दोई योह बि जन्म रेंई। 58दोऊ पड़ोसी ए नाताज़ि दी रेड्रा कि प्रभुज़ि दोऊ टोईच़ी महस दया लहरी, दोरंङ साते खुशी मनाएती, 59दंङ रेह ध्याड़ारिंङ दोरे कटुऊ खतना लहज़िमी थल्जी अतिरे। दोरे दोऊ मिन दोऊ बाहू मिन्दिंङ जकर्याह केट्री तातेर। 60दंङ दोऊ याह ज़ि जुबाब रेंई, “मेस; पर दोऊ मिन यूहन्ना केंईन।”
61दंङ दोच़ी एलीशिबा बि कुतोह, “कांह नातिऊ बिचंङ अतु ला दीह मिन माह।” 62दंङ दोच़ी दोऊ बाह जकर्याहू हखा इशारा रे रुहक्ती कि केई केनोह योहू छि मिन केट्री तातन? 63दोई च़ेचिमी तकती पेट्रा दोऊ टोहकठे चेंह च़रति, “दिऊ मिन यूहन्ना शुह,” 64दंङ भत्ते हेरान शुहचे इलिरे। दंङ जकर्याहो आह ए लेह दोहथल ए युप्सा इलि; दंङ दुह कुट्री लेहती दंङ परमेश्वरो धन्यवाद लहज़ी लेहती। 65दंङ दोरे भत्ते बेवा इलिर; दंङ दुह भत्ते गप्पो चर्चा यहुदिया प्रदेशो पहाड़ी इलाकंङ फेलेके इलि। 66दंङ भत्ते रेड्रा दोच़ी एनोह-एनोह सेहमरिंङ बिचार लहजे कुतोह, “दीह गंङकटु छना शोतो?” छना कुचे प्रभुऊ सामर्थ दोरंङ साते तोह।
जकर्याह ओ स्तुति गान
67दंङ दोऊ बाह जकर्याह पवित्र आत्मा रंङ साते पिंङे इलि, दंङ भविष्यवाणी लहज़ी लेहती;
68“प्रभु इस्राएलो परमेश्वरो स्तुति लांई, छना कुचे दुह एनोह मीहतु थल्जी अंज़े तोह दंङ दोतु छुटकारा लहरि,
69दंङ अरी दोऊ सेवक रज्ज़ा दाऊदो खानदानो शुह, दोई ञेंहतु थल्जी इच्च़ा शक्तिशाली उद्धार लहच़ाबि च़रसी ततो।”
70महस तुई, प्रभुज़ि एनोह भविष्यवक्तातु दोरच़ी कुहतो कि,
71दोई ञेंतिंङ ञेंहतु बेरीतु दोरच़ी बचाएपोतो अच़ि ञेंतंङ साते नफरत लहज़ातोर।
72दोई एनोह पवित्र वाईदा हिद लेह, ञेंहतु बाह-मेमेतु टोईच़ी दया लोहतो,
73दंङ दुह वाईदा
अंऊ परमेश्वरा ज़ि ञेंहतु बाह-मेमे अब्राहम रंङ साते जासि तते,
74दोई ञेंहतिंङ ञेंहतु बेरीतु दोरच़ी छुड़ाके, 75दोऊ तुईज़ी पवित्र ए धर्मिकता रंङ साते जीवन पुरे
निडर बंङज़ा दोऊ सेवा लहज़ा लोंहि।
76दंङ केई हे, गंङकटु, परमप्रधानो भविष्यवक्ता कह्लापोंन, छना कुचे कांह प्रभुऊ अम तेयार लहज़िमी थल्जी दोऊ तुईज़ी-तुईज़ी जोज़ोन,
77कि दुह एनोह मीहतु पापो माफ लहज़िमीरंङ साते दोतिंङ उद्धारो पाहठी ज्ञान रमोतो।
78दीह ञेंहतु परमेश्वरो मोह्ड़े दाह रंङ साते शोतो; छना ऐके ञेंतिंङ छंङी रंड्रीमी थल्जी छंङी शवाह ध्वांए मसीह ला ञेंहतु कछंङ अपतो।
79पापारिंङ जोज़ा ए सीमी बेह्दारिंङ बंङज़ा दोतिंङ छंङी रंड्रीमी थल्जी, कि दिह छंङी ञेंतिंङ दुह अमो मार्गदर्शन लोहतो शांति ओ अम रिंङ सीधा चलाएपोतो।
80दंङ दुह गंङकटु यूहन्ना, मोह्ड़े दंङ आत्मारिंङ ताकतवर शुहआ लहरी, दंङ दुह इस्राएलो मीहतु बिचंङ शिक्षा रंड्रीमी ध्याड़ा तचेक सुनसान ठाहरीरिंङ बंङज़ा तोहई।
Currently Selected:
:
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.