Matoosa 24
24
Kagachchoo alamikokki malaataal
(Mar. 13:1-2; Luk'. 21:5-6)
1Yesuusa k'ulluukki min kawaakko beegure seetaa giraan usukko oɂagaalssatareen k'ulluukki minkkokki gimbbe tusin usu tos emeeten. 2Usu goɂameen, «Hikka dubba diyaattaan?» «Ani rumminaa amara eɂemo eɂemoo gutii kaginbamera goggodiyaattanii hadarɂaamooni hikkamalee goggogirooyi kahesira eɂemo koonna laagiro» ame.
3Yesuusa zayitii kabeyaara gaa takkoɂalataro wodami gutii hamas's'ee giraan; usukko oɂagaalssatareen kale been usu tos seeteengureen «Alla noon segiilla» «Hikki ati kaɂamatta dubbaa goree linnara? Emeetottana alamikkotti gachchoon malaata meyya?» ameen. 4Yesuusana abbaabere haa ame; «Maayyoona isin goggosoboonkko isiɂoorayeen.» 5Kamoogganna ani Kiristoosaya amaa megekkeeyi emeeyinnara kamoogganna shirsinaraan. 6Jereenna gara kajereene taɂayeesamatto odu isin maalinnattan; hikki ayees laano kahesooniya, halleewo kuwaarre gachcho ganaa mankkolleete maraan hikkanii isin goggoneyinokko isiɂoorayeen. 7Gosa gosaayi gutii, wononna wonoo gutii kiinnara, banɂe banɂeeyi uɂina ulkokki aaɂaano linnara. 8Hikki dubba goɂameen k'aniin kaɂummullakkotti rakkookko tahoraarijjeetta.
9«Hassu goorata ibaaddo isin rakkoowun roorisi sisinnara, lagadinnaran; megekkeekkotti aalanttii gosa dubbaa dollee odiidantteen linnattaan.#Mat. 10:22. 10Hassu goorata kamooggan ammanokkisoo iisinara, koo kakkalee roorisi sisinnara; isi isiɂorroonna kookkoo diidinnaraan. 11Kamooggan kat'araa kahegerool kiinnara, kamoogganna sossoyisinaraan. 12Tamooggan meellanekko kakkeeyi kamooggan ibaaddokkotti geelanjje ambbal linnatta. 13Tagachchoo arri taageeroon kaɂataate hassu fayyinara. 14Gosa dubbaan ato goggolleeroon hikki wononnati kawaakokki wongala alami dubbaayi lallabaaminnara, esekkona tagachchoo arri emeeyinnatta.
Bayi kakkeenaro battiikki kooko
(Mar. 13:14-23; Luk'. 21:20-24)
15«Goortanun kahegeroo Daanelan goggosegaamerokki malee, ‹Kabattoyisira kameellan ayees tak'ulloyitetto banɂee kaɂaalleero kakkodeeten goorata kannabbabara hashaado!›#Dan. 9:27; 11:31; 12:11. 16Hassu goorata ul kayihuudayi kagirana wodami tos habak'ato, 17Minii fook'ii gutii kagira maamisikki ibaaddona huu minkko atayin arooddago,#Luk'. 17:31. 18Iraa kagira ibaaddotina sarssikkeessa atayin arooɂabbaabanno. 19Ese arri heleel kafatowunna kaɂiilisaroon rakkoo taɂatii leeta. 20Goorttanu bak'atanokkisin bat't'eessayi goorttun Ayihuudin tafoolssi arri goggolleenoonkko ebaayen. 21Hassu goorata alami takkomet'amero arrikko haggaɂabere taa hittaari geeroo lii kakkasoon esekkona horenbbaan ese rakkoonne wota kakkoɂekkaaro kallayitti rakkoo taɂatii linnatta. 22Hassu arriil gabaabbayi waatenna ibaaddo dubba lakkohesare. Kaɂassaabamero maraan goɂameen hanɂu arrija gabaabbateen. 23Hassu goorata maayyonna hikkima Kiristoosa hittanii gira goorttun hassee gira goɂameenna arooɂabddatteen. 24Kat'araa Kiristoosalnna kat'araa hegerool kiinnaraan, isoon goɂekkaate kaɂassaabamerona shirsiin amireene kaɂatii baasakki malaataalnna tusinaraan.#Dan. 12:1; Rag. 7:14. 25Goortta ani isinuun t'aye segaara:
26«Haanssun ‹Aankkima gaa orroo gira,› goɂameenna eserraa aroobbeeten, Hikkima min orroo giridii gira goɂameen arooɂabddatteen.#Luk'. 17:23-24. 27Hank'k'a mina tabiyaankko beegure mina taɂiyaan tos taageero goggohank'aaroo ere kaɂibaaddokkotti emeeto hikkamalee linnatta. 28Rak'a takkogiro banɂe dubbaa allaattil kukkuɂamara.#Luk'. 17:37.
Ere kaɂibaaddokkotti tallami emeeto
(Mar. 13:24-27; Luk'. 21:25-28)
29«Hanɂu tarrakkoo arrijjakko abbaabayire goorsewa
« ‹Arriti mugud linnatta,
diginninna ifakkisee tiraynnatta,
Barraajjana daruurkko ubayinara,
kadaruuree hunnana shalagaaminara.›#Isa. 13:10; 34:4; Hiz. 32:7; Iyu. 2:10,31; 3:15; Rag. 6:12-13; Dan. 7:13; Zak. 12:10-14; Rag. 1:7.
30«Hassu goorata ere kaɂibaaddoo malaata daruurii gutii mutinnara, hassu goorata ulii tagitta aani dubbana woo woo ami ooyinnara. Ere kaɂibaaddona kadaruure duumanchchaayi orroo hunnaayinna taɂatii kabajaayi emeetaa giraan dinnaraan. 31Erggichchalna taɂatii tamalakata yaayene wota faraminnara, isona oɂassabaameraan alamii mina afarkko daruurkkotti gachchokko taa daruurkkotti gachcho geeroo ibaaddo kukkuyisinaran.
Kabalasi gaakokki masuussa
(Mar. 13:28-31; Luk'. 21:29-33)
32«Kabalasi gaakko hikka agaalssis agaalssayeen, ballaal gohurisiro baalallo goc'ariidiraan hassu goorata bat't'eessa gabbalamano addeesattaan.#24:32 Giilaal hikki segaano katusara ulkkisooyi gaa kakkohurisarana baalallo kakkoc'ariidaraan giilaal goggabbalamiro mankkollee maraanya. 33Hikkamaleenna hikka dubba goddeeten ese arri goc'atii gabbalamano addeesa. 34Ani rumminaa amara hikki dubba taagudaroo hitti alattaan lakkoroortto. 35Ulnna daruurnna roorraanwa haafurakki goɂameen suure lakkoroorro.
Goottaa takkoɂemeeyinnara arri addeesamana waatti
(Mar. 13:32-37; Luk'. 17:26-30,34-36)
36«Hasse arrina hasse saatii goɂameen odo kuwaarre kadaruure erggichchaal golleenna, Ere golleenna koonna laakkaso. 37Kanohe geesii goggolleeroyi Ere kaɂibaaddokkotti emeeto usumalee linnatta.#Met'. 6:5-8. 38Usu geesii beke miirɂa geegisanakko horeene Nohe markkafa tos takkotabinaro arri taageeroon ibaaddo aamaanna t'amaanna, oori atataanna keesataa goggogireenkki malee, 39Hasse arri taageeto me emeeyinnaro haɂaddeesooni miirɂa tabekeeyi goggoɂennegamerani ere kaɂibaaddokkotti emeeto usumalee linnatta. 40Usu goorata ibaaddojja lama iraa hayinnaraan, koo ataminara koo hesinnara, 41Heleel lama riim kooyi riitayinaraan too ataminatta, takkalee hesinnatta.
42«Goorttanu Goottakkisin takkoɂemeeyinnaro arri isin mankkokasoon maraan nabbaada oorayeen, 43Hikka wodanaa abayeen, odo minee heto hemeen maagorata emeeyinnatto addeesi girewa nabbaadi min goggosaamamonkko ooratarewa. 44Ere kaɂibaaddonna isin kakkoshaadon goorata mankoɂemeeyinnaro maraan, isinna isiɂekkaasayeen oora.#Luk'. 12:39-40.
Kaɂabddamena kaɂabddamoon kahandaarokokki masuussa
(Luk'. 12:41-48)
45«Babokkisoo isoon kakkodootisaro goorata goggosisiroo goottaa minkkeessakki ibaaddo gutii kashuumatera kaɂabdamena k'arookki kahandaara ayyoyya? 46Goottaakkeessa abbaabayi kakkoɂemeero goorata tasisanttetto hadara fele gudise giraan kahelnnara hassu kahandaara kasommaasameya. 47Ani rumminaa amara ogiraan urrawo dubbaayi gutii usu shoomiinnara. 48Ayesuun goɂameen kahandaara hassu ibaaddoti kameellan golleenna usu metekkeessan, ‹goottaa adallaayinara› amaa, 49Kiigure kakkalee kahandaaro jaleettessa boc'aano gohaggaɂabe t'ameen osetaaraanne wota goɂaamenna got'ame, 50Hassu kahandaarokkokki goottaa usu taɂoorannon arriinna takkoshaadon saatii emeeyigure, 51Hassu kahandaarokki goottaakkeessa murrisinnara, it'aattessana ifissaaddoleenne wota yelinnara, ese banɂee oottanna ilkko fooc'ano linnara.
Currently Selected:
Matoosa 24: BayNT
Highlight
Share
Copy
Want to have your highlights saved across all your devices? Sign up or sign in
The Word for the World Northern Africa
