Jean 1

Ma Zhiklè nʼnde na a gada va ndo

1Te nhinkaɗ na, ma Zhiklè a zhè. Maʼa a zhè a sam Zhiklè. Zhiklè, nengaʼa maʼa. 2Nengaʼa a zhè a sam Zhiklè te nhinkaɗ na. 3Skwi tèlèba nʼnga a nengaʼa; ko skwi staɗ azɓai, man nʼngaʼa a vna ɓai. 4Te nengaʼa nshèffè a zhè, nshèffè skwi nhél sam ndohai. 5Skwi nhél sam a hél ruva, aman ruva a nca ɓai.

6Ndo ngiɗè a zhè, nzlembaɗ na Jean, man Zhiklè a zlündokoɗai. 7Nengaʼa a mshkè, aman a gi malwudai, a ngréɗè skwi nhél sam, aman ndohi tèlèba ta cèʼa a ndav a géɗ nengaʼa. 8Jean, skwi nhél sam ka ɓai; aman nengaʼa ndo malwuɗi skwi nhél sam. 9Skwi nhél sam, skwi nhél sam nzuraʼa, man a shkè a herkeda, a hela ta sam a ndohi tèlèba. 10Na zhè tʼherkeda. A herkeda nʼnga a nengaʼa, aman herkeda a sun nengaʼa ɓai. 11Nengaʼa a mshkè a sam skwi na, aman ndohi nengaʼa ta ca ɓai. 12Aman ko wawa man a nco, a mva ta wuɗai, aman ta ndi a wudahi Zhiklè. Tengaʼa man ta co nzlembaɗ na a ndav ta, 13ara man Zhiklè a yeka ta, ara ndo ka ɓai.

14A ma Zhiklè a nʼnde na a ndo, a nʼnza a sam nga, a nga rka nʼnjèl nengaʼa. Nʼnjèlè Bab Zhiklè, man a mva na kra nengaʼa staɗgenè, nʼndha a pombai a ma nzuraʼa. 15Jean a ngu malwuɗi nengaʼa, a mboho: Nengaʼa ndo, man i gada kinè: Ndo ngiɗè a shkè te deɓ ga, man zlèzlèa a zhè, daga man i az di ɓai. 16Te skwi nengaʼa man ndev ɓai, nga tèlèba nga ngots pombai, a va, a vaʼa. 17Zhiklè a mbezdekona ma kita a ri a Moise. Aman ma pombai, a ma nzuraʼa, a mbezdekona a ri a Yèsu Kristi. 18Ko ndo staɗ a nrka Zhiklè di ɓai. Kra nengaʼa staɗgenè, man a nzi a sam Bab na, nengaʼa nʼngreda nga.

Ma malwuɗi Jean Baptiste

(Mt. 3,1-12; Marc 1,7-8; Luc 3,15-17)

19Na haha, ma malwuɗi Jean, man ndohi Juif ta zlinde ta ndohi mvi skwi a Zhiklè a ndohi Lévi a sam na, aman ta jhèɗèʼa: Ka wa? 20A nengaʼa a nʼngreda, a ngaɗa ta tsarayaʼa: Iyè, i Kristi ka ɓai.

21A ta dzhoɗo: Ka wa, ka Elie ɗè? A ngaɗa ta: I Elie ka ɓai. Ka ndo nhadka ma dè? A ngaɗa ta: I nenga ka ɓai. 22A ta gada na: Ka wa? Aman a nga menda ta ma a deɓa a ndohi man ta zlindeka nga. Ka gaɗa, i wa? 23A ngaɗa: I ndo man a bèhè tʼhèshèkèɗ: Va-ga civèɗ Bi Zhiklè saraʼa, ara man Esaie, ndo nhadka ma, a gaɗa. 24Ndohi man to do a sam Jean, ta te va ndohi pharisie. 25A ta gaɗa na: Aman ka Kristi ka ɓai, ka Elie ka ɓai, ka ndo nhadka ma ka ɓai, ka gi baptême èhèmè? 26Jean a mʼmbeɗa ta a ma: I gi baptême te iyam. Aman ndo man kin sun nenga ɓai, ani na zhè te ndev kinè ma! 27Nengaʼa ndo man a shkè te deɓ ga. I gi huyokokoʼa, i slaha a i gshè kotokoroh nengaʼa a ri ɓai.

28Skwi haha a gu te kokwar Béthanie, te wud woyam Jourdain, a sam man Jean a gu baptême.

Na haha, kra tambak Zhiklè

29Te mangoslèmaʼa Jean a rka, Yèsu a shkè a sam na, a ngaɗa: Na haha, kra tambak Zhiklè, man a cè mali herkeda! 30Nengaʼa ndo man i gaɗa kinè: Ndo ngiɗè a shkè te deɓ ga, man zlèzlèa a zhè, daga man i az di ɓai. 31Te va nasa i sun nengaʼa ɓai. Aman i shkè, a i gi baptême te iyam, aman ndohi Israel a ta shinèʼa. 32A Jean a nʼngreda, a ngaɗa: I rka Mèzhèɓ a shkèhai te zhiklè ara nkuɗhom, a nʼnza a géɗ nengaʼa. 33Te va nasa i sun nengaʼa bai. Aman nengaʼa man a zlindekayè a ngi baptême te iyam, a ngadayè: Ndo man ka rka Mèzhèɓ a shkèhai te zhiklè, a nzi a géɗ nengaʼa, nengaʼa ndo man a gi baptême te Mèzhèɓ Zhiklè nkezlaʼa. 34A i rkaʼa, a i gi malwudai, nengaʼa kra Zhiklè.

Golahi Yèsu nshèlèkurhiaʼa

35Te mangoslèmaʼa, Jean a golahi nengaʼa cèw, ta zhè zaʼa. 36Aman a rka Yèsu man a shèwèlè, a ngaɗa: Na haha, kra tambak Zhiklè! 37A golahi nengaʼa cèw ta tsena ngèɗè nengaʼa, a ta dzodzor Yèsu. 38A Yèsu a mpu di a deɓa, a nrka ara man ta jèjèrèʼa, a ngaɗa ta: Kin War mè? Aman ta gaɗa na: Rabbi, (ara ngèɗè: Ndo njèngè ma), gi ngaya tema? 39A nengaʼa a ngaɗa ta: Vo-washkè, a kin da rkaʼa! A to do, a ta rkaʼa. A ta nza a sam na a pats nasa, pats dakwaɗ.

40Staɗ te va tengahi cèw, aman ta tsena ma Jean, a ta dzodzor Yèsu, nengaʼa André, kramam Simon Pierre. 41Nengaʼa a nʼngots Simon, kramam na, nshè-lèkuraʼa, a ngaɗa na: Nga ngots Messie (ara ngèɗè, ndo man ta bada na mbar a geɗ). 42A ndaʼa a sam Yèsu. Aman Yèsu a rkaʼa, a ngaɗa na: Ka Simon, kra Jonas; sèi ta baha ka Céphas (ara ngèɗè, kwa).

Yèsu a baha ta nda Philippe a Nathanael

43Te mangoslèmaʼa Yèsu a woya man a dè a kokwar Galilée, a nʼngots Philippe, a ngaɗa na: Dzadzarkayè! 44Philippe, ndo Bethsaida, te kokwar André a Pierre.

45A Philippe a nʼngots Nathanael, a ngaɗa na: Nga ngots ndo, nengaʼa man Moise a ndohi nhadka ma ta Windo te ɗèlèwèr Zhiklè: Yèsu, kra Joseph, te Nazareth! 46Nathanael a ngaɗa na: Skwi mbelaʼa a shkè te kokwar Nazareth dè? A Philippe a ngaɗa na: Washkè, ka da rkaʼa! 47A Yèsu a nrka Nathanael a shkè a sam na, a ngoɗ a géɗ nengaʼa: Na haha, ndo Israel tas! 48Nathanael a ngaɗa na: Ka senkay tema? A Yèsu a mʼmbeɗa na a ma: Ga Philippe a baha ka, aman ka nza te verzi wof kslor, i rka ka. 49Nathanael a mʼmbeɗa na a ma: Rabbi, ka kra Zhiklè, ka Bi Israel! 50A Yèsu a mʼmbeɗa na a ma: A géɗ man i gaɗa ka: i rka ka te verzi wof kslor, ka co a ndav ngaya dè? Ka da rka skwi mbiaʼa, man a fenaʼa. 51A ngaɗa na: A vava, a vava, i gaɗa kinè: Kin da rka giɗfèk mwinèa, a golahi Zhiklè ta dè a pa, a ta shkèhai a géɗ a kra-ndo.

Currently Selected:

Jean 1: MOF89

Highlight

Copy