ዎጋ 1

እሞታነ ያርሹዋ

(1:1—7:38)

ጹግያ ያርሹዋ

1መና ጎዳና ጋከትያ ዱንካንያ ግዶፐ መና ጎዳይ ሙሳ ጼሲደ፥ ሀዋዳን ያጊደ ሃሳዬዳ፤ 2“እስራኤልያ አሳዉ ሀዋዳን ያጋደ ኦዳ፤ ‘ህንተፐ ኦንነ መና ጎዳዉ ያርሹዋ ሺሽያ ዎደ፥ ሄ ባረ ሺሽያ ያርሹዋ ባረ መህያፐ ዎይ ባረ ዶርሳ ዎይ ዴሻ ዉድያፐ አሆ። 3ሄ ያርሹ መህያ ዉድያፐ ጹግያ ያርሹዋ ግዶፐ፥ አቱማዋ ግዲደ፥ ትላ ቦላና ደእያዋ ግዶ። መና ጎዳይ አካና ማላ፥ እ ሄ ያርሹዋ መና ጎዳ ዱንካንያ ገልያ ፐንግያን ያርሾ። 4ያርሹዋ ሺሽያ ብታኒ ጹጊደ ያርሻናዉ አሄዳ ባረ መህያ ሁጲያን ባረ ኩሽያ ዎ። ሄዌ አ ናጋራ አቶ ጋናዉ ጾሳይ አኬዳ ያርሹዋ ግዳናዋ። 5እ ኮሩማ መና ጎዳ ስንን ሹክና፤ አሮና ናናይ ቄሳቱ ሄ ሱ አሂደ፥ መና ጎዳ ዱንካንያ ገልያ ፐንግያን ደእያ ያርሽያ ሳኣ ምይያ ኡባን ጉስኖ። 6ሄዋፐ ጉይያን፥ እ ጹግያ ያርሾ መህያ ጋልባ ቃሮ፤ አሹዋ አ ቆሙዋን ቆሙዋን ከሶ። 7ቄስያ አሮና ናናይ ያርሽያ ሳኣ ቦላን ታማ ኤደ፥ ም ዎኖ። 8ሄዋፐ ጉይያን፥ አሮና ናናይ ቄሳቱ ሄ ከሴዳ አሹዋ ሁጲያነ ሞዋ ጉጂደ፥ ያርሽያ ሳኣ ቦላን ታማን ደእያ ም ቦላን ማሪደ ዎኖ። 9ሽን ሄ ብታኒ ቃን አሹዋነ ገደቱዋ ሃን ሜጮ። ያቲደ ቄሲ ሄዋ ኡባካ አሂደ፥ ያርሽያ ሳኣ ቦላ ጹጎ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

10“ ‘ጹግያ ያርሾ እ እምያ እሙ ዶርሳ ዉድያፐ ዎይ ዴሻ ዉድያፐ አከትያዋ ግዶፐ፥ አቱማዋ ግዲደ፥ ትላ ቦላና ደእያዋ ግዶ። 11ሄ መህያ ያርሽያ ሳኣፐ ሁጲሳ ባጋና መና ጎዳ ስንን ሹኮ። አሮና ናናይ ቄሳቱ አ ሱ አኪደ፥ ያርሽያ ሳኣ ምይያ ኡባ ቦላን ጉስኖ። 12ሄዋፐ ጉይያን፥ ሄ ብታኒ አ ቆሙዋን ቆሙዋን ከሴዳ አሹዋ ኡባ ቄሲ አኪደ፥ ሁጲያነ ሞዋ ጉጂደ፥ ያርሽያ ሳኣ ቦላን ታማን ደእያ ም ቦላን ዎ። 13ሽን ቃን አሹዋነ ገደቱዋ ሃን ሜጮ፤ ያቲደ ቄሲ ሄዋ ኡባ አሂደ ያርሽያ ሳኣ ቦላን ጹጎ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

14“ ‘መና ጎዳዉ ያርሽያ ጹግያ ያርሹ ካፉዋ ግዶፐ፥ ሀራጵያ ማራ፥ ዎይ ዶጎሙዋ አሆ። 15ቄሲ ሄዋ አኪደ፥ ቆያ ምርቆ፤ ያቲደ ያርሽያ ሳኣ ቦላን ደእያ ታማን ጹጎ። አ ሱይ ያርሽያ ሳኣ ቦላፐ ምይያና ዱገ ጎግ ጭንጎ፤ 16ኡሎ ግዱዋ ባለቱዋና ከሲደ፥ ያርሽያ ሳኣፐ አዋይ ዶልያ ባጋና፥ ብድን ቆልያ ሳኣን ኦሎ። 17እ ሄ ካፉዋ ቀፈቱዋ ኦይቂደ ጳልቆ፥ ሽን ኡባና ዳኮፖ። ሄዋፐ ጉይያን፥ ቄሲ ያርሽያ ሳኣ ቦላን ደእያ ታማን ዎደ ጹጎ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

Currently Selected:

ዎጋ 1: DFBE

Highlight

Copy

Compare