Luka 1
1
Amaywi no Matatekelo
1Kanyi aka no kupula,
Aanu no kupula naeteke okun̄ola etitaba no inu eyi inaku tendahala mukaci ketu. 2Kanyi omo ana kutwambelela awo ana kwikalanga kumatatekelo ana kwimona mi aambi no liywi.
3Kame imonahala wino kwa mene muku kon̄a einu wino mu nako ina kubwa, okun̄ola eliywi kwa wene no kutompeha Teufilasi. 4Nji cwale olimuke ouniti okukumanena ni inu ona kwambeliwa.
Okuleiwa kwa Jowani Omukolobezi aba kuna Kulimukisiwa
5Mu tinako ta Heloda ombumu no Judeya, kame kuna kwikalanga omupulisita no litina lya Zakaliya, woyo noikalanga mu sikwata no mupulisita no Abija. Mukataye neli osilusika lwa Aloni, mi elitina lyaye neli Elizabeta. 6Onje neli ano kuluka balubala lwa Nyambe, okuyoya oku nambulwa okunyazahala okukumanena ku titaelo tonje ni milawo ya Mbumu. 7Kono kasi kwikalanga ni mwana kakuli Elizabeta neli muumba, mi onje naku kulubala.
8Cwale yo sebeza kanyi mupulisata balubala lwa Nyambe abo esikwata saye esili ba nako no kusebeza. 9Okukumanena ku sizo no upulisita, kame ana kuketiwa okwingena mu keleke ya Mbumu okacin̄a eisense. 10Cwale aanu no kupula kame ana kulapelelanga bandee ba nako no kucin̄a einsense.
11Ababo cwale sebeli kumonahala kwa yonyene elingeloi lya Nyambe, eli imanine ku silyo no aletale no insense. 12Cwale Zakaliya kame ana kuziyeleha aba ana kumona elingeloi, sebeli okucila. 13Kono elingeloi sebeli lyamba kwa yonyene nji, “Olese kucila Zakaliya! Kakuli etapelo yowe naiyupiwa, mi mukatowe Elizabeta mbaku leyele omwana no ndumbana mi mbomu tumbu elitina lya Jowani. 14Mi mbu wabelelwa nuukutumela mi ano kupula mba wabelelwe ba kuleiwa kwaye! 15Kakuli mbatende woyo no kuneneba balubala lwa Mbumu. Mi katamba okunwa ewaine simba amalopu cwale mba iyala ni Mebo No Kukena simba okutunda mu lipumo lya inawaye. 16Mi mba usu aanu no kupula no Isilaele kwa Mbumu Nyambe woo, 17mi mbati balubala lwaye mu mebo ni maata a Eliya okuusa emicima no ashemi kwaana ni awo nambulwa okukon̄a okushangama no kuluka, oku baakanya aanu ana kulukisetwa kwa Mbumu .”
18Zakaliya sebeli wamba ku lingeloi nji, “Ngasibine sani limuke eyi? Kakuli mene nakulubala kale ni mukatange nakulubala ku myaka.”
19Elingeloi sebeli limutambula nji, “Time Gabiliyele woyo oimanine mu sibaka sa Nyambe mi kame nina tumiwa okwamba kwa wene mane nuukulitela amaywi no kuwaba. 20Cwale komone, kame sondoke ni kuulwa okwamba okutwala ba liywaa elyo aba saiyele einu eyi. Kakuli kawasi pumena amaywi ange awo saiyatetetwe mu nako yawo.”
21Cwale aanu sebeli atatelela Zakaliya ni kukomoka okuliyeha kwaye mu keleke. 22Cwale aba ana kubanena bandee kasi kutwesa okwamba kwa onyene, mi sebeli anahana nji namono epono mu keleke. Zakaiya sebeli wamba noo mu kuyuleka yooli esimumu.
23Cwale Zakaliya enako yaye no kusebeza aba ina kubwa, sebeli ota ku ndoo yaye. 24Munyima no maywaa awo mukataye Elizabeta sebeli oimana mu mundi (oukushimba) mi sebeli okushweeka mu ndoo ba tikweti no kukwana titanu ni kwamba nji, 25“Eyi yokame ana tende Nyambe kwa mene mu maywaa ona likete, okutundisa elikenyi lyange mukaci no aanu!”
Okulimukisiwa no Kuleiwa kwa Jesu
26Mukweti no utanu ni kamweya elingeloi Gabiliyele sebeli litumiwa okutunda kwa Nyambe okuta ku mulenen̄i wisaniwa nji Nazaleta. 27Kwa mukatana no naluleya woyo ona kubeleziwa ku mulume oisaniwa Josefa, no lusika lwa Dabida. Woyo naluleya elitina lyaye neli Maliya. 28Mi selbeli oiya kwa yonyene ni kwamba nji, “Olumele, wene no kufuyaulwa! Nyambe kame ali ni wene!”
29Kono kame ana komokisiwa ku maywi aye ni kumakala kumukwa no kuketiwa kwaye. 30Cwale Elingeloi sebeli lyamba kwa yonyene nji, “Olese kucila, Maliya, kakuli nuwana omuhau kwa Nyambe. 31Cwale komone kame sokushimbe mu lipumo lyowe ni kuleya omwana no ndumbana, mi mbumu tumbu elitina lya Jesu. 32Mba tende wuyu no kuneneba mi mba isaniwa Omwana a Nyambe OMWAMBAKANI onene mane Ombumu Nyambe mba mubi olubona lwa nyakulyaye Dabida, 33mba busu endoo ya Jakobo okuta oku no kwaabwa mane ni mubuso waye no kwaabwa!”
34Maliya sebeli oibanguta elingeloi nji, “Ngasibine saitendahale eyi kakuli mene silimukile omulume?”
35Elingeloi sebeli lyamba kwa yonyene nji, “Emebo No Kukena mba iiyi kwa wene, mi amaata a Nyambe OMWAMBAKANI mba kufuku. Cwale abo omwana woyo soleiwa mba isaniwa nji wa kukena Omwana Nyambe. 36Cwale komone, mwabowe Elizabeta mu nako yaye no ku kulubala naku shimbi omwana no ndumbana, mi okweti uno sebeli ou no utanu ni kamweya, woyo ona kutoiwa nji muumba. 37Kakuli kwa Nyambe kakwisa esi sikwangwiwa”
38Cwale Maliya sebeli wamba nji, “Komone, mene uno, omubika wa Mbumu, “sitendiwe kwa mene okukumanena ni maywi owe.” Cwale elingeloi sebeli limusiya.
Maliya yo Potela Elizabeta
39Mu maywaa awo Maliya sebeli okutukiseta okuta mu naha no malundu mu mulenen̄i no Judeya. 40Cwale sebeli okaingena mu ndoo ya Zakaliya niku keeta Elizabeta. 41Cwale Elizabeta aba ana kuyupa okukeetiwa kwa Maliya, omwana sebeli weenda mu lipumo. Mi Elizabeta sebeli oiyala Emebo No Kukena 42mi sebeli okuweleza ni liywi no kuneneba nji, “Nufuyolwa mukaci no akati onje, mi embuyoti nimbuya no lipumo lyowe. 43Mi iikene eyi aba ina tendahala kwa mene, nji inawaye Mbumu wange aiye kwa mene? 44Kakuli komone, abo eliywi lyowe no kuni keeta aba lina keela mu litwi lyange, ababo omwana oli mu lipumo lyange sebeli weenda mulibaka no kuwabelelwa. 45Cwale embuyoti niya woyo opumena nji mba kwiyatetwe eso sina kwambiwa kwa yonyene okutunda kwa Mbumu.”
Olusimo lwa Maliya no Milumbeko
46Mi Maliya sebeli wamba nji,
“Emebo yange kame ilumbeka Ombumu,
47mi emebo yange kame iwabelelwa mwa Nyambe omuyoyisi wange,
48kakuli nalikete oukushuwa no mubika waye!
Komumone okutunda bano amasika onje mbani isana nji wuyu no kufuyolwa,
49kakuli wuyu no kuneneba Nyambe nani tendele esinu sinene.
Mi okukena lyokame elitina lyaye,
50cwale amakeke aye kame ali kwaawo amucila
okutunda ku lusika okuta ku lusika.
51Namonisa amaata ni lyoko lyaye
nahasanya oukuyeema koo mu mihupulo no micima yoo.
52Natulula ano kuneneba ba mabona oo,
mi natuleke awo no ukushuwa.
53Naiyata ano kuyomba ni inu no kuwaba,
ni kucita asikufuma oku nambulwa simweya.
54Natusu omubika waye Isilaele,
mu kupuluka amakeke aye.
55Kanyi aba ana kwamba kwa njekulyetu
kwa Abulahama ni ku masika aye okuta oku no kwabwa.”
56Cwale Maliya aba ana kusiyalelwa etikweti tin̄atu sebeli ouka ku mundi waye.
Okuleiwa kwa Jowani Omukolobezi
57Cwale enako sebeli ikeela eyi no kuleya kwa Elizabeta, mane sebeli oleya omwana no ndumbana. 58Cwale awo ayakile noo ku nyonga nabaaye aba ana kuyupa Ombumu namonisa amakeke no kuneneba kwa yonyene, sebeli awabelelwa naye.
59Cwale ba liywaa no mutanu ni twaatu sebeli atwala olukeke ku mupato, mi kame ana kusinga nji amutumbe Zakaliya elitina lya sitaye. 60Kono inawaye sebeli wamba nji, “Kokuulwa! mbaisaniwa nji Jowani.”
61Cwale sebeli aamba kwa yonyene nji, “Kakwisa kwasi mukowa wowe oisaniwa ni litina eli!” 62Cwale sebeli ambela sitaye ni tiponiso, nji aasimwete elitina elyo asinga okubeeka mwanaye.
63Zakaliya sebeli okumbela akabala ni ku n̄olabo nji, “Elitina lyaye ni Jowani.” Mi onje sebeli akomoka! 64Cwale ababo akanwa kaye sebeli kayatuluka ni lulimi lwaye sebeli lunungutuka, ni kwamba, oku lumbeka Nyambe. 65Cwale awo onje ayakile amabapa noo sebeli alemiwa okucila, mi etaba eyo sebeli ihasana mu naha yonje no malundu no Judeya. 66Cwale onje awo ana kwiyupa sebeli aiteula mu micima yoo ni kwamba nji, “Cwale uyu mwanukana kame sa kule oku tenda anyine?” Kakuli elyoko lya Mbumu kame lina kwikala ni yonyene.
Ounuhi wa Zakaliya
67Cwale Zakaliya sitaye sebeli oiyala ni Mebo No Kukena, ni kunuha okwamba nji,
68“Ku lumbiwe Ombumu Nyambe no Isilaele!
Kakuli na poto ni ku liulula aanu aye.
69Mi na tulitele omuyoyisi no maata,
mu ndoo ya mubika waye Dabida.
70Kanyi omo ana kwambela ni tunwa no anuhi aye no kukena oku tunda ku kale
71nji kame sa tuyoyisiwe ku ila yetu,
ni mu maoko no awo atu timbile.
72Oku monisa amakeke ana kusepisiwa kwa anjekulyetu
ni ku puluka oulikani waye no kukena
73oluci ana kweeta kwa sitetu Abulahama
74na ku tusepisa
nji aba tuna mana oku lamulelwa mu maoko no iila yetu,
tu mu sebeleze mu kwaacila,
75me tuli ano kukena ni kuluka balubala lwaye amaywaa onje no mooyo wetu.
76Cale weene, olukeke, kame soisaniwe nji omunuhi wa Nyambe OMWAMBAKANI
kakuli kame sote balubala lwa Mbumu
okalukisa endila yaye,
77okuba ezibo no kuyoya kwaanu aye
mu ku lemenwa eibi yoo,
78mulibaka no mukekecima wa Nyambe wetu.
abo eliywaa aba saliiye beulu yetu okutunda ku wilu
79okuba eliseli kwawo ali mu uwi ni mu mwiinda no lifu,
oku simweta amakondo etu mu ndila no kozo.”
80Cwale omwana sebeli okula ni koongola mu Mebo, mi kame ana kwikala mu lihalaupa okutwala ba liywaa elyo ana kumonahala mu Isilaele.
Currently Selected:
Luka 1: lyn
Highlight
Share
Copy
Want to have your highlights saved across all your devices? Sign up or sign in
