Luka 20

Epuzo Okukumanena ni Maata a Jesu

(Mateu21.23-27; Maleka11.27-33)

1Eliywaa linjili Jesu yoiyeta ni kukutaza eliywi kwaanu mu Ndoo ya Nyambe, apulisita akulu na n̄oli bamweya na kulu sebeli aiya, 2ni kwamba kwa yonyene nji, “Otwambele, ka maata awo otendisa einu eyi, simba anyini ona kubi woo.” 3Jesu sebeli waatambula nji, “Ni mene kame sani mibangute epuzo nji munambele, 4kana ekolobezo ya Jowani kame ina kutunda ku wilu nji neli kwaanu?”

5Cwale sebeli akwambota mukaci koo, ni kwamba nji, “Aba satwambe nji, ‘Kame itunda kuwilu,’ kame saambe nji, ‘Cwale iikene kamwa sikumupumena?’ 6Kono aba satwambe nji, ‘Niya aanu feela, aanu onje kame satu pwacaule ni mawee, kakuli kame apumena nji Jowani neli munuhi.”

7Cwale sebeli atambula nji, “Katuyii oko ina kutunda.”

8Cwale Jesu sebeli wamba kwa onyene nji, “Ni mene simyambele amaata ni kutusisa okutenda einu eyi.”

Enguli no Abeleki na mu Litema

(Mateu21.33-46; Maleka12.1-12)

9Cwale Jesu sebeli otateka okwambela aanu enguli eyi nji, “Omulume kame ana kukuna elitema no beine ni kulisiya mu maoko no abeleki, mi sebeli ota mu naha indina ba nako no kuleba. 10Cwale enako aba ina kukwana, sebeli otuma omubika kwa beleki nji amube ku mbuya na mu litema no beine. Kono abeleki sebeli amufula ni kumuusa nambulwa esi ana kushimba. 11Mi kame sebeli otuma omubika munjili, kono abeleki sebeli amufula ni yonyene ni ku muyandisa mu mukwa no kwenisa mane ni kumuusa nambulwa esi ana kushimba. 12Cwale sebeli otuma woyo no waatu, woyo sebeli amulemeka ni kumuyumbela kundee. 13Cwale omunya litema sebeli wamba nji, ‘Cwale iikene sanitende? Mbi tumu mwanange woyo nisinga onene, mwendi mba ka mukuteke!’ 14Kono cwale abeleki abana ku mumona, sebeli akwambota mukaci koo nji, ‘Woyo yokame shwana twendenyi tu mwibae, nji cwale aci tu kayole esifumu!’ 15Cwale sebeli amuyumbela kundee no litema no beine niku mwibaa.

“Cwale siikene satende omunya litema kwa onyene? 16“Kame saiye mukusinya abeleki ni kuba anjili.”

Cwale aanu aba ana kuyupa ngeeso sebeli aamba nji, “Nyambe otulemene!”

17Kono Jesu sebeli waaliketa ni kwamba nji, “Iikene cwale eyo in̄olilwe?

‘Eliwee elyo lina kukaniwa kwayaki

kame lina futuka omusumo no utokwa namu lilulu.’

18Omunu yonje woyo so kwelabo mba patuka otubindi-bindi, kono cwale nji eliwee elyo likwele omunu mba limulemeke.”

Epuzo mulibaka no Kuteneka Imitelo

(Mateu22.15-22; Maleka12.13-17)

19Aiyeti no mulawo na pulisita akulu sebeli aeteka oku beeka amaoko oo beulu ya Jesu ba nako eyeyo, kono sebeli acila aanu kakuli kame ana lemuha nji naambele enguli eyo yalwisa. 20Cwale sebeli amwaliketa, ni kutumena amatwela awo ana kukumonahalisa nji akuluka, nji ayupe eyo saambe, nji amube mu maata ni mupuso no mubusisi. 21Cwale amatwela sebeli aibanguta Jesu nji, “Mwiyeti, kame tuyii nji kame wamba ni kwiyeta wino mane kukwite esishweka, kono kame wiyeta endila ya Nyambe mu niti. 22Kame tulukeele aci okuba omutelo kwa Sesale nji katulukeele?” 23Kono Jesu sebeli omona etingana too ni kwamba kwa onyene nji, 24“Komunimonise omuwayawaya. Sanyine esifateho neyi ina n̄oliwabo?”

Sebeli aamba nji, “Ya Sesale.”

25Cwale Jesu sebeli wamba kwa onyene nji, “Cwale mube Sesale eso sili sa Sesale, mi mube Nyambe eso sili sa Nyambe. 26Cwale sebeli akwangwa mukaci no aanu okulema eso ana kwamba, kono sebeli akomoka ekalabo yaye, mi sebeli aondoka feela.

Epuzo Okukumanena eyi no Kwinguka Kwaafu

(Mateu22.23-33; Maleka12.18-27)

27Cwale sebeli kwiiya Aduki anjili kwa Jesu awo ana kwamba nji kakwisa okwinguka kwaafu, 28mi sebeli amwibanguta nji, “Mwiyeti, Mushe kame ana kutun̄olela omulawo owo wamba nji mukulwaye munu nafi yo kwite omukati kono kakwite omwana, minaye kame afanena okukwata woyo mukati nji alitele mukulwaye aana.’ 29Cwale kame kuna kwikalanga alume atanu na yiili, wuyu no weli sebeli okwata omukati kono sebeli ofa nambulwa kuleyelako omwana. 30Wuyu no wiili 31mane wuyu no waatu sebeli omushimba. Mi onje atanu na yiili sebeli aafa nambulwa kusiya aana. 32Cwale munyima yoo ni mukati sebeli ofa. 33Cwalehe mukwinguka kwaafu anyine sotenda omunya mukati? Kakuli onje kame naku mukwatanga.”

34Cwale Jesu sebeli wamba kwa onyene nji, “Aana namu nako ino kame akwata ni kukwaliwa, 35kono awo sa biwe etukelo no kumona elitunga na kulubala ni kwinguka no aafu awo katamba kukwata ni kukwaliwa. 36Cwale katamba kufa kame, kakuli kame afekile kanyi mangeloi mi aana a Nyambe, atendile aana no kwinguka. 37Kono nji aafu mba inguka, simba Mushe ni yonyene na kwamba ngeeso ku liputa lina kutumbuka aba ana kwisana Mbumu nji Nyambe wa Abulahama, ni Nyambe wa Isaka mane ni Nyambe wa Jakobo. 38Cwale ka Nyambe waa no kufa, kono wawo no kuyoya, kakuli kwa yonyene onje kame ayoya.”

39Cwale an̄oli anjili sebeli aamba nji, “Mwiyeti nwamba wino!” 40Kakuli kame ana kucila oku mwibanguta epuzo injili kame.

Epuzo mulibaka lya Jesu

(Mateu22.41-46; Maleka12.35-37)

41Kono Jesu sebeli wamba kwa onyene nji, “Ngasibine aba aamba nji Kilesite ni Mwana Dabida? 42Kakuli Dabida yonyene kame ana kwamba mu buka no Lisamu nji,

‘Ombumu naamba kwa Mbumu wange nji,

Oikale ku lyooko lyange no silyo

43okutwala abo sani tendele eila yowe eipula no kulyatabo makondo owe.

44Dabida kame amwisana nji Mbumu, cwale ngasibine omo satendele nji mwanaye?

Jesu yoba Emamela kwa Iyeti no Mulawo

(Mateu23.1-36; Maleka12.38-40)

45Jesu sebeli wambela aiyetwa aye aanu onje ateetete. 46Mucile an̄oli awo asinga oukumanga mu ikumango no kuleba mane ni kusinga okupota mu ibaka no misika ni kwikala mu ipula no utokwa mu tindoo no milapelo ni mu ibaka no kukutekeha ku mikiti. 47Kame amana eiluwo no akati no ambakati aatendela etitapelo no kuleba! Awo kame sabiwe ekoto no kubambaba onene ni kubitelela!”

Currently Selected:

Luka 20: lyn

Highlight

Copy