Marcos 4
4
Jesus trigu ewy tamuinze etâni wâgâ unâ nhegatuhobyry
(Mt 13.1-9; Lc 8.4-8)
1Jesus kurâdo nhenomedâdondyly paru Galiléia emelay. Toenzepa myani kurâdo eydâ âtâdyguybyem awyly. Aituo ekadyly pepi sagunu iwaguepanro odaji. Kurâ domodo tâpagune lelâ paru emelay, Jesus xunâry idase. 2Jesus unâ nhegatuly, kurâ domodo tienomedâdoem, aguely:
3— Xirâ idataungâ. Tâlâ myani uguondo trigu ewy tamuinze etâni typi ezay. 4Nhamuinday olâ myani tâlâ ânwa oze ihugueim. Mârâ myani konopio modoram tadaguoze. 5Tâlâ pylâ toenzepa tuhube atoram ihugueim, onro tâsanigueba atoram. Inepa kehoem myani târâ iazely wâne, tydâetâgueba olâ mârâ ago idyly. 6Xixiram tâjiaduân-honze myani nady tyaduânse, iwindy ago ondaxi nâtâba awylygue. 7Tâlâ myani tyguyreimpe atoram ihugueim. Tyguyreim modo, trigu modo warâ âzekiba ago tâise myani. Tyguyreim olâ ago ini kuru, trigu takaze kehoem. Aituo kopâ ihugueyby nikuiba. Aituo âdaitoem nudupa. Mârâ duay tawylygue trigu newiseba. 8Tâlâ myani onro iwâkuru onwa ihugueim. Tyazewâse, ago tâise, tâwiseze warâ myani. Toenzepa myani mârâ nady modo ewitunu. Koendâ kehoem myani ekaunâdyly ewy modo wâgâ cem, sessenta, trinta alelâ kehoem — kely.
9Warâ Jesus nhegatuly eyanmo.
— Xirâ unâ aguely koendâ mâuntudyze mataymo, koendâne angahumo odaji ietaungâ — kely Jesus.
Âdaituo unâ tâgatuzeingue kulelâ tienomedâdyly Jesus aguehobyry
(Mt 13.10-17; Lc 8.9-10)
10Ilâpygueduo kurâ domodo idâwâdyly, Jesus aguely idanipyryem. Jesus eynynonro modo, târâ âxiânwâdyby modo warâ Jesus nhapâiguelymo:
— Âdaituoka mâenomedâday unâ mâengatuly, ago lelâ amyguepa mawyly? — kelymo Jesusram.
11Aituo Jesus in-hoguly:
— Saguhoem mykâinane Deus nutuen-homba âdara idânârâ iwymâryem tâidyly. Urâlâ olâ xutuen-hoim âyanmo, âmaemoma mâindadysedonromo. Koendâ ise âyanmo kâuntuen-honly. Deus koendâ tiuntudyzebaom modo olâ unâ tâgatuzeingue lelâ kâenomedâdyly. 12Agânhekyly tâensemolâ wâne, nutubamo olâ, nepyramo-ro waunlo ara kulelâ. Auguely tydasemolâ wâne, âdakeze auguely nutubamo olâ ise. Koendâ tiuntuduomo, Deus izepa ato aiedyly tumozemo tâise. Deus tâinwânsemo tâise, inakanhe aitomobyry tygakeze tâise Deus warâ — kely Jesus.
Jesus âdakeze nady wâgâ adâkely awyly aguehobyry
(Mt 13.18-23; Lc 8.11-15)
13Alâ Jesus agueondyly:
— Nady wâgâ kâengatuyby mâuntuba âmaemo watay, eagonro modo kâengatuduo mâuntuwâbyra ise âmaemo. 14Inomedâzemo nady ewy wâgâ auguehobyry ise âyanmo koendâ kâengatuly. Mâkâ nady ewy âpa ezay tamuinze etâni emyenro mawânkâ Deus itaumbyry egatuim modo. Deus itaumbyry iwâkuru pylâ awârâ nady ewy ara-ro. Onro onwa nady ewy samuin-hobyry ara lâpylâ Deus itaumbyry kurâ domodoram âzegatuoly. 15Mârâ nady ewy ânwa oze tamuinze etâdyby tadaguoze myani. Aituo âdy niazepa awyly târâ samuin-hobyrydâ. Tâlâ lâpylâ arâ Deus itaumbyry idataynrim modo. Tydasemo wâne. Inepa olâ Satanás idânârâ indatybymo nhangahumo odaypa nhetyly. Aituo pylâ Deus neinwâmpyra awylymo-ro warâ.
16-17— Mârâ nady ewy onro tuhubeom onwa ihuguewâdyby inepa kehoem iazely. Iwindy modo ago ondaxi nâtâba awylygue olâ, inepa iladaynly, iguewâdyly warâ. Tâlâ lâpylâ arâ Deus itaumbyry idataynrim modo. Tindatyby modo tâinwânsemo tuomare kehoem. Tâzenagazeoduo olâ inepa kehoem Deus neinwâmpyra idylymo.
18— Tâlâ mârâ nady ewy tyguyreim duaxi ihuguewâdyby, ago tâise wâne, newiseba olâ, tuahuze mârâ tyguyreim awylygue. Tâlâ lâpylâ arâ Deus itaumbyry idataynrim modo, Deus tâinwânsemo wâne. 19Xirâ onro anaym adienkyly modo wâgâ kulâ olâ âseguâdâdylymo. Toenzepa âdype tâidyly kulâ, toenzepa tydinherugadyly kulâ warâ olâ ize atomo. Kurâdo tohoguedyly kulâ ize atomo. Awylygue Deus nhenanânehonlymo. Deus itaumbyry nidapyra, iwâgâ nâpaunzebyra warâ idylymo. Deus wâgâ ânguyram aguepa idylymo warâ.
20— Mârâ nady ewy onro iwâkuru onwa ihuguewâdyby olâ koendâ iazely, ago idyly warâ. Toenzepa ewisely. Tâlâ myani ewy wâgâ cem lelâ ewily xuduim, sessenta lelâ ewily xuduim, trinta lelâ ewily xuduim warâ. Tâlâ lâpylâ arâ Deus itaumbyry idataynrim modo, tindakylymo lelâ nheinwânkylymo. Deus lelâ nheinwânkylymo. Ize ato lelâ anhekylymo. Iwâgâ aguelymo, toenzepa kurâ domodo nheinwântoem warâ — kely Jesus.
Âdy kioempyra kine Deus kurâem anhetyby
(Lc 8.16-18)
21Jesus aguely:
— Âyanmo kâengatuyby koendâ mâuntudyzemo urâ. Peto tyatygueim âdylâ iaxi toentuneba, kama iaxi tyeseba, cestu iaxi tyeseba warâ. Kayanlâ kianlokuândyly âtâ oday, idânârâ nhesagon-hoem. 22Idânârâ unâry mâuntuba mitomoemba xirâ auguely. Koendâ kehoem mâuntuhomoem auguely. Idânârâ soentaymby modo âjiepanâgueowâze; idânârâ koendâ tydasenrybyry modo âjidahoze, keze mawânrâ xirâ auguely. 23Xirâ unâ koendâ mâuntudyze âmaemo watay, koendâne angahumo odaji ietaungâ. 24Idânârâ auguehobyry koendâ idataungâ. Mâindatomobyry ara lelâ amidylymo-ro watay, ago kuru mâuntuhomoem inomedâdonzemo lelâ urâ. 25Imâem ywâgâ mâuntudyze âmaemo watay, imâem ise mâuntulymo. Ywâgâ mâuntudyzeba âmaemo watay olâ, âdiempa ywâgâ mâuntuybymo enanânehonze âmaemo. Utuba ise âmaemo warâ — kely Jesus.
Deuslâ Jesus einwânni modo imâem nhutuhomoem aieni
26Aituo Jesus agueondyly. Unâ nhegatuondyly enomedâzemo:
— Deus kywymâryem kuru idyly wâgâ ise auguely. Tâlâ myani uguondo nady ewy tamuinze etâni. 27Nady ewy tientâbygueduo myani eagonro âwanu anhekyly. Peto oday âsewanily, kopae xykyly. Eagonro ewanu anhetay, nady ewy iazely, ago itaynly. Deuslâ mârâ ago ieni, uguondo keba. 28Onro iwâkuru watay, ewy samuimby tyazeze, ago tâise, tâwiseze, tahuaze warâ. 29Trigu sahuaduo, sodo nhatâwâdyly, ekaunâdo odaji itybyem awylygue — kely Jesus.
{Deus itaumbyry lelâ kieinwânkyly watay, ize ato ara aise lelâ kurâ. Awyara lâpylâ ise ohondybyem lelâ kydawyly kâense Jesus âewyly-ro watay.}
Jesus mostarda ewy wâgâ aguehobyry
(Mt 13.31-32; Lc 13.18-19)
30Tienomedâdondomoem Jesus âkelo unâ nhegatuondyly myani eyanmo. Aguely:
— Unâ segatuji wao âdara Deus kywymâryem lelâlâ idyly awyly mâuntuhomoem. 31Tutuzelâ âmaemo, idânârâ nady ewy modo takaze kehoem mostarda ewy imeimbyryem awyly. 32Tâtâduo olâ tyazeze, kaynâ kehoem ago tâise, eagonro modo etâdaymby modo takaze kehoem ago tâise; imâsedo modoem kehoem tywatazeze warâ. Awylygue tawâguneim modo iwatary wâgâ tâty anhetoem nhuduly — kely Jesus.
{“Myara lâpylâ saguhoem kuru aguipa kurâdo kulâ Deus tywymâryem awyly einwânni modo. Ilâpygueduo olâ agui idylymo” keze Jesus aguely.}
Jesus unâgue lelâ tienomedâdaymo aguehobyry
(Mt 13.34-35)
33Jesus Deus wâgâ kurâdo nhenomedâdyly, unâ nhegatuly warâ. Nhutuhomo aralâ olâ mykâinane nhenomedâdylymo. 34Kurâdo nhenomedâdyly watay, âdylâ wâgâ mykâinane unâ nhegatuly. Tynynonro modo koendâ tonomedâze olâ mykâinane âdara keze mârâ unâ aguely awyly wâgâ.
Jesus sapezenru ton-honreim, kopâ tyelugueim agonro nhepagunâdobyry
(Mt 8.23-27; Lc 8.22-25)
35Ilâ iguandyly ume Jesus tynynonro modoram aguely:
— Paru kuyam kydâzekuâne — kely.
36Aituo kurâ domodoram âsedaengulymo. Pepi odaji âxiedylymo, tâzekuâdomoem Jesus agâ. Kurâ domodo idâwânmo lâpylâ eagonro pepi modo oday. 37Âzekuâdylymo ume myani kopâ sapezenru ton-honreim kopâ agonro adaguly. Toenzepa kehoem myani paru adahugânily, xytyânimobelâ kehoem. 38Mârâ aitay myani Jesus pepi ihudâ xykyly tyangahu awo wâgâ. Aituo tytylymo tiuntuduo, eynynonro modo nhuagueândyly. Adaenkelymo:
— Pymâ, âwaguegâ! Aukâ! Kyiguely ise xirâ! Kytyly awyly mâempyraka âmâ? — kelymo.
39Aituo saudyly. Ton-honre kehoem aguely:
— Arâ kehoem tadapezeinzeba ikâ! — kely sapezenruram.
— Tahugâneba ikâ! Ipagugâ! — kely paru sahugânuram warâ.
Agueduo tapezenremba idyly, paru tahugâneba idyly warâ. 40Aituo myani aguely tynynonro modoram:
— Tâseanezeba itaungâ. Imakezemo, ton-honre wawyly mâinwâmpyra lelâ waunlo ara lâgâlâma âmaemo — kely.
41Toenzepa myani âseanedylymo, aguelymo:
— Etaungâ! Sapezenru nadapezeimba itoem adyese. Paru tahugâneba itoem adyese warâ. Ânguy kuruka awâkâ eon-honru xudunri, awârâ modo anhetoem? — kelymo.
Currently Selected:
Marcos 4: bkq
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
