Sealm 83
83
Sealm 82
1Hwylc is þe gelic, ece Drihten?
Ne swiga ðu, ne þe sylfne bewere.
2For þon þine feond fæcne forwurdan,
þa ðe fæste ær feodan, Drihten,
and heora heafod wið þe hofan swiðe.
3Hi on ðinum folce him facen geswipere
syredan and feredan, and to swice hogedon,
and ehtunga ealle hæfdon,
hu hi þine halgan her yfeladan.
4Cwædan cuðlice: “wutun cuman ealle
and hi towyrpan geond werþeoda,
þæt ne sy gemyndig manna ænig,
hu Israhela naman ænig nemne.”
5For þon hi an geþeaht ealle ymbsætan,
and gewitnesse wið þe wise gesettan.
6Selegesceotu synd onsægd in Idumea
and Ismæhelita, eac synt Moabes,
7Ammon and Ammalech, Agareni,
swylce Gebal and grame manige
fremde þeoda mid eardiendum folce on Tyrum.
8Cwom samod mid ðam swylce Assur;
ealle on wegum æghwær syndon
on leodstefnum Loðes bearnum.
9Do him nu swa ðu dydest dagum Madiane
and Sisare, swylce Iabin;
10ealle þa namon Ændor wylle
and Cisone clæne hlimme;
wurdan þa earme eorþan to meohxe.
11Sete heora ealdormenn swa ðu Oreb dydest,
Zeb and Zebee and Salmanaa,
and heora ealdrum eallum swylce;
12ealle þa on an ær gecwædon,
þæt hi halignesse godes her gesettan.
13Sete hi nu, min god, samod anlice
swa se wægnes hweol oþþe windes healm,
14and swa færincga fyr wudu byrneð,
oððe swa lig freteð lungre morhæð,
15Swa þu hi on yrre ehtest and drefest,
þæt hi on hrernesse hraþe forweorðað.
16Gedo þæt hiora ansyn awa sceamige,
þonne hi naman þinne neode seceað.
17Ealle beoð georette, eac gescende,
and on weoruldlife weorþað gedrefde,
18þonne hi naman þinne neode seceað.
Þu ana eart ofer ealle heah
eorðbuende, ece Drihten.
Currently Selected:
Sealm 83: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.