YA-SFADOCI JRNE 10
10
1Tapilo, tapilo, gi talapwv nelv, Inv mvtv mi sqrta waci becfrtv ini u wvghowa-nwv nihki magefvki, wakv pvivgilv Irqv udrfiwa, yonv grgimotakv inv macimi jekuniwahfi. 2Wakv inv ini sqrta waci becfrtv gahcitvwvhrtv nihi magefhi inv. 3Nileni inv gahcitvwvhdotv ini sqrta u tvwanvmvwrli; macimi nihki magefvki u notvmvwrwrli u ta sihsimowa-nilici : chena inv u nahvlwrkv magefhi yasifulici u tasi wihkumvhi nihi, macimi u luhfa-walvhi. 4Ia hinv mahci frgici-walrci jrivhki u nhvlwrfe-wanhi, nihi yalvhfvmelici hawv, macimi nihki magefvki u nakvlr-wrli nili : xvga u wrkudrnrwv nihki u ta sihsimowa-nilici. 5Chena kutvgisi-goqa-nafvli mvtv wah nakvlrwrli nihki, wakv nili wa huci usimoki : xvga mvtv nihki u wrkudrnrwv ini u ta sihsimowa-nilici kutvgisi-goqa-nafhi. 6Yomv pamrtuwawa u kvlolvhi Jesise : pvyaqv nihki mvtv u nanuhdrnrwv ini si wiahi ga-kvlolrci.
7Jesise waciganvhi u talvhi nuhgi, Tapilo, tapilo, gi talapwv nelv, neiv ini u sqrdamwv nihki magefvki. 8Jrivhki yalvhfvmeiv ba-bircki grgimotagiki chena jekuniwahfeki : pvyaqv nihki mage-fvki mvtv u notvwrwvhi nihi. 9Neiv ini sqrta; qahqi wiyafv ilani nelv uci becfrta, wah wrpvnashofu inv, chena wah becfa macimi luhfa, macimi wa mkv wvhtvhpvh wihfanici. 10Inv grgimotakv mvtv biawv, wakv wvhsi manvwvhi gimotagi, macimi nsiwaci, macimi mvciludwrgaci : ni bir wvhsi manvwvhi nihki bonvmuwrci lanvwawewa, macimi manvwvhi mrli bonvmuwrci ini. 11Neiv inv uwasi gahcitvwvhrtv magefhi : inv uwasi gahcitvwvhrtv u sagifatvwvhi u ta lanvwawewa nihi magefhi. 12Hinv ya-lolatv, macimi mvtv gahcitvwvhrtv, mvtv nihi magefhi nhvlwrfewani, u ta Irpvmrli nili mwhawvli biali, chena u nvkvlvhi nihi magefhi, macimi usimu, macimi inv mwhawv u mvmpwvhi nihi, chena u Ifwalkvwvhi nihi : 13husimu inv xvga ya-lolatv, macimi mvtv u mvkufalamvhi nihi magefhi. 14Neiv inv uwasi gahcitvwvhrtv magefhi; chena ni wrkumrki ni nhvlwrfewanvki, macimi ni nhvl-wrfewanvki ni wrkumagoki, 15datapilvhi yasi inv Ufimv wrkumici, macimi ni wrkumv inv Ufimv; chena ni sagifatvwrki ni ta lanvwawewa nihki magefvki. 16Chena kutvkvki magefvki ni bonrki, mvtv yomv waciwicki : qelvhi nahfrpi nihki nah bialrki, macimi nihki wah nodrnrwv ni ta sihsimowa; chena wah nakude-feki, nakuti gahcitvwvhrtv. 17Waciganvhi inv Ufimv svpkvhi nit vhqalamaqv, xvga ni sagifatu ni ta lanvwawewa, wvhsi manv-wv’ hini mvmaiv nuhgi. 18Mvtv wiyafv ni mvmrqv ini, wakv pasiqi neiv ini ni sagifatu. Ni bonv wrsikvgi wvhsi sagifadoiv ini, macimi ni bonv wrsikvgi wvhsi mvmaiv ini nuhgi. Yomv tapigamowa n’ Uhfv n’ utvtanv.
19Nitvsi nuhgi pvfaqeiv pvhfahgrwa alagenv nihki Josvki xvga yolumv kvlvwewanv uci. 20Chena maci nihki, U bonrli inv wvninahfeli, macimi wapafi; gociwa ki notvwrwv gelvwv? iwvki. 21Kutvkvki, Mvtv yolumv nili u tayowanv wiyafv ba-bonvhfomakutv wvninahfeli. Hv wih kvtvwi wvninahfi tv-wanvmvwrli nili u sgesaku inv ga-kvgabeqatv? iwvki.
22Chena qanv ini vhdawi ini ufabrci-lvwewa si wihfanci-gawa Culosalame tvsi : 23pabonwi ini; chena Jesise brmfa ini mvmrtumawi-kvmikugi Svlvmvne ut vwikvnafowigr-nagi. 24Nihki Josvki waciganvhi biaki gryrukv nili, macimi, Drniwa Irqvsi gelv git kvwrci foginipa? Qahqi geiv-wivna inv Klvisde, tapinvlaqi wetvmvwinrga, u talrwrli. 25Ud rpvftvwvhi Jesise, Gi wetvmolapwv, macimi mvtv ki dapwahsapwv gelvwv : nili pakvtafewanv yr-silvweiv u wefowa-nagi n’ Uhfv, nileni ba-pvh nemrkuiv dabwawa. 26Pvyaqv mvtv ki dapwahsapwv, xvga mvtv ni magefamvki k’ uciwipwv gelvwv. 27Ni magefamvki u nodrnrwv ni ta sihsimowa, chena ni wrkumrki, macimi ni nakvla-goki nihki : 28chena ni melrki goqa-lrqvsi lanvwawewa; chena mvtv-lrqvsi iv iqinvmoki, macimi mvtv wiyafv wah ni lacigi uci qvqvtanvhi nihi. 29N’ Uhfv, mviahci melitv nihi, vlikv msi-ilafi notv jrivhki; macimi mvtv wiyafv kvtvwi-ilafi wvhsi inv Ufimv u lacigi uci qvqvtanrci nihi. 30Neiv chena inv Ufimv ni nakudwepa. 31Nihki Josvki u mvmrwvhi sekunhi nuhgi wvhsi seku nwhrwrci nili. 32Ud rpvtvwvhi Jesise, Maci uwasi pakvtafewanv gi mahci inv Ufimv uci wrpvtalalapwv; drniwa nala pakvtafewanv k’ uci sekunwhipwv, u talvhi. 33Ud rpvtvwr-wrli nihki Josvki, Uwasi pakvtafewa mvtv k’ uci sekunhulapa, wakv pvhdrmowa uci; macimi yasi xvga gelv, kvtasgi ilani, Mvna-tu sdoivni geiv, u talrwrli. 34Ud rpvftvwvhi Jesise, Hv mvtv ki kutaladewanwrgi, Nelv ni taiu, Mvnadoki gelvwv si mahtvwigrta?
35Qahqi inv mvnadoki sinrta nihi, wa-utfakulici ini u kvlvwewa Mvnatu (macimi ini tapilo awigrdagi mvtv iv kvtvwi puskunota), 36hv Gi pvhdrmu gelv, ki talrwv inv nili inv Ufimv ya-yrphrci macimi ini yalakuqvh-kvmigigi ya-wrwenaskvwrci; hv xvga, Neiv inv u Qihfvli Mvnatu, ni taiu? 37Qahqi nelv silvweiv mvtv nili u pakvtafewanv n’ Uhfv, tagi dapwahtvwiku. 38Wakv qahqi nili silvweiv nelv, waghi mvtv nelv ki dapwahtvwipwv, dapwahtvmu-ku nili pakvtafewanv : wvhsi gelvwv manvwvhi wrkutvmaqa macimi nanuhtvmaqa yasi inv Ufimv vpici neyrgi, macimi u weyrgi inv Ufimv nelv. 39Nihki nuhgi nvtunahigaki wvhsi nfrwrci nili : macimi nili wapfali u susqvtanrwrli.
40Chena inv wapfa nuhgi vlikv ini Jrtane tvsi tv hvpici Jrne tv hina nhihtv fvfvhqi-ulalhiwagi; macimi ntvsi vpiwv. 41Chena maci u bialudrkuhi inv; chena nihki, Jrne svpkvhi mvtv gigino-lowa silvwi : pvyaqv jrivhki wiahi goqa-nahi-grci Jrne yalrcimrci yolumv ilaneli dabwawanwi, iwvki. 42Chena maci ntvsi u dap-wahtvwrwrli nili.
Currently Selected:
YA-SFADOCI JRNE 10: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
