YA-SFADOCI JRNE 6

1Hvhkuwihi ina yolumv wiahi Jesise wapfa ini grmagi ini Galalewi msi-napi hawv, Drpilivsewi msi-napi ini. 2Chena maci mahsalagiki u nakvlr-wrli nili, xvga nihki u talrpvdrnrwv nili giginolowanv ya-ipanvlrci inv nihi ya-qilugalici. 3Chena ini maqvhgigi si kuqicsinwv Jesise, macimi ntvsi lamvtvpi weci u kvgahgimrfhi. 4Huwa ini pamfrsiwawa, ini u wihfancigawa-nwv nihki Josvki, uwa nvhekv biaiv. 5Waciganvhi Jesise mr-lrpi u sgesaku, macimi naga yasi maci mahsalalici utfakuci, Drniwa ga huci tapanrpa tvkuwhv, wvhsi iuhkumv manvwvhi meciwrci? u talrli Filvbeli. 6Macimi wacitv yomv u talrli wvhsi kucihkvwrci : xvga welv u wrkutv wvh si lvweci. 7Ud rpvftv-wrli Filvbe, Nesana tabawa salani ya-lalamakugi tvkuwhv mvtv ivh dapvtwi nihki wvhsi jrgi nakuti manvwvhi mvmagi mrlacihi, isiwa. 8Nakuti u kvgahgimrfhi, Antlo, Svimvn’ Betv u janinrli, u talrli nili, 9Hutvsi vpiwv mvyrni-lanefv, ba-bonvkv nyrlvnwi brlawi-kvwvsqi wapsqadawvli, macimi neswi nvmafhi : pvyaqv nahiwa yolumv alageni yone si maci? 10Lamvtvp-hahku nihki lanvwaki, isiwa Jesise. Huwa mskutahqvlwihgi ulrmi ini tvsi. Waciganvhi nihki ilaneki svhgigi si lamvtvbeki, ya-tfwiwrci nvwitu nyrlvna-matvhfana-tabawa. 11Waciganvhi Jesise u tah mvmanv nili wapsqadawvli; macimi yasi mahci meliwaci niyrwa, u lalskunv-mvwvhi nihi la-mvtvpilici svhgigi; ini ivskv nahfrpi nihi nvmafhi laghi ya-lalatvmuwrci nihki. 12Chena ina nihki iah dabholuwrci, Mrwvtunv-muku nili baxkvhki sa-sqvdodaki, wvhsi mvtv wiahi wvndodagi, u talvhi u kvgahgimrfhi. 13Waciganvhi nihki u mrwvtunrnrwv nili, macimi uqihfadonrwv matvhfwi-gita-neswi sosoniwvli baxkvhki uci nili nyrlvnwi kvwvsqi wapsqadawvli, mvialici sqvtvmalici nihi mviahci wihfanilici. 14Iah namuwrci nihki lanvwaki waciganvhi ini giginolowa yasi lvweci inv, Dabwawa yrmv inv mrmosigesqatv ini ya-lakuqvh-kvmigigi babirtv, iwvki nihki.

15Waciganvhi Jesise bami mosi tahaci yasi nvwitu nihki birwrci macimi mvmelowi mvmrwrci, wvhsi ugimru-hrwrci nili, nuhgi ini maqvhgigi si srwa nrnsihkv welv.

16Chena iah biayrgi walrqefigi, u kvgahgimrfhi ini msi-napigi si brlvcsinuhi; 17chena nihki ulvga-lagi Ikvmoki, macimi Gabrnivmegi grmagi ini msi-napi wesv haki. Chena uwa ini papagicv, macimi Jesise mvtv gawvgi u ma’ hutfvhi nihi. 18Chena ini msi-napi bami sqikvmigi ia msrgi mahsigikvgi uci bodrcigaiv. 19Ina nihki waciganvhi nvwitu neswi-gita-pvhfi walr tuga nfwi-gita-nfwah-fapvti mvili iah si mahci jomawrci, u talrpvmrwrli Jesiseli pamfali usgici ini msi-napi, macimi bami mrlrqvhi birlici ini ulvgasi : chena grwilvwaki nihki. 20Pvyaqv inv, Nelv, tagi grwilvwaku, u talvhi nihi. 21Nihki waciganvhi u manwi ini ulvgalagi si utvhpanr-wrli nili : macimi walanv ini ulvgasi nvhekv ini vsisgi ya-hrwrci nihki.

22Ini wvyrpvgi nihki mahsalagiki na-nepvwicki ini vsuwa grmagi ini msi-napi u namanrwv yasi bur vhdagi kutvgi ulvgasi ntvsi, waciwaphi nakuti, macimi yasi bur Jesise weci u kvgah-gimrfhi ini ulagalagi Ikvgi, yasi wakv u kvgahgimrfhi wapfalici nrnsihkv 23(wakv ntvsi biaiv ulvgalvli Drpilivse uci mrlrqvhi ini tvsi tvh nihki meciwrci ini tvkuwhv yasi inv Dabalamiwatv mahci meliwaci niyrwa) : 24ina waciganvhi nihki mahsalagiki iah namuwrci yasi bur Jesiseli ntvsi vpilici, mvtv nuhgi u kvgahgimrfhi, welvwv nihki nili Ikvmoki ulvgalvli, macimi Gabrnivme si biaki, u nvtunawhrwrli Jesiseli. 25Chena iah mkvwrwrci ini vsuwa grmagi ini msi-napi, Labrye, drniwa Irqv gi bir utvsi? u talrwrli. 26Ud rpvftvwvhi Jesise macimi, Tapilo, tapilo, gi talapwv nelv, Ki nvtunawhipwv, mvtv ya-namayaqa xvga giginolowanv uci, wakv xvga ki mecinrwv nili wapsqadawvli macimi ki dabholupwv. 27Tagi pakvtafihtvmuku ini wihfanewa ya-ivsagi, ini wakv wihfanewa ya-vhdagi goqa-lrqvsi lanvwa-wewa-nagi si, ini inv u Qihfvli ilani wvh melalwrqa : xvga nileni inv Ufimv, datapilvhi Mvnatu, u mahci pashvlwamrli, isiwa. 28Nahiwa qelvhi nah si Ivwepa, wvhsi manvwvhi pakvtafiyrga nili u pakvtafewanv Mvnatu? u talrwrli waciganvhi nihki. 29Hrpvfsa Jesise macimi, Vlv-yomv ini u pakvtafewa Mvnatu, wvhsi gelvwv dapwahtv-mvwaqa nili mviahci inv wrwenaskvwrci, u talvhi. 30Waciganvhi nihki, Nahiwa uwa gah si Ivwi gelv giginolowa, wvhsi manvwvhi nelvwa namayrga, macimi dapwahdolrga? nahiwa gelv gi pakvtanv? 31K’ uhfanrki u mecinrwv ini manv ini belasgi; Inv wafapvh-kvmigigi uci melvhi tvkuwhv wvh mecilici, ya-lvwigagi ini, u talrwrli. 32Waciganvhi Jesise, Tapilo, tapilo, gi talapwv nelv, Mvtv inv Mosise wafapvh-kvmigigi waci melalwrqa ini tvkuwhv; wakv n’ Uhfv g’ uci wafapvh-kvmigigi melakuwv ini mvyrwi tvkuwhv. 33Xvga ini u tvkuwhrnami Mvnatu svhgigi ini yasi biayrgi wafapvh-kvmigigi uci luhfaiv, macimi ini ya-lakuqvh-kvmigigi si meliwaiv lanvwawewa, u talvhi. 34Nihki waciganvhi, Dabalamiwatv, melinrga yomv goqa-lrqvsi tvkuwhv, u talrwrli. 35Neiv ini lanvwawewa si tvkuwhv : inv ba-bialutvwitv mvtv wa sqrlvwa, macimi inv da-dapwahsatv neiv mvtv Irqvsi wah kvhkvlrmu, u talvhi Jesise. 36Pvyaqv gi talapwv nelv, yasi gelvwv mahci nawiyaqa, macimi mvtv gawvgi ki dapwahsapwv. 37Jrivhki nihi ma-melici inv Ufimv na hutfagoki; macimi inv ba-bialutvwitv mvtv nah wiahisi luhfapvgilv. 38Xvga nelv wafapvh-kvmigigi ni uci svhgigi bir, mvtv wvhsi nelv yasi tahaiv si lvweiv, ini u tasi tahawa wakv inv wa-wrwenaskvwitv. 39Chena vlv-yomv ini u tasi tahawa inv wa-wrwenaskvwitv, wvhsi jrivhki ini inv mviahci melici uci tagi wvndoiv wiahi, wakv wi hunsgrnvmv ini ina tvh jaiahqi gesagigi. 40Xvga yomv ini u tasi tahawa n’Uhfv, wvhsi jrgi wiyafv ya-lrpvmrtv nili Uqihfimrli, macimi dapwahsa nili, wih bonvgi goqa-lrqvsi lanvwawewa; macimi nelv na hunsgrnv inv tv hini jaiahqi gesagigi.

41Nihki Josvki waciganvhi nili uci patfvkuwaki, xvga inv, Neiv ini tvkuwhv svhgigi yasi biayrgi wafapvh-kvmigigi uci luhfaiv, iwv. 42Chena, Hv mvtv Jesise yrmv, u qihfvli Jose, ufvli macimi u gali ki wrkumrpa? nahiwa si inugi, Wafapvh-kvmigigi n’ uci svhgigi si luhfv, iwv? hiwvki nihki. 43Jesise rpvfsa macimi, Tagi patfvkuwaku alagenv gelvwv, u talvhi. 44Mvtv ilani ni tvh kvtvwi bialudrqv, waciwaphi nili Ufimrli wa-wrwenaskvwilici biatanakuta : chena na hunsgrnv inv tv hini jaiahqi gesagigi. 45Chena nihki wah jrivhki kvgahgimakuwrli Mvnadoli, Ivwigapi ini lr mrmosigesqacki. Jrgi wiyafv mviahci nili Ufimrli uci nodrgatv, macimi mahci wrkutafi, ni bialudrqv. 46Mvtviu wiyasi ilani u mah’ nawrli nili Ufimrli, waciwaphi inv Mvnadoli waciwitv, henv u mahci nawrli nili Ufimrli. 47Tapilo, tapilo, gi talapwv nelv, Inv da-dapwahsatv u bonv goqa-lrqvsi lanvwawewa. 48Neiv ini lanvwawewa si tvkuwhv. 49K’uhfanrki u mecinrwv ini manv ini belasgi, macimi nihki naboki.

50Vlv-yomv ini tvkuwhv ba-biayrgi svhgigi wafapvh-kvmigigi uci luhfaiv, wvhsi manvwv’ hilani ini mecici, macimi bur napagi.

51Neiv ini la-lanvwaweyrgi tvkuwhv ba-biayrgi svhgigi wafapvh-kvmigigi uci luhfaiv : qahqi wiyasi ilani mecita yomv tvkuwhv, wah lanvwawi goqa-lrqvsi : hvnkv macimi ini tvkuwhv wvh meliwaiv nelv ni wivufami ini, wvhsi u ta lanvwawici inv ya-lakuqvh-kvmigigi, u talvhi.

52Nihki Josvki waciganvhi mvwinvh-grladeki, Nahiwa gah si kvtvwi melakunv yrmv ilani u wivufami wvhsi mecivqa? iwvki. 53Waciganvhi Jesise, Tapilo, tapilo, gi talapwv nelv, Waciwaphi meciyaka ini u wivufami inv u Qihfvli ilani macimi manayaqa u mskumi, mvtv ki bonrnrwv lanvwawewa geyrwrgi, u talvhi. 54Hinv ma-mecitv ni wivufami macimi ma-nakv ni mskumi u bonv goqa-lrqvsi lanvwawewa; macimi inv na hunsgrnv tv hini jaiahqi gesagigi. 55Xvga ni wivufami wihfanewa svpkvhi, macimi ni mskumi manowa svpkvhi. 56Hinv ma-mecitv ni wivufami macimi ma-nakv ni mskumi vpiwv neyrgi, macimi nelv weyrgi. 57Yasi inv Ufimv la-nvwawitv wr wenaskv wici, macimi lanvwa-wi v xvga inv Ufimv uci; yone ivskv inv ya-mwitv, nahfrpi inv wah lanvwawi xvga neiv uci. 58Hene yomv tvkuwhv ba-biayrgi svhgigi wafapvh-kvmigigi uci luhfaiv : mvtv yasi nihki ufimrki meciwrci, macimi napuwrci; inv ma-mecitv yomv tvkuwhv wah lanvwawi goqa-lrqvsi. 59Betiga ini msi-kvmiqi iwv yolumv wiahi, yasi kvgahgimiwaci Gabrnivmegi.

60Maci waciganvhi u kvgahgimrfhi, ina nihki iah notvmu-wrci yomv, Gesanrtuwawa yomv; nafvwa wah kvtvwi notv ini? iwvki. 61Pvyaqv bami wrkutvgi Jesise weyrgi yasi u kvgahgimrfhi pagihgrtv-malici yomv, Hv xvga yomv git panvlakunrwv wvhsi utvgikvhsina-yaqa? u talvhi. 62Nahiwa uwa qahqi gelvwv ki hilrpvmrwv inv u Qihfvli ilani pami spamagi hrta tv hvpici iahgi? 63Hucvjrlvhqv inv mrmeliwatv lanvwawewa; ini wivuf i utafihiwaiv mvtv-wiahi : nili kv-lvwewanv mviahci kvlolalvku ucvjrlvhkuweiv, macimi lanvwawe-wanu. 64Pvyaqv vbeki ntvsi nrlatv gelvwv ba-bur dapwahsacki, u talvhi. Xvga Jesise u wrkumvhi ina wasgi uci siwiyafhi nihi ba-bur dapwahsalici, macimi siwiyafvli wvh masdruhakuci. 65Macimi iwv, Xvga yomv uci g’uci mahci ilalapwv, wvhsi ilani mvtv kvtvwi bialutvwici, wacip’ hini melata nili Ufimrli uci.

66Yona uwa yomv maci u kvgahgimrfhi gewahi, macimi mvtv gidani u wedfamakuhi. 67Waciganvhi Jesise, Hv nahfrpi gelvwv gah wapfapwv? u talvhi nihi matvhfwi-gita-neswi. 68Svimvn’ Betv ud rpvftvwrli, Dabalamiwatv, drnvwa inv na hrpa? gelv gi bonrnv nili goqa-lrqvsi lanvwawewa si kvlvwewanv. 69Chena ni mahci dapwahsapa macimi ni wrkudrpa yasi gelr-wivni inv Wafapafitv Nakuti Mvnatu uci, u talrli. 70Ud rpvftvwvhi Jesise, Hv mvtv nelv gi mvmalapwv gelvwv nihki matvhfwi-gita-neswi, macimi nakuti gelvwv mvci-mvnadowi? u talvhi. 71Huwa Josvli ud rcimrli inv nili u qihfvli Svimvn’ Isgalade, xvga yonv inv wvh masdruhrtv nili, nakuti nihki matvhfwi-gita-neswi.

Currently Selected:

YA-SFADOCI JRNE 6: SJW

Highlight

Copy