YASFADOCI LOKU 16
16
1Chena nahfrpi u talvhi nihi kvgahgimrfhi, Nr-nakuti ’n’tvsi pvwawi ’lani, ba-bonrtv nosrfewanvli; chena nileni mvdr-cimuhdrqi yasi bami nili wvlaskhudr-kuci u wiahemv. 2Chena utvhpi-mrli nili, macimi, Nahiwa yomv yasi nodrgaiv gelv si? patakv-gitvnu ini gi nosrf ewa; xvga mvtv vlikv lrqvsi gitvh kvtwi nosrfewanv ilafi, u talrli. 3Chena inv nosrfewanv iwvpi lrmagi weiv, Nahiwa nah si lvwi, bami namaiv wvhsi dabalamitv mvmv-wici ini nosrf ewa? Mvtv ni bonv wesikvtuwewa wvhsi wrlgaiv; wvhsi kvtuwaiv ni taqafi. 4Ni mahci taha ini wvh silvweiv, ina ini nosrfewa uci luhfalgo-fuiv wvhsi manvwvhi nihki yadr-wrci wegiwrpvli si utvhpani-wrci. 5Macimi uta hutvhpimvhi mrsv nakuti dabalamakuci u mosinahikvnhi, Drniwa laghi gi mosina-whv dabalamitv? u talrli nili nhihtv. 6Macimi inv, Tabawa tapvci-kvnv pami, isiwa. Chena, Mvmalu gid awigrdami macimi lamvtvpilu wawatapi, chena nyrlvnwrpitvgi lvwigalu, utalrli nili.
7Huwa kutvkvli, Chena gelv drniwa laghi gi mosinahiga? u talrli. Macimi inv, Tabawa tapvcikvnv kvwvsqi, isiwa. Chena, Mvmalu gid awigrdami, macimi nyawi-neswrpitvgi lvwigalu, u talrl nili.
8Chena dabalamakuci u wivwrci-magoli inv buryr tapvsvwelafitv nosrfewanv xvga inv mahci laburwi lvwi : nihi xvga u qifhi yrmv yalakuqvh-kvmigigi vliwi laburwafihi nahvlwrkv u sqe-lanvwa-wewanwv si notv nihi u qifjii inv wvivhfayrgi. 9Chena gi talapwv nelv, Pasiqi geyrwrgi si wihgrnatih-gaku ini mvjelafewa uci pv-wawa vwaku; wvhsi, ina wah mvtv-yaciwafeiv ini, manvwvhi nihki betiga si utvhpanal-wrqv nili goqa-lrqvsi rjewi-kvmiku. 10Hinv ma-mvyrwelafitv tapilo mrlacihigi, mvyrwelafi nahfrpi ini maci-laghigi. 11Qahqi waciganvhi mvtv naiahkv ki mahci mvyr-welafi-pwv ini buryr tapvsvugi pvwawa-nagi, nafvwa gah tvl-wvhfakuwv nili mvyrwi pvwawanv? 12Chena qahqi mvtv naiah-kv ki mahci mvyrwelafipwv ini wa-welrmici kutvkv wiyafv, nafvwa gah melakuwv ini nahvlwrkv wa-welrmi-yaqa? 13Mvtv vlolrkv utvh kvtvwi mamagini lutvwvhi neswi mastalahi : xvga nr-nakuti wah segalamrli, macimi ut vhqalamrli nili kutvkvli; walrga wa hryetvta-nrli nakuti, macimi u muivlawala-mrli nili kutvkvli. Mvtv gitvh kvtvwi mamagini-lutvwrwv Mvnatu macimi pvwawa.
14Macimi nihki Palaseki, ivhqalatvgiki muni, nodrgaki jrivhki yolumv wiahi; chena u wrpvlrci-mrwrli nili. 15Macimi inv u talvhi nihi, Nihgeni gelvwv pasiqi da-pvsvudoci weyrwv ini ilaneki uta lrbewanwrgi; pvyaqv Mvnatu u wrkudrnv ki tahiwv : Xvga ini ma-mosbalamaqi-dodagi alagenv ilaneki lvsegrci-wafewa ini ini uta lrbewa-nagi Mvnatu. 16Hvhdawi ini kutaladewa macimi nihki mrmosigesqacki vbeki brluhi Jrne : ina Irqv uci nvnv-himiwapi ini uwasi-biadrcimowa yagi ini ugimrwi-drmkumi Mvn-atu, macimi jrgi ilani mvmelowi uttitv becfa ini. 17Pvyaqv ini vliwi wacihi manqvtwi macimi vsisgi-drmqa wvhsi vsagi, notv wvhsi ini kutaladewa uci nakuti vnhiwawi mrlacihi panfagi.
18Jrgi wiyafv ba-pgawhrtv wewvli, macimi kutvkvli u wewi-nrli, mvcilwi wrpvsiphigawa : chena inv wa-wewinrtv nakuti ba-pgahofulici wahsici uci, mvcilvwi wrpvsiphigawa.
19Huwa ’n’tvsi vpiwv nr-nakuti pvwawi ’lani, chena inv mkvdawi msqrwi betaniga macimi nrswi wrpi mvfrni-mutv, bami gisuwalamaqi wrwasiwi lanvwawici tfana wrpvgi : 20chena nr-nakuti gr-kvtuwatv Lasulase sinofu saximofoli u sqrdamagi, uqrwafeli umagewanv, 21macimi bami skvtv si tahalici wvhsi vhsvmofulici nili baxginodaki inv pvwawi ’lani yrtvh wihfanici waci panfaki; hvnkv, muhci nihki wihseki biaki macimi u nuh-qrtvmvwr-wrli umagewa-nilici. 22Chena ini biamikvtwi, yasi inv grkvtuwatv napagi, macimi yasi u tvkunyawa-nagi Aplahame si walakuci inv nihi ancvlihi : macimi nahfrpi inv pvwawi ’lani napwv, chena lakunofu. 23Macimi vhqinvmowa-nagi via pvsgrpi, bami nvmuci vnhiwa-wvtgrwanv, macimi paluwihi utah nawrli Aplahameli, chena Lasulaseli inv u tvkunyawa-nagi. 24Macimi ntvlvhotvmwv, Ufimv Aplahame, bonv-mvwilu gitaminr-qa-ladewa, macimi wrweni Lasulase wvhsi manvwv’ hinv napigi si goginrci ini vnvhqi u lajali, macimi tigihfatvwici nelvni; xvga bami vhqinvmuiv nelv beci yomv pahkvlagi, iwvpi. 25Pvyaqv iwv Aplahame, Uqihfimv, mkvwala-tvnu yasi gelv utfakuivni g’ uwasi wiahemv, macimi nahf rpi Lasulase mvci wiahi : pvyaqv uwa inv utvsi uwasi-lapwvhofu, macimi gelv bami vhqinvmuivni. 26Che-na goluci jrivhki yomv, ’n’tvsi vhdawi lvlvqi nelvwa chena gelvwv msrwi goqa lrqvsi pamrlvqi, wvhsi nihki wvh gelvwv si yoci uci pamfacki manvwv’ hrlwi ilafi-wrci, macimi wvhsi mvtv wiyafv manvwv’ heni-uci nelvwa si grmagi hrci, u talrli. 27Macimi inv, Gi mvmrtumala waciganvhi, ufimv, wvhsi n’ uhfv yadrci wegiwv si wrwenvci inv; 28xvga ni bonrki nyrlvnwi ujaninrki; wvhsi manvwv’ hinv tabrcimuhtv-wrci nihi, belapa nihki nahfrpi yomv vnhiwa-wvtgrwa-nagi tvsi wih si biaki, isiwa. 29Pvyaqv Aplahame, U bonr-wvhi nihki Mosiseli chena nihi mrmosigesqa-lici; welrni nihki pafatvwr-wrta nihi, iwv. 30Chena inv, Mvtv, ufimv Aplahame : wakv qahqi nakuti nihi hrta nili napalici uci, mvtveni wah si tahaki nihki, iwv. 31Chena, Qahqi nihki bur pafatvwr-wrta Mosiseli chena nihi mrmosigesqalici, mvtv nuhgi nihki ivh kvtvwihgo-foki, qahqi nakuti nili napalici uci unsgrlita, u talrli nili.
Currently Selected:
YASFADOCI LOKU 16: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
