YASFADOCI LOKU 18

1Chena u kvlolvhi pamrtuwawa ini wvyaci wvhsi grgikviu mvmrtumalici, macimi wvhsi tagi srqalamulici; 2Vpiwv ’n’tvsi u-dawa-nagi da-pvsvwvtaniwatv, buryr kufrtv Mvnadoli, macimi mvtv u mvkufalamrli ilaneli, iwvpi : 3Chena vpiwv ’n’tvsi sekvwi-iqa ini udawa-nagi; macmi mosvgi nili u wv utfagoli, Vlutvmv-wilu ni mvdaladewanv, u tvigoli. 4Macimi inv mvtv si taha mr-lrkvsi : pvyaqv mviuhqrci iwvpi lrmagi weiv, Waghi mvtv ni kufv Mvnatu, mvtv nuhgi ni mvkufalamv ilani; 5pvyaqv xvga ni pat-fvghaqv yrmv sekvwi-iqa, na hvlutvmvwv inv, belapa u mosv-tvwi birwa ni huci luhkvchaqv. 6Chena iwv inv Dabalamiwatv, Notvmuku ya-iuci inv buryr tapvsvwelafitv da-pvsvwvtaniwatv. 7Macimi Mvnatu hv mvtv wa hvlutvmv-wrli u mvmrwanvli, ma-mvwimakuci gesagi macimi tapahgi, macimi gawvgi inv bami vhqi bonalamrci nihi? 8Gi talapwv nelv, inv wah qvqi vlutvwvhi nihi. Pvyaqv, ina inv u Qihfvli ilani birta, hv wa mkv dapwah-sawa ini usgi-drmkugi?

9Chena yomv pamrtuwawa nahfrpi u kvlolvhi nihi nr-naku-ti ya-balatvgiki weyrwv yasi tapvsvwelfi-wrci nihki, macimi u mvtv wiyafagisi-hrwvhi jrivhki kutvkhi : 10Neswi ilaneki spamagi haki becfaki ini mvmrtumawi-kvmiqi wvhsi mvmrtuma-wrci; Palasi inv nakuti, chena daxewi-mrwvtunigahfi inv kutvkv. 11Nepvwi inv Palasi macimi mvmrtuma vlveni gilagi weiv, Mvnatu, niyrwa gelv, yasi bur ilafiv nelv brsi nihki mvisi ilaneki, sa-seqido-waficki, buryr tapvsvwaficki, wrpvsiphigahfeki, walr datapilvhi brsi yrmv daxewi-mrwvtunigahfi. 12N’ uciga nesana ini balaku manadowi-gesagigi; mvwi-matvhfwi laghi ni meliwa jrivhki ga-kvtvwihkvmv, iivvpi. 13Wakv inv daxewi-mrwvtun-igahfi, bami nepvwici paluwihi, mvtv muhci spamagi manqvtugi wih Irpici u sgesaku, pvyaqv u pgitahv u pvlacikv, Mvnatu, gitam-inrqi ilafilu nelv majelafitv, iwvpi. 14Gi talapwv nelv, Yrmv ilani wegiwv yadrci si brlvcsinwv tapvsvwi taha grjekv notv inv kutvkv : xvga jrgi wiyafv ma-mosbalamaqi-dotv weiv wah nvnv-hbrci-ludofu; wakv inv na-nvnvhbrci-lutvkv weiv wah mosba-lamaqi-hofu.

15Chena nihki bami biatvwr-wrci nahfrpi ut vpaluhfam-wvhi, wvhsi inv pahsanrci nihi : pvyaqv nihki kvgahgimrfvki iah namu-wrci ini u kutalr-wvhi nihi. 16Pvyaqv Jesise uta hutvhpi-mvhi nihi, Welrni nihki vpaluhfafvki bialutvwi-wrta, macimi tagi kutajahku : xvga nihgen welvwv ini ugimrwi-drmkumi Mvnatu. 17Tapilo gi talapwv nelv, goqanafvgrci mvtv brsi vpaluhfafv wah si utvhpanv ini ugimrwi-drmkumi Mvnatu, mvtv inv wah wiahisi becfa ’n’tvsi, iwvpi.

18Chena nr-nakuti dabalacigalici u nvtuhdrgoli, Uwasi Ga-gahgimiwa, nahiwa nah silvwi wvhsi lrpsinv goqa-lrqvsi lanvwa-wewa? iwvli. 19Macimi Jesise, Gociwa gelv uwasi gi tasini? mvtvlrqv uwasi, waciwaphi nakuti, Mvnatu inv. 20Gi wrkudrnv nili tapigamowanv, Tagi mvcilvwelu wrpvsiphigawa, Tagi nsi-walu, Tagi gimotalu, Tagi pvh-nemiwalu myrsi dabwawa, Hut-vgalami g’uhfv macimi gi giv, u talrli. 21Macimi, Naiahkv jrivhki yolumv wiahi nit vginvia ni mvyrni-lanewa-nagi uci, iwv inv. 22Macimi Jesise iah nodrgaci ini, Nakuti wiahi gawvgi gi notkufi : myagilu jrivhki ba-bonvmvni, macimi lalskunvmvwi inv gitamrfv, macimi gah bonv pvwrwa manqvtugi : chena birlu, nakvsilu, u talrli. 23Pvyaqv iah nodrgaci inv yolumv wiahi, uqr-wafi vnhiwawi mvci-labwrwa; xvga inv ulrmi pvwawv. 24Ma-cimi Jesise bam’ rpvmrci, Lvkuqa fvgrgi nihki ba-bonvgiki pvwr-wanv wah becfvdr-nrwv ini ugimrwi-drmkumi Mvnatu ! 25Xvga ini vlikv wacihi wvhsi gamvli becfrci srpwi u sgesaqi srpunikv, notv pvwawi ’lani wvhsi befvtvgi ini ugimrwi-drmkumi Mvnatu, iwvpi. 26Chena nihki na-nodrgacki ini, Nafvwa uwa wah kvtvwi wrpvnashofu? iwvki. 27Pvyaqv inv, Nili wiahi ma-tvyaciwafi-wrci ilaneki kvtvwvtwili Mvnatu, iwvpi. 28Chena Betv, Scih, naiahkv ni nvkvdrpa ni nhvlwrfewananv, macimi gi nakvlalapa, isiwa. 29Macimi u talvhi nihi, Tapilo gi talapwv nelv, Mvtv ilani vpiwv mviahci nvkvtvkv wegiwv, walr wewvli, walr ujan-inrnhi, walr gahgirmhi, walr vpalufhi, ini ugimrwi-drmkumi Mvnatu uci, 30wa hinv bur utfaku maci-tfwaginwi vliwi inugi yalrqawanigi, macimi goqalrqvsi lanvwawewa ini wvh biatvh-kvmigigi.

31Chena u mvmvhi nihi matvhfwi-gita-neswi, macimi, Wrpvtv-muku, Culosalamegi kita kuqicsinapa, macimi nili jrivh-ki wiahi yawigagi srpwi nihki mrmosigesqacki wah macfadrqi inv u Qihfvli ilani. 32Xvga inv nihi Nvnvhkvwi-lanihi wah si pvg-fanofu, chena wah wrpvlrchofu, macimi wah taqrci-panvlofu, che-na wah fefaqrlof u : 33chena wah lihfewvnwhr-wrli nihki macimi wa nfrwrli : chena ini mvwi-nfuku nvgiga inv wa hunskv nuhgi, u talvhi. 34Chena nihki mvtv nakuti u nanuhdr-nrwv yolumv wiahi; macimi yomv iyowa gigidrqeki nihki, chena mvtv u molaladr-nrwv nili wiahi ya-iugi.

35Chena ini biamikvtwi, yasi mrlrqvhi birci Calago, nr-na-kuti kvgabeqa ilani lamvtvpiwv ini pvkvckvnv bami kvtuwaci : 36macimi u pami notvwvhi mahsalalici pamfahi mrlrqvhi, nvtuhsa inv nahiwa uci yomv inwi. 37Macimi u wetvmvwr-wrli nihki yasi Nrsalafi-lani Jesise pamfaci mrlrqvhi. 38Macimi ntvlvhotvmwv inv, Jesise, gelv u qihfvli Dapide, bonvmvwilu gitaminrqa-ladewa, isiwa. 39Macimi nihki na-negrnecki u kutalr-wrli nili, wvhsi nolawilici : pvyaqv inv msi vlikv ini lvhotvmwv, Gelv u qihfvli Dapide, bonvmvwilu gitaminrqa-ladewa. 40Macimi nepvwi Jes-ise, chena tapigamu nili wvhsi biadofuci : chena iah mrlrqvhi birlici, 41u nvtuhtvwrli, Nahiwa gi talalatv nelv wvhsi lvwihd-olv? Macimi, Dabalamiwatv, wvhsi nelv manvwv’ hutfakuiv ni tapinvmowa, isiwa inv. 42Macimi Jesise, Hutfakulu gi tapinvm-owa; gi dapwahsawa gi mahci wrpvnas-haku, u talrli. 43Ma-cimi walanv inv utfaku u tapinvmowa, macimi u nakvlagoli, u wvhfrci-makufihrli Mvnadoli : macimi jrivhki nihki lanvwaki iah namuwrci ini, wivwrcimowa u melrwrli Mvnadoli.

Currently Selected:

YASFADOCI LOKU 18: SJW

Highlight

Copy