HINI UWASI-BIADRCIMOWA ya-sfadoci MAFIYO 7
7
1Tagi wiahi Ivhkuwrsiwaku, wvh si bur gelvwv wiahi Ivhkuwrfuyaqa. 2Xvga wiahi Ivhkuwrsiwawa waci wiahi Ivhkuwrsiwayaqa ga hutvh kuwrfupwv gelvwv : macimi ini tapvcikv dapvcigayaqa, ini gah tapvlagopwv gelvwv. 3Chena gociwa gi talrpvtv ini pafanowa gi janinv yavhdalici u sgesakugi, wakv mvtv gi mamaginalatv ini bamvkufagi nahvlwrkv gi sgesakugi yavhdagi? 4Walr nahiwa gah si ilv gi janinv, Cah gah luhfa pvgitvmola ini pafanowa gi sgesaqi uci; macimi scih, ini bamvkufagi vhdawi nahvlwrkv gi sgesakugi? 5Gelv naluhci-lvwiwahfi, nhihtv luhfa pvgitvnu ini bamvkufagi nahvlwrkv gi sgesakugi uci; hina chena gah tapinrqi nama gelv wvhsi luhfa pvgitvmvni ini pafanowa gi janinv u sgesaqi uci.
6Melahku tagi ini wafabirgi nihki wihseki, tagi nuhgi yalvhfvmewrci nihki kusgoki ipvgilahku ki megahfamwrki, belaba nihki u kvgalkvwrwvhi nihi Irmagi u fitwv, macimi kugeki chena ki lalkvmakuwrki gelvwv.
7Nvtutvmrgaku, macimi ini gah melagopwv; nvtunahigaku, macimi ga mkvhfupwv; tuwvthigaku, macimi ini gah tvwanvmr-gopwv : 8xvga jrgi wayafv na-tutvmrgatv utafi; macimi inv na-tunahigatv mkvhfu; chena inv da-tuwvthigatv wah tvwanvmrqi ini. 9Walr nafvwa ilani vpiwv ntvsi gelvwv, inv, qahqi u qihfvli wah nvtutvmrgoli wapsqadagi, hv sekunvli wah melrli nili; 10walr qahqi inv nvmahfvli wah nvtumrli, hv mvnadoli wah melrli nili? 11Qahqi waciganvhi, waghi ki mvjelafipwv, wrkutvmaqa wvhsi melaqa uwasi wiahi kit vpaluhfamwrki, drniwa si vlikv k’ Uhfwv wafapvh-kvmigigi yapitv wah si melvhi uwasi wiahi nihi na-nvtutvmrkuci? 12Jrivhki wiahi waciganvhi goqanahigrci skvtv nih silvwihdrku-nrki ilaneki yasi tahayaqa, datapilvhi yone silvwihtv-wahku nahfrpi gelvwv : xvga yomv ini kutaladewa chena nihki mrmosigesqacki.
13Uci becfrku gelvwv ini macqr-lvkvdofigi sqrta : xvga mfrlvkvtwi ini sqrta, macimi mfrbiaiv ini myawi, ya-sfagi iqinvmowanagi, chena maci nihki ntvsi waci becfrcki. 14Xvga mrcqrlvkvdofi ini sqrta, macimi wesaiv ini myawi, ya-sfagi lanvwawewa-nagi, chena lrkufwihi nihki ma-mkvgiki ini.
15Mvhgani m y r s i mrmosigesqacki, ba-bialudolwrqa magefiwi betanikv-nagi, pvyaqv pkvmawi mwhawvki Irmagi nihki. 16Hu mvwifowanwv ga huci gelvwv wrkumrwrki nihki. Hv ilaneki grwesahi utvtanrnrwv mfvlomi, walr gicimi hvhfvwigrnvskuhi? 17Datapilvhi yone jrgi uwasi mtaqi uci neginwi uwasi mvwifowa; wakv ini wvskvlgi mtaqi uci neginwi mvjrfi mvwifowa. 18Huwasi mtaqi uci rlwi neginwi majrfigi mvwifowa, mvtv nuhgi wvskvlgi mtaqi uci kvtvwi neginwi uwasi mvwifowa. 19Jrgi mtaqi buryr uci negigi uwasi mywifowa kvuhota, macimi ini skudagi ipvgidota. 20Waciganvhi u mvwi-fowanwv ga huci gelvwv wrkumrwrki nihki. 21Mvtv jrgi wiyafv, Dabalamiwatv, Dabalamiwatv, ya-sitv wah becfa ini wafapvh-kvmigigi ugimrwi-drmqa; hinv wakv yasi lvwetv ini u tasi tahawa n’ Uhfv yapitv wafapvh-kvmigigi. 22Maci, Dabalamiwatv, Dabalamiwatv, hv mvtv gi wefowa uci ni mosigesqr-cimupa, chena gi wefowa uci ni luhfa pvgilrpa wvninahfeki, macimi gi wefowa ni uci lvwepa maci mvgeci pakvtaf ewanv? na higoki ina grsagigi. 23Macimi ina uwa, Mvtv gi wrkumalapwv gelvmv : nelv uci srwaku, gelvwv ba-kvtanvgiki wvnrtafewa, nah si tabrci-muhdrwrki nihki.
24Jrgi wiyafv waciganvhi na-notvkv yolumv ni kvlvwewanv nelv, macimi u tasi lvwihdrnv nili, wah si tvqalamakufi laburwi ilani, mviacidotv yadrci wegiwv usgici nili sekunvli : 25chena ini gamuwrgi lrsiwah-fanwi, chena nili yrmikvmiki biaiv, chena nili mahsigikvki bodrcigaiv, macimi pgitahfanu ini wegiwr-pagi; macimi ini mvtv rgicifaiv : xvga ini usgici nili sekunvli Ivhgah-fanwi. 26Chena jrgi wiyafv na-notvkv yolumv ni kvlvwewanv nelv, macimi mvtv nili silvwi, wah si tvqalamakufi wvnihsvkv ilani, mviacidotv yadrci wegiwv usgici ini lakvwi : 27chena ini gamuwrgi lrsiwah-fanwi, chena nili yrmikvmigi biaiv, chena nili mahsigikvki bodrcigaiv, macimi pgitahfanu ini wegiwr-pagi; macimi rgicfaiv ini : macimi msrwi ini rgicfrwa ntvsi.
28Chena ini biamikvtwi, ina Jesise iah mahci lutvgi yolumv kvlvwewanv, nihki mahsalagiki u qvqahdrna - ladrnrwv u kvgahgimiwawa : 29xvga inv u tasi kvgahgimvhi nihi brsi nakuti bami bonvkv wiahsimakufewa, chena mvtv brsi ud awigamwvhi.
Currently Selected:
HINI UWASI-BIADRCIMOWA ya-sfadoci MAFIYO 7: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
