Lukas 10
10
Inutusan ni Jesus u Pitto a Pulo ay ti Duwwa a Disepulus
1Nadid, káttapos ni itod ay nángpile dámman u Panginoon ti pitto a pulo ay ti duwwa a disepulus. Sakay pinágdipalongo na hide ti tágdaduwwa a umangay tu balang banuwan sakay tu lugar a angayan na. 2Sakay kinagi na nide, “Makpal u gapasán, pero kulang u mággapas.” Kaya idasal moy tu makákkao a mángpaangay pa siya ti mággapas tu pággapasan na. 3Sigi kammoy dán! Paangayán takam a kumán a tupa tu bállog nu hayup hide a mágkatapang.
4Dyan kam magtawed ti pitaka, hembeg oni sinelas. Sakay dyan kamon magabala a mákpagkumustaan tu matagbu moy hide. 5Kássáddáp moy tu balang bilay a angayan moy ay kagiyán moy nide a, “Maghare nakwa u kapayapaan ti iye a bilay!” 6Ni masássohán ti kapayapaan u mámmágyan hod ay mágkahod hide ti kapayapaan. Pero ni awan hide masassohan ti kapayapaan ay awan mangyare u kinagi moy nide. 7Ni deya u bilay a nagpatulos nikam ay hod kam la hod. Dyan kamon paagton-agton ti bilay; kanán moy sakay inumán moy u ánya man a ihayin di nikam. Dipo u tarahabador ay te karapatan a mangtanggap tu hornal na. 8Ni tanggapán di kam tu essa a banuwan, kanán moy ni ánya man u ihayin di nikam. 9Pagpiyyaán moy u tehhod hide a saket hod sakay kagiyán moy nide, “Adene kamon a paghariyan nu Diyos.” 10Pero ni awan dikam tanggapan tu essa a banuwan ay lumuwas kam tu dilan sakay kagiyán moy, 11“Maske u alikabuk nu banuwan moy a pimmakkat tu tika-tikád me ay pagpagán me bilang babala nikam. Pero iye u pakaisipán moy, inatádden kamon ti pagkakataun a mapagharian nu Diyos! 12Kagiyán ko nikam: tu Aldew nu Pághatul ay mas madágge u parusa nu tolay hide ti banuwanan itona, nan tu dinanas nu taga-Sodoma hide!”
Babala tu Banuwan a Awan Magsise
(Mateo 11:20-24)
13Kakagbi kam a taga-Corazin hide! Kakagbi kam a taga-Betsaida hide! Dipo ni ti Tiro sakay ti Sidon nangyare u himala hide a inpeta ko nikam ay nalay dán nakwa hide a nagsulot ti kostal sakay nággetnod tu abu, para ipeta a nagsise hide. 14Tu Aldew nu Pághatul ay mas madágge u parusa moy nan tu parusa nu taga-Tiro sakay u taga-Sidon hide. 15Sakay hikam a taga-Capernaum hide, maare moy a ilangkaw u sadili moy hanggan ti langet pero itákneg kam hanggan ti impiyerno.
16Ni deya man u mangsaneg nikam ay hikán i sinaneg diyay sakay u awan mangtanggap nikam ay hikán i awan diyay tinanggap. U awan mangtanggap nikán ay awan di be tinanggap u nangutus nikán a umangay he.
Nagsole u Pitto a Pulo ay ti Duwwa a Disepulus
17Káttapos ni pangyayariyan iye ay nagsole a tuna't saya u pitto a pulo ay ti duwwa a disepulus. Kinagi de, “Panginoon, maski u demonyo hide ay summunud nikame ni utusan mi hide tu ngahan mo.”
18Kinagi ni Jesus, “Netan ko ti Satanas a natákneg a gábwat ti langet a kumán a kilat. 19Tandaan moy inatádden takam ti kapangyariyan a gemmakan u biklat sakay u ánnepet hide, sakay inatádden takam be ti kapangyariyan a mangtalo tu kapangyariyan ni Satanas. Sakay awan nikam ti makapangpasaket. 20Pero dyan kam magsaya ta napasunud moy u mágkadukás hide a ispirito nan magsaya kam dipo nelista dán u ngaha-ngahan moy ti langet.”
Nasaya ti Jesus
(Mateo 11:25-27; 13:16-17)
21Ti odas biyan itod ay nagkahod ti Jesus ti kasayaan a gábwat tu Banal a Ispirito, kinagi na, “Magpasalamaták niko Ama a Panginoon ti langet sakay ti lutaáy dipo awan mo impakapospos tu mágkarunung i bagayan hidenye. Impakapospos mo la iye hide tu tolay hide a mapakumbaba a konna tu anak. On, Ama magpasalamaták dipo konna hod u gusto mo a mangyare.”
22Sakay kinagi na nide, “Inyatád dán nikán nu Ama ko u atanan a bagay. Awan ti makatukoy ni deya u Anak ni awan la u Ama. Sakay awan ti makatukoy tu Ama ni awan u Anak la, sakay u pinile hide nu Anak a pángpakapospusan na tungkul nikuna.”
23Ummatubang ti Jesus tu disepulus na hide sakay kinagi na nide a awan ti agum a mangsássaneg, “Mapalad kam, dipo netan moy u bagay hide a ketan moy nadid! 24Pero kagiyán ko nikam, makpal a prupeta sakay hare u nasoh a maketa tu netan moy pero awan di netan. Masoh be hide a mangsaneg tu nasaneg moy pero awan di be nasaneg.”
U Talinhaga nu Essa a Samaritano
25Nadid, immadene ni Jesus u essa a maisto nu Kautusan tánni purbaan siya, “Maisto,” kagi na, “Ánya u dapat ko a gimitán tánni magkahodák ti biyag a awan ti kahád?”
26Timmábbeg ti Jesus, “Ánya beman u nakasulat tu Kautusan? Ánya beman u mabasa mo hod?”
27Timmábbeg siya, “Mahalán mo u Panginoon mo a Diyos ti buo a puso, ti buo a kaliduwwa, ti buo begsák sakay tu buo mo a isip; Sakay mahalán mo u kapareho mo a tolay konna tu pángmahal mo tu sadile mo.”
28“Tama u tábbeg mo,” kagi ni Jesus. “Gimitán mo ina, tánni magkahod ka ti biyag a awan ti kahád.”
29Dipo tu pagkasoh nu maisto nu Kautusan a ipeta a tama siya ay tinanung na a huway ti Jesus: “Deya beman kapareho kuway a tolay?”
30Timmábbeg ti Jesus tu pamamag-itan nu pággistorya, “Te essa a tolay a gábwat ti Jerusalem a patamo ti Jerico. Insanáb siya nu tulisan hide. Inalap de u susulot na a badu sakay binálbág de siya, kaya magipepatay dán nikuna a lakaden de. 31Nadid, netaun be a magtaleb u essa a saserdote ti itod, pákketa na tu tolay a kumakkatdug tu dilan ay limmise siya sakay nagtulos-tulos tu lakad na. 32Tehhod be a nagtaleb a essa a Levita,#10:32 Levita: Iye u Judio hide a tumáttulung tu saserdote. pero nikuna ketan na u tolay a nabálbág ay limmisi be siya sakay nagtulos-tulos la be tu lakad na. 33Pero tehhod be a nagtaleb a Samaritano a gábwat tu adeyo a lugar. Pákketa na tu kumakkatdug a tolay ay kinagbiyan na siya. 34Inadeniyan na siya, binulakan na ti langis sakay ti alak u talingo na hide sakay binádbáddán na. Sakay insakay na siya tu nagsakayan na a asno. Inyangay na siya tu essa a táttulusan tánni maalagaan hod siya. 35Tu kadimadimangan na ay inatádden nu Samaritano u makábbilay ti pilak sakay kinagi na nikuna, ‘Alagaan mo siya sakay ni kulang pa ina tu kailangan moy hide ay bayaden ko la tu kássole ko.’ ”
36Kinagi ni Jesus tu tagapagtoldu tu Kautusan, “Deya nadid tu palagay mo tu tállo a nagtaleb u nángpeta ti págmahal tu tolay a hinarang nu tulisan hide?”
37“U tolay a timmulung nikuna.” Kagi nu maisto nu Kautusan. Kinagi nikuna ni Jesus, “Kadmudán sakay konna bi hod u gimitán mo.”
Bummisita ti Jesus tu kád Marta sakay ti Maria
38Nadid, nagtulos-tulos di Jesus sakay u disepulus na hide tu lakad de, dimmemát hide tu essa a baryo. Te mágyan hod a essa a bábbey a Marta u ngahan na. Masaya na a tinanggap di Jesus tu bilay na, 39sakay tehhod siya a wadi a Maria u ngahan na. Nággetnod siya tu atubang nu Panginoon sakay nágsaneg tu intáttoldu na. 40Pero grabi dán u balisa ni Marta dipo tu kákpal nu dapat na a gimitán, kaya immadene ni Jesus sakay kinagi na, “Panginoon, baliawan beman la niko a páppabayanák ni wadi kuwe a mággisessa a magpospos? Kagiyán mo ped nikuna a tulunganák na.”
41Pero kinagi nikuna nu Panginoon, “Marta, Marta, grabi ka ti kábbali-balisa tu sari-sare a bagay, 42pero eessa la i talagaay a kailangan. Pinile ni Maria u tama a bagay a awan mamawan nikuna.”
Currently Selected:
Lukas 10: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
Lukas 10
10
Inutusan ni Jesus u Pitto a Pulo ay ti Duwwa a Disepulus
1Nadid, káttapos ni itod ay nángpile dámman u Panginoon ti pitto a pulo ay ti duwwa a disepulus. Sakay pinágdipalongo na hide ti tágdaduwwa a umangay tu balang banuwan sakay tu lugar a angayan na. 2Sakay kinagi na nide, “Makpal u gapasán, pero kulang u mággapas.” Kaya idasal moy tu makákkao a mángpaangay pa siya ti mággapas tu pággapasan na. 3Sigi kammoy dán! Paangayán takam a kumán a tupa tu bállog nu hayup hide a mágkatapang.
4Dyan kam magtawed ti pitaka, hembeg oni sinelas. Sakay dyan kamon magabala a mákpagkumustaan tu matagbu moy hide. 5Kássáddáp moy tu balang bilay a angayan moy ay kagiyán moy nide a, “Maghare nakwa u kapayapaan ti iye a bilay!” 6Ni masássohán ti kapayapaan u mámmágyan hod ay mágkahod hide ti kapayapaan. Pero ni awan hide masassohan ti kapayapaan ay awan mangyare u kinagi moy nide. 7Ni deya u bilay a nagpatulos nikam ay hod kam la hod. Dyan kamon paagton-agton ti bilay; kanán moy sakay inumán moy u ánya man a ihayin di nikam. Dipo u tarahabador ay te karapatan a mangtanggap tu hornal na. 8Ni tanggapán di kam tu essa a banuwan, kanán moy ni ánya man u ihayin di nikam. 9Pagpiyyaán moy u tehhod hide a saket hod sakay kagiyán moy nide, “Adene kamon a paghariyan nu Diyos.” 10Pero ni awan dikam tanggapan tu essa a banuwan ay lumuwas kam tu dilan sakay kagiyán moy, 11“Maske u alikabuk nu banuwan moy a pimmakkat tu tika-tikád me ay pagpagán me bilang babala nikam. Pero iye u pakaisipán moy, inatádden kamon ti pagkakataun a mapagharian nu Diyos! 12Kagiyán ko nikam: tu Aldew nu Pághatul ay mas madágge u parusa nu tolay hide ti banuwanan itona, nan tu dinanas nu taga-Sodoma hide!”
Babala tu Banuwan a Awan Magsise
(Mateo 11:20-24)
13Kakagbi kam a taga-Corazin hide! Kakagbi kam a taga-Betsaida hide! Dipo ni ti Tiro sakay ti Sidon nangyare u himala hide a inpeta ko nikam ay nalay dán nakwa hide a nagsulot ti kostal sakay nággetnod tu abu, para ipeta a nagsise hide. 14Tu Aldew nu Pághatul ay mas madágge u parusa moy nan tu parusa nu taga-Tiro sakay u taga-Sidon hide. 15Sakay hikam a taga-Capernaum hide, maare moy a ilangkaw u sadili moy hanggan ti langet pero itákneg kam hanggan ti impiyerno.
16Ni deya man u mangsaneg nikam ay hikán i sinaneg diyay sakay u awan mangtanggap nikam ay hikán i awan diyay tinanggap. U awan mangtanggap nikán ay awan di be tinanggap u nangutus nikán a umangay he.
Nagsole u Pitto a Pulo ay ti Duwwa a Disepulus
17Káttapos ni pangyayariyan iye ay nagsole a tuna't saya u pitto a pulo ay ti duwwa a disepulus. Kinagi de, “Panginoon, maski u demonyo hide ay summunud nikame ni utusan mi hide tu ngahan mo.”
18Kinagi ni Jesus, “Netan ko ti Satanas a natákneg a gábwat ti langet a kumán a kilat. 19Tandaan moy inatádden takam ti kapangyariyan a gemmakan u biklat sakay u ánnepet hide, sakay inatádden takam be ti kapangyariyan a mangtalo tu kapangyariyan ni Satanas. Sakay awan nikam ti makapangpasaket. 20Pero dyan kam magsaya ta napasunud moy u mágkadukás hide a ispirito nan magsaya kam dipo nelista dán u ngaha-ngahan moy ti langet.”
Nasaya ti Jesus
(Mateo 11:25-27; 13:16-17)
21Ti odas biyan itod ay nagkahod ti Jesus ti kasayaan a gábwat tu Banal a Ispirito, kinagi na, “Magpasalamaták niko Ama a Panginoon ti langet sakay ti lutaáy dipo awan mo impakapospos tu mágkarunung i bagayan hidenye. Impakapospos mo la iye hide tu tolay hide a mapakumbaba a konna tu anak. On, Ama magpasalamaták dipo konna hod u gusto mo a mangyare.”
22Sakay kinagi na nide, “Inyatád dán nikán nu Ama ko u atanan a bagay. Awan ti makatukoy ni deya u Anak ni awan la u Ama. Sakay awan ti makatukoy tu Ama ni awan u Anak la, sakay u pinile hide nu Anak a pángpakapospusan na tungkul nikuna.”
23Ummatubang ti Jesus tu disepulus na hide sakay kinagi na nide a awan ti agum a mangsássaneg, “Mapalad kam, dipo netan moy u bagay hide a ketan moy nadid! 24Pero kagiyán ko nikam, makpal a prupeta sakay hare u nasoh a maketa tu netan moy pero awan di netan. Masoh be hide a mangsaneg tu nasaneg moy pero awan di be nasaneg.”
U Talinhaga nu Essa a Samaritano
25Nadid, immadene ni Jesus u essa a maisto nu Kautusan tánni purbaan siya, “Maisto,” kagi na, “Ánya u dapat ko a gimitán tánni magkahodák ti biyag a awan ti kahád?”
26Timmábbeg ti Jesus, “Ánya beman u nakasulat tu Kautusan? Ánya beman u mabasa mo hod?”
27Timmábbeg siya, “Mahalán mo u Panginoon mo a Diyos ti buo a puso, ti buo a kaliduwwa, ti buo begsák sakay tu buo mo a isip; Sakay mahalán mo u kapareho mo a tolay konna tu pángmahal mo tu sadile mo.”
28“Tama u tábbeg mo,” kagi ni Jesus. “Gimitán mo ina, tánni magkahod ka ti biyag a awan ti kahád.”
29Dipo tu pagkasoh nu maisto nu Kautusan a ipeta a tama siya ay tinanung na a huway ti Jesus: “Deya beman kapareho kuway a tolay?”
30Timmábbeg ti Jesus tu pamamag-itan nu pággistorya, “Te essa a tolay a gábwat ti Jerusalem a patamo ti Jerico. Insanáb siya nu tulisan hide. Inalap de u susulot na a badu sakay binálbág de siya, kaya magipepatay dán nikuna a lakaden de. 31Nadid, netaun be a magtaleb u essa a saserdote ti itod, pákketa na tu tolay a kumakkatdug tu dilan ay limmise siya sakay nagtulos-tulos tu lakad na. 32Tehhod be a nagtaleb a essa a Levita,#10:32 Levita: Iye u Judio hide a tumáttulung tu saserdote. pero nikuna ketan na u tolay a nabálbág ay limmisi be siya sakay nagtulos-tulos la be tu lakad na. 33Pero tehhod be a nagtaleb a Samaritano a gábwat tu adeyo a lugar. Pákketa na tu kumakkatdug a tolay ay kinagbiyan na siya. 34Inadeniyan na siya, binulakan na ti langis sakay ti alak u talingo na hide sakay binádbáddán na. Sakay insakay na siya tu nagsakayan na a asno. Inyangay na siya tu essa a táttulusan tánni maalagaan hod siya. 35Tu kadimadimangan na ay inatádden nu Samaritano u makábbilay ti pilak sakay kinagi na nikuna, ‘Alagaan mo siya sakay ni kulang pa ina tu kailangan moy hide ay bayaden ko la tu kássole ko.’ ”
36Kinagi ni Jesus tu tagapagtoldu tu Kautusan, “Deya nadid tu palagay mo tu tállo a nagtaleb u nángpeta ti págmahal tu tolay a hinarang nu tulisan hide?”
37“U tolay a timmulung nikuna.” Kagi nu maisto nu Kautusan. Kinagi nikuna ni Jesus, “Kadmudán sakay konna bi hod u gimitán mo.”
Bummisita ti Jesus tu kád Marta sakay ti Maria
38Nadid, nagtulos-tulos di Jesus sakay u disepulus na hide tu lakad de, dimmemát hide tu essa a baryo. Te mágyan hod a essa a bábbey a Marta u ngahan na. Masaya na a tinanggap di Jesus tu bilay na, 39sakay tehhod siya a wadi a Maria u ngahan na. Nággetnod siya tu atubang nu Panginoon sakay nágsaneg tu intáttoldu na. 40Pero grabi dán u balisa ni Marta dipo tu kákpal nu dapat na a gimitán, kaya immadene ni Jesus sakay kinagi na, “Panginoon, baliawan beman la niko a páppabayanák ni wadi kuwe a mággisessa a magpospos? Kagiyán mo ped nikuna a tulunganák na.”
41Pero kinagi nikuna nu Panginoon, “Marta, Marta, grabi ka ti kábbali-balisa tu sari-sare a bagay, 42pero eessa la i talagaay a kailangan. Pinile ni Maria u tama a bagay a awan mamawan nikuna.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.