Lukas 17

U Dahilan nu Págkasala

(Mateo 18:6-7, 21-22; Markos 9:42)

1Kinagi ni Jesus tu disepulus na hide, “Pirme a tehhod a dahilan ni bakin a magkasala u tolay; pero makaánteng u sapitán nu tolay a pinaggábwatan ni iye a pagkakasala! 2Maganda pa ni báttenan siya ti essa a dakál a gilingan a bito tu álleg na sakay ibut ditaw a diget, nan magin dahilan nu pagkasalaan ni biguwan iye hide ti pánnampalataya. 3Kaya mag-ingat kam!

Ni magkasala niko u kapátkákka mo ay págkagiyan mo; sakay ni magsise siya ay patawadán mo. 4Ni pumenpitto dán siya a nagkasala niko tu maghapun, sakay pumenpitto be siya a umadene niko a magkagi a, ‘Nagsisiyák,’ Kailangan a patawadán mo siya.”

Pánnalig tu Diyos

5Kinagi nu disepulus hide ni Jesus, “Dagdagan mu ped pánnampalataya miyáy!”

6Pero timmábbeg ti Jesus, “Ni te pánnampalataya kam nakwan dálla a konna tu kadakál nu bukál nu mustasa ay maare moy dán a makagi ti kayuwáy a sikomoro a, ‘Mabotbot ka sakay memula ka ti diget ta atod!’ sakay sumunud iye.

U Tungkulin nu Essa a Utusan

7Ipagpalagay tam a tehhod kam a utusan a mággaradu oni mággalaga ti tupa. Kággábwat na beman tu araduwan ay kagiyán moy beman nikuna a, ‘Karon he, angay ka dán kuman?’ 8Awan beman konna he i kagiyán moyay, ‘Maglewas ka dán sakay paghandaák mo ti pangapon ko sakay serbiyanák mo mentaras kumanák. Káttapos ko a kuman ay saka ka dán a kuman.’ 9Kailangan beman a pasalamatan nu amo u alipin na dipo sássunudán na siya? 10Konna kam labi hod, ni nagimet moy dán u atanan a inyutus nikam nu Diyos ay iye u dapat moy a kagiyán, ‘Alipin kami la; kaya ginimet mila u tungkulin me hide.’”

Pinagpiyya ni Jesus u Sapulo a te Ketong

11Nikuna patamo dán ti Jesus ti Jerusalem ay nagtaleb siya tu pag-itan nu Samaria sakay Galilea. 12Nikuna pasáddáp dán siya tu essa a baryo ay tinagbu siya nu sapulo a kinetong pero awan hide immadene nan tumáttaknág la hide tu medyo adeyo, 13sakay pimmákhaw hide, “Jesus a Panginoon! Kagbiyan mo kami pay!”

14Pákketa ni Jesus nide ay kinagi na, “Kámmoy dán sakay pumeta kam tu saserdote hide.”

Mentaras a maglakad hide ay nagpiyya hide. 15Nikuna nabate nu essa a nagpiyya dán siya, ay nagsole siya a mágpapákhawán a nágpapuriyán tu Diyos. 16Sakay limmuhud siya tu atubang ni Jesus sakay nagpasalamat. Taga-Samaria iye a tolay.

17Kinagi ni Jesus, “Awan beman sapulo u pinagpiyya ko? Hádyarán u siyam? 18Bakin awan nagsole u agum para magpure tu Diyos, nan i nagsole paáy ay i bakán náy a taga-he?” 19Sakay kinagi ni Jesus nikuna, “Tumaknág ka dán sakay sole! Pinagpiyya ka dipo tu pánnampalataya mo.”

U Káddemát nu Kahariyan nu Diyos

(Mateo 24:23-28, 37-41)

20Nadid, tinanung nu Pariseo hide ti Jesus ni nikan a magsapul u pághare nu Diyos. Timmábbeg siya, “Awan ti ketan a palatandaan tu págsapul nu pághare nu Diyos, 21sakay awan be ti magkagi a nagsapul dán iye hode oni heeh. Dipo i tahoday ay nagsapul dán a maghare u Diyos nikam.”

22Káttapos ay kinagi na tu disepulus hide, “Dumemát u panahun a gustuwán moy a ketan u Anak nu Tolay maskin essa aldew la, pero awan mangyare itod.” 23Te mángkagi nikam, “Kátoy hode!” oni “Katoy siya heeh!” Pero dyan kam hod umangay sakay dyan kam nide maniwala. 24Dipo u Anak nu Tolay ay dumemát a konna tu kilat a magdemlag tu buo a langet. 25Pero kailangan pa siya a magtággád ti makpal a hirap, sakay umadden di siya nu tolay hide nadid. 26U káangay he nu Anak nu Tolay ay konna tu panahun ni Noe. 27U tolay hide tu itod ay mágkakanán, makán inumán sakay mamágkabangaán, hanggan dummemát u aldew a summakay ti Noe tu dapat a kadakál a abeng. Káddemát nu lonso ay nágkatay hide a atanan. 28Konna labi hod u nangyare tu panahun ni Lot. U tolay hide ay makán kanán, makán inumán, sakay makán baliyán, makán lakuwan, makán mulaán sakay mágbabilayán. 29Pero nikuna a lumakad ti Lot ti Sodoma ay naguden ti apoy sakay asupre kaya natutod hide a atanan. 30Konna labi hod i mangyariyay tu káddemát nu Anak nu Tolay.

31“Ti aldiwan itod, u katoy tu atáp nu bilay ay dyan dán magabala a umogsad para alapán u kabiyagen na hide tu disalad nu bilay. Sakay u katoy tu uma ay dyan dán magabala a sole. 32Isipán moy dálla u nangyare tu kabanga ni Lot. 33Ni deya man u mángligtas tu biyag na ay mawanan a talaga. Pero ni deya man u awan mángkemot tu biyag na dipo tu kássunud na nikán ay magkahod ti biyag a awan ti kahád. 34Kagiyán ko nikam, ni te duwwa a lállake a mágkatdug tu essa a abák ti gibiyan itod, alapán u essa sakay mawahak u essa. 35Tehhod be a duwwa a bábbey a maggiling; maalap u essa sakay mawahak be u essa. 36Tehhod be a duwwa a lállake a magtarabaho tu uma, maalap u essa sakay mawahak be u essa.”

37Tinanung nu disepulus na hide, “Hadya iye a mangyare Panginoon?” Timmábbeg siya, “Ni hádya u páppagyanan nu bangkay hide ay hod bi hod a naipun-ipun u wakwak hide.”

Currently Selected:

Lukas 17: MBJC

Highlight

Copy