مَتّی 2
2
اِستَرَ شناسِن عالیم
1هیرودیسی پادیشاهیی دوورَ، عیسی شهر بِیت لَحِمیکا کن وِلَتِه یَهودیَه کاَ بَه دِنیا آمَه. عیسی دِنیا آمِه بَه دوملَه چن گِلَه اِستَرَ شِناسَه عالیم کن موغون کاولکا بین مَشرِقییکا، شهر اورشَلیمیرا آمینَه 2و دَپَرسِستین: «یَهودیون پادیشا کن تازَ دِنیا آمَیَه، کِرَم جِگاکارَ؟ اِمی خونه کن چَی اِستَرَ وقتی کن پِرمَه ویندِمونَه و آمَه ایمون تا بَی پَرستِش بِکَرم.» 3وَقتی هیرودیسِ پادیشا اِمِش درَستَه، اَ و گردِ اورشلیمی آدَمِن، بَینَه تَته وَسّکا دَگِنِستین. 4هیرودیس، گردِ سران کاهینون و قامی توراتی موعَلیمون خِلِه کَردِشَه و اَوونکا دَپرسِستَه کن: «وَعدَ آدوعَه مسیح کِرَم جِگاکا پی دِنیا با؟» 5اَیِن بَی واتشون: «ولَتِه یَهودییَه، شهرِ بِیت‌لِحِمیکا، اِمی خونه کن میکای پَیغَمبَری واسیطَنَه نوشتَه آبَه یَه کن:
6«”اَی بِیت‌لِحِم کن یَهودا وِلَتیکاشَه،
تِه اَصلا، یَهودا فرمانرواونکا گِچ تَرنیشهَ،
اِمی خونه کن بَتکا فرمانروایی ظهور بکَیَه
کن چمن قام، اسرائیلی را رهبری بَکَیَه.“»
7پس هیرودیسِ پادیشا نونَکِه اِستَرَ شِناسَه عالیمون، اِشتَن وَرخِلِه کَردِشَه و اَوونکا دَپَرسِستَه کن، اِستَرَ کَینی اَیر آبَه یَه. 8و اَیِنِش بِیت لَحِمیرا رَونَه آکَردِش و واتش: «بشَه و دیقَتینَه اَ خردنی دوملَه بگَردَ و وقتی کن بَی ویندرون، بَمن نی خَبَر بدَرَ تا اَز نی بام و بَی پرستش بکَم.» 9اَیِن، پادیشا گَفون دَرَستِه بَه دوملَه، رَونَه بین. اَ اِستَرَ ایی کن چَی پِرمِه موقِه بَی ویندَشون بهَ، چَوون ناردَکَر اَشیَه وآخیر بَسَر اَجگایی کا کن خردن بَه، چَی سَریکا پا بِند آبَه. 10اَیِن اِستَرَ ویندِکا بَرک خَش آبین. 11وقتی اَیِن کهَ دِله دَرمین و خِردَنی و چَی نَنَه مریمی ویندشون، زَمینی سَردِرِ برگنستین و بَی پرستِش کَردَشون. چَی بَه دوملَه اِشتَن صِندوخَه اون آج آکَردشون وخَلا اِنی کن طِله و کندُر و عَرینَه روعَن به، بَی تقدیم کَردشون. 12و اِمی خونه کن خاویکا اَیِنشون هوشدار دوعَشون بهَ کن هیرودیسِی وَر آنِگَردن، دیَیرَ راهینه اِشتَن وِلَتیرا رونَه بین.
مصریرا ویریتِه
13اِستَرَ شِناسون شِه بَه دوملَه، خداوندی ایلَه فرشتَه خاوی دِلَکا یوسوفیرا اَیر آبه و واتش: «پِب، خردنو چَی نَنَه پِگهِ و مصریرا بیوریج و تا بَتِه خبَر بدَم اَجگا کا بومون، اِمی خونه کن هیرودیس خردنی دومله بَگَردِستی تا اَی بِکشِه.» 14پس یوسوف پِبَه و شَویرا خردن و چَی نَنَه پِگَتشَه ومِصری طرف شَه. 15و تا هیرودیسِی مَردِ موقِه اَجگا کا مَندَ. اِنتَرَآبَه تا اَچیی ایی کن خداوند هوشَعه پَیغَمبَری زونینَه واتَش بَه اَنجوم ببو کن: «اِشتَن زوعَه مصریکا خِلِه کَردِمَه.»
هیرودیس چِیلَینَه خِردَنون بَکِشتی
16اَموقه کن هیرودیسِ سَر آگِنَه کن اِستَرَ شِناسَه عالیمِن بَی گول ژَشونَه، بَرک آسرَنگِستَه و طبق اَ زمانی کن اِستَرَ شناسونکا دَپَرسِستَه بَه آدَم عَندِشَه، تا گِردِ دِسالَه زوعَه اِن و دِ سالیکا کَمتَر کن بیت لَحِم و گِردِ اَ منطَقَه اونکا بینَه، بکشن. 17اَموقه اَ چیی ایی کن اِرمیای پَیغَمبَری واسیطَنَشون واته بَه، اَنجوم بَه کن:
18«سَسی شهر رامَکا گوشیرا آرَستَه،
برکَه بِرَمِه و عازیَه ایی سَس.
راحیل، اِشتَن خِردَنون خونه بَبِرَمِستی
ونَپیشبَه کن آلاوی،
اِمی خونه کن دِ سورَقی چَی خِردَنونکا نیَه.»
مِصریکا ویگَردِستِه
19هیرودیسی مَردِ بَه دوملَه، خداوندی ایلَه فرشتَه خاویکا، یوسوفیرا کن مِصریکا بَه اَیر آبَه 20و بَش واتَه: «پِب، خردنو چَی نَنَه پِگهِ و وِلتِه اسرائیلیرا ویگَرد، چون اَیِنی کن اَپیشون بَه خِردَنی بِکِشِن، مردَ اینَه.» 21پس یوسوف راست آبَه خردن و چَی نَنَه پِگَتشَه و وِلَته اسرائیلیرا ویگَردِستَه. 22ولی وَقتی دَرَستِشَه کن آرکِلائوس اِشتَن دَدَ هیرودیسی جِگا وِلَتِه یهودیَکا حکم بَکَی، تَرسستهَ اَجگا را بِشو، و اِمی خاطر کن خاویکا هوشدار ویندَش بَه، وِلَتِه جَلیلی طَرَف شَه. 23یوسوف شَه شَهریکا کن چَی نوم ناصرَ به مندَ، اِنتَرَ آبَه تا اَ چیی ایی کن پَیغَمبَرون واسیطَنَه واتَشون بَه اَنجوم ببو کن: «بَی ناصری خِله بَکنه.»
Currently Selected:
مَتّی 2: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
