ลามูลา 38

ยูดา ฌางัน ทามา

1เดะ กาลา อีตู_ ยูดา ตีงัน โกะ อาดี บราดี เดะ ญา_ ญา ปี มือนูปัก ฌางัน ซือมียา ตูโปะ อาดุลาม_ นู ปือนามา จะ_ ฮีรา. 2โซะ อีตู_ ยูดา ลีฮัจ นีบีนี บักซา คานาอัน_ นู ปะ เดะ ญา ปือนามา จะ_ ชูวา. ญา มาโซะ ดัฮ_ มียา นีบีนี อีตู_ บือนีกัฮ ดัฮ 3นีบีนี อีตู ญา บือโปรจ_ บือเลฮ นานะ กีลากี. ยูดา ตืองะ ปือนามา จะ_ เอระ. 4นีบีนี อีตู ญา บือโปรจ ปูลัก_ บือเลฮ นานะ กีลากี_ ตืองะ ปือนามา จะ_ โอนัน. 5ญา บือโปรจ ซือกาลี ลาฆี_ บือเลฮ นานะ กีลากี_ ตืองะ ปือนามา จะ_ เซลัฮ. กาลา อีตู_ นีบีนี อีตู ดูโดะ เดะ ตูโปะ เคซิบ.

6ยูดา มียา นีบีนี ซืออูรัก นู ปือนามา ทามา_ บรี ฌาดี บีนี นะ เอระ_ นานะ นู ซูโลก นะ ญา. 7ตาปี เอระ_ ญา ฌาดี ซือมียา ฌาฮัจ โซะ ฮือลด มูคา นะ ตูฮัด บือซัยํ เดะ อาตัซ_ กะฆีเตอ ตูฮัด บูนอฮ ญา ดัฮ.

8กะฆีเตอ_ ยูดา มือเลา ฌางัน โอนัน จะ_ “เกา กือนา มาโซะ ปี อาเมด บีนี นะ กากา_ บรี ฌาดี บีนี นะ เกา_ บูวัจ ตูโรจ กะ ฮาดัจ นะ อาดี นะ กากา_ บรี กากา อาดา นานะ ดัฮ#38.8 ฮาดัจ นะ กูญา ฌาดี จะ_ ดัฮ กีลากี มาตี ดัฮ_ ตาปี ฮอย นานะ_ อาดี เดะ ญา ซืออูรัก_ กือนา อาเมด บีนี กากา_ ฌาดี บีนี นะ ญา_ มาโซะ ปี ซารี ญา. นานะ นู บือฌาดี ดัฮ_ นะ ฌาดี นานะ นะ กีลากี นู มาตี ดัฮ_ บือเลฮ ปือซากา นะ ญา. ลีฮัจ ซูรัจ รูด 4_ ฌางัน ซูรัจ มัดทัย 22.23-33..”

9ตาปี โอนัน ตาฮู จะ_ นะ เตด ฌาดี บือแนฮ นะ ญา_ กะฆีเตอ กาลา ญา มาโซะ ปี_ ดาปัจ บีนี นะ กากา_ ญา ปลือปัซ บรี อาเย บือแนฮ นะ ญา_ ฆูโฆยํ กะ ตานัฮ_ ตีเมา นะ บรี อาดา บือแนฮ บรี กะ กากา. 10นู ญา บูวัจ กะฆีเตอ_ บูวัจ บรี ตูฮัด บือซัยํ เดะ อาตัซ เตด ซูกา ฮาตี_ กะฆีเตอ ญา บูนอฮ โอนัน ฌูฆา ดัฮ.

11ยูดา มือญาเระ กะ ทามา_ นู ฌาดี มือนาตู นะ ญา_ จะ “เกา กือนา บาลิ ปี ดูโดะ_ ฌาดี นีบีนี ฌานา เดะ รูมัฮ นะ ปะ เดะ เกา_ ฌู เซลัฮ นานะ นะ กู บือซัยํ ดัฮ.” ญา ตาโกจ จะ_ เซลัฮ นะ มาตี ฌูฆา_ ซือรูปา โกะ กากา เดะ ญา. กะฆีเตอ ทามา ปี ดูโดะ เดะ รูมัฮ นะ ปะ เดะ ญา ดัฮ.

12เดะ บลากัก_ บีนี นะ ยูดา_ นู ฌาดี นานะ นะ ชูวา_ ญา มาตี ดัฮ. ตานา ยูดา เตด บราปา ซูซัฮ ฮาตี ดัฮ_ ญา ปี กะ ตูโปะ ทิมนา_ ฌางัน ซาบัจ นะ ญา_ นู ปือนามา จะ_ ฮีรา_ ซือมียา ตูโปะ อาดุลาม. ญา ปี บีดา นะ ฆูติก บูลู นะ กาวัด กาเมก นะ ญา. 13อาดา ซือมียา ปี มือญาเระ กะ ทามา จะ_ “ลีฮัจ เลอ_ ปะ มือตูฮา เดะ เกา ตืองัฮ ปี_ กะ ตูโปะ ทิมนา_ บีดา นะ ฆูติก บูลู นะ กาวัด กาเมก นะ ญา.”

14ทามา ญา อูฆัย กาเยด นู ฌาดี นีบีนี ฌานา นะ ญา_ ปากัย กาเยด บีลัก อารี_ อาเมด กาเยด ตูโดก มูคา นะ ญา_ ปี ดูโดะ เดะ ตือปัจ มาโซะ ตูโปะ เอนายิม_ บีดิก ฌาลัด นู นะ ปี กะ ทิมนา_ ซาเบะ ญา ลีฮัจ จะ_ เซลัฮ บือซัยํ ดัฮ_ ตาปี ยูดา ตีเมา บรี ญา ฌาดี ลากี นะ ญา.

15กาลา ยูดา ลีฮัจ ทามา_ ญา อีงัจ จะ_ ญา ฌาดี นีบีนี ฌาลัก_ ซาเบะ ญา ตูโดก มูคา ดัฮ. 16กะฆีเตอ ญา อาเลฮ ปี มือเลา_ ฌางัน นีบีนี เดะ บีดิก ฌาลัด อีตู จะ_ “โฌฮ บรี กีตา มาโซะ ปี บือซามา เลอ.” ญา เตด ตาฮู จะ_ ญา ฌาดี มือนาตู นะ ญา.

นีบีนี อีตู มือเลา จะ_ “ดัฮ เกา มาโซะ กะฆีเตอ_ เกา นะ บรี รือฆา บราปา?”

17ยูดา ญา ตีกัฮ จะ_ “กู นะ กีเรบ บรี กะ เกา_ อานะ แบะ ซืออีโกยํ_ เดะ กาวัด แบะ นะ กู.”

นีบีนี อีตู ตาญา จะ_ “เกา นะ บรี บารัก นามา_ ฌาดี รือฆา อูปัฮ ซือตืองัฮ ดูลู_ นู เกา นะ กีเรบ กะฆีเตอ เฆอ?”

18ยูดา ตาญา ปูลัก จะ_ “กู นะ บรี บารัก นามา กะ เกา_ ฌาดี รือฆา อูปัฮ ดูลู?”

นีบีนี อีตู ตีกัฮ จะ_ “เกา กือนา บรี กะ กู_ จีเจด มือกรา นะ เกา_ ซือกาลี ฌางัน ตาลี ฆาโตก นะ ญา_ ฌางัน ตูกัจ นู อาดา เดะ ตางัน นะ เกา ฌูฆา.” กะฆีเตอ ยูดา บรี บารัก อีตู กะ ทามา ดัฮ_ ญา มาโซะ ปี ดาปัจ ญา_ บูวัจ บรี ญา บือโปรจ ดัฮ. 19กะฆีเตอ ทามา บีกัซ_ บาลิ ปี กะ รูมัฮ. ญา อูฆัย กาเยด ตูโดก มูคา นะ ญา_ ปากัย กาเยด นะ นีบีนี ฌานา ปูลัก.

20ยูดา ญา กีเรบ อานะ แบะ เดะ ซาบัจ นะ ญา_ ซือมียา ตูโปะ อาดุลาม_ บีดา ญา ปี อาเมด ซือบารัก ปือนานา ดาตัก เดะ ตางัน นะ นีบีนี อีตู. ตาปี ญา ซารี ฮอย เตด ดาปัจ ญา. 21ญา ตาญา ลูมอฮ ซือมียา เดะ ตือปัจ อีตู จะ_ “นีบีนี ฌาลัก นู ดูโดะ เดะ บีดิก ฌาลัด โซะ ตูโปะ เอนายิม_ ญา อาดา ปัจ ดีฮา?”

กูญา ตีกัฮ จะ_ “โซะ อีนี ฮอย นีบีนี ฌาลัก เลอ.”

22ซาบัจ บาลิ ปี ดาปัจ ยูดา_ มือเลา จะ_ “กู ซารี ญา_ เตด ดาปัจ ลาฆี. ลูมอฮ ซือมียา เดะ ตือปัจ อีตู มือเลา จะ_ ‘ฮอย นีบีนี ฌาลัก เดะ ตือปัจ อีนี เลอ.’ ” 23ยูดา ตีกัฮ จะ_ “บรี ญา อาเมด บือนา บารัก อีตู ตาโรฮ เลอ_ ตาโกจ จะ_ กูญา นะ อาฆัฮ ฆือละ กะ กีตา. ลีฮัจ เลอ_ กู กีเรบ อานะ แบะ อีนี_ ตาปี เกา ซารี นีบีนี อีตู เตด ดาปัจ.”

24ดูโดะ มาแรฮ ตีฆา บูลัด ดัฮ_ อาดา ซือมียา มาแรฮ มือญาเระ จะ_ “ทามา มือนาตู นะ เกา_ ญา ฌาดี นีบีนี ฌาลัก ดัฮ_ บือเลฮ บือโปรจ ฌูฆา_ เดะ ลาฆู บือกาเซฮ อีตู.”

ยูดา มือเลา จะ_ “อาเมด นีบีนี อีตู มาแรฮ. บรี ญา กือนา ตูนู เดะ อาปี เลอ.”

25ตานา กูญา ตืองัฮ บาวา ญา มาแรฮ_ ญา ซูโรฮ ซือมียา ปี มือญาเระ กะ ปะ มือตูฮา จะ_ “กู บือโปรจ ดัฮ_ ฌางัน ซือมียา นู ฌาดี ตูฮัด นะ บารัก อีนี เลอ”. ญา มือเลา จะ_ “ลีฮัจ เลอ_ จีเจด มือกรา อีนี_ ฌางัน ตาลี อีนี_ ฌางัน ตูกัจ อีนี_ ฌาดี บารัก นะ ซาปา? มีตา บรี เกา บือฮีมัจ ลีฮัจ เลอ.”

26ยูดา ลีฮัจ ดัฮ_ ซาโมจ จะ_ “นีบีนี อีนี ญา บาฌิ ตือปัจ ลือเบฮ เดะ กู_ ซาเบะ กู ตีเมา บรี เซลัฮ นู นานะ นะ กู_ ฌาดี ลากี นะ ญา.” กะฆีเตอ ยูดา เตด มาโซะ บือซามา ฌางัน นีบีนี อีตู ปูลัก.

27ตานา รอจ วะตู นะ ดูโดะ เดะ อาปี_ ลีฮัจ เลอ_ ญา อาดา นานะ บือกือมัยํ เดะ โปรจ นะ ญา. 28ฌาดี ดัฮ_ ตานา ญา ตืองัฮ ดูโดะ เดะ อาปี_ ตางัน นะ นานะ ซืออูรัก ตรือเบะ ดูลู. กะฆีเตอ บีดัด ญา อีกัจ บือนัง มีรัฮ เดะ ตางัน นะ ญา_ มือเลา จะ_ “นานะ อีนี ตรือเบะ ดูลู ดัฮ.” 29กาลา นานะ อีตู ซีตะ ตางัน นะ ญา มาโซะ ปาเระ ดัฮ_ ลีฮัจ เลอ_ อาดี นะ ญา ตรือเบะ ดัฮ. กะฆีเตอ บีดัด มือเลา จะ_ “บูวัจ นามา เลอ? เกา จือแรก ตรือเบะ มาแรฮ ดูลู กะฮามี?” กะฆีเตอ กูญา บรี นานะ อีตู ปือนามา จะ_ เปเรด.#38.29 ปือนามา จะ “เปเรด” ฌาดี จะ_ ลูบัก นู จือแรก ตรือเบะ. 30เดะ บลากัก กากา เดะ ญา ตรือเบะ_ นู อาดา บือนัง มีรัฮ เดะ ตางัน นะ ญา. กะฆีเตอ กูญา บรี นานะ อีตู ปือนามา จะ_ เซรัฮ#38.30 ปือนามา จะ “เซรัฮ” ฌาดี จะ_ บือตือแล_ ตูโญะ กะ บือนัง มีรัฮ..

Currently Selected:

ลามูลา 38: ULBIBLE

Highlight

Copy