Kitaaba Seera Dadaa 27
27
Yisihaq Yaaqoob Eebbise
1Yisihaq dulloomee yennaa ilti isaa baararroottetti#27:1 Baararrootetti: Yookiin garjitett., ilma isaa angaficha Esaawu waamee, «Ilma kiyya» jedheen.
Innille deebisee, «Kunoo, ani as jira» jedhe.
2Yisihaq, «Kunoo, ani dulloomeera; guyyaa du'a tiyyaalle hin beeku. 3Tanaaf, meya adamo'oo keeti, korojoo teeti, guube'ee fi daaya keeti fudhadhuu bayii bineensa naaf adansi. 4Dhandhama ani jaaladhu qopheessiitii naa fidi; ani nyaadhee, adoo hin du'iniin dura akka si eebbisu naaf dhikeessi» jedheen.
5Yennaa Yisihaq ilma ifii Esaawutti dubbate san Ribqaan dhage'iisatti jirtiiyyu. Maarre yennaa Esaawu bineensa adansiisaaf baye, 6Ribqaan ilma ifii Yaaqoobiin, «Abbaan keeti obboleessa keeti Esaawu'utti dubbatuun ani dhage'eera; 7inni, ‹Bineensa adansiitii, dhandhama ani jaaladhu qopheessiitii naa dhikeessi; ani nyaadhee, adoo hin du'iniin dura Mootii Waan Maraa duratti si hin eebbisa› jedhe. 8Amma, ilma kiyya, naaf ajajamii waan ani sitti himu godhi. 9Dhandhama abbaan keeti jaalattu akka qopheessuuf, gara re'ee teennaa dhaqiitii buruusoo lama fidi. 10Achiin duuba inni adoo hin du'iniin dura akka si eebbisu, abbaa keetiif fuutee dhikeessita» jette.
11Yaaqoob haadha ifii Ribqa'aan, «Kunoo, obboleessi kiyya Esaawu nafi isaa dabbasicha; nafi kiyya ammoo mucucaataa dabbasaa hin qanne. 12Dedha fa'a#27:12 Dedha fa'a: Yookiin akka wotoolle hin jedhama. abbaan kiyya yoo na qaqqabee ilaale, ani waan isatti murge fakkaadhee, eebba adoo hin te'in abaarsa ifitti fida» jedhe.
13Ribqaan deebittee, «Ilma kiyya, abaarsa keeti ani hin fudhadha; akka ani jedhe godhiitii, deemii buruusota naa fidi» jette. 14Maarre inni dhaqee buruusota gara haadha ifii fide; haati isaalle akkuma abbaan isaa jaalatutti dhandhama qopheessite. 15Achiin duuba isiin woyaa Esaawuu ilma isi'ii angafichaa adduu ta mana jirtu fuutee, ilma maandhicha Yaaqoobitti uffitte. 16Isiin gogaa buruusoo re'e'eelle harka isaatii fi morma isaa mucucaata'atti uffitte. 17Isiin dhandhamaa fi daabboo qopheessitelle ilma ifii maandhicha Yaaqoobitti kennite.
18Yaaqoob gara abbaa ifii dhaqee, «Abbaa» jedheen.
Innille deebisee, «Kunoo, ani as jira, ati ilma kam?» jedhe.
19Yaaqoob abbaa ifiitiin, «Ani Esaawuu ilma keeti angaficha; ani akka ati jette godheera. Ol jedhii tee'iitii, akka na eebbittu, foon ani adansee fide nyaadhu» jedhe.
20Yisihaq, «Ilma kiyya, attam akkas ariifattee dhaggatte?» jedhee gaafate.
Innille deebisee, «Mootii Waan Maraa Waaqa keetitti na milkeesse» jedhe.
21Yisihaq, «Ani si qaqqabee, dhugumaan ilma kiyya Esaawu akka teete yookiin hin te'in akka beekuuf, as dhikaadhu» jedhe.
22Yaaqoob gara abbaa ifii Yisihaqii dhikaate; innille isa qaqqabee, «Qoonqoon, qoonqoo Yaaqoobii ti; harki ammoo harka Esaawuu ti» jedhe. 23Harki isaa dabbasicha akka harka obboleessa isaa Esaawuu waan te'eef, abbaan isaa isa beekuu hin dandeenne. Tanaaf inni isa eebbisiisaaf jedhee, 24«Ati dhugumaan ilma kiyya Esaawuu?» jedhee gaafate.
Inni deebisee, «Ee, ana» jedhe.
25Yisihaq, «Ilma kiyya, foon ati adansitee fidde nyaadhee, akka si eebbisuuf, as naa fidi» jedhe. Yaaqoobille isatti fidee, innille nyaate; daadhii woyni'iille akka unuuf fidee innille une. 26Achiin duuba abbaan isaa Yisihaq, «Ilma kiyya, as koyii, na sunqadhu» isaan jedhe. 27Maarre inni gara isaa dhufee isa sunqate; Yisihaqille foolee woyaa isaa ulatee, isa eebbisee,
«Fooleen ilma kiyyaa,
akka foolee fichaa Mootiin Waan Maraa eebbisee ti.
28Waaqi karfaffuu ol-gubba'aa,
lafa laayyoo,
midhaanii fi woynii bacaa sii kennu.
29Gosi biyya adda addaa si tajaajiltuu ti;
kolbaan hedduulle si'iif gad jettuu ti.
Obboleeyyan teeti irratti goottaa te'i;
ilmaan haadha teetii si'iif gad jettuu ti.
Worri si abaare abaaramuu ti;
worri si eebbise eebbifamuu ti» jedhe.
Esaawu Eebba Yisihaq Kadhate
30Yisihaq akkuma Yaaqoob eebbisee ka'een, Yaaqoob fuula abbaa ifii duraa gad bayeeruun, obboleessi isaa Esaawuun adamo'oo dhufee seene. 31Innille dhandhama qopheessee gara abbaa ifii fidee, «Abba'a, ol jedhii tee'i; akka na eebbittuuf, foon ani adansee fide nyaadhu» jedhe.
32Abbaan isaa Yisihaq, «Ati eennu?» jedhee gaafate.
Inni deebisee, «Ani ilma keeti angaficha, Esaawu'u» jedheen.
33Yisihaq guddoo nayee hollatee, «Ka bineensa adansee naa fide, inni eennu ree? Dhufa teetiin dura ani nyaadhee isa eebbiseera; ee, inni ka eebbifame hin te'a!» jedhe.
34Esaawu yennaa tana dhage'e, qoonqoo guddo'oon iyyee laaleffatee bowee, abbaa ifiitiin, «Abba'a, analle eebbisi» jedhe.
35Yisihaq ammoo, «Obboleessi keeti sobaan dhufee, eebba keeti fudhateera» jedhe.
36Esaawu, «Ana sobiisi isaa kun yennaa lammeesso'oo ti. Yaaqoob jedhamuun isaa sirri'i; tanaan dura angafummaa tiyya na irraa fudhatee, ammalle eebba kiyya na irraa fudhate» jedhe. Achiin duuba, «Ati eebba tokkolle naaf hin hamburree?» jedhee abbaa ifii gaafate.
37Yisihaq deebisee Esaawu'uun, «Ani si'i irratti Yaaqoob goottonseera; obboleeyyan isaa mara tajaajiltoota isaa godheera. Midhaanii fi woynii bacaa isaaf kenneera. Ilma kiyya, maan si'iif godhuu dande'a ree?» jedhe.
38Esaawu abbaa ifiitiin, «Abba'a, ati eebba tokko qofa qaddaa? Abba'a, analle eebbisi» jedhee, qoonqoo ol qabatee bowe.
39Abbaan isaa Yisihaq deebisee, isaan,
«Ati lafa laayyoo irraa,
karfaffuu irraa fagaattee leeta.
40Shallaagaa keetiin leeta;
obboleessa keeti tajaajilta.
Yennaa didde ammoo,
waanjoo isaa morma keeti irraa hin buufatta» jedhe.
41Abbaan isaa waan isa eebbiseef, Esaawuun Yaaqoob jibbe. Inni gadhaa ifiititti, «Yennaan abbaan kiyya du'u dhikaatteerti; achiin duuba ani obboleessa kiyya Yaaqoob hin ijjeesa» jedhe.
42Ribqaan ammoo marroo yaada Esaawu'uu yennaa dhageette, Yaaqoobitti ergitee, «Dhage'i, obboleessi keeti Esaawu si ijjeesee, haluu bayiisaaf yaadateera. 43Tanaaf amma, ilma kiyya, waan ani siin jedhu godhi. Ka'iitii gara obboleessa kiyya Laabaanii ka Kaaraan keessa jiruu baqadhu. 44Haga obboleessi keeti aarii caffatu yenna'aaf isa woliin turi. 45Obboleessi keeti yennaa aarii caffate, waan ati isa goote hin dedha. Achiin duuba ani nama sitti ergee achii si deebisa. Ani maaf isin lamaanuu guyyaa tokkotti dhabaa?» jetteen.
Yisihaq Gara Laabaanii Yaaqoob Erge
46Achiin duuba Ribqaan Yisihaqiin, «Sababa dubartoota Heetotaa ta Esaawu fuudhee tanaaf, ani le'ii tiyya jibbeera; Yaaqoobille dubartoota Heetotaa tama akkanaa tana, lafa tana keessaa niitii yoo fuudhe, ani du'iisa fedha» jette.
Currently Selected:
Kitaaba Seera Dadaa 27: guj
Highlight
Share
Copy
Want to have your highlights saved across all your devices? Sign up or sign in
The Word for the World International and Bible Society of Ethiopia
