YouVersion Logo
Search Icon

Matewos 24

24
Yesus Betemeqdesiis Boktonamato Raaji Make
(Mar. 13:1-2; Luqa. 21:5-6)
1Yesus betemeqdesin kesse hamfeen nawobaasakito shu'ak keete betemeqdesiison besuk barki tai'sesete. 2Sinuntano Yesus wolgire: «Han baron zuutira biitiyoso? Futo nittok makefawungwa; boktonoy shu'aas shu'aasta diira fui'tonir aafawa.»
Daamiis Yoonanneen Zeemma Kar'ni Kabugtonewa Shanane
(Mar. 13:3-13; Luqa. 21:8-19)
3Bar Dabrazayitini kumaasta diifen nawobaas baasso baasso barki tai'sesere: «Innok makowa; han bar aagenso sinanari? Ne yoosewa han daasi koi'ni besone aambanso?» yit mamussete.
4Yesus wolgire: «Oonu nittotin eshanaatawa! 5Showobesiis ‹Ta Kiristooswa!› yit ta sunaasik yoosone. Showobesiisin dey eshone. 6Neebonewa neeboni odune odoti. Es bar dey sinanak sholsu sinna boor'a digotiita. Sinuntano koi'baas hanneengwa. 7Daraas daraasata; taatoos taatoosta kabuna. Maknewa daani shorkone showo dimsi sinana. 8Es bar zuuttera kophoni merosi keektone faarwa. 9Es kabaasik asuni meya nitto shana ephphatootik aatire imone dey worsone. Ta sunaasi boor'a dara zuuttambaase asi sina oomtester sinati. 10Es kabaasik showoni meya tuusa'sere orfo wolsone. Isaas oomiisin aatire imana. Asuni meya dey baassotna baassotna wal oomtososone. 11Showo esh raajjuni meya kabsone. Showo meyanon dey eshone. 12Manguusi aatamtan kabi chowa showoni meeni keeshtanaas koochona. 13Sinuntano koi'ba kar'ananneen chimme yere bar faruna. 14Dara zuuttambaase asik zaala sinanak Ha'oosi taatoni misirachchuni kaamaas daa zuuttambaase asiista maktona. Es kabaasiktu koi'baas yoona.
Digsu Shana
(Mar. 13:14-23; Luqa. 21:20-24)
15«Ese raajju Danielnik maktenaasimato ‹Kiinsuni mangu wuzaas› korto dimaasta yerefeen biifena kabaasik feretife bar yaadatowowa. 16Es kabaasik Yuuda feese baasso den aamaaski eelosotowa. 17Keyaasi tukta fe bar keyaassi fa wuzason ephanak keronaata. 18Bulota fe bar maybaason ephanak orfo wolunaata. 19Es kabaasik naaner asusikitonewa tama tanifa barikitone haybubawungwa. 20Ese eelati wonaas yeeshu wedey beysani wonak sinnoynamato shiiphsoti. 21Es kabaasik han daas testenanneen kabira hawung kar'a sinnor hanneen ekalo dey isanne sinnor akama shana sinanawa. 22Es wonaasikito kawuna shaki sinfaanane asha mayoos zuuttere fui'tona kabatawa. Sinuntano kortere fe asuni meeni boor'a es wonaasikito kawunana.
23«Es kabaasik oonu: ‹Ese Kiristoos hanta feer› wedey ‹Ekesta feer yifaanane amanotiitawa› 24Eshni Kiristoosni meenawa eshni raajjuni meena kabsone. Baassok chimtefaanane kortere feese baassotinnu daagsuk akama akama biistera artonoy wuznewa diinqine bessone.
25«Ese han baron zuutira zeemma nittok makengwa. 26Es bari boor'a: ‹Zaboossitu fewa› yisefaatene kesatiita. ‹Aacho dimsitu fewa› yisefaatene amanotiitawa. 27Kawuna kawunna awakesnarkin awagirinarki biistefanaasimato Asuni Naani yoos dey esiisimatotu sinana. 28Kitu wuza faanaastatu arikasaas zuuttefa.
Kiristoosni Hepsa Wolle Yoo
(Mar. 13:24-27; Luqa. 21:25-28)
29«Es shanani wonaasikito aatnanneen orfo geregere awaas talmona; assaas dey chaarefbaason kalana; baakuraasikito dey samastan kere woottona; samaastaki hugnaasikito shorkona. 30Estan Asuni Naani beso samaasta bestona. Es kabaasik han daasta fe daraas zuuttere waassone. Asuni Naa dey akama hugnaknawa akama ulfinakna shaaruusikitota yeefeen biyone. 31Akama markatani kaama odsuni Ha'oosi wosiyaasikitonon wosuna. Baasso dey samaasi diltan hamma dilbaasta kar'a fa acheech fashaassi hamere barik kortere feese baassotin zuutusone» yi.
Belesini I'oosi Beso
(Mar. 13:28-31; Luqa. 21:29-33)
32Tusire dey Yesus: «Han belesini i'oosi besostan biira aruti. Waa'baas boodera tosha kotfana kabaasik begani assa ta'baason arutiwa. 33Esiisimato nitto dey es baron zuutira biyefeti kabaasik wonaas yaara finynyi tai'namato arutiwa. 34Futo nittok makefawungwa; es bar zuuttera sinana kabaneen han koontoos aafa aatana wuza. 35Samaasewa daase aatana; sinuntano kaamnaasikito isanne aafa aatana wuza.»
Daamiis Yoona Wonaasewa Sa'atiise Oonu Aane Arife
(Mar. 13:32-37; Luqa. 17:26-30, 34-36)
36Dey Yesus: «Es wonaasewa es sa'atiise asin Abaasteno samaki wosiyaasnu sinun Naaso sino oonu arifer aafe. 37Noohni neyaasik sinnaasimato Asuni Naani yoos dey ekkatu sinana. 38Es neyaasik tishuni akaastan zeemma Nooh Merkebiissi girina wononeen asuni meya meetnawa ushetna; ephetnawa giritna feeseter. 39Tishuni akaas yaara zuuttambesiise asin tishkunanneen aane arsoto. Asuni Naani yoos dey esiisimatotu sinana. 40Es kabaasik hep asuni meya buloni dimta ane wostosone. Isaas oottona; isaas fui'tona. 41Hep mashkasu isa dimta meya ni'ona; isaas oottona isaas fui'tona. 42Ese nitto Daamiis aro sa'atita yoonamato aane aruweti sinna boor'a guzira oodti. 43Sinuntano isa wuza arutiwa; keeni abaas waalaasi aaffa sa'atiista wiis yoonamato ari sinfaanane guzire keebaas dey yiishtonoynamato kalana kabawa. 44Esiisimato Asuni Naa dey nitto arunoyti sa'atiista yoonir sinna boor'a hoorera oodtiwa.»
Amanamto Wostinynyaasnawa Mangu Wostinynyaasna Asi Beso
(Luqa. 12:41-48)
45Dey Yesus: «Muubesiison sholsinaastak imonek daambaas keerki fe asusata taassina amanamto dey nibbare yere wostinynyaas oonso? 46Daambaas yeefena kabaasik ekka zagifeen danana es wostinynyaas suustowa. 47Futo nittok makefawungwa; es wostinynyaasin fa waagba zuuttambaase asiistatu taassunawa. 48Sinuntano es mangu wostinynyaas: ‹Daamtaas wokketu yoonawa› yit nibbaassi safarefaananenawa, 49Wostoni zomoba sina baassotin ichak kabifaananena zayini meyaneen ane meere ushfaanane; 50Es wostinynyaasa daam bar arunoyna wonaknawa oodnoyna sa'atikna yoona. 51Es wostinynyaasin heppik kalasire ixabaason dey sinnoy sinne bestesefe baassoneen ane zaguna. Estak waasnewa ay'ni koyet foone sinana» yi.

Currently Selected:

Matewos 24: YemsaNTL

Highlight

Share

Copy

None

Want to have your highlights saved across all your devices? Sign up or sign in