Maatoosa 6
6
Manqqitayis inggith bagga
1«Gujjikka Yesuusa yhay garkk yeegeeza; Asii bo7o gi yi lo77o oosa as tiina oothaamay garkk naaginttoytta. Yeypp attiko salo yez yi Adaypp woyito denggaamii.#Mat. 23:5
2«Yinttii manqqitayis inggittar as tiina bonchchinttodayis gi cubbitay oge doonayidannee Ayihuditay Woosa keethitayid oothizay garkk asii bo7o gi tulitula puggisppate. Ta yinttis turo odiza; unttii fa waaga ekkeeza. 3Zin yi manqqitayis inggodar yi ushachch kushay oothizana yi haddirss kushay erippe; 4Yikkee imay geema maaqqo. Geema oothizana bi7iza yi aday yinttis woyito pidhdhe immada.
Woosa bagga
(Luq. 11:2-4)
5«Woosa woossittar cubbo asay garkk hanppatte. U, fana asii bo7o gi Ayihuditay Woosa Keeth ganccennee oge doonal eqqii woossizana dosiza. Ta yinttis turo odiza; unttii fa kunth gate ekkeeza.#Luq. 18:10-14 6Zin ne woossittar ne qol7a gelii, gazara gorddii geema yez ne Adayiko woossoba; geema oosintteez baz bi7iza ne aday neesi ne gata immada. 7Yi woossittar Ammanoowa as garkk cere qaala mahii mahii adussis woossippatte. U adussisi woossiko Xoossii si7iza gi qoppiza. 8Yey gishos, unttiisay garkk hanppatte. Abis giiko, yi aday yinttis abii koshshizako yi woossodaypp tiinattii eriza. 9Yikkee, yi yeegii woossoytta:
« ‹Salo yez nu adayyo,
Ne sunthay anjjintto.
10Ne kaatetithay ye7o,
ne shenay salo haneezay garkk
sa7allakka hano.
11Gallasa katha yhayino nuus inggoba.
12Nuunii nuna qoheezitayis, atto gizay garkk,
nuuskka nu qoheez baz atto goba.
13Nuna iitapp ashshobapp attin
paace gncce gelisippe.
Kaatetithii, wolqqannee bonchcho
medhinas neesi. Amin7e.›#6:13Kaatetithii, wolqqannee Boncho medhinas neesii. Amin7e: Gizay pettii pettii binii maxaafitayid baaya.
14«Yi yinttan qoheezitayis atto giiko, salo yez yi Aday yi qoheez bazkka atto goda.#Mar. 11:25-26 15Zin yi hara as nagara atto gaam ixxiko yi Aday yi nagara atto gamii.»
Xooma bagga
16«Yi xoomttar cubbitay garkk shullippatte. Abis giiko, unttii xoomizana asii erod garkk fa sina kayisiza. Ta turo odiza; unttii fa gata ekkeeza.
17«Zin ne xoomittar ne aafa meeccoba, ne omma tizhinttoba. 18Yey garkk ne oothiko ne xoomiza xoomay asapp geemiza, zin geema yez ne Aday eriza xooma maaqqada. Geema oosintteez baz bi7iza ne Aday neess woyito immada.
Shalo salo shiisho bagga
19«Bilannee woosho dhabisiza aqo, kayzo bookkii ekkiza aqo, yha sa7all, yinttis shalo shiishippate.#Yay. 5:2 20Zin bilannee, woosho, dhabisoowa, kayzo bookkii ekkowa aqo salo yinttis shalo shiishoytta. 21Ne shalay yeza aqo ne wozinaykka ezayid yezoda.
22«Aafe asetith ubbas xomppe. Yey gishos, ne aafay path maaqqiko ne gallay ubbay poo7o maaqqiza. 23Ne aafay harginttiza maaqqiko ne kunth asetithay dhuma maaqqiza. Yikkee, neell yez poo7ay dhuma maaqqiko, dhumay ab garkk aadho dhumodeshsha!
24«Pettii asii nam77ii goditayis moodinttodayis danda7ooya. Petta qadhdhiko yhankka ixxiza; woy petta bonchchiko yhankka leqqiza. Xoossisinnee miishes moodinttodayis danda7ooya.
Un77inttippate
(Luq. 12:22-31)
25«Yikkee, si7oytta! Yi shemppayis, ‹Ab maadee? Ab uzhode?#6:25Ab uzhode Gizay binii maxaafitayid baaya. Ab ma77ode?› gi qoppippatte; shemppo kathapp, galla ma7opp aadhoosa? 26Salo kafita bo7oytta; unttii zerooya, buucoya, shaale olooya, zin yi salo aday unttan muziza. Yeezin yi unttapp lo7ithii aadhoosa? 27Yi ganccepp un77inttii fa laythal afa pettii gallas gujjodayis danda7izay yenee?
28«Ma yinttii ma77izabazis abis un7inttinee? Wora yez fudhita bo7oytta, u oosor daaburooya woy suqqooya. 29Hara attozin, kaat Solomone fa bonchcho ubbayir yha fudhitaypp pettay garkk ma77ekkaya.#1 Kaat. 10:4-7; 2 Zeena. 9:3-6 30Yinttanno, ammano pacceezitayyo, Xoossay yhayino benttii wontta tama gancce wodhodayis yez maata yeezii ma7isiza maaqqiko, yinttan unttapp aathii wayizii ma7isoosa? 31Yey gishos, ‹ab maadee? ab uzhode? ab ma77ode?› gi un77inttippete. 32Yhaya ubba Xooss ammanoowa asay gaanthii denggodayis un77inttiza. Yi salo aday ye ubbay yinttis koshshizana eriza. 33Zin ubbapp tiin Xooss kaatetithinnee e xillotitha kozhoytta; ye ubbay yinttis guzhinttoda. 34Yey gishos, wonttas qoppittar un77inttippate. Wontta paass metintto; pettii pettii gallasayis e iitatithay gidoda.
Currently Selected:
Maatoosa 6: MeloNTL
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
