Luke 1
1
1Ke'hi leca laq khrawng 'Tawphiluq' j han'hi yj 'Pxtpaw Phawlaw' hawu nghxt khrawng heq a' kxmyom kyaq. 2A'cxk nawk khaw vj thoq jn a'kxmyom khrawng mhuyaw tiq sawksi heq na 'Pxtpaw Phawlaw' tok lupcak pet tiq heq na an'hawu nghxt baw tjng ngj khrawng batnghawt na yok ba hai an'poqcai nghxt. 3Jn baw khennj mji nghxt thon nghxt cjn tiq sitawng heq khrawng ke na a'cxk nawk kj ka'thoq a'pawi caw vj nghimin theqna 4Nang na na'coksawng nge nghxt laq khrawng heq a'mhawn kyaq tiyj na'cok hai tok kj nang ceng tjq ka'yok laq khrawng ngj thonne. 5'Heruka' mawng na 'Yuqdaq' kre a'om nghxt tun khaw vj 'Cakhariq' ming naw tiq 'Kyu' ''Mhawpaw'' pjinghawt a'mji. 'Cakhariq' khrawng 'Abiqyaq'b tiyj an'hawu khrawng ''Mhawpawc'' bong duk kj kxq pjinghawt tj a'thonne. Nhi immawq nu 'Iliqsyaqbet' kha cxkcxk mhawpaw 'Arung' tiyj an'hawu khrawng ''Mhawpaw'' yx vj kxq komlo tiq j thonne. 6Nhi hji pjinhiq khrawng 'Pxtpaw Phawlaw' petnyettaw nge theqna a'mhaw mji yaq hawn nj a'hiq mji. Jnkhen cuvj krundiu tiqd hji yj a'hiq thonne 7'Iliqsyaqbet' khrawng a'lum khennj a'hiq caw mji yju. A'hiq sawk kha a'cang koklok lo pjn. 8'Iliqsyaqbet' khrawng a'lum khennj a'hiq caw mji yju. A'hiq sawk kha a'cang koklok lo pjn. 9Jnkhaw hxvj 'Mhawpaw' heq thum baw vj Phawlaw kyong duk kj a'o-ing heq dawpawq hai an'lui nawk kj 'Cakhariq' a'lui khawm laq. 10Jn baw khennj 'Cakhariq' na a'o-ing heq a'dawpawq tun nj khrawng heq na kha Phawlaw kyong vawng ngj suq an'tong. 11Jnkhaw vj 'Pxtpaw Phawlaw' na a'tjq lo khrawng hawn cipaw dawng lo theqna a'o-ing an'dawpawq nawk khet lawm dxn nj a'dawn ne. 12'Cakhariq' na hawn cipaw a'mhuq khaw vj kiqca tong na a'letlet te. 13Hawn cipaw na "kiqkawq 'Cakhariq' j nang suqtong khrawng 'Pxtpaw Phawlaw' na a'cok pjn. Nang immawq nu 'Iliqsyaqbet' na nang tok a'cawpaw pjinghawt a'caw nawk pet tai. A'ming ce 'Yawhen' tiyj na'sui laq ai. 14Nhi mji lo khaw vj nang'hiq lung lhju laq baw vj khrawng batnghawt heq kha an'lung lhju laq ai. 15Ibahai yj nawk hxvj ce 'Yawhen' khrawng 'Pxtpaw Phawlaw' mhawimhaw vj cimkya tiq pjinghawt tj a'thonne yai. 'Capyek' voi hawng na yu o-lawk khrawng i-khaw vj kha o-hai siyju 'Yawhen' khrawng a'nu hjntung duk kj ka'thoq cimkya tiq muikhraw dj a'mji nghaq ai. 16'Icare' khrawng yx batnghawt heq na lungbong suisaw ye ba na nhi tiq 'PxtPaw Phawlaw' ceng pawt 'Yawhen' na a'ten ne ba sawk kai. 17'Yawhen' khrawng 'Parawphek'f 'Iqliqyaq' baw vj cimkya tiq muikhraw dj a'phun mji na 'Pxtpaw Phawlaw' na mawdong a'dawn sawk khrawng ngj a'thon nai. Nhi na nu-paw na caw-nawu lungthin nyhinyhop ba pet tai. Kheu nge yaq tiq heq kha nge ba hawn nj krundiu na mhawnkawn tiq a'coknyen heq a'coksawng pet tai. Jn baw hxvj yawng, khrawng heq khrawng kha 'Pxtpaw Phawlaw' a'khrai lo khaw hxvj a'cjncjn nj an'mji yai tiyj a'hawu 18Jnkhaw vjyawng 'Cakhariq' na hawn cipaw vj "nang hawu baw vj a'thonne lo vai nawk khrawng ke na i-baw ka'cok khoq ai. Ke'hiq peha putaw pjinhiq khrawng a'lhji yj ka'hiq cang koklok nghxq tiyj a'hawu ba. 19Hawn cipaw na nhi yj "ke khrawng 'Pxtpaw Phawlaw' mhawimhaw vj kheukhaw hawu laq tiq 'Gabrelaq' j ka'thonne. Ni sitawng pawi soqsai hai yj 'Pxtpaw Phawlaw' na ke khrawng nang ceng tjq a'tjq lo. 20Ke kheukhaw na'yum yaq khennj ni thonne lo hai tiq heq a'thonne lo lhawn tjq kheu khoq yaq tiq a'mong paw vj na' thonne yai. Khonhxp a'kxmyom na ce ke kheukhaw baw a'thonne lo vai tiyj a'hawu. 21'Cakhariq' na hawn cipaw khrawng Phawlaw kyong duk kj a'hiq krju ve tun nj kyong vawng duk kj suqtong tiq khrawng heq na kha 'Cakhariq ' khrawng an'cong nge. Nhi tiq na khrawng Phawlaw kyong duk kj 'Cakhariq' ibahai yj ni hyawq a'diu laq nawk khrawng co hai an'lx. 22'Cakhariq' krawng pawt a'thok lo ba hxvj kheu theq tiyju. Jnkhennj Phawlaw kyong duk kj a'mji khaw hxvj 'Cakhariq' na nimik u-nghawt a'mhuq nghxt nawk khrawng khrawng heq na an'cok nawk laq. Nhi khrawng a'mong khennj khrawng heq dj a'kutkho vjyawng dawn na a'khrju kheu ve. 23'Cakhariq' khrawng Phawlaw kyong duk kj a'poqcai hai mji tiq heq a'poqcai cawng na ce a'im nghaw pawt a'cet ba. 24Khonhxp meqcaw a'diu lo na ce 'Cakhariq ' immawq nu 'Iliqsyaqbet' kha a'pum yeq lo. A'hjn khraw panghaw tjq khrawng heq dj khom me kaw imduk kj a'mji ye. 25'Iliqsyaqbet' na 'Pxtpaw Phawlaw' na a'manne khennj ka'hjn a'mji pjn. Khrawng heq nuiqkheu nawk kj kxq kha ka'ljt pjn tiyj" a'hawu ve. 26'Iliqsyaqbet' a'hjn khraw sok a'mji khaw hxvj 'Pxtpaw Phawlaw' na hawn cipaw 'Gabrelaq' khrawng 'Galiqle' kre 'Nacarek' luq j mji tjq nhawknhu caw ceng tjq a'tjq batx. 27Jn nhawknhu caw khrawng mawnglen 'Davik' yx vj kxq komlo tiq congkrang caw 'Yawtep' na a'nghiq e-pjn. Jn nhawknhu caw na 'Mariq' tiyj a'ming nawk. 28Hawn cipaw 'Gabrelaq' khrawng 'Mariq'ceng ngj khrai lo theqna 'Pxtpaw Phawlaw' ceng ngj mhawi laq tiq nhawknhu caw vj bjikhji bjiq seq tiq. 'Pxtpaw Phawlaw' khrawng nang lawm mj a'pui ye pjn tiyj a'bek ke. 29'Mariq' na hawn cipaw 'Gabrelaq' kheukhaw a'yawk khaw hxvj i-a'hawu ljk nawk khrawng yawcu khoq yju. 30Jnpjnnj hawn cipaw 'Gabrelaq' na jn mhutaw caw vj "kiqkawq 'Mariq' j. 'Pxtpaw Phawlaw' na nang ngj mhawi a'pet pjn. 31Nang na'hjn mji lo theqna cawpaw pjinghawt na'caw naw kai. Nhi ming ce 'Yesyuq' tiyj sui bjiq. 32Nhi khrawng a'phun len tiq pjinghawt tj thonne theqna a'lhxng dj vj mji hai tiq Phawlaw caw tiyj an'pan ne laq ai. Nhi syaw yx mawnglen 'Davik' baw vj nhi tiq yxyang pjng khoq hawn nj 'Pxtpaw Phawlaw' na nhi yj a'pet tai. 33Nhi na 'Yakuk' yxyangg heq khrawng sawk nghawt a'om mai. Nhi neng-ngeng kha i-khaw vj kha krak hai siyju tiyj a'hawu. 34'Mariq' na ke ce putawcaw dj mji nghaq phu yaq tiq nhawknhu caw yawng ni ce i-baw a'sikhok kai tiyj hawn cipaw 'Gabrelaq' j a'hawu ba. 35Hawn cipaw na kha "Cimkya tiq muikhraw nang ceng ngj khrai lo theqna 'Pxtpaw Phawlaw' phun na nang a'lhom xp pai. Jn baw mji lo hai tiq lhxng dj tiq dikcaw khrawng kha 'Pxtpaw Phawlaw' caw tiyj pan ne khrawng a'khawm laq ai. 36Nang dj na'yx soi tiq 'Iliqsyaqbet' kha a'cang koklok pjn a'caw caw-naw khoq tiyju tiyj khrawng heq na khin u-na kha tuq j a'hjn khraw sok a'mji pjn. 37'Pxtpaw Phawlaw' na a'poqcai khoq yaq khrawng i-kha mji yju tiyj" a'hawu. 38Jnkhaw hxyawng 'Mariq' na "ke kha 'Pxtpaw Phawlaw' ma pjinghawt yawng. Ke khrawng 'Pxtpaw Phawlaw' na a'lx mji hxce nang hawu baw si bjiq seq tiyj" a'hawu ba . Jn hxvj yawng hawn cipaw kha 'Mariq' ceng ngj kxq a'cet ba. 39Khonhxp tawng tawng diu lo lhawn nj 'Mariq' kha 'Cakhariq' mji nawk kongdek kj kxq 'Yuqdaq' kre, luq, luq nghawt tjq a'yawng ngj a'cet te. 40Nhi khrawng jn tjq a'khrai na ce 'Cakhariq' imduk vawng theqna 'Cakhariq' immawq nu 'Iliqsyaqbet' a'bek ke. 41'Mariq' na a'bek ke khrawng 'Iliqsyaqbet' na a'yawk na mhoknghawt pjttj nhi hjn duk kj kxq dikcaw kha a'dong nge. 'Iliqsyaqbet' kha cimkya tiq muikhraw vj kxmyom na a'lung lhju. 42'Iliqsyaqbet' na 'Mariq' j nang khrawng a'kyaw mhutaw heq thawk kj na'bjikhji. Nang caw lo nawk hai dikcaw kha a'bjikhji. 43Ke 'Boipaw Yesyuq' nu ce ke ceng ibahai yj a'khrai lo. Ni baw bji tiq ke na ka'khawm laq sxtx. 44Nang na na'bek ke khrawng ka'yawk na ke hjn duk kj kxq dikcaw kha a'lung lhju na a'cak ke. 45'Pxtpaw Phawlaw' sitawng kheukhaw khrawng a'mhawnmx thonne lo vai tiyj na'yum khen cuvj na'bjikhji tiyj pang na a'hawu. 46Jnkhaw hxyawng 'Mariq' na 'Pxtpaw Phawlaw' seye naw na a'tjuqkauq ve nawk. 47Ke lungko heq kha ljulawk ke tiq 'Pxtpaw Phawlaw' tok kj lung lhju laq. 48Ke khrawng 'Pxtpaw Phawlaw' ceng ngj nem me dj tiq ma vj thonne hx na kha tuq j ka'thoq cat na yx mawq tjng ngj kxq khrawng heq na ke yj khunkhjipawi a'pet khrawng khawm laq tiq tiyj an'hawu vai. 49A'phun len tiq 'Pxtpaw Phawlaw' na ke tok kj bji djdj tiq a'poqcai pet pjn. 'Pxtpaw Phawlaw' ming kha lhxng dj na a'kxmyom. 50Hjmhjmmj ka'thoq 'Pxtpaw Phawlaw' na nhi kiqken na nhi kheu nge tiq khrawng heq j mitta a'tawk nawk khrawng a'dawn. 51A'kut tj kha a'phun len khrawng a'dawn. A'mai len tiq khrawng heq kha nhi phun nj an'cjutit. 52Mai yj om tiq heq khrawng nhem ba theqna lungbong nhem me tiq heq j a'om ba sawk. 53Mxthak tiq heq j ce tui lhim tiq pe theqna boima tiq heq ce kut honglak kj a'tjq ba. 54Nhi nawye nawk khrawng khin ne theqna nhi tok lup tiq 'Icare' khrawng yx heq khrawng a'tunpan pet. 55Ke'hi poksyaw yx vj thon tiq 'Abrengheng' na a'caw-nawu heq j 'Pxtpaw Phawlaw' na kheukhaw a'tawk nghxt baw vj a' poqcai pet pjn tiyj a'tjuqkauq ve nawk. 56Jnpjnnj 'Mariq' kha 'Iliqsyaqbet' dj khraw thum mji nghxt nghaq na a'im nghaw pawt a'cet ba. 57'Iliqsyaqbet' khrawng khraw ngawq theqna a'cawpaw pjinghawt a'caw nawk. 58'Iliqsyaqbet' khrawng 'Pxtpaw Phawlaw' na a'lhji yj mitta taw na a'nawye nawk tiyj co tiq yaw tiq a'imcengpui na bongbawi yxyang heq kha nhi lung lhju baw vj an'lung lhju kyaq. 59Dikcaw mji na nhxp sat nhxp a'khrai na ce nhi tiq thum baw a'vxn awt pjih poqcai hai yj khrawng heq an'khrai lo. Nhi tiq na khrawng dikcaw ming ngj a'paw ming pui hawn nj 'Cakhariq' tiyj sui pet hai an'lx tyaw 60Sinakha a'nu na ce " 'Yawhen' tiyj yawng an'sui yai" tiyj a'hawu. 61Khrawng heq na kha "nang'hi yx duk kj ni-baw ming naw tiq mji yju cuq tiyj" an'hawu. 62Jnkhaw hxyawng jn heq na khrawng a'paw vj thon tiq 'Cakhariq' j na'caw ming khrawng i-baw sui dang na'ti tiyj a'kutkho dawn na an'nghiq. 63'Cakhariq' na kha tawngphung lhap-nghawt tong theqna nhi caw ming khrawng 'Yawhen' a'si tiyj a'yok khaw hxvj yawng mhu tiq khrawng heq tomti na a' mhawnkau nghxq yawng. 64Jnkhaw vjyawng jn dxn kung ngj 'Cakhariq' khrawng kheu ba khoq na 'Pxtpaw Phawlaw' 'seye naw na a'tjuqkauq ve nawk. 65Imcengpui, bongbawi heq na kha jn baw a'thonne khrawng an'mhuq khaw hxvj an'kiqca tong kyaq. Khrawng heq na jn sitawng khrawng kongdek kj kxq 'Yuqdaq' kre yj mji tiq takaq na i-khjk tom mj an'hawu yok. 66Jn sitawng yaw laq tiq khrawng heq tomti na kha "ni dikcaw a'len lo na ce i-baw mji hai tiq kha'co yju tiyj nhi tiq lungthin duk kj a'yup caw vj an'hawu ve tong. 'Pxtpaw Phawlaw' phun len khrawng kha dikcaw dj a'mji nghaq. 67Cimkya tiq muikhraw khrawng 'Cakhariq' ceng tjq khrai lo theqna mawlawm mj thonne lo hai heq a'tjuqkauq ve nawk khrawng ce. 68"'Icare' khrawng yx heq 'Pxtpaw Phawlaw' bjikhji bjiq seq. Nhi ce nhi yx heq ljulawk ke ba hai yj a'khrai lo vai. 69'Pxtpaw Phawlaw' mapaw 'Davik' yx vj kxq komlo tiq phun len na ljulawk ke hai khrawng ke'hi tok kj a'pet lo vai. 70Hjmmj ka'thoq 'Pxtpaw Phawlaw' na lhxng dj tiq 'Parawphek' heq j a'hawu nghxt baw tjng ngj 71'Pxtpaw Phawlaw' na ke'hi khrawng pawi yaq tiq khrawng heq ceng ngj kxq ljulawk ke na mhu do yaq tiq sunpui heq ceng ngj kxq kha a'ljt sawk ba 72'Pxtpaw Phawlaw' na ke'hi poksyaw heq a'man nai. Nhi na a'hawu nghxt khrawng lhxng dj tiq sawksi khin ne naw na a'mhawt te yai tiyj a'sin nghxt. 73'Pxtpaw Phawlaw' na ke'hi syaw vj thon tiq 'Abrengheng' yj a'pet nghxt khrawng katiq baw tjng ngj 74ke'hi khrawng sunpui heq kut dj kxq ljt sawk theqna ke'hi heq kha kan'sawk heng tjq kiqca lawkaw 'Pxtpaw Phawlaw' tok kan'lupcak njn nai. 75Jnkhaw vjyawng ke hi tomti kha 'Pxtpaw Phawlaw' mhawimhaw vj kan'cimkyalek kai. Kan'sawk heng caw hawm hxvj 'Pxtpaw Phawlaw' tok lupcak hai a'pet tai. 76'Cakhariq' na "ke caw vj nang khrawng lhxng dj tiq 'Pxtpaw Phawlaw' 'Parawphek' tiyj an'hawu vai. Ibahai yj nawk hxce 'Boipaw Yesyuq' cet nawk hai lawm cimsya hai tiq j an'thon nai khennj. 77Pxtpaw Phawlaw' na khrawng heq a'kret a'sisaw heq mji khrawng lhjq ba na a'ljulawk ke ba khok nawk khrawng nang na khrawng heq j na'hawu yok laq ai. 78'Pxtpaw Phawlaw' na a'manne khennj hawnnhi yj khoni a'ang baw tjng ngj nhi mitta kha han'hi ceng ngj a'ang ngai. 79Jn a'ang na khrawng bjt laq hai lawm mj cet hai tiq khrawng heq na an'kret mji tiq heq kha ljt ba khoq na yadik dawmdak mji laq hai lawm a'dawn nai. 80'Yawhen' khrawng len lo theqna a'muikhraw kha a'cang lo. 'Icare' khrawng yx mhawimhaw vj 'Pxtpaw Phawlaw' tok a'lupcak hai khrai lhawn nj nhi khrawng tjunu khocxn nj a'mji ye laq.
Currently Selected:
Luke 1: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
