Luke 5
5
1Nhxp-nghawt khaw vj 'Boipaw Yesyuq' khrawng 'Gawngnetarawk' awngv ka vj a'tung khaw hxvj khrawng heq batnghawt khrawng 'Pxtpaw Phawlaw' mongthem valung nge hai yj nhi ceng ka vj an'cuq-e lo. 2'Boipaw Yesyuq' na kawmpawng ka vj hawp pe tiq long cawng nhiq a'mhuq. Ngaw sui tiq heq kha long ngj kxq kom na pjkva heq an'bot. 3'Boipaw Yesyuq' na jn long cawng nhiq j kxq 'Syiqmung' long ngj kawi na long khrawng kawmpawng ngj kxq meqcaw khau hai a'hawu. Jnkhaw vjyawng nhi na long duk kj ngvaw na khrawng heq j a'cokhawu tx. 4A'cokhawu cawng na ce 'Boipaw Yesyuq' na 'Syiqmung' ngj "tui thuk nawk pawt long lhju theqna ngaw mawn hai tok nang pjkva khrawng khraw va" tiyj a'hawu. 5'Syiqmung' na kha "'Boipaw' vj, ke'hi na khoyawn yawn nghawt kung a'yai khawm na sui u-hx na kha ngaw lu-nghawt kha laq u-hx. Sinakha nang na na'hawu khen cuvj ke'hi na pjkva khrawng a'tha kan'khrawk ba vai tx" tiyj a'hawu. 6Nhi tiq na an'khrawk na ce pjkva taikrut taiq thuiq hawn nj ngaw heq batnghawt an'laq. 7Jn baw khennj a'kyaw long ngj kxq ngaw mawn tiq heq j nhi tiq phui hai an'pan ne. Jn heq an'khrai lo na ce long cawng nhiq j ngaw an'san na long kung a'nikyup kat. 8Ni thonlok heq an'mhuq khaw hxvj 'Syiqmung Petaruqw na 'Boipaw Yesyuq' khocju vj khukdyawq caw vj ngvaw theqna "'Boipaw Yesyuq' j, ke khrawng a'kret a'sisaw kong tiq j ka'thonne khennj ke ceng ngj kxq cet ba va" tiyj a'hawu ve. 9Ni baw a'hawu laq khrawng ce nhi tiq na ngaw a'lhji yj laq theqna an'mhawnkau kyaq khennj. 10'Syiqmung' pekpui heq duk kj 'Cebede' caw 'Yakuk' na 'Yawhen' pjinhiq kha a'hiq pui. Jnpjnnj ce 'Boipaw Yesyuq' na 'Syiqmung' ngj "kiqkawq nang khrawng tuq j ka'thoq ngaw na'mawn hai caw ke nhu yun hai khrawng heq sjmnhjm hai tiq j na'thon nai" tiyj a'hawu. 11Jnkhaw vj nhi tiq na long heq kawmpawng ngj an'hawp pjnnj an'tawk ke khrawng taw nghxt theqna 'Boipaw Yesyuq' nhu yawng an'yun ne kyaq. 12'Boipaw Yesyuq' khrawng luq, luq nghawt tj a'mji ye. Jn luq j a'pumyo cuvj niq len koppe tiq putaw pjinghawt a'mji. Nhi na 'Boipaw Yesyuq' a'mhuq khaw vj a'mhawimhaw vj vawk ke theqna "Boipaw vj, Boipaw vj na'lx mji hxvj ce ke niqnawng heq khrawng khrxk ba sawk maw va" tiyj a'hawu ve. 13Jn pjnnj 'Boipaw Yesyuq' na a'kut hyan na jn khrawng, khrawng a'kut tj suk theqna "ke na ka'lx mji khrxk bjiq seq" tiyj an'hawu na jn dxn kung ngj nhi niqnawng heq a'khrxk ba. 14Jnpjnnj ce 'Boipaw Yesyuq' na nhi yj ni baw na'niqnawng a'khrxk ba khrawng u-vj kha sai kawq tiyi a'sin. Jn baw a'sin cawng na ce 'Boipaw Yesyuq' na nhi yj "'Mhawpaw' ceng tjq cet theqna na'punghaw ko na'punghaw dawn ne ye. Pjnnj ce nang niqnawng a'khrxk ba khrawng khrawng heq mhuq j-sawksi dawn hai tok 'Mawsye' petnyettaw vj kxq baw vj pawq hai mji tiq pawq bjiq" tiyj a'hawu. 15Jn baw sin nghxt na kha 'Boipaw Yesyuq' sitawng heq khrawng i-khjk dxn tom mj a'khrai yok khennj khrawng bong nghawt khrawng 'Boipaw Yesyuq' tala tawmthong nge hai tok an'niqnawng heq to-ve hai tok kj an'cuq-e lo. 16Sinakha 'Boipaw Yesyuq' khrawng, hittu hittu vj khrawng heq hiusip nawk dxn nj pjinghawt pjtcaw cet na suq a'tong nge soi. 17Nhxp-nghawt khaw vj 'Boipaw Yesyuq' khrawng tala tawmthong soqsai na a'mji. Jn tun nj 'Galiqle' kre na 'Yuqdaq' kre yj mji tiq nam tjng ngj kxq heq, 'Yeruqsalawng' luq j kxq heq khrai lo tiq 'Phariqsye'y heq na uqpade yawcu tiq sarapaw heq kha jn dxn nj an'ngvaw. 'Pxtpaw Phawlaw' na 'Boipaw Yesyuq' j khrawng heq an'niqnawng khrxk khoq hawn nj a'phun a'pet. 18Jnkhaw vj khrawng heq na lilek tiq khrawng pjinghawt khrawng djngphawk kj tawng na an'ba lo. Jnpjnnj ce imduk pawt hawn na 'Boipaw Yesyuq' mhawimhaw vj taw khok hawn nj an'poqcai tyaw. 19Sinakha khrawng heq batnghawt an'mji khen cuvj 'Boipaw Yesyuq' ceng tjq khrai naw khoq yju uq. Jnkhennj imkrung hawn nj kawi pui naw theqna khrawng heq pxm mj mji tiq 'Boipaw Yesyuq' mhawimhaw tjq djngphawk cu yoi yj an'hyj. 20'Boipaw Yesyuq' na jn khrawng heq na an'yum khrawng a'mhuq khaw vj lilek tiq j "khepui yj nang a'kret a'sisaw heq khrawng ka'lhjq pjn" tiyj an'hawu. 21Jnkhaw vjyawng 'Phariqsye' heq uqpade yawcu tiq sarapaw heq na "ni khrawng na a'punghaw ko a'punghaw hu-u tiyj xt te naw na ni baw vj 'Pxtpaw Phawlaw' hyju nawk khrawng kheukhaw a'hawu laq theq. A'punghaw ko a'punghaw 'Pxtpaw Phawlaw' tiyj a'xt te nawk kaw. PhawLaw siyaq hxvj ce u-na kha a'kret khrawng lhjq khoq yju" tiyj an'xt nawk. 22Jn baw na kha 'Boipaw Yesyuq' na nhi tiq na an'xt nawk khrawng a'cok khennj "ibahai yj nang'hi lungthin nj ni baw nan'xt nawk laq theq. 23Nang a'kret heq khrawng ka'lhjq pjn tiyj ka'hawu khrawng na thju na krawk ke ya tiyj ka'hawu khrawng i-bawng ce a'loi tyaw. 24Sinakha 'Ceqcaw'z na ni somdek kj mji tiq a'kret heq khrawng a'lhjq njn nawk khrawng nang'hi na co hawn nj ka'dawn nai tiyj hawu theqna, jn lilek tiq j "ke ka'hawu vai thju na na'djngphawk nghaw lju na im pawt cet ba va" tiyj a'hawu. 25Jn baw a'hawu na jn khrawng, khrawng, khrawng heq mhawimhaw vj mhoknghawt pjttj thju na a'hjn nawk nghaw khrawng djngphawk lhok ba na 'Pxtpaw Phawlaw' phun tjuqkauq ve pheng im pawt a'cet ba. 26Khrawng heq na kha an'mhawnkau nghxq yawng. An'kiqken ne tong khennj 'Pxtpaw Phawlaw' phun tjuqkauq naw u-na " tuq nhxp pj han'hi na si khoq yaq tiq khrawng han'mhuq laq pjn" tiyj an'hawu ve tong 27Jnpjnnj ce 'Boipaw Yesyuq' khrawng jn dxn nj kxq a'cet ba hxvj 'Leviq'a ming naw tiq a'phu tong tiq pjinghawt khrawng a'phu tong nawk dxn nj a'ngvaw khrawng a'mhuq na "ke nhu yun lo va" tiyj a'hawu. 28'Leviq' kha thju na a'tawk ke khrawng heq taw nghxt theqna 'Boipaw Yesyuq' nhu vj a'yun ne lhji. 29Jnpjnnj ce 'Leviq' na e-pawi ok-pawi yj nhi im mj 'Boipaw Yesyuq' na a'tabeq heq a'khin nawk. Nhi khepui a'phukok tiq heq na a'kyaw khin heq kha an'e-o nghaq. 30'Phariqsye' heq meqcaw, uqpade yawcu tiq sarapaw heq meqcaw na "nang'hi khrawng ni a'phu tong tiq heq, a'kyaw a'kret a'sisaw mawq heq dj ibahai yj nan'e-o nghaq" tiyj setsui theqna 'Boipaw Yesyuq' tabeq heq j si an'lx. 31'Boipaw Yesyuq' na "kang nge tiq na to-to tiq lx yju, kang yaq tiq na yawng to-to tiq a'lx. 32Jn baw tjng ngj ke kha an'punghaw ko krun mhawn tiq tiyj xt te naw tiq heq tok ke ka'lo siyju. A'kret saw mawq heq an'lung suisaw ye hai tok ke ka'lo yawng" tiyj a'hawu ba. 33A'kyaw khrawng heq na kha 'Boipaw Yesyuq' j " 'Yawhen' na nhi tabeq heq khrawng tanaw tanaw vj e-ok ngha na suqtong khrawng an'poq soi. 'Phariqsye' tabeq heq na kha jn baw an'poq soi. Sinakha nang tabeq heq na ce ibahai yj e-ok ngha yju uq" tiyj an'nghiq. 34'Boipaw Yesyuq' na 'mawn lju pji yj lo tiq heq khrawng bjikhji paw tabeq heq khrawng bjikhji paw dj an'mji nghaq khaw vj e-ok an'nghaq khoq ai yaw. Ni baw vj u-na kha poqcai hai siyju uq. 35Sinakha bjikhji paw vj thon tiq ke khrawng nhi tiq ceng ngj kxq an'ciq-e hai cxn khrai na ce nhi tiq khrawng e-ok an'nghaq vai" tiyj a'hawu. 36Jnkhaw vjyawng 'Boipaw Yesyuq' na nhi tiq j khuicut nawk a'hawu khrawng ce "u-na kha tha tiq suisawk tai na phem tiq suisawk bx naw yju uq. Jn baw nan'poqcai na ce tha tiq suisawk kha a'tai laq phem tiq suisawk dj kha piqkawp pe khoq yju. 37Jn baw tjng ngj tha tiq 'Capyek' voi khrawng phem tiq a'vxn an'khoi khrawng tui ok kj u-na kha thunsan yju uq. Jn baw nan'poqcai na ce tha tiq 'Capyek' voi na phem tiq a'vxn an'khoi khrawng tui ok khrawng a'pjk nawk khoq khennj 'Capyek' voi kha bo theqna a'vxn an'khoi khrawng tui ok kha a'cimkrak kai. 38Jnkhennj 'Capyek' voi tha khrawng a'vxn an'khoi khrawng tui ok tha vj nan'san laq ai. 39Phem tiq 'Capyek' voi o-tiq tjng na phem tiq 'Capyek' voi yawng a'o pha tiyj hawu theqna tha tiq 'Capyek' voi o-do ti hai siyju uq" tiyj a'hawu nghxt.
Currently Selected:
Luke 5: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
