Luke 13
13
1Yaq khinga boengak khlaung haq lo uk loeqteq Pilat mang loeq Galilae plei saw boengaq a'thi yoeng yaqhniq loeq án puzaw khoeq yeitoeng án hnoek hni taeng án hmyauk. 2Boiyesuq loeq, yaq Galilae plei saw haqkhoeq yaqkha a'tuk án laqiya teq a'coe Galiqlae plei saw haq thauka a'plaet thaengthaeng sai saw haq taeng nán mkhin moe? 3Yaqkhakhut seiyaq. Nanghiqa keiloeq ka'mhau haqlai. Nanghniq awlum khaw sa'diq laqaq tuk nak loeq yaq khakhut nán du laqai. 4Siqlau hmyawcang loeq ploe nauk haqloeq teq a'dusaw ha'laisaet khoeq a'coe Yeruqsalein mloeq saw haq thauka a'plaet thaengthaeng sai saw haq taeng nán mkhin moe? 5Yaqkha seiyaq. Nanghniqa keiloeq ka'mhau haqlai. Nanghniq khaw sa'diq laqaq tuk nak loeq yaq khakhut nán du laqai taeng a'hau haq. 6Yaqkiyoeng Boiyesuq loeq khlaung haqla pung a'mtumi nauk haqkhoeq teq, khlaung poemaka ca'byeit khlai duka a'mcoeq khoeq paipei thing thingak a'moeiq. Yaq khlai mawq loeq lo loeqteq paipei thaiq a'msiqai taeng a'sota teq paipei thinga a'thaiq lungak khaw khomaq. 7Yaqateq khlai mawq loeq khlai cong sawa, keiloeq nei paipei thinga paipei thaiq suiya ka'lo khoeq kumtum a'moeiq hni. Seiloeqkhaw lungak khaw khomaq hang. Nei paipei thing khoeq khluq hnoek. Pi klongoeng daek kawtnauk sauk ma'mtoeqai yoe? 8Seiloeqkhaw khlai cong saw loeq yaq thing khoeq a'la kumak baung tawhme. Keiloeq nei thing hmyei haq coq poeiq hang loeqteq phluk ka'thoen bahmai. 9Saengkuma a'thaiq khoq beq. A'thaiq thaiq yaq nak loeq na'khluq khoq taeng a'hau. 10Ubuk hnup hnupakoeng ta'lazalaiq lungaka Boiyesuq loeq a'mcok hau haq. 11Yaqduna sa'simangca loeq mani loeqteq a'hling a'kuk khoeq ka'kum ha'laisaet a'kla hni khoeq hna'taw poemak a'moeiq. 12Boiyesuq loeq yaq hna'tawa a'hmuq loeq baeki loeqteq, hna'tawoe, nang khoeq to ta'koeiq mcaq tiloeqteq na'kaiyi ba hni taeng a'hau loeq. 13A'kutoeng yaq hna'tawa a'hmlaem loeq saksang yaq hna'taw khoeq a'hling yan bala teq yaq hna'taw khaw tho loeqteq Boipaw a a'hmlokthaq toeq. 14Seiloeqkhaw ta'lazalaiq ya tawai a'moeiq khoeq pa'taw loeq ubuk hnupoeng Boiyesuq loeq a'mniq a'mboei klongoeng nana a'saw a'hlok. Yaqklongoeng yaq pa'taw loeq khlaung haqla, paiqyaka bi ma'bi laq khoeq komhnup hnupsok a'moeiq klongoeng yaq hnup haqla nán mniq saiyiya loboei tuk. Ubuk hnupa lotai tuk taeng a'hau haq. 15Boiyesuq loeqkhaw, khlaungpawilong songi saw haqloe. Ubuk hnupoeng nanghniq hma a'moeiq khoeq soe, nawq haqkhoeq mongka a khoeq phlutuk loeqteq tui nán mpaekai khoeq nán ciqi pui nauk seiyaq moe? 16Yaqkha nak loeq ka'kum ha'laisaet Cadan hma a'mani a'laqi khoeq Abarahan cawhnu a'phlaet khoeq nei hna'tawa ubuk hnupa yaq a'mniq má boei paek pha seiyaq moe? taeng a'hau. 17Boiyesuq plau woeng Boiya sikcaq suisaw haq án hyawqi nank toeq. Seiloeqkhaw khlaung haq awlum khoeq yaq mauk nauk pha a'sai khoeqoeng nana án oeqcaq toeq. 18Yaqkiyoeng Boi loeq, Boipaw komcaeng khoeq pikhoeqoeng a'louqi yoe? Pikhoeqoeng ma'taeng nauk laqai yoe? 19Yaqkhoeq mounyein mci a'louqi. Khlaung poemak loeq yaq mci khoeq louqi loeqteq yaq khlaiya a'mcoeqi. Yaq a'mciya khoeq a'bumbak haqloeng thinglaen phlaet loeqteq mehona khoeq pha'yaw haqkhaw lo uk loeq án khoq. 20Yaqkiyoeng Boiyesuq loeq Boipaw khomcaeng khoeq a'la piyoeng a'taeng naukoe? 21Yaqkhoeq ta'se a'louqi. Hna'taw poemak loeq ta'se ba'dakcaw louq loeqteq hamtheiya thoen loeqteq a'weipoeiq nak loeq yaq muq khoeq a'pwaq poeiq taeng a'hau haq. 22Yaqkiyoeng Boiyesuq khoeq Yeruqsalein mloeqa a'nciq dun lawma a'moeiq khoeq mloeq haq nam haqla a'nmoeq khoeq khlaung haqla a'mcok hau haq. 23Khlaung poemak loeq Boiyesuqa, Boi yoe a'plaeta khoeq a'klawn án laqi yai khoeq khlaung haqteq ba'dakcaw noeng án moeiq moe? taeng a'hiq. 24Boi loeqkhaw, nanghniq khoeq a'mcaek dun pokoeng nán wonoengai khoeq nana sui tuk loeqkhaw wonoengaq tuk nakhoeq nanghniqa ka'mhau haq. 25Im mawq loeq tho loeqteq daiqsot a'pit nak loeq nanghniq khoeq kowa ya tuk loeqteq, im mawqoe, keihniqa daiqsot a'mphwai paek haq hme taeng nán hau laqai. Seiloeqkhaw imawq loeq nanghniq baung a khoeq nán lowoe nakkhoeq keiloeq a'hmot haqla hang taeng a'hau ba lai. 26Keihniq khoeq im mawqoeng hui tu kán ei ok homphu khoeq khlaung haq noeng. Im mawq khoeq keihniq mloeq nam haqla khaw a'mcok hau haqphu taeng hau uk loeqkhaw, 27Im mawq loeq, keiloeq nanghniqa ka'mhau haqlai. Nanghniq baung a khoeq nán lowoe nakkhoeq keiloeq a'hmot haq cangahang. Keihma khoeq sot uk loeq citoek. Nanghniq haqkhoeq khlaungsei haq noeng taeng a'mhau haqlai. 28Boipaw khomcaenga Abarahan, Izaeq, Yakouq loeq a'cimcai khoeq Pa'rawphaeq haqla khom laq tuk loeqkhaw nanghniq khoeq a'planga a'thut laqi tuk loeqteq hyung loeqteq nán mlung thiqcaek duna nán kaq laqai. 29Hmaungkaum phak, a'hnu phak, tong phak, mlok phak poet haqla án moeiq khoeq khlaung haq lo uk loeqteq Boipaw khomcaenga án ei ok homai. 30A'mcaqa khoeq khlaung haq phlaet uk loeqkhaw a'msuma án klawqai khoeq khlaung haqkhaw án moeiq khakhut a'msuma klawq uk loeqkhaw a'mcaq án phaw ba lai khoeq khlaung haq án moeiq taeng a'hau haq. 31Yaq khinga Boiyesuq hma boengak Phariqsae haq lo uk loeqteq Herouq mang loeq nanga a'mtuk hnowaiq klongoeng nei duma khoeq a'yang cit hne taeng án hau. 32Boiyesuq loeqkhaw Yaqhniq haqla, cit uk loeqteq yaq kheiwa haqla hau hoetoek. Keiloeq tohnup loeq hyantaqa sa'simangca haqla ka'thutai a'mniq haq ka'mboeiyai khoeq hnuptum dunoeng awlum ka'mcon poeiq yai. 33Yaqklongoeng kei khoeq tohnup, hyantaq loeq a'la hnupaka kha'li ka'soq laq hmai. A'klong teq, Pa'rawphaeq khoeq Yeruqsalein mloeqa khoeq lawi loeqteq baung a khaw a'du laqai nakkhoeq moeiq yaq. 34Oe, Yeruqsalein mloeq Yeruqsalein mloeqoe, nang khoeq Pa'rawphaeq haqla tuk tiloeq loeqteq Boipaw loeq a'teiq haqkhoeq yaq khlaung haqla khaw lungoeng na'weiq haq hni. Anu loeq a'caw haqkhoeq a'khla kawa kup loeqteq a'tauk haq khakhut kei loeqkhgaw nanghniq caw haqla ka'thin cong haqlai khoeq ta'nak ta'nak saihang loeqkhaw nang loeq keiya a'mloeyiyati. 35Nanghniq omdum im khoeq thinthin huiqhuiq a'kyan hoet hni. Keiloeq ka'mhau haqkhoeq teq Boipaw a'khwaing yoeng a'lo khoeq khlaung khoeq a'oeqcaq taeng nanghniq loeq nán hau wai khoeq a'phaw mawoeng to ta'koeiq mcaq loeqteq nanghniq loeq keihmoi a'hmu laq hlaq tuk taeng a'hau haq.
Currently Selected:
Luke 13: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
