Luke 17
17
1Boiyesuq loeq yaq ta'paiq haqla, klaung haqla pawi yaq khoeqhaq a'saiyai khoeq tawiq ya a'cicasaw loeq a'cicaai khoeq klong haq a'phlaetai. Seiloeqkhaw yaqkha a'cica saw a'laqi khoeq khlaung khoeq oeqcaq hlaq. 2Yaq khlaung khoeq nei sa'mi caw haqla khoeq hmat poemaka pawi yaqkhoeq a'sai thauka kliksung khoeq a'hnyoeboenga moqi loeqteq pangleiya a'tong a'laqi naka yaq tawiq ya nana a'boei hmai. 3Nanghniq khoeq sa'diq tawyi boei tuk. Nang na'ta nau loeq nanga a'plaet a'msai loeq yaqa mcok hau boei. Yaq loeq sa'diq a'laq ba nak loeq yaqa khwai hloeqba boei. 4Khomhnup hnupaka yaq loeq nanga patseiq a'plaet a'msai loeqteq nang hma patseiq lo ba loeqteq keiloeq sa'diq ka'laq ba hni taeng a'hau loeq yaq plaet tawiq ya khwai na'hloeq laqai taeng a'hau. 5Ta'paiq haqloeq keihniqa nei thauka myumi noengoeng a'msai paek haq hme taeng án hau. 6Yaqklongoeng Boiyesuq loeq, nanghniqa mounyein mci hyawq caw baung nán myumi mlung a'moeiq loeq nei paipei thing khoeq a'yungpa ta'koeiq phoni loeqteq pangleiya mcoeqiye taeng nán hau loeq nanghniq plau a'hnyiniyai. 7Nanghniqa lai a'bi khoeq hmy seiyaqloeq toe cong saw mya moeiq loeqteq yaq mya khoeq laiya khoeq a'lo ba nak loeq, a'yang lo tiloeq ngung tiloeq ei hne taeng a'hau saw a'moeiq moe? 8Yaqkha hau ta'ong, kei ka'ei yai khoeq ei ok sa'lange. Nang wawtpawi hyoeqi tiloeqteq keiya a'myoeqe. Yaqkiyoeng noeng nang loeq ei boei taeng nán hau wai seiyaq moe? 9Yaq mya loeq nang loeq na'mtoeq khoeqhaq a'sai kiloeq yaqa kyezu na'taungi moe? 10Yaqkhakhut nanghniq khaw nanghniqa a'mtoeq haqkhoeq hmuq awlum nán sai poeiq kiloeq, keihniq khoeq a'tawni nauk khoeq mya seiyaq uk hang. Keihniq loeq kán sai laqai khoeq tawai a'moeiq klongoeng kán sai khoeq noeng a'phlaet taeng nán hau laqai taeng a'hau haq. 11Boiyesuq khoeq Yeruqsalein mloeqa a'ciqdun lawma Sa'mariq plei loeq Galilae plei laikla woeng kawq loeqteq a'ciq. 12Nam namaka a'won loeq a'mno khoeq khlaung poemha loeq Boiya án dou. Yaqhniq khoeq a'hlaw ta'thoq ya uk loeqteq, 13án thai bau woeng mpoq uk loeqteq Boiyesuq oe, keihniqa a'hmyaen haq hme taeng án mpoq. 14Boiyesuq loeqkhaw yaqhniqa a'hmuq haq nak loeq Yahaenpaw hma cit uk loeq mphlaqi hoet toek taeng a'hau haq. Yaqhniq khaw án ciq tuna yaqhniq mniq haq a'klok poeiq. 15Yaqhniq duka khoeq poemak loeq a'mniq a'klok khoeq a'hmuqi nak loeq Boipaw phumthaung a'lulu toeq hmlokthaq loeqteq Boiyesuq hma hlaengi loeqteq a'lo ba. 16Yaqkiyoeng Boiyesuq ok kho wa bok loeqteq Boiya kyezu a'taungi. Yaq khlaung khoeq Sa'mariq plei saw a'phlaet. 17Yaqateq Boiyesuq loeq nán mniq a'klok khoeq poemha seiyaq tuk moe? A'la poemkoq teq baung a woe? 18Boipaw kyezu a'mhlokthaqai a'lo ba khoeq nei a'coe khlaungmyowa khoeq lawi loeqteq a'ni khaw moeiqcaq moe? taeng a'hau. 19Yaqkiyoeng Boi loeq yaq khlaunga, tho tiloeq cit hne. Nang loeq na'myumi khoeq mlungoeng nang mniq a'boei ba hni taeng a'hau. 20Hnupakteq boengak Phariqsae haqloeq Boiyesuqa, Boipaw khomcaeng teq pi kho wa a'pau wai yoe? taeng án hiq. Yaqateq Boiyesuq loeq Boipaw khomcaeng khoeq nanghniq mikoeng hmu noengaq tuk. 21Boipaw khomcaeng khoeq neiduna a'moeiq. Cuduna a'moeiq taeng a'ni loeqkhaw hau noengaq uk. Piyawoe naka Boipaw khomcaeng khoeq nanghniq hui tu nanghniq mlung duka a'moeiq taeng a'hau haq. 22Yaqkiyoeng ta'paiq haqla nanghniq loeq nán hmuqwai khoeq khlaungcaw loeq ta'la a'ciyangai khoeq hnup haq tau wa khoeq hnupak a'phawai. Seiloeqkhaw yaq hnup khoeq nanghniq loeq nán hmuq laqai khoeq seiyaq. 23Neiduna so woek, cuduna so woek taeng a'mhau uk loeqkhaw yaqhniq hui tu cit pawqai tuk. 24Khaikla a'wakwak loeq mehon pawkaka khoeq a'coe pawkaka a'wang khakhut khlaungcaw a'lo khoeq hnupoeng khaw yaqkha a'phlaetai. 25Seiloeqkhaw yaqkhoeq mcaq loeq mcaq sounglai patma khawmi laq loeqteq nei khlaungmyoe haqloeq án myang khoeq a'khawmi laqai. 26Nawqe khaek kho wa a'phlaet hoet khakhut khlaungcaw a'lo wai khoeq khinga khaw yaq khakhut a'phlaetai. 27Tuimuntoeng a'thoq mawoeng Nawqe samphau duka a'won khing phawong khlaung haqloeq ei ok uk loeqteq koipawi haq án sai tun, án paeki tuna tuimuntoeng tho loeqteq awlum án du poeiq. 28Yaqkhakhut pak Lawtaq khoeq Tawdou mloeqa a'om kho wa Tawdou mloeqa khoeq khlaung haqkhoeq ei ok uk loeq, yeiqtup uk loeq, awndum haq sai uk loeq, im haq sauk uk loeqteq án om. 29Seiloeqkhaw Lawtaq khoeq Tawdou mloeqa khoeq a'soq khoeq hnupoeng mehona khoeq kat noeng a'hnouki khoeq mi aw loeqteq yaqhniq awlum án du poeiq. 30Khlaungcaw a'lo ba khoeq hnupoeng khaw yaq khakhut a'phlaetai. 31Yaqhnupoeng a'ni khaw uwak eiyak a'louqi yai khoeq tawiq ya im hona khoeq a'daunga komai tuk. Laiya a'om saw khaw ima planai tuk. 32Lawtaq peha kha a'phlaetoe nakkhoeq sa'diq laq boei tuk. 33Yaqa yaq sauk a'klawni yai a'sai saw loeq a'sauk a'sungi laqai. A'sauk a'sungi laq saw loeq a'sauk a'klawni a'laqi yai. 34Nanghniqa keiloeq ka'mhau haqlai. Yaq yanoeng iqdun kha'dang lungaka an moeiq khoeq khlaung poemhneiq tau wa khoeq poemak a'ciqi pui nauk laqi loeqteq poemak a'kyan hoetai. 35Kliksaung an thoe hom khoeq hna'taw poemhneiq tau wa poemak a'ciqi pui nauk laqi loeqteq poemak a'kyan hoetai. 36Laiya an moeiq khoeq khlaung poemhneiq tau wa khoeq poemak a'ciqi pui nauk laqi loeqteq poemak a'kyan hoetai. 37Yaqateq ta'paiq haqloeq Boi yoe, baungduna yaqkha a'phlaetai yoe? taeng án hiqateq Boiyesuq loeqkhaw, yok a'moeiq dun a laungtawq haq mcuqi uk loeq án omai taeng a'hau haq.
Currently Selected:
Luke 17: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
